La skʼupil kʼoptabe sbi Jeova li Jobe

«Ichʼbiluc ta mucʼ sbi li Mucʼul Diose.» (JOB 1:21)

1. ¿Buchʼu la stsʼiba yaʼeluk li slivroal Jobe, xchiʼuk kʼusi ora la stsʼiba?

 LI Moisese yichʼoj xaʼox van 40 jabil ti kʼalal jatav lokʼel ta Egipto ta skoj ti xtiʼet ta jyalel sjol li faraone, vaʼun te bat nakluk ta Madián (Hech. 7:23). Yaʼeluke jaʼo te nakal ti kʼalal laj yaʼibe skʼoplal li svokol Jobe, ti te nopol nakal ta yosilal Uze. Kʼalal echʼ xaʼox jayibuk jabile, te nopol echʼik li j-israeletik li ta lum taje, ti kʼalal poʼot xaʼox xlaj yoʼontonik ta xanvil ta taki xokol balumile. Yikʼaluk van jaʼo te laj yaʼi Moisés li kʼusi kʼot ta stojolal Job ti kʼalal poʼot xaʼox xchame. Jaʼ to la stsʼiba Moisés li slivroal Job ti kʼalal chamen xaʼox li moltotil taje, jech onoʼox kʼuchaʼal nopem xaʼiik li judioetike.

2. ¿Kʼu yuʼun tstsatsubtasbe tajek yoʼonton yajtuneltak Dios li slivroal Jobe?

² Li slivroal Jobe tstsatsubtasbe tajek yoʼonton li yajtuneltak Dios avie. ¿Kʼu yuʼun? Yuʼun chalbe skʼoplal li kʼusitik toj tsots skʼoplal kʼotemik ta pasel ta vinajele xchiʼuk tsots chalbe skʼoplal li mukʼta pas mantal ta vinajel-balumil yuʼun Jeovae. Tskoltautik ta yaʼibel smelolal kʼusi skʼan xal li tukʼil oʼontonale xchiʼuk ti kʼu yuʼun chakʼ Jeova bakʼintik ti akʼo xil svokol li yajtuneltake. Jech xtok, chakʼ kiltik ti jaʼ bankilal yajkontra Jeova li Satanase xchiʼuk jaʼ yajkontra ek li krixchanoetike, chakʼ kiltik xtok ti xuʼ tukʼ yoʼonton xakʼ sba ta stojolal Jeova li jpas mulil krixchanoetik akʼo mi tsots tajek xil svokolik kʼuchaʼal Jobe. Jkʼeltik avil jlomuk kʼusitik kʼotem ta pasel ti chal li livro taje.

Li Satanase la spas ta preva li Jobe

3. 1) ¿Kʼusi jnaʼojtik ta sventa li Jobe? 2) ¿Kʼu yuʼun laj yilbajin Job li Diabloe?

³ Jaʼ jun jkʼulej vinik echʼ li Jobe xchiʼuk toj lek ojtikinbil ti lek snaʼ skolta li buchʼutik skʼanik koltaele, toj lek stalelal li moltotil taje xchiʼuk toj lek ichʼbil ta mukʼ ta skoj ti chtojobtasvane. Pe ti kʼusi toj tsots skʼoplale, jaʼ ti xiʼtaoj Diose. Li loʼile chal kaʼitik ti «lec tucʼ yoʼnton [li Jobe], lec cʼusitic la spas» xchiʼuk «lec yichʼoj ta mucʼ Dios, svocʼoj sba o ta sventa li cʼusi chopole». Ti kʼusi laj-o ta ilbajinel yuʼun Diablo li Jobe jaʼ ta skoj ti lek yichʼoj ta mukʼ li Diose, maʼuk ta skoj li skʼulejale mi jaʼuk ti lek ojtikinbile (Job 1:1; 29:7-16; 31:1).

4. ¿Kʼusi jaʼ li stukʼil oʼontonale?

