Xuʼ me xa muyubaj yuʼun li chanubtaseletik laj yakʼ Jesuse
Xuʼ me xa muyubaj yuʼun li chanubtaseletik laj yakʼ Jesuse
«[Li Jesuse] imuy ta biqʼuit vits [...]. Te inopajic batel [...] li yajchancʼoptaque. Te lic cʼopojuc [...], lic chanubtasvanuc.» (MAT. 5:1, 2)
1, 2. 1) ¿Kʼusi yakal tspas Jesús kʼalal laj yalbe skʼoplal li Mantaletik ta Vitse? 2) ¿Kʼuxi la slikes li mantale?
JAʼO li sjabilal 31 ta jkʼakʼaliltike. Li Jesuse la xkechan jlikeluk li chol mantal tspas ta Galilea sventa chbat yetʼes li kʼin Koltael ta Jerusalene (Juan 5:1). Kʼalal sutem xaʼox tal ta Galilea li Jesuse, sjunul akʼobal la skʼopon Dios sventa tskʼanbe koltael yoʼ tstʼuj li lajchaʼvoʼ yajtakboltake. Ta yokʼomale, epal krixchanoetik la saʼik li Jesuse, vaʼun la xpoxta li buchʼutik ipike. Laj une ibat ta chʼut vits, te choti sventa chchanubtas yajtsʼaklomtak xchiʼuk li krixchanoetike (Mat. 4:23–5:2; Luc. 6:12-19).
2 Kʼalal lik yal mantal li Jesuse, —ti Mantaletik ta Vits ojtikinbile— lik yalbe skʼoplal ti mi lek la oyutik ta stojolal li Diose xkuxet noʼox la koʼontontik (kʼelo Mateo 5:1-12). Li xkuxetel oʼontonale jaʼ skʼan xal li lekilal chkaʼitik ta skoj li kʼusi jun koʼontontik yuʼune o ti xi jmuyubaj tajeke. Li baluneb xkuxetel oʼontonal laj yalbe skʼoplal Jesuse te chakʼ ta ilel ti kʼu yuʼun xmuyubajik noʼox li yajtsʼaklomtake xchiʼuk ti kʼu yuʼun toj echʼem sbalil jech kʼuchaʼal ti toj ep la stabeik sbalil leʼ xa ta chaʼmil jabile. Jkʼelbetik skʼoplal ta jujuntal.
«Li buchʼutik oy ta sjol yoʼontonik ti chtun yuʼunik mantale»
3. ¿Kʼusi skʼan xal ti oy ta jol koʼontontik ti chtun kuʼuntik mantale?
3 «Xmuyubajik li buchʼutik oy ta sjol yoʼontonik ti chtun yuʼunik mantale, yuʼun jaʼ chuʼuninik li ajvalilal ta vinajele.» (Mat. 5:3, NM.) Li buchʼutik jech oy ta yoʼontonike snaʼojik lek ti toj povreik ta mantale xchiʼuk snaʼojik ti chtun tajek yuʼunik li xkʼuxul yoʼonton Diose.
4, 5. 1) ¿Kʼu yuʼun xmuyubajik noʼox li buchʼutik oy ta yoʼontonik ti chtun yuʼunik mantale? 2) ¿Kʼuxi xuʼ jmakʼlin jbatik ta mantal?
4 Li buchʼutik oy ta yoʼontonik ti chtun yuʼunik mantale xkuxet noʼox yoʼontonik, «yuʼun jaʼ chuʼuninik li ajvalilal ta vinajele». Kʼalal la xchʼamik kʼuchaʼal Mesías li Jesuse, li yajtsʼaklomtake la sta smotonik, jaʼ ti xuʼ ch-ajvalilajik xchiʼuk li ta Ajvalilal ta vinajel yuʼun Diose (Luc. 22:28-30). Mi jpatoj koʼontontik chi j-ajvalilaj xchiʼuk Cristo ta vinajel o mi jpatoj koʼonton chi jkuxiutik sbatel osil ta paraiso ta Balumil ti jaʼ tsventain li Ajvalilal taje, xuʼ me xkuxet noʼox koʼontontik ta melel mi jnaʼojtik lek ti chtun kuʼuntik mantale xchiʼuk ti jnaʼojtik lek ti persa skʼan sventainutik li Diose.
