¿Mi ta van xkuch-o batel kuʼuntik ta xcholel li mantale?

¿MI OY junuk velta ti chakʼ tajek chavaʼie xchiʼuk ti chibaj avoʼonton ti la anop ti mu xa bu cha chol mantale? Li tsatsal kontrainele, li at-oʼontone, li chameletike, li ilbajinel chakʼ jchiʼiltaktike o ti muʼyuk lek kʼusi kʼot ta lokʼel kuʼuntike jaʼ chakʼ ta preva mi chkuch batel kuʼuntik. Akʼo mi jech, li kʼusi la spas Jesuse tspat tajek koʼontontik. Kuch yuʼun tsatsal vokoliletik ta skoj ti «la snaʼ ti xcuxet noʼox yoʼnton ta tsʼacale» (Heb. 12:2). Snaʼoj onoʼox ti jaʼ xmuyubaj-o tajek sTot mi laj yakʼ ta ilel ta stalelal ti jecheʼ li kʼusi albil ta stojolale (Pro. 27:11).

Ta me xmuyubaj avuʼun ek li Jeova mi chkuch avuʼun ta xcholel li mantale. Pe ¿kʼusi stakʼ xa pas mi chjutukaj-o avip chavaʼi ta chol mantal li kʼusitik cha nuptane? Jun yajtsʼaklom Cristo ti oy xa sjabilal ti Krystyna sbi xchiʼuk ti ip noʼox chaʼie xi chale: «Lubemun noʼox chkaʼi xchiʼuk mu noʼox xuʼ tajek yaʼel. Bateltike jaʼ chchʼay-o jmuyubajel ta chol mantal ti xlubet noʼox chkaʼi ta skoj jabilale, li chameletik ta jnuptane xchiʼuk li at-oʼonton jujun kʼakʼale». ¿Kʼuxi xuʼ xa chol-o mantal akʼo mi oy avokol?

Chanbo stalelal li j-alkʼopetike

Sventa xkuch-o yuʼunik xcholel mantal li buchʼutik chcholbeik skʼoplal Ajvalilal yuʼun Diose skʼan me chakʼbeik yipal ta snopel kʼuchaʼal li j-alkʼopetik ta voʼnee. Jnopbetik skʼoplal avaʼi li Jeremiase. Kʼalal biiltasat ta j-alkʼop yuʼun Jeovae xiʼ tajek. Akʼo mi jech, pas-o batel yuʼun li tsatsal abtel mas ta 40 jabil ta skoj ti la spat lek yoʼonton ta stojolal Jeovae (Jer. 1:6; 20:7-11).

Li Henryke jaʼ akʼbat lek stsatsal yoʼonton li stalelal Jeremiase. «Ti mas xa ta 70 jabil yakal ta jchol mantale —xi chal—, oy bateltik ti chibajem koʼonton yuʼun li ilbajinele xchiʼuk ti mu kʼusi skʼan li krixchanoetike. Kʼalal jech taje jaʼ ta jnopbe skʼoplal li Jeremiase, ti skʼanoj Jeovae xchiʼuk ti kʼuyelan oy ta mantale, ti jaʼ akʼbat-o yip sventa xchol-o batel li mantale.» (Jer. 1:17.) Li kʼusi la spas xtok li j-alkʼope jaʼ kʼotem ta yoʼonton ek li Rafał ti xi chale: «Maʼuk laj yakʼ ta yoʼonton ti kʼuyelan chaʼi sba li Jeremiase, moʼoj, yuʼun la spat yoʼonton ta stojolal Jeova xchiʼuk la xchol-o echʼel mantal, maʼuk xiʼo ti chpʼajvan li krixchanoetike. Taje jaʼ kakʼoj-o ta koʼonton ek».