⁴ Li slivroal Jobe jaʼ baʼyel chlik yalbe skʼoplal jun tsobajel ti kʼot ta pasel ta vinajele: te batik ta stojolal Jeova li anjeletike xchiʼuk te bat ek li Satanase, te lik xchibal kʼoptabe stalelal li Jobe (kʼelo Job 1:6-11). Laj yalbe skʼoplal skʼulejal Job li Diabloe, pe ti kʼusi la xchibal kʼoptae jaʼ ta sventa ti kʼu yuʼun tukʼ yoʼontone. Li jpʼel kʼop stukʼil oʼontonale jaʼ skʼan xal ti chʼabal spaltail xchiʼuk xchopolil li jun krixchanoe. Li stukʼil oʼontonal chalbe skʼoplal Vivliae jaʼ skʼan xal ti jaʼ noʼox chkichʼtik ta mukʼ li Jeovae xchiʼuk ti ta sjunul koʼonton chkichʼtik ta mukʼe.

5. ¿Kʼusi laj yal Satanás ta stojolal li Jobe?

⁵ Li Satanase laj yal ti jaʼ noʼox chichʼ ta mukʼ Dios ta skoj ti tsaʼ slekilal stuk li Jobe. Laj yal xtok ti jaʼ noʼox tukʼ chakʼ sba ta stojolal Jeova kʼalal chchabiate xchiʼuk ti kʼalal ch-akʼbat bendisione. Sventa chakʼ ta ilel Jeova ti mu jechuk taje, laj yakʼ ti akʼo x-akʼbat svokol yuʼun Diablo li Jobe. Vaʼun, ta jun noʼox kʼakʼal laj skotol li kʼusitik yuʼune, laj ta milel li chonbolometik yuʼune o laj ta j-elekʼ, jutuk mu skotoluk laj ta milel xtok li yaj-abteltake xchiʼuk cham slajunvoʼal li xnichʼnabe (Job 1:13-19). ¿Mi jaʼ jech la spas Job kʼuchaʼal snopoj li Diabloe? Mu jechuk la spas: yuʼun xi laj yal kʼalal laj yil tsots svokoltake: «Mucʼul Dios laj yacʼbun scotol; Mucʼul Dios la spojbun sutel noxtoc. Ichʼbiluc ta mucʼ sbi li Mucʼul Diose» (Job 1:21).

6. 1) ¿Kʼusi kʼot ta pasel li ta xchibal tsobajel laj yichʼ pasel ta vinajele? 2) Kʼalal la xchibal kʼoptabe stukʼil yoʼonton Job li Satanase, ¿buchʼutik yan la sabe smul?

 ⁶ Ta mas tsʼakal jutuke laj yichʼ pasel yan tsobajel ta vinajel. La sabe yan velta smul Job li Satanase, xi laj yale: «Xuʼ chacʼ cʼusitic yan ta sventa chcʼuxubin sbecʼtal stuc. Yuʼun li cristianoe xuʼ chacʼ scotol cʼusi oy yuʼun, jaʼ noʼox venta me cuxul chcom stuque. Pero picbo avil li sbaquil xchiʼuc li sbecʼtal stuque; te chavil me mu xlic chopolcʼopojuc ta atojol». Kakʼtik lek venta avil ti maʼuk xa noʼox la sabe smul Job li Satanase. Yuʼun xi laj yale: «Li cristianoe xuʼ chacʼ scotol cʼusi oy yuʼun, jaʼ noʼox venta me cuxul chcom stuque». Kʼuchaʼal chkiltike maʼuk noʼox la xchibal kʼoptabe stukʼil yoʼonton Job li Satanase, moʼoj, yuʼun la xchibal kʼoptabe xtok stukʼil yoʼonton skotol li krixchanoetik ti chtunik ta stojolal Diose. Albat ti xuʼ chbat yilbajin yan velta Job li Satanase, laj yakʼbe jtos chamel ti toj echʼem xa noʼox kʼuxe (Job 2:1-8). Pe maʼuk noʼox taje, laj to yil svokol li moltotile.