5 Mu skotoluk krixchanoetik snaʼojik ti chtun yuʼunik mantale, yuʼun ep buchʼutik chʼabal xchʼunel yoʼontonik xchiʼuk muʼyuk sbalil chilik li kʼusitik chʼule (2 Tes. 3:1, 2; Heb. 12:16). Mi ta jkʼan ta jmakʼlin jbatik ta mantale, skʼan baxbolukutik ta xchanel li Vivliae, ti ta sjunuluk koʼontontik jpastik ta yajtsʼaklom Cristo li krixchanoetike xchiʼuk ti xi jkʼotilan ta tsobajeletike (Mat. 28:19, 20; Heb. 10:23-25).
«Xcuxet noʼox yoʼnton li bochʼo ta xʼoqʼuique»
6. ¿«Bochʼo [ti] ta xʼoqʼuique», xchiʼuk kʼu yuʼun ti xmuyubajike?
6 «Xcuxet noʼox yoʼnton li bochʼo ta xʼoqʼuique, yuʼun jaʼ ta xʼacʼbat smucʼul yoʼntonic.» (Mat. 5:4.) «Li bochʼo ta xʼoqʼuique» xkoʼolajik xchiʼuk «li buchʼutik oy ta sjol yoʼontonik ti chtun yuʼunik mantale». Muʼyuk bu ch-okʼik ta skoj ti kʼuyelan xkuxlejalike, jaʼ ta skoj ti jmulaviletike xchiʼuk kʼux chaʼiik li vokolil chakʼ ti chʼabal jtukʼiltike. Pe ¿kʼu yuʼun laj yal Jesús ti xmuyubajik noʼox ti ch-okʼike? Yuʼun oy xchʼunel yoʼontonik ta stojolal Dios, ta stojolal Jesús xchiʼuk tsta spatobil yoʼontonik ta skoj ti lek xil sbaik xchiʼuk Jeovae (Juan 3:36).
7. ¿Kʼu yelan skʼan xkiltik li sbalumil Satanase?
7 ¿Mi chopol chkiltik ti ep kʼusitik chʼabal tukʼ chkʼot ta pasel ta slumal Satanase? ¿Kʼu yelan skʼan xkiltik li balumil liʼe xchiʼuk li kʼusitik chakʼe? Xi la stakʼ li jtakbol Juane: «Scotol li cʼusitic oy liʼ ta banamile, jaʼ li cʼusi chopol tscʼan jbecʼtaltique, li cʼusi tscʼupin jsatique, li toybail ta sventa cʼulejalile, leʼe maʼuc te liquem tal ta stojol li jtotic Diose» (1 Juan 2:16). Pe ¿kʼusi xuʼ jpastik mi yakal xa tsokes kʼu kelantik ta mantal li «espíritu liʼ ta banamile», jaʼ xkaltik, ti kʼu yelan snopben li krixchanoetik ti nom oyik ta stojolal Diose? Ta sjunuluk me koʼonton jpastik orasion, jchantik li Vivliae xchiʼuk jsaʼtik koltael ta stojolal moletik. Kʼalal chi jnopaj mas ta stojolal li Jeovae mas me ta jta spatobil koʼontontik, kʼusiuk li vokol ta jnuptantike (1 Cor. 2:12; Sal. 119:52; Sant. 5:14, 15).
«Xcuxet noʼox yoʼnton li bochʼo mucʼ noʼox yoʼntonique»
8, 9. 1) ¿Kʼusi smakoj batel li smukʼul oʼontonale? 2) ¿Kʼu yuʼun xmuyubajik noʼox li buchʼutik oy smukʼul yoʼontonike?