Li Isaiase jaʼ jun j-alkʼop xtok ti ep skoltaoj ta stalelal li yajtsʼaklomtak Cristo sventa xcholik-o batel li mantale. Li Jeovae kak xa onoʼox laj yalbe yaʼi Isaías ti muʼyuk chaʼi j-israeletik li kʼusi chale: «Tsatsubtasbo yoʼntonic li jun lum leʼe; macbo xchiquinic, [...] mu me xaʼyic». ¿Mi muʼyuk van sbalil li chol mantal tspas j-alkʼope? Li Diose mu jechuk laj yil. Xchiʼuk mu jechuk laj yil ek li Isaiase, yuʼun kʼalal laj yichʼ li yabtele xi tsots laj yale: «Liʼ oyun vuʼune, tacun batel» (Isa. 6:8-10). Pas batel yuʼun li yabtele. ¿Mi jech oy ta avoʼonton ek? ¿Mi tsots chavakʼ persa sventa xa chʼun li mantal ti skʼan cholbel skʼoplal li Ajvalilal yuʼun Diose?

Mi ta jkʼan ta jcholtik-o batel li mantal kʼuchaʼal la spas Isaiase, maʼuk me skʼan xkakʼ ta koʼontontik ti mu kʼusi skʼan li krixchanoetike o ti tspʼajik mantale. Xi chchap kaʼitik Rafał ti kʼusi tsal-o yuʼun ti chibajem toʼox yoʼontone: «Kʼalal oy kʼusi muʼyuk lek chi albat ta chol mantale maʼuk ta jnopilan-o. Ta melel, yuʼun onoʼox oy sderechoik ti kʼuyelan tskʼan chtakʼavik li krixchanoetike». Xi chal li Anna eke: «Mi jaʼuk jkʼan jnop li kʼusi chchibaj-o koʼontone. Kʼalal skʼan toʼox xi lokʼ ta chol mantale ta jpas orasion xchiʼuk ta jchan li teksto sventa jujun kʼakʼale; vaʼun jaʼ jech chlokʼ batel ta jol li kʼusi muʼyuk lek ta jnope».

 Jnoptik avaʼi ek li ta stojolal Ezequiele, ti la xcholbe mantal li pimil judioetik kʼalal jaʼo te mosoinbilik ta Babiloniae (Eze. 2:6). Ti muʼyukuk laj yakʼ ta ojtikinel li pʼijubtasel chakʼ Diose xchiʼuk ti oy buchʼu junuk chopol krixchano icham ta skoj ti muʼyuk xichʼ pʼijubtasele, jaʼ me chchapanat yuʼun Dios li Ezequiel ta skoj ti cham li krixchano taje. Xi albat yuʼun Jeova li j-alkʼope: «Li xchʼichʼale voʼot chcom ta aba» (Eze. 3:17, 18).

Tsots chakʼ yipal ti jechuk stalelal kʼuchaʼal Ezequiel li Henryke, jaʼ yuʼun xi chale: «Mu jkʼan jbainbe xchʼichʼel junuk krixchano. Oy ep krixchanoetik ti xiʼel xlajike» (Hech. 20:26, 27). Jaʼ jech tsnop ek li Zbigniew: «Skʼan xchol-o batel mantal li Ezequiele, akʼo mi oy kʼusi chal li krixchanoetike. Li stalelale jaʼ tskoltaun sventa jechuk xkil chol mantal kʼuchaʼal li Jpasvaneje».

Naʼo me ti mu atukuke

Mu junuk buchʼu stuk oy kʼalal chchol mantale. Jtekeltik jaʼ «ta jchiʼin[tik] ta abtel li Diose», jech kʼuchaʼal echʼ li jtakbol Pabloe (1 Cor. 3:9). Jech kʼuchaʼal laj xa kiltike, bateltike muʼyuk yip chaʼi sba li Krystynae, xi chale: «Stekel onoʼox velta ta jkʼanbe Jeova ti akʼo xakʼ kipale, vaʼun persa onoʼox chi yakʼbun». Jech, chtun kuʼuntik li xchʼul espiritu Dios sventa xkuch-o batel kuʼuntik li chol mantale (Zac. 4:6).