Li kʼusitik xuʼ jchantik ta stojolal Jobe

7. ¿Kʼuxi akʼbat svokol yuʼun yajnil li Job xchiʼuk li oxvoʼ yamigotak ta alele?

⁷ Laj yil tajek svokol ek li yajnil Job ta slikebale. Jaʼ ti cham li yalabtake xchiʼuk ti toj abol sba komik ta skoj ti ep kʼusitik chʼay yuʼunike. Jech xtok, toj kʼux van laj yaʼi ti kʼalal laj yil ti tsakbil ta tsatsal chamel li smalale. Xi tsots laj yale: «¿Me yoquel to staoj yav jun avoʼnton o? Tuchʼo ta utel li Diose, chaman xa». Ta mas tsʼakale te kʼot oxvoʼ viniketik —Elifaz, Bildad xchiʼuk Zofar— sventa tspatbeik yoʼonton yalojik li Jobe. Pe mu kʼusi lek laj yalik, jaʼ yuʼun xi laj yal li Jobe: «Yolbaj noʼox chavacʼbicun jvocol». Li Bildade laj yakʼ ta aʼiel ti yuʼun la saʼoj smulik li xnichʼnabtak Jobe xchiʼuk staik-o la ti jech chamike. Li Elifaze laj yakʼ ta aʼiel ti yuʼun la yakal tstoj li smul Job ti spasojan ta voʼnee. ¡Laj yakʼ ta aʼiel xtok ti muʼyuk la bu chkʼuxubin Jeova li yajtuneltak ti tukʼ yoʼontonike! (Job 2:9, 11; 4:8; 8:4; 16:2; 22:2, 3.) Akʼo mi toj tsots kʼusitik la snuptan li Jobe, tukʼ yoʼonton laj yakʼ sba. Melel onoʼox ti muʼyuk lek ti «la snop ti jaʼ xjelov stuqʼuil jech chac cʼu chaʼal Diose» (Job 32:2). Akʼo mi jech, tukʼ laj yakʼ-o sba kʼalal to icham.

8. ¿Kʼusi toj lek xuʼ xchanik ta stojolal Eliú li buchʼutik chakʼik tojobtasel avie?

⁸ Vaʼun li slivroal Jobe chalbe skʼoplal Eliú ti bat svulaʼan Job eke. Baʼyuk laj yaʼi li kʼusi oy ta yoʼonton chal Jobe xchiʼuk li kʼusi chal oxvoʼ yamigotake. Akʼo mi jaʼ itsʼinal ta yoʼvoʼalik li Eliue, laj yakʼ ta ilel ti oy spʼijile. La stsak ta mukʼ li Jobe, ta slekil yoʼonton xchiʼuk la sbiiltas ta sbi kʼalal la skʼopone, ti jaʼ mu jechuk la spasik li oxvoʼ viniketike. Jech xtok, laj yalbe ti toj lek ti tukʼ yoʼonton yakʼoj sbae. Pe laj yalbe xtok ti mu lekuk ti chakʼ tajek ta yoʼonton ta yakʼel ta ilel ti muʼyuk smule. Vaʼun laj yalbe ti ep sbalil ti xtunik ta stojolal Diose xchiʼuk ti tukʼ xakʼ sbaik ta stojolale (kʼelo Job 36:1, 11). ¡Toj lek tajek ti jechuk stalelalik kʼuchaʼal Eliú li buchʼutik chtojobtasvanik avi kʼakʼale!  Laj yakʼ ta ilel ti oy smalael yuʼun li Eliue, la stsʼet chikinta li kʼusi laj yal Jobe, la yalbe ti lek li kʼusi tspase xchiʼuk laj yakʼbe lekil tojobtaseletik (Job 32:6; 33:32, NM).

9. ¿Kʼuxi koltaat yuʼun Jeova li Jobe?