8 «Xcuxet noʼox yoʼnton li bochʼo mucʼ noʼox yoʼntonique, yuʼun jaʼ ch-acʼbat sventainic li banamil ti albil scʼoplale.» (Mat. 5:5.) Ti mukʼ noʼox yoʼonton o manxo li jun krixchanoe, maʼuk skʼan xal ti kʼun stalelale; maʼuk ti jech noʼox ta spas sba ti oy slekil yoʼonton yileluk xtoke (1 Tim. 6:11). Li buchʼu mukʼ noʼox yoʼontone tspasbe li kʼusi tskʼan yoʼonton Jeovae xchiʼuk chchʼun li beiltasel chakʼe. Jaʼ jech chvinaj ta stalelal ti kʼusi tspas ta stojolal yantike, jech kʼuchaʼal chakʼ kiltik li mantal laj yal Pablo ta sventa li yajtsʼaklom Cristo ta Romae (kʼelo Romanos 12:17-19).
9 ¿Kʼu yuʼun laj yal Jesús ti «xcuxet noʼox yoʼnton li bochʼo mucʼ noʼox yoʼntonique»? Jaʼ ta skoj ti xi laj yal stuke: «Ch-acʼbat sventainic li banamil ti albil scʼoplale». Toj lek laj yakʼ ta ilel smukʼul oʼontonal li Jesuse, ti jaʼ li Bankilal ti buchʼu tsventain Balumile (Sal. 2:8; Mat. 11:29; Heb. 2:8, 9). Li buchʼutik yakʼoj ta ilel smukʼul yoʼontonik eke, «jech ta [xichʼik] ec» kʼuchaʼal Cristo ti tsventainik li Balumile (Rom. 8:16, 17). Xchiʼuk epal krixchanoetik ti manxoike chkuxiik sbatel osil ta Balumil ti chventainatik yuʼun li Ajvalilal yuʼun Mesiase (Sal. 37:10, 11).
10. Kʼalal chʼabal smukʼul koʼontontike, ¿kʼuxi xuʼ tsokes ti kʼu yelan chkil jbatik xchiʼuk yantike xchiʼuk kʼuxi xuʼ smakutik ta be sventa mu jtatik junuk abtelal ta stojolal Dios?
10 Skʼan oyuk smukʼul koʼontontik kʼuchaʼal Jesuse. Pe ¿kʼusi van chkʼot ta pasel mi ojtikinbilutik ti toj echʼ noʼox simaronutik ta jpas jbatik ta stojolal li yantike? Ta melel, chjatavik lokʼel ta jtojolaltik. Jech xtok, mi oy jun ermano ti oy kʼusi tsbain yaʼi li ta tsobobbaile, muʼyuk bu tsta ta skoj li stalelal taje (1 Tim. 3:1, 3). Li Pabloe laj yalbe Tito ti akʼo svulesbe ta sjol li yajtsʼaklomtak Cristo ta Creta ti «mu me sliquesic cʼop[e]; acʼo oyuc slequil yoʼntonic. Acʼo yaqʼuic ta ilel ta stojol scotol cristianoetic ti oy smucʼul yoʼntonique» (Tito 3:1, 2). Ta melel, li krixchanoetik ti oy smukʼul yoʼontonike jaʼ me jun bendision chil li yantike.
«Xcuxet noʼox yoʼnton li bochʼo jun ta viʼnal, jun ta taqui-oʼnal chaʼyic ti acʼo cʼotuc ta pasel cʼusi tscʼan yoʼnton Diose»
11-13. 1) ¿Kʼusi smakoj batel ti chkaʼitik viʼnal xchiʼuk taki-tiʼil ta sventa li tukʼilale? 2) ¿Kʼuxi chnoj xchʼutik li buchʼutik chaʼiik viʼnal xchiʼuk taki-tiʼil ta sventa li tukʼilale?