Kʼalal ta jcholtik echʼel li mantale jaʼ tskoltautik li chʼul espiritu sventa xkakʼtik ta ilel li talelaletik ti jaʼ «yabtel Chʼul Espiritue» (Gál. 5:22, 23). Taje jaʼ me tskoltautik xtok sventa xkuch-o batel kuʼuntik xcholel li mantale akʼo mi oy kʼusi xkʼot ta pasel. Xi chakʼ venta li Henryke: «Jaʼ tslekubtas jtalelal li chol mantale: ta jchantik ti oyuk smalael kuʼuntike, ti oyuk ta koʼontontik li yantike xchiʼuk ti mu ta orauk xi jlubtsaje». Mi chkuch-o batel kuʼuntik li xcholel mantal akʼo mi oy kontrainele ta me xchʼi kuʼuntik li talelaletik ti jaʼ yabtel chʼul espiritue.

Tstunes yaj-anjeltak Jeova sventa chbeiltasvanik li ta abtelal ti stuk noʼox jeche (Apo. 14:6). Li Vivliae chal ti «batsʼi ep ta millón ta jyalel» li anjeletik taje (Apo. 5:11). Li anjeletik ti beiltasbilik yuʼun Jesuse jaʼ tskoltaik li yajtuneltak Dios ta Balumile. ¿Mi xvul ta ajol kʼalal jaʼo yakal cha chol mantale?

Xi chal ta melel li Annae: «Tspat tajek koʼonton kʼalal te oy ta jol ti te xchiʼukutik ta chol mantal li anjeletike, oy tajek sbalil chkil ti tskoltautike, ti beiltasbilik yuʼun Jeova xchiʼuk Jesuse». ¡Jaʼ jun mukʼta matanal ti jmoj chi j-abtej xchiʼuk li tukʼil anjeletike!

Pe ¿kʼusi xuʼ xkaltik ta stojolal li kermanotaktike? Jtaojtik jun mukʼta bendision, jaʼ ti xuʼ lek xkojtikintik ep tukʼil yajrextikotak Jeovae. Ta melel, aviloj van ta asat atuk ti melel kʼusi chal li pʼijil loʼil ta Vivlia liʼe: «Li taqʼuine tscʼan juxbel ye ta taqʼuin noxtoc; jaʼ noʼox jech ec li cristianoe ta ye cristiano xuʼ ta xbijub» (Pro. 27:17).

Kʼalal jmoj chi j-abtej xchiʼuk kermanotaktik ta chol mantale xuʼ te jchantik kʼuyelan xuʼ lek xi jtojob ta chol mantal. Li Elżbietae xi chale: «Kʼalal yantik ermanoetik ta jchiʼin ta chol mantale xuʼ te xkakʼ ta ilel ti jkʼanojik kʼuchaʼal jkʼanoj li krixchanoetik bu ta jchol mantale». ¿Kʼu yuʼun mu xa nop ti yantik-o ermanoetik xa chiʼin ta chol mantale? Te me chavakʼ venta ti mas kʼupil sba li chol mantal cha pase.

Chabio me aba lek

Sventa xa muyubajuk-o ta chol mantale skʼan me xa chapan aba lek, ti oyuk lek yorail avuʼun xa chanunaj atuke xchiʼuk ti xa kux leke. Jaʼ xkaltik, skʼan me jchabi jbatik lek ta mantal xchiʼuk skʼan jchabi lek jbekʼtaltik.

Xi chal li Vivliae: «Li cʼusi chichʼ chapanel ti lec nopbile lec chbat» (Pro. 21:5). Zygmunt ti oy xa 88 sjabilale xi chale: «Ta skoj ti toj lek jnaʼ jchapan jbae lek kʼusi chkʼot ta pasel kuʼun li ta chol mantale. Lek ta jchapan li kʼusitik ta jpase, vaʼun jaʼ jech oy lek yorail kuʼun li chol mantale».