⁹ Ta slajebal une oy kʼusi la snuptan Job ti toj labal sbae: «Li Diose lic cʼopojuc tal ta jun sutub icʼ, [la skʼopon] li Jobe». Tsots la stukʼibtasbe snopben Job li Jeovae, pe ta slekil yoʼonton la stukʼibtas un, ep kʼusitik la sjakʼbe ta sventa taje. Bikʼit laj yakʼ sba li Jobe, la xchʼam li tukʼibtasele xchiʼuk xi laj yakʼ ventae: «Toj biqʼuitun ta atojol». Xi to laj yale: «Ta jsutes coʼnton ta atojol; liʼ ta xcacʼ jba ta pucuctic, ta tantic». Vaʼun li Jeovae laj yal ti chopol laj yil li kʼusi la spas li viniketik ti ay spatbeik yoʼonton ta alel li Jobe, yuʼun mu meleluk ti kʼusi laj yalike. Laj une laj yalbe Job ti akʼo spas orasion ta stojolal li viniketik taje. Vaʼun «cʼalal la scʼopanbe Dios ta stojol xchiʼiltac li Jobe, li Mucʼul Diose lic sloqʼuesbe svocol li Jobe, xchiʼuc laj yepajesbe yan velta cʼusitic oy yuʼun. Xʼechʼ to jech yepal laj yepajesbe jech chac cʼu chaʼal oy onoʼox yuʼune» (Job 38:1; 40:4; 42:6-10).

¿Kʼu to yepal jkʼanojtik li Jeovae?

10. ¿Kʼu yuʼun muʼyuk la slajes Satanás li Jeovae, xchiʼuk kʼu yuʼun la stsak ta mukʼ li kʼusi la xchibal kʼoptae?

¹⁰ Li Jeovae jaʼ Jpasvanej, jaʼ Mukʼul Jpas mantal ta spʼejel vinajel-balumil. Xuʼ ox mu stsak ta mukʼ ta jyalel Jeova li kʼusi la xchibal kʼopta Satanase, pe mu jechuk la spas. ¿Kʼu yuʼun? Yuʼun oy kʼusi skʼan chapanbel lek skʼoplal, pe mi la slajes li yajkontrae o ti mu stsak ta mukʼ li kʼusi la xchibal kʼoptae muʼyuk me chchapaj taje. Li Diabloe laj yal ti mu la bu tukʼ yoʼonton chakʼ sba Job mi chʼay yuʼun skotol li kʼusi oy yuʼune; pe bu cha ta, li yajtunel Dios ti stuk noʼox jeche kuch yuʼun li prevae. Laj xtoke, laj yal Satanás ti tsvalopatinik Dios li krixchanoetik ti kʼalal chichʼik ilbajinele. Pe akʼo mi toj tsots laj yil svokol li Jobe tukʼ-o yoʼonton laj yakʼ sba. Jaʼ jech jamal ivinaj ti mu meleluk li kʼusi laj yichʼ alel ta stojolal li vinik liʼe, yuʼun akʼo mi jpas mulil, tukʼ laj yakʼ sba. Pe ¿kʼusi xuʼ xkaltik ta sventa li yan yajtuneltak Dios une?

11. ¿Kʼusi la spas Jesús sventa chakʼ lek ta ilel ti mu meleluk li kʼusi xchibal kʼoptaoj Satanase?

¹¹ Kʼalal tukʼ yoʼonton chakʼ sba li jun yajtunel Dios ti ch-ilbajine yuʼun Satanase, yakal me chakʼ ta ilel ti mu meleluk li kʼusi chal yajkontra Jeova ti toj chopole. Kʼalal ay ta Balumil li Jesuse jamal lek laj yakʼ ta ilel ti mu meleluk li kʼusi xchibal kʼoptaoj Diabloe. Ta skoj ti jaʼ jun tukʼil vinik echʼe —kʼuchaʼal li jmoltotik Adane—, laj yakʼ ta ilel ti jaʼ jun jut kʼop li Satanase xchiʼuk ti jecheʼ tsaʼ mulile, yuʼun tukʼ stalelal icham li Jesuse (Apo. 12:10).

12. ¿Kