Li muklomal tspasik yajtsʼaklomtak Cristoe skʼan lekuk, ta yutsil noʼox xchiʼuk ti tskʼupil kʼopta Diose

TA BUYUK noʼox chichʼ aʼyel ti x-avetik noʼox ta okʼele. Jtsop krixchanoetik xtok ti slapojik ikʼal kʼuʼile tsten sbaik yalel ta lum sventa chakʼik ta ilel ti chat tajek yoʼontonike. Yantike jaʼ jech ch-akʼotajik ti kʼuyelan chaʼiik li sone, yane chveʼik xchiʼuk xkʼajlajetik ta tseʼej. Junantik xtoke yalemik ta lum, yuʼun yakubemik ta servesa xchiʼuk ta pox ti lokʼem talel ta palmerae. Jaʼ jech tspasik ta jlom lumetik kʼalal oy buchʼu chchame, ta sienal noʼox krixchanoetik tstsob sbaik sventa chbat skʼoponik ta slajeb velta li buchʼu chame.

Ep yajrextikotak Jeovae jaʼ te nakalik li ta lumetik ti bu xchʼunojik li labtael o metsʼtaele xchiʼuk ti chiʼtaik li animaetike. Ta smiyonal noʼox li krixchanoetike xchʼunojik ti kuxul la chkom xchʼulel li buchʼu chchame, ti xuʼ to la tskolta li buchʼutik kuxajtike xchiʼuk ti xuʼ la chakʼbe svokol xtoke. Ep li kostumbreetik chichʼ pasel ta muklomale jaʼ ta skoj ti chʼunbil ti oy la chʼulelale. Ta melel, kʼalal chkokʼitatik li buchʼutik chcham kuʼuntike stalel onoʼox; jaʼ jech la spasik bateltik li Jesús xchiʼuk li yajtsʼaklomtake (Juan 11:33-35, 38; Hech. 8:2; 9:39). Pe muʼyuk bu laj yakʼik ta ilel ti chat tajek yoʼontonik jech kʼuchaʼal nopem xaʼiik spasel li yan krixchanoetik ta skʼakʼalilike (Luc. 23:27, Ch, 28; 1 Tes. 4:13). ¿Kʼu yuʼun? Ep kʼusitik ta skoj, jtose jaʼ ti snaʼojik lek li kʼusi melel ta sventa li lajelale.

Xi jamal chakʼ ta ilel li Vivliae: «Li bochʼotic cuxulic toe snaʼic ti ta onoʼox xchamique, pero li bochʼotic chamenic xae mu xa cʼusi snaʼic o [...]. Jech te laj scʼoplal o li xcʼuxul yoʼntone, li yitʼixal yoʼntone, xchiʼuc li stiʼetel yoʼntone. Muʼyuc xa ta sventa o li cʼusi stacʼ pasel liʼ ta banamile. [...] Yuʼun cʼalal me labat ta yavil animaetique, muʼyuc xa abtel, muʼyuc cʼusi stacʼ pasel, muʼyuc xa cʼusi jnaʼtic, muʼyuc xa bijubtasel» (Ecl. 9:5, 6, 10). Li versikuloetik ta Vivlia liʼe chakʼ ta ilel ti mu kʼusi snaʼik ta jyalel li krixchanoetik ti chamemik xae. Muʼyuk xa kʼusi tsnopik, chaʼiik, mu xa xloʼilajik xchiʼuk chʼabal xa kʼusi chaʼibeik smelolal ta jyalel. Ta sventa ti kʼusi toj tsots skʼoplal chal Vivlia liʼe, ¿kʼu yelan skʼan xmuklomajik li yajtsʼaklomtak Cristoe?

«Mu me xapiquic li cʼusi toj chopole» o li kʼusitik toj ibal sbae

Kʼusiuk ti nopem xaʼiik ta spasel li yajrextikotak Jeovae xchiʼuk ti buuk noʼox li slumalike, ta sjunul yoʼonton tspʼajik li kʼusitik tspasik yan krixchanoetik ti xchʼunojik ti kuxul la li animaetike xchiʼuk ti oy la kʼusitik xuʼ tspasbeik li krixchanoetike. Li kostumbreetik ti tspasbeik skʼinal li animae, ti tstaik ta naʼel kʼusi ora chame xchiʼuk li xlechanbel sveʼele toj ibal me sba xchiʼuk muʼyuk me lek chil li Diose. Taje jaʼ ta skoj ti xchʼunojik ti oy la chʼulelal ti mu snaʼ xchame, ti mu jechuk chchanubtasvan Vivliae xchiʼuk ti likem tal ta stojolal pukuje (Eze. 18:4). Li yajtsʼaklomtak Cristoe muʼyuk tspasik li kostumbreetik taje, yuʼun xi ch-albatike: «Mu xuʼ chaveʼbeic cʼusi oy ta xmexa Cajvaltic me tsʼacal chbat aveʼic cʼusi oy ta xmexa li pucujetique» (1 Cor. 10:21). Moʼoj, yuʼun ti kʼusie chakʼbeik yipal ta xchʼunel li mantal liʼe: «Vocʼo abaic loqʼuel; mu me xapiquic li cʼusi toj chopole» o li kʼusitik toj ibal sbae (2 Cor. 6:17). Pe bakʼintike toj tsots ta pasel taje.

Li ta África xchiʼuk li ta yantik lumetike, ep krixchanoetik xchʼunojik ti xuʼ la x-ilin li xchʼulel smoltot syayaik mi muʼyuk chichʼ pasel junantik kostumbreetike. Mi muʼyuk la chichʼ pasel li kostumbreetike jaʼ la jun tsatsal mulil ti xuʼ la sta-o svokol li jteklume. Ep yajrextikotak Jeova ti chlajik ta labanel, ta utel xchiʼuk ti pʼajbil yuʼun yutsʼ yalalik xchiʼuk slakʼnatakik ta skoj ti muʼyuk tspasik li kʼusi chichʼ pasel kʼalal oy buchʼu chcham ti chal Vivlia ti mu xtun ta pasele. Oy junantike pakʼtabilik ti xchʼakoj la sbaik ta stojolal krixchanoetike xchiʼuk ti mu la  bu tstsakik ta venta li animaetike. Oy bateltike, li buchʼutik maʼuk yajtsʼaklomtak Cristoe tstikʼ sbaik ta persa ta skʼelbel skʼoplal li smukel jun yajtsʼaklom Cristoe. ¿Kʼusi stakʼ jpastik sventa mu xlik kʼop kuʼuntik xchiʼuk li buchʼutik ti chalik ti persa skʼan pasel li kʼusi chopol chil Diose? Ti kʼusi mas to tsots skʼoplale: ¿kʼusi stakʼ jpastik sventa nomuk oyutik ta stojolal li kʼusitik chichʼ ichʼel ta mukʼ xchiʼuk li kʼusi tspasik ti ibal sba ti xuʼ tsokes ti kʼu yelan xkil jbatik xchiʼuk Jeovae?

Jpʼeluk avoʼonton xa chapbe smelolal li kʼusi achʼunoje

Oy junantik lumetike oy la sderechoik ta yalel kʼuyelan chichʼ mukel jun krixchano li moletik te ta jteklume xchiʼuk ti oy la sderechoik ek li snamtal utsʼ-alalike. Jaʼ yuʼun li jun yajtsʼaklom Cristoe skʼan jamal xal ti jaʼ tskʼelbeik skʼoplal yajrextikotak Jeova ti kʼuyelan chichʼ mukele, jech kʼuchaʼal chal li beiltaseletik ta Vivliae (2 Cor. 6:14-16). Li kʼusi chkʼot ta pasel ta muklomale skʼan me mu chopoluk xaʼi sjol yoʼonton li yajtsʼaklomtak Cristoe xchiʼuk ti mu me xichʼ chibajesbel yoʼontonik li buchʼutik xojtikinik li kʼusitik jchʼunojtike xchiʼuk li kʼusitik chkakʼtik ta chanel ta sventa li animaetike.

Kʼalal chichʼik albel li jbabeetik ta tsobobbail ti akʼo sbainik skʼelel li muklomale, li kʼusi tspasike jaʼ ti tskoltaik li utsʼ-alalile xchiʼuk chtojobtasvanik sventa skotoluk ora xichʼ chʼunel li beiltaseletik ta Vivliae. Mi oy junuk krixchano ti tskʼan chichʼ ta mukʼ kʼusitik li ta muklomale, skʼan me tsotsuk koʼontontik jchapbetik smelolal li kʼusi jchʼunojtike, jaʼ noʼox ti kʼusi une mu me jchʼay ta joltik ti oyuk slekil koʼontontike xchiʼuk ti tsakvankutik me ta mukʼe (1 Ped. 3:15, 16). Pe ¿kʼusi van skʼan pasel mi mu skʼan xaʼibe smelolal li yutsʼ yalaltake xchiʼuk ti jaʼ jech tskʼanik akʼo yichʼ pasel ti kʼu yelan chalike? Jaʼ van lek ti akʼo skʼej sbaik lokʼel li yutsʼ yalaltak ti jaʼik yajtsʼaklomtak Cristoe (1 Cor. 10:20). Mi jech kʼot ta pasele, xuʼ te xbat yichʼ jelubtasel jun uni mantal ta Salon sventa Tsobobbail ti bu nakalike o ta yan bu ti jech sta-o sventa «chpat [yoʼontonik]» ta sventa «cʼusitic tsʼibabil [komel]» ti buchʼu chokʼitabeik li slajel yutsʼ yalalike (Rom. 15:4). Akʼo mi muʼyuk te telel li buchʼu chame, maʼuk me skʼan xal ti chʼabal xa sbalil li tsobajel taje (Deu. 34:5, 6, 8). Akʼo mi toj kʼux chaʼiik ti jech tstikʼ sbaik li buchʼutik maʼuk jchʼunolajeletike, li yajtsʼaklomtak Cristoe ta me xpatbat yoʼontonik ti skʼeloj lek Dios ti chakʼ yipalik ta spasel li kʼusi leke. Xuʼ spat yoʼontonik ti ch-akʼbatik li «svuʼel stuc li Diose» (2 Cor. 4:7).

Tsʼibao li kʼusi oy ta avoʼontone

Kʼalal tstsʼiba komel kʼusi tskʼan ta sventa smukel li jun krixchanoe mas me lek ta sventa li yutsʼ yalale, sventa mu vokoluk x-ochik ta rason xchiʼuk li yutsʼ yalal ti maʼuk yajrextiko Jeovae xchiʼuk ti stsakik ta venta ti kʼuyelan tskʼane. Jlom ti kʼusitike jaʼ ti skʼan stsʼiba komel kʼuxi ti tskʼan mukele, ti bu tskʼan mukele xchiʼuk ti buchʼu chchapan xchiʼuk tskʼele (Gén. 50:5). Mi ta sat jun rextiko o mi chichʼ saʼel mas kʼalal chichʼ pasel firmar li vune mas to me oy sbalil. Li Vivliae chal ti oyuk jpʼijiltike. Li buchʼutik chchʼunik li pʼijil mantal liʼe, snaʼojik ti  mu persauk mol o meʼelik xa tajek sventa tspasik li vun taje, o ti jaʼ to tspasik kʼalal smelol xa tsakalike (Pro. 22:3; Ecl. 9:12).

Oy jlom yajtsʼaklomtak Cristoe chopol chaʼiik ti jech tstsakik ta vun ti kʼuyelan tskʼanik mukele. Akʼo mi jech, kʼalal jech chichʼ pasele jaʼ me svinajeb ti yijutik ta mantale xchiʼuk ti jkʼanojtik li kutsʼ kalaltik ti jaʼik yajrextikotak Jeovae (Fili. 2:4). Jaʼ mas lek ti akʼo jech spas li jun yajtsʼaklom Cristo kʼalal kuxul toe, jaʼ me mu stakʼ mi jaʼ chakʼ akʼo yil svokol li yutsʼ yalaltak ti jaʼik yajrextiko Jeovae, yuʼun maʼuk noʼox chat-o yoʼontonik li slajele, yuʼun me xuʼ xlajik ta sujel ti akʼo spasik li kʼusitik ibal sbae xchiʼuk ta spasel li kʼusitik ti mu jechuk lek chil ek li buchʼu chame.

Kʼelo me lek ti lekuk noʼox sba li muklomale

Ta epal lumetik ta Africae xchʼunojik ti skʼan la ep tajek xbat krixchano li ta muklomale xchiʼuk ti labaluk xa la sba ta kʼelel sventa mu x-ilin li xchʼulel moltotil yayailetike. Jech xtok, oy buchʼutik ti jaʼo xa te chakʼik ta ilel li «toybail» ti kʼuyelan xkuxlejalike xchiʼuk ti kʼuyelan oyik ta takʼine (1 Juan 2:16). Ep chchʼakbeik skʼakʼalil, tsots chakʼ yipalik xchiʼuk ep tslajes stakʼinik sventa la lek tsmuk ta alel li yutsʼ yalalike. Mukʼtik xa chlichʼanbeik svunal ta butikuk noʼox ti te slokʼol li animae sventa xakʼik ta aʼiel taje xchiʼuk ti xnopaj tal mas krixchanoetike. Tsmeltsanik playeraetik ti te slokʼol li animae, vaʼun tspukik sventa xichʼ tunesel li ta muklomale. Xchiʼuk tsmanik li kajonetik ti toyolik tajek stojol sventa labaluk xa sba chilik li buchʼutik tee. Oy jun lum ta Africae batsʼi chbatik ta mas, yuʼun jaʼ tsmanik li kajonetik ti xkoʼolaj kʼuchaʼal karo, avion o varko sventa chakʼik ta ilel ti oy stakʼinik xchiʼuk ti kʼuyelan xkuxlejalike. Oy bateltike ta slokʼesik ta skajonal li animae, vaʼun te tstelanik ta jun tem ti alakʼ xa sba meltsanbil ta sventa taje. Oy junantik antsetik ti chamemike chichʼik lapbel skʼuʼik sventa nupunel, chichʼik tʼujomtasel ta epal natsʼiletik xchiʼuk chichʼ bonbel lek satik. ¿Mi lek van xa naʼ ti jech spas li yajtuneltak Diose?

Li yajtsʼaklomtak Cristo ti yijik ta mantale snaʼojik lek ti mu stakʼ xbatik ta mas kʼuchaʼal tspas li krixchanoetik ti mu xojtikinik li beiltaseletik ta Vivliae o ti mu skʼan xojtikinike. Jech xtok, snaʼojik ti stekel li kʼusitik nopem xaʼiik spasel ti muʼyuk lek ta pasel chal Vivlia ta sventa toybaile «maʼuc te liquem tal ta stojol li Jtotic Diose; jaʼ sventa noʼox banamil» (1 Juan 2:15-17). Skʼan me jkʼel jbatik lek ti «mu jsaʼbetic sloʼil yoʼntonic» li yantike, jaʼ xkaltik, ti  mu xkakʼtik tsalbail ta sventa li kʼusitik liʼ ta balumile (Gál. 5:26). Jech kʼuchaʼal chakʼ kiltik li kʼusitik kʼotemik ta pasel li ta lumetik ti bu chiʼtaik tajek li animaetike, li ta muklomaletike chkʼataj ta mukʼtik tsobajeletik xchiʼuk ti vokol xa ta kʼelele, vaʼun oy kʼusitik vokol chkʼot ta pasel. Ti oy ta yoʼontonik yichʼel ta mukʼ li animaetike xuʼ me stijbe yoʼonton li buchʼutik te sventa tspasik li kʼusitik chal Vivlia ti mu stakʼ pasele. Yikʼaluk van x-avetik likel ta okʼel, ti smeyik li animae, ti chchiʼinik ta loʼil ti xkoʼolaj kʼuchaʼal kuxul to chilike xchiʼuk ti chchʼikbeik takʼin o yantik kʼusitik li ta skʼuʼe. Ti jech xkʼot ta pasel li ta muklomal sventa jun yajtsʼaklom Cristoe ta me xikʼubtasbe li sbi Jeovae xchiʼuk tsokesbe skʼoplal li steklumale (1 Ped. 1:14-16).

Ti jnaʼojtik lek ti kʼuyelan oy li animaetike jaʼ me chakʼ stsatsal koʼontontik ti mu xkʼot ta pasel li kostumbreetik ta muklomaletik yuʼun yajrextikotak Jeovae (Efe. 4:17-19). Akʼo mi jaʼ jun vinik ti toj tsots skʼoplal echʼ ta Balumil li Jesuse, muʼyuk bu xvinaj tajek ti kʼalal la smukike xchiʼuk ti lek noʼox sbae (Juan 19:40-42). Li buchʼutik yichʼojbeik li «sjol yoʼnton li Cristoe» muʼyuk kʼexlal sba chilik ti jech chmukike (1 Cor. 2:16). Mi mu jkʼan jpastik li kʼusi chal Vivlia ti mu xtun ta pasele, ti mu kʼusi xkʼot ta pasele xchiʼuk ti lekuk ta sventa yajtunel Dios li muklomal ta jpastike skʼan me lekuk noʼox sba xchiʼuk ti ta yutsiluk noʼoxe.

¿Mi jaʼ van yorail muyubajel li muklomale?

Ta junantik lume nopem xaʼiik ti tspasik jun mukʼta kʼin mi sutik tal ta muklomal li yutsʼ yalal animae, li slakʼnatake xchiʼuk li yantik buchʼutik takbil ta ikʼele xchiʼuk ti jech ch-akʼotajik ti kʼuyelan chaʼiik sone. Li kʼinetik sventa muklomal taje stalel onoʼox ti ep chakʼik poxe xchiʼuk jech tspas stalelik kʼuchaʼal jmulivajeletike. Oy junantik krixchanoetike chalik ti ta la xkoltavan li kʼinetik sventa xjutukaj yuʼun at-oʼonton ta skoj li lajele, li yantik xtoke chalik ti jaʼ la jech nopem xaʼiike. Pe ep li kʼinetik tspasik taje jaʼ la sventa yichʼel ta mukʼ xchiʼuk skʼupil kʼoptael li animaetike, xchiʼuk ti jaʼ la jech tskoltabeik lokʼel xchʼulel li anima sventa jech xbat sta li smoltotak xchiʼuk syayatake.

Li yajtsʼaklomutik Cristoe xkiltik lek li pʼijubtasel chakʼbutik li pʼijil loʼiletik liʼe: «Me chijʼocʼutique jaʼ lec; jaʼ vocol me xijtseʼinutic noʼoxe. Acʼo me chvinaj ta jsatic ti chcat coʼntontique, pero tsʼacal chacʼ smucʼul coʼntontic» (Ecl. 7:3). Jnaʼojtik ti jaʼ mas lek ti jnoptik ti toj komkom li kuxlejale xchiʼuk ti jnaʼojtik ti oy chaʼkuxesele. Ti kʼalal nopol oyutik ta stojolal li Jeovae mas lek chkaʼitik «me ta xa xijchamutique, [...] jaʼ vocol li bochʼo jaʼ to chvoqʼuique» (Ecl. 7:1). Ta skoj ti te nitajtik ta sventa li kʼusi mu stakʼ nabel lek smelolal li kʼinetik taje xchiʼuk ti chakʼ akʼo oyuk mulivajele, li yajtsʼaklomutik Cristoe muʼyuk me ta jpastik li kʼinetik taje. Mi jaʼuk chi jbat te xtok, yuʼun jaʼ ti kichʼojtik ta mukʼ li Diose xchiʼuk ti kichʼojbetik ta mukʼ li sjol yoʼonton kermanotaktike.

Skʼan me xil krixchanoetik ti jelelutike

Li avi kʼakʼale epal krixchanoetik mosoinbilik yuʼun li xiʼtael animaetike. Yan li voʼotike koltabilutik xa lokʼel li ta xiʼtael taje. ¡Koliyal tajek chkaltik ti jech koltabilutike! (Juan 8:32.) Ti kʼuyelan chkakʼtik ta ilel kʼalal chkat koʼontontike jaʼ me svinajeb ti chi «[jxanav] ta sac osile» xchiʼuk ti jnaʼojtik lek li kʼusi melel ta sventa li animaetike. Ta skoj ti jpatoj koʼontontik ta sventa li chaʼkuxesele oy noʼox jmeloltik xchiʼuk ti muʼyuk chi jbat ta mas kʼalal chkakʼtik ta ilel ti chkat koʼontontike (Efe. 5:8; Juan 5:28, 29). Li kʼupil sba spatobil koʼontontik taje jaʼ me tskoltautik ti mu xi jbat ta mas li ta at-oʼonton jech kʼuchaʼal tspas li buchʼutik chʼabal spatobil yoʼontonike (1 Tes. 4:13). Jech xtok, jaʼ me jech oy stsatsal koʼontontik sventa jpʼeluk ta koʼontontik jpakbetik skʼoplal li melel yichʼel ta mukʼ Diose xchiʼuk ti mu xi stsalutik li xiʼele (1 Ped. 3:13, 14).

Mi tukʼ koʼontontik ta jchʼuntik li beiltaseletik ta Vivliae jaʼ me te chakʼ venta li krixchanoetik ti jelel «li bochʼotic [yichʼojik] ta mucʼ xchiʼuc li bochʼotic muʼyuc [yichʼojik] ta [mukʼ]» Diose (Mal. 3:18). Li Vivliae chal ta melel ti chlaj skʼoplal li lajele (Apo. 21:4). Yoʼ to mu xvul li smukʼta kʼakʼalil taje, kakʼ me kipaltik «ti muʼyucuc [kikʼobaltik], ti muʼyuc [jmultik] chvul stao[tik] li Diose», ti jchʼakoj jbatik ta jyalel li ta chopol balumil liʼe xchiʼuk li ta kostumbreetik ti chopol chil Diose (2 Ped. 3:14).

[Lokʼol ta pajina 30]

Ti kʼusi mas leke jaʼ ti jtsʼibatik li kʼusi ta jkʼantik chichʼ pasel ta sventa li jmukeltike

[Lokʼol ta pajina 31]

Li muklomaletik yuʼun yajtsʼaklomtak Cristoe skʼan me lekuk noʼox sba xchiʼuk ti ta yutsiluk noʼoxe