Kʼalal xkojtikintik lek li Vivliae ta me stsatsubtasutik xchiʼuk chchapanutik ta chol mantal. Sventa tsotsuk li jbekʼtaltike skʼan me lek xi jveʼutik, jaʼ me jech skʼan jmakʼlin jbatik lek ek li ta mantal sventa jcholtik-o echʼel li mantale. Mi skotol kʼakʼal ta jmakʼlin jbatik ta sKʼop Dios xchiʼuk li ta vunetik chakʼ ta «yorail» li «jʼabtel ti jun [«tukʼ», NM] yoʼnton [...], ti lec bije», oy me lek kipaltik sventa jcholtik li mantale (Mat. 24:45-47).

Li Elżbietae ep kʼusi tsots skʼoplal sjeloj ta xkuxlejal sventa slekubtas ti kʼuyelan chchol mantale. Xi chale: «Jutuk xa tajek ta jkʼel television li avie,  vaʼun jaʼ xuʼ jchapan jba lek li ta chol mantale. Kʼalal ta jkʼel jVivlia ta akʼobaltike, ta jnopbe skʼoplal li krixchanoetik ti laj cholbe mantale. Xchiʼuk ta jsaʼ tekstoetik xchiʼuk yan mantaletik ti xuʼ xkoltaatike».

Mi cha kux leke mas me oy avipal xchiʼuk mas me lek cha chol li mantale. Yan mi jaʼ mas ep cha chʼakbe yorail li chʼayob oʼontonale xuʼ me mu xa masuk lek xa chol mantal yuʼun. Jun baxbol jchol mantal ti Andrzej sbie xi chale: «Kʼalal muʼyuk lek ta jkuxtike chi jlubtsaj ta jyalel, mi li jlubtsaj une chlik chibajkutik, taje jaʼ ta skoj ti muʼyuk lek ta jkuxtike. Tsots chkakʼ persa sventa mu jechuk jnuptan» (Ecl. 4:6).

Akʼo mi ta sjunul koʼontontik ti tsots chkakʼ kipaltike, jutuk li krixchanoetik ti oy sbalil chilik li lekil aʼyeje. Pe tspat koʼontontik ti jnaʼojtik ti muʼyuk chchʼay ta sjol Jeova li kabteltike (Heb. 6:10). Akʼo mi ep ti mu skʼan xaʼiik li kʼusi chkaltike, yikʼaluk van xalbeik skʼoplal ti ay jvulaʼantik kʼalal sutemutik xaʼoxe. Ta melel, yikʼaluk van jech xkʼot ta pasel kʼuchaʼal ta skʼakʼalil Ezequiele: li krixchanoetike ta «snaʼic ti oy jun jʼalcʼop te ta stojolique» (Eze 2:5). Melel onoʼox ti mu kʼunuk ta pasel li kabteltike, pe toj ep me sbalil ta jtatik, maʼuk noʼox li voʼotike, yuʼun tstabeik sbalil ek li buchʼutik chchʼamik li mantal chkaltike.

Xi chal li Zygmunt: «Kʼalal ta jcholtik li lekil aʼyeje jaʼ me tskoltautik sventa jlaptik li achʼ talelalile, ti xkakʼtik ta ilel ti jkʼanojtik li Diose xchiʼuk li jchiʼiltaktike». Xchiʼuk xi laj yal ek li Andrzej: «Jaʼ jun matanal ti chi j-abtej sventa sta xkuxlejal li krixchanoetike, jun abtelal ti muʼyuk xa jech chichʼ pasel kʼuchaʼal avie xchiʼuk ti mu xa jechuk yelan li kuxlejal kʼuchaʼal avie». Xuʼ xa ta epal bendision ek mi chkuch-o batel avuʼun li xcholel mantale (2 Cor. 4:1, 2).

[Lokʼol ta pajina 31]

Sventa chkuch-o batel kuʼuntik ta xcholel li mantale skʼan me jchabi jbatik lek ta mantal xchiʼuk skʼan jchabi lek jbekʼtaltik