¿Mi jaʼ van skʼan xichʼ pasel ta persa li kʼusi cha kʼane?

YAKAL chtajin chaʼvoʼ ololetik. Vaʼun oy jun ti la spojbe yixtol li xchiʼile xchiʼuk xi tsots laj yalbee: «¡Jaʼ kuʼun maʼ leʼe!». Ta jbikʼtaltik onoʼox ta xvinaj tal ti jaʼ ta jkʼan jlekilal jtuktike (Gén. 8:21; Rom. 3:23). Jech xtok, jutuk mu skotoluk li krixchanoetike tstijik oʼontonal yoʼ xi xkaltike: «Voʼon baʼyuk». Jaʼ yuʼun li yajtsʼaklomutik Cristoe yakal ta jpastik tsatsal kʼop sventa stsal kuʼuntik li saʼel jlekilal jtuktike. Mi muʼyuk ta jtsaltik taje mu me vokoluk tsok ti kʼuyelan lek xkil jbatik xchiʼuk Jeovae xchiʼuk ti xuʼ spʼosi yok kuʼuntik ta mantal li jchiʼiltaktike (Rom. 7:21-23).

Jech onoʼox ta melel, li jtakbol Pabloe tstij koʼontontik ta snopel kʼusi xuʼ xkʼot ta pasel ta stojolal yantik li kʼusi ta jpastike. Xi la stsʼibae: «“Scotol xuʼ ta jpastic”, xiic. Pero mu scotoluc lec. Chalic ti scotol xuʼ ta jpastique, pero mu scotoluc tstsatsub coʼntontic ta stojol Dios yuʼun». Vaʼun xi chalbutik mantale: «Mu me bochʼo xbolib yoʼnton avuʼunic» (1 Cor. 10:23, 32). Jaʼ yuʼun, kʼalal oy kʼusi ta jkʼan jtuktike toj lek me ti xi jakʼbe jbatike: «¿Mi oy van ta koʼonton muʼyuk ta jpas jlomuk li kʼusitik oy jderecho ta spasel sventa muʼyukuk kʼop li ta tsobobbaile? ¿Mi oy ta koʼonton ti jaʼ ta jpas-o li kʼusi chal beiltaseletik ta Vivlia akʼo mi mu kʼunuk chkaʼi xchiʼuk ti maʼuk sventa jlekilale?».

Li ta stʼujel abtelale

Jutuk mu skotoluk li krixchanoetike chalik ti mu la kʼusi sventa-o yan krixchanoetik li kʼusi  abtelal tspasike yuʼun la jaʼ tsnop stukik. Pe jnopbetik skʼoplal kʼusi kʼot ta stojolal jun jchonolajel ta jun bikʼit lum ta Sudamérica. Toj lek nabil ti toj lek xaʼi xtajin xchiʼuk xyakube, pe lik xchan Vivlia xchiʼuk li yajrextikotak Jeovae, chʼi ta mantal xchiʼuk la sjel li xkuxlejale (2 Cor. 7:1). Kʼalal laj yal ti oy ta yoʼonton ch-och ta jchol mantale, jun mol ta tsobobbaile lek la skʼelbe smelol kʼuxi xuʼ stijbe yoʼonton ta snopbel lek skʼoplal li yabtele. Lek xa kʼuk sjalil ti ch-abtej ta bankilal jchon nich pox li ta lum taje. Li pox taje ep kʼusitik stu, pe li ta lum taje nopem xaʼiik tskapik ta presko xchiʼuk chuchʼik sventa chyakubik-o.

Laj yaʼibe smelolal ti xuʼ sok ti kʼuyelan xil sba xchiʼuk Dios xchiʼuk chopol chkʼopojik ta stojolal tsobobbail mi lik xchol mantal xchiʼuk ti jech-o chchon li poxe. Akʼo mi ep li yutsʼ yalal ti skʼan smakʼline laj yikta xchonel li poxe, li avi une chchon kʼusitik ta papeleria sventa tstabe stojol li sveʼelike. ¿Kʼusi kot ta pasel? Laj xa yichʼ voʼ xchiʼuk yajnil, jech xtok oy voʼob xnichʼnab ti chaʼvoʼ xa yichʼoj voʼe, ta sjunul yoʼonton chcholik mantal xchiʼuk muʼyuk kʼusi chopol chaʼiik.

Li stʼujel kamigotaktike

Oy buchʼutik chalik ti voʼotik ta jnop jtuktik mi ta xkamigointik li buchʼutik maʼuk jchiʼiltik ta chʼunolajele. ¿Mi melel van, o mi oy van beiltaseletik ta Vivlia ti te tsakal skʼoplal ta sventa taje? Veno, jkʼeltik li kʼusi kʼot ta pasel liʼe. Jun ermanae tskʼan tajek chbat yaʼi ta kʼin xchiʼuk jun kerem ti maʼuk yajrextiko Jeovae. Akʼo mi laj yichʼ albel ti kʼusi xuʼ chkʼot ta pasele, la snop ti jaʼ oy ta sba stuk li kʼusi tspase, jaʼ yuʼun ibat li ta kʼine. Kʼalal mu toʼox jaluk skʼotelik li ta kʼine oy kʼusi laj yakʼbeik yuchʼ ti la stikʼbeik jpʼej pastiya ti chvayubtasvane. Kʼalal echʼem xaʼox jayibuk orae jaʼ to laj yakʼ venta ti tsatsal tsake yuʼun li yamigo ta alele (koʼoltaso xchiʼuk Génesis 34:2).

Yikʼaluk van mu naka chopoluk jech chkʼot ta pasel ti kʼalal ta xkamigointik junuk krixchano ti maʼuk yajrextiko Jeovae. Pe li Vivliae xi tspʼijubtasutike: «Li bochʼo jaʼ chchiʼin li bochʼotic oy sbijilique ta xbijub batel ec; yan li bochʼo jaʼ chbat xchiʼin li bol cristianoetique te chbolib o ec» (Pro. 13:20). Jamal ta aʼiel chaʼa: toj xibal xa noʼox sba mi muʼyuk lek li buchʼutik chkamigointike. Xi tsvules ta joltik li Proverbios 22:3: «Li bochʼo bije ta xil li cʼusi xiʼbal sbae, jech mu xbat sticʼ sba te; yan li bochʼo muc bijuque tsticʼ noʼox sba batel, jech te ta sta o vocol». Ta melel, kʼalal chopol li buchʼu chkamigointike xuʼ me chakʼ tajek jvokoltik, yuʼun xuʼ tsokes ti kʼuyelan lek xkil jbatik xchiʼuk Jeovae (1 Cor. 15:33; Sant. 4:4).

Li ta jkʼuʼ jpokʼtike xchiʼuk ti kʼuyelan ta jmeltsan jbatike

Ti kʼuyelan ta jmeltsan jbatik xchiʼuk li modaetike ta xjelilan echʼel. Pe li beiltaseletik ta Vivlia ta sventa ti kʼuyelan ta jlap jkʼuʼ jpokʼtike xchiʼuk ti ta jmeltsan jbatike muʼyuk bu chjel. Li Pabloe la stijbe yoʼonton «li antsetique [sventa] lec lec noʼox sba acʼo spas sbaic xchiʼuc li scʼuʼ spoqʼuique yuʼun jech mu stoy sbaic o. Tucʼuc me yoʼntonic», jaʼ jech skʼan xchʼunik beiltasel ek li viniketike (1 Tim. 2:9, Achʼ Testamento, ta skʼop Chenalhó).  Li Pabloe maʼuk tskʼan chal ti yuʼun muʼyuk xa lek jkʼuʼ jpokʼtik ta jlaptike, jech xtok maʼuk tskʼan chal ti lekuk xil li yan jchʼunolajeletik li kʼusi lek chkiltike. Pe li kʼusi laj yale jaʼ ti mu me jtoy jbatik ti kʼuyelan ta jlap jkʼuʼ jpokʼtike. Li diksionarioetike xi chalbeik skʼoplal ti muʼyuk tstoy sba jun krixchanoe: «Bikʼit chakʼ sba, muʼyuk bu mukʼ skʼoplal chaʼi sba», jaʼ stalelal ti buchʼu «oy noʼox yutsil tspas sbae xchiʼuk ti kʼuyelan spat xokone».

Jaʼ yuʼun chaʼa, skʼan xi jakʼbe jbatik ta jujuntale: «¿Mi ta van xkakʼ ta ilel ti muʼyuk ta jtoy jba mi jaʼ ta jlap li kʼuʼil ti labal xa sba ta kʼelele xchiʼuk ti chkal ti jaʼ jderechoe? ¿Mi yan-o van kʼusi tsnop krixchanoetik ta jtojolal ta skoj ti kʼu yelan ta jlap jkʼuʼ jpokʼe xchiʼuk li mantaletik sventa talelalile? Mi mu jkʼan «jsocbe[tik] yoʼnton junuc» krixchanoe, skʼan me jchʼuntik li mantal liʼe: «Mu me jaʼuc noʼox xbat asat ta aventa atuquic, acʼo oyuc ta avoʼntonic noxtoc li yantique» (2 Cor. 6:3; Fili. 2:4).