11 «Xcuxet noʼox yoʼnton li bochʼo jun ta viʼnal, jun ta taqui-oʼnal chaʼyic ti acʼo cʼotuc ta pasel cʼusi tscʼan yoʼnton Diose [o li tukʼilale]; yuʼun jaʼ ta snojesbat o xchʼutic yuʼun li Diose.» (Mat. 5:6.) Li tukʼilal laj yal Jesús liʼe, jaʼ chalbe skʼoplal li spasbel kʼusi tskʼan yoʼonton Diose xchiʼuk li xchʼunbel smantaltake. Li jtsʼibajom yuʼun Salmoe laj yal ti oy tajek ta yoʼonton li tukʼil chanubtaseletik yuʼun Jeovae (Sal. 119:20). ¿Mi jech oy tajek ta koʼontontik ek? ¿Mi tsots skʼoplal chkiltik li tukʼilal ek kʼuchaʼal chil stuke?
12 Li Jesuse laj yal ti xmuyubajik li buchʼutik chaʼiik viʼnal xchiʼuk taki-tiʼil ta sventa li tukʼilale, yuʼun ta «snojesbat o xchʼutic». Liʼe jaʼ jech kʼot ta pasel ta skoj ti laj yakʼ ta naʼel ta xchʼul espiritu Jeova ta stojolal «jnaclejetic ta banomil [...] cʼusi ti lequilale», taje jaʼo kʼot ta pasel ta yechʼel Pentecostés ta sjabilal 33 (Juan 16:8, Ch). Ta sventa xchʼul espiritu li Jeovae, laj yakʼbe snaʼ jayvoʼ viniketik sventa stsʼibaik li Tsʼibetik ta Griego Kʼop ti chalbe skʼoplal Cristoe, ti toj jtunel «ta sventa bijubtasel ta spasel cʼusi tu[kʼe]» (2 Tim. 3:16). Jech xtok, li chʼul espiritu taje tskoltautik ta slapbel «stalel li achʼ cristiano ti pasbil jech chac cʼu chaʼal stuc li Diose, ti tuqʼue ti me jutuc muʼyuc smule» (Efe. 4:24). Tspat tajek koʼontontik ti xuʼ tukʼ ch-ilatik yuʼun Dios li buchʼutik tsutes yoʼontonik xchiʼuk ti tskʼanbeik perton Dios ta skoj ti laj yakʼ sba ta matanal li Jesuse (kʼelo Romanos 3:23, 24).
13 Li buchʼutik spatoj yoʼonton chkuxiik sbatel osil ta Balumile, jaʼ to me te chnoj xchʼutik xchiʼuk chpaj chaʼiik li taki-tiʼil ta sventa li tukʼilal ta achʼ balumil yuʼun Diose. Pe ti kʼu to sjalil ta jmalatike, jpʼeluk me ta koʼontontik jchʼunbetik-o smantal li Diose. Xi laj yal li Jesuse: «Tscʼan baʼyuc chavacʼ abaic ta ventainel yuʼun li Diose, xchiʼuc ti chapasic cʼusi tscʼane» (Mat. 6:33). Mi jech ta jpastike «[skotol me ora chi j-abtej] yuʼun li Cajvaltique» xchiʼuk xi jmuyubaj me ta melel (1 Cor. 15:58).
¿Kʼu yuʼun xkuxet noʼox yoʼonton li buchʼutik chkʼuxubinvane?
14, 15. 1) ¿Kʼuxi xuʼ xkakʼtik ta ilel ti chi jkʼuxubinvane? 2) ¿Kʼu yuʼun xmuyubajik noʼox li buchʼutik chkʼuxubinvanike?
14 «Xcuxet noʼox yoʼnton li bochʼo ta xcʼuxubinvanique, yuʼun ta xichʼic cʼuxubinel ec.» (Mat. 5:7.) Li kʼusi chtijbat-o yoʼontonik li buchʼutik chkʼuxubinvanike jaʼ ti kʼux ta yoʼontonik li yantike. Jech kʼuchaʼal li Jesuse, ep krixchanoetik la xpoxtaan ta skʼelobil juʼelal ta xkʼuxul yoʼonton (Mat. 14:14). Jtos ti kʼuyelan xuʼ xi jkʼuxubinvane jaʼ ti jpasbetik perton li buchʼu tspas smul ta jtojolaltike, jech kʼuchaʼal ta xkʼuxul yoʼonton tspasbe perton Jeova li buchʼutik tsutes yoʼonton ta skoj smulike (Éxo. 34:6, 7; Sal. 103:10). Oy yan ti kʼusi xuʼ jpastik xtoke, jaʼ ti ta slekiluk koʼontontik oy kʼusi xkalbetik o jpastik ta stojolal yantik sventa jyochbetik li svokolike. Ti kʼuxi mas tsots skʼoplal ta jkʼuxubin li jchiʼiltaktike, jaʼ ti kʼalal chkalbetik li kʼusitik melel ta Vivliae. Jaʼ jech ta jchanbetik stalelal li Jesuse, yuʼun ta xkʼuxul yoʼonton «lic xchanubtas [li krixchanoetike]; ep cʼusitic laj yacʼ ta chanel» (Mar. 6:34).
15 Ta melel, jaʼ jech ta jnoptik ek kʼuchaʼal laj yal Jesuse: «Xcuxet noʼox yoʼnton li bochʼo ta xcʼuxubinvanique, yuʼun ta xichʼic cʼuxubinel ec». Mi ta jkʼuxubintik li yantike jaʼ me jech chi xkʼuxubinutik ek. Jech xtok, ti kʼalal ta jkʼuxubintik li yantike, jaʼ me tspas kanal li kʼuxul oʼontonal kʼalal chkichʼtik chapanele, jaʼ xkaltik, muʼyuk me mas tsots chkichʼtik chapanel kʼalal chkaltik ta stojolal Dios ti kʼuyelan la jpas jbatike (Sant. 2:13). Jech kʼuchaʼal chkiltike, jaʼ noʼox me tstaik perton xchiʼuk kuxlejal sbatel osil li buchʼutik chkʼuxubinvanike (Mat. 6:15).
¿Kʼu yuʼun xkuxet noʼox yoʼontonik li buchʼutik lek yoʼontonike?
16. ¿Kʼuxi chvinaj ti «lecuben xa [yoʼonton]» li krixchanoetike, xchiʼuk kʼusi smelolal ti chilik Diose?
16 «Xcuxet noʼox yoʼnton li bochʼo lecuben xa yoʼntonique, yuʼun jaʼ chbat yotquinic li Diose.» (Mat. 5:8.) Mi «lecuben xa [li koʼontontike]» ta me xvinaj ta kʼusitik oy ta koʼontontik xchiʼuk ta kʼusitik ta jkʼantik. Jech oxal, li kʼanelal kuʼuntike «jech chvinaj ti lecuben xa coʼntontic ta melele» (1 Tim. 1:5). Li jmotontik ta skoj taje, jaʼ ti te jkʼoplaltik ti buchʼutik «[chojtikinik] li Diose». Taje maʼuk me skʼan xal ti ta xkiltik ta batsʼi melel li Jeovae. Yuʼun ta melel, «muʼyuc bochʼo xuʼ cuxul chcom me laj [yilbe sat]» li Jeovae (Éxo. 33:20). Pe jkotoltik xuʼ chkiltik li Jeova mi ta jchanbetik lek skʼoplal stalelaltak li Jesuse, yuʼun toj lek laj yakʼ ta ilel li stalelal sTote. Xi laj yal stuke: «Li bochʼotic laj xa yilicune laj xa yilic o li Jtote» (Juan 14:7-9). Li buchʼutik liʼ chi jtunutik ta Balumil yuʼun li Diose xuʼ xkiltik ek kʼalal ta jkʼeltik lek li kʼusi tspas ta jtojolaltike (Job 42:5). Pe li buchʼutik tʼujbil chbatik ta vinajele ta xilbeik lek sat li sTotik ta vinajel kʼalal chchaʼkuxiik kʼuchaʼal kuxlejaletik ti mu xvinajik ta kʼelele (1 Juan 3:2).
17. ¿Kʼu yelan stalelalik li buchʼutik lekubem xa yoʼontonike?
17 Li jun krixchano ti sak yoʼonton ta stalelal xchiʼuk ta mantale muʼyuk bu chchʼay yoʼonton ta kʼusitik ti ibal sba chil Jeovae (1 Cró. 28:9; Isa. 52:11). Mi sak li koʼontontike, sak me li kʼusi chkaltik xchiʼuk li kʼusitik ta jpastike, vaʼun jaʼ me jech chvinaj ti melel li kabteltik ta stojolal Jeovae.
Chkʼotik ta xnichʼnab Dios li buchʼutik muʼyuk tsaʼik kʼope
18, 19. ¿Kʼu yelan stalelalik li buchʼutik «ta spaj[esik] cʼope»?
18 «Xcuxet noʼox yoʼnton li bochʼo yacʼoj svocolic ta spajesel cʼope; jaʼ xnichʼnabtac Dios, xi scʼoplalic.» (Mat. 5:9.) Li krixchanoetik ti mu snaʼ saʼik kʼop laj yalbe skʼoplal Jesuse maʼuk noʼox ojtikinbilik-o ta skoj li kʼusi tspasike, yuʼun jaʼ ojtikinbilik-o xtok ti kʼusi muʼyuk tspasike. Jech kʼuchaʼal liʼe, chchʼunik li mantal ti «mu me xapacbe abaic li cʼusi chopol chapasbe abaique» ti xie. Yuʼun «lec cʼusi [tspasbeik] scotol li cristianoetique» (1 Tes. 5:15).
19 Li jpʼel griego kʼop ti jelubtasbil kʼuchaʼal «ta spajesel cʼope» ti xi ta Mateo 5:9 jaʼ skʼan xal «jsaʼ lekilaletik», jaʼ xkaltik, krixchanoetik ti muʼyuk tsaʼik kʼope. Li jsaʼ lekilaletike muʼyuk bu «ta sliques contrainel» (Pro. 16:28, Ch). Jech xtok, chakʼbeik yipal sventa «coʼol [y]oʼnton [skotolik]» (Heb. 12:14).
20. ¿Buchʼutik ti kʼotemik xa ta «xnichʼnabtac Dios[e]», xchiʼuk buchʼutik ti ta xkʼotik ta xnichʼnab Dios ta mas jelavele?
20 Li jsaʼ lekilaletike xkuxet noʼox yoʼontonik, yuʼun «jaʼ xnichʼnabtac Dios, xi scʼoplalic». Li Jeovae xchʼamoj xa li tukʼil yajtsʼaklomtak Cristo ti chbatik ta vinajele, «jaʼ [xa] xnichʼnabtac» xchiʼuk toj lek chil sbaik xchiʼuk li Diose. Li smotonik taje jaʼ ta skoj ti yakʼoj xchʼunel yoʼontonik ta stojolal li Cristoe xchiʼuk ti ta sjunul yoʼonton chichʼik ta mukʼ «li Dios ti stalel chcʼanvane xchiʼuc ti tscʼan jun noʼox coʼntontique» (2 Cor. 13:11; Juan 1:12). ¿Kʼusi xuʼ xkaltik ta sventa li yan chijetike? Akʼo mi jaʼ «Totil Sbatel Osil» chkʼot yuʼunik Jesús li ta Jmil jabil ch-ajvalilaje, mi tsuts ti vaʼ sjalil taje, ta me xakʼ sba ta ventainel ek ta stojolal Jeova, vaʼun li yan chijetike ta me xkʼotik ta sbatsʼi nichʼnabtak Dios (Juan 10:16; Isa. 9:6; Rom. 8:21; 1 Cor. 15:27, 28).
21. ¿Kʼu yelan jtalelaltik mi «jaʼ xa cuxulutic ta sventa li Chʼul Espiritue»?
21 Mi «jaʼ xa cuxulutic ta sventa li Chʼul Espiritue», ta me xilik yantik ti muʼyuk bu ta jsaʼtik kʼope. Mu me «jsaʼbetic sloʼil yoʼntonic li yantique» o mu «me xcacʼbe jbatic scʼacʼal coʼontic» (Gál. 5:22-26; Scʼop Riox, ta skʼop Zinacantán). Yuʼun ti kʼusie, ta jpastik persa ti «muʼyucuc cʼop [kuʼuntik xchiʼuk] scotol cristianoetique» (Rom. 12:18).
Xkuxet noʼox koʼontontik akʼo mi chkichʼtik utsʼintael
22-24. 1) ¿Kʼu yuʼun xkuxet noʼox yoʼontonik li buchʼutik ta xichʼik utsʼintael ta sventa ti tukʼ kʼusi tspasike? 2) ¿Kʼusi ta jchanbetik skʼoplal li ta yan chib xchanobil chtale?
22 «Xcuxet noʼox yoʼnton li bochʼo ta xichʼic utsʼintael ta sventa ti tucʼ cʼusi tspasique, yuʼun jaʼ chventainatic yuʼun Dios.» (Mat. 5:10.) Xi to laj yal Jesús kʼalal laj yal taje: «Li voʼoxuque cuxetuc noʼox avoʼntonic me vuʼun ta jventa chachopolcʼoptaatic, chasoquesbat acʼoplalic, xchiʼuc me ch-epalcʼopojic ta atojolique. Cuxetuc noʼox avoʼntonic yuʼun. Yuʼun chcʼot ata ep amotonic te ta vinajel. Yuʼun jech onoʼox laj yichʼic utsʼintael ec li yajʼalcʼoptac Dios ti baʼyuc ijelov avuʼunique» (Mat. 5:11, 12).
23 Jech kʼuchaʼal li j-alkʼopetik ta voʼnee, jnaʼojtik ti ta xkichʼtik labanel yuʼun krixchanoetik li yajtsʼaklomutik Cristoe, ta xkichʼtik sabel jmultik xchiʼuk ta xkichʼtik «utsʼintael ta sventa ti tucʼ cʼusi [ta jpastike]». Pe mi kuch kuʼuntik li vokoliletik taje, xi jmuyubaj me ta skoj ti ta jlekubtasbetik yoʼonton Jeova xchiʼuk ti chkichʼtik ta mukʼe (1 Ped. 2:19-21). Li vokolile mu xuʼ sjutukajes li muyubajel chkaʼitik ta skoj li jmotontik ti chi jtun ta stojolal Jeova li avie xchiʼuk li ta jelavele. Mu xuʼ sjutukajesbat smuyubajelik li buchʼutik ch-ajvalilajik xchiʼuk Cristo ta vinajele, mi jaʼuk li buchʼutik chichʼik ventainel sbatel osil liʼ ta Balumil yuʼun li Ajvalilal taje. Li bendisionetik taje chakʼ ta ilel ti lek chilutik li Diose xchiʼuk ti toj lek yoʼonton ta jtojolaltike.
24 Pe ep to kʼusitik xuʼ jchantik li ta Mantaletik ta Vitse. Li ta yan chib xchanobil chtale ta jkʼelbetik lek skʼoplal yan mantaletik ti toj echʼ noʼox jtunele. Jkʼeltik baʼyuk kʼuxi xuʼ xkakʼ ta jkuxlejaltik li chanubtaseletik laj yakʼ Jesuse.
¿Kʼuxi cha takʼ?
• ¿Kʼu yuʼun xkuxet noʼox yoʼonton «li buchʼutik oy ta sjol yoʼontonik ti chtun yuʼunik mantale»?
• ¿Kʼu yuʼun xkuxet noʼox yoʼonton «li bochʼo mucʼ noʼox yoʼntonique»?
• ¿Kʼu yuʼun xkuxet noʼox yoʼonton li yajtsʼaklomtak Cristo akʼo mi xichʼik utsʼintaele?
• ¿Kʼusi jtosukal xkuxetel oʼontonal laj yal Jesús ti mas chkʼot ta avoʼontone?
[Sjakʼobiltak sventa xchanobil]
[Lokʼol ta pajina 7]
Li baluneb xkuxetel oʼontonal laj yalbe skʼoplal Jesuse jech toj ep sbalil li avi kʼuchaʼal ep sbalil la staik li ta voʼnee