Ta sventa takʼin

Kʼalal lik tsatsal kʼopetik ta tsobobbail Corinto ta sventa li kʼusitik muʼyuk lek tspasik ta sventa li takʼine o ti ch-elkʼajike, xi la stsʼiba li Pabloe: «¿Cʼu yuʼun mu xatsʼiquic li cʼusi chopol chapasbatique? ¿Cʼu yuʼun mu xatsʼiquic ti chaloʼlaatique?». Ta melel, jaʼ mas lek ti sten ta yoʼonton li kʼusitik yuʼunike, jaʼ mas chopol ti chbat yakʼ ta chapanel yermanoik ta stojolal jchapanvanejetike (1 Cor. 6:1-7). Jun ermano ta Estados Unidos la xchʼun ta sjunul yoʼonton li tojobtasel taje. Ch-abtej ta yabtel jun ermano, vaʼun mu xkʼot tajek ta nopel yuʼunik ti kʼuyepal kechel stojole. La xchʼunik li beiltaseletik ta Vivliae, ep ta velta iloʼilajik pe muʼyuk bu xchapaj yuʼunik li kʼope. Vaʼun bat yakʼik ta chapanel ta tsobobbail, jaʼ xkaltik, ta stojolal li moletik ta tsobobbaile (Mat. 18:15-17).

Kʼux ta alel, pe muʼyuk xchapaj-o li kʼope. La spas tajek orasion li buchʼu kechel stojole, vaʼun la snop ti chchʼay ta sjol li stojol ti kechel yaloje. ¿Kʼu yuʼun? Xi laj yalbe smelolal ta mas tsʼakale: «Muʼyuk bu xi muyubaj-o yuʼun li kʼop taje xchiʼuk ep la xchʼaybun jkʼakʼal ti toj ep sbalil ti jaʼ la jpas jechuk li abtelaletik ta mantale». Kʼalal jech la spas li ermano taje, lik sta xkuxetel yoʼonton yan velta xchiʼuk laj yakʼ venta ti ch-akʼbat bendision yuʼun Jeova ta sventa li yabtel ta chol mantale.

Akʼo mi muʼyuk mas tsots skʼoplal

Akʼo mi muʼyuk mas tsots skʼoplal li kʼusi ta jkʼantike, ta me jtatik bendision mi muʼyuk ta jkʼantik ti persa akʼo xichʼ pasele. Li ta sba kʼakʼal mukʼta tsobajel ta oxib kʼakʼale, sob kʼotik jun nupul-tsʼakal ti prekursoretike, vaʼun la smakik ti jayib chotlebal chtun yuʼunike. Kʼalal lik li tsobajele, oy jun utsʼ-alalil ti oy jayibuk yalab xnichʼnabike anil xa ochik ti bu ch-echʼ tsobajel ti noj ta krixchanoetike. Kʼalal laj yakʼ venta ti tsaʼ bu chchotiike, li nupul-tsʼakal taje laj yakʼbe li bu toʼox yavilike. Koliyal taje jmoj ichotiik li utsʼ-alalile. Kʼalal echʼ xaʼox jayibuk kʼakʼale, li prekursoretike laj yichʼik akʼbel jun karta sventa ch-albatik kolaval. Li ta karta taje te laj yalik li utsʼ-alalil ti solel toj chopol tajek laj yaʼi sbaik ti muʼyuk bu sob ikʼotik li ta mukʼta tsobajele. Akʼo mi toj chopol tajek chaʼi sbaik li kʼakʼal taje ikʼataj ta muyubajel xchiʼuk jaʼ xa noʼox oy ta yoʼontonik stojel ta vokol ta skoj li slekil yoʼontonik li vaʼ prekursoretike.

Mi jaʼo jech skʼan jpastik chkiltike, jpʼeluk me koʼontontik ti maʼuk jsaʼ jlekilal jtuktike, jaʼ lek jsabetik slekilal li yantike. Mi jech ta xkakʼtik ta ilel li kʼanel ti «muc jaʼuc noʼox tsaʼ cʼusi lec chaʼay stu[ke]», ta me jsabetik slekilal li tsobobbaile xchiʼuk li jchiʼiltaktike (1 Cor. 13:5). Pe li kʼusi mas toj tsots skʼoplale, jaʼ ti jaʼ kamigotik-o li Jeovae.

[Lokʼol ta pajina 20]

Kʼalal cha tʼuj akʼuʼ apokʼe, ¿mi jpʼel van ta avoʼonton cha ten komel li kʼusi cha kʼan atuke?

[Lokʼol ta pajina 21]

¿Mi oy van ta avoʼonton chavakʼ li avavile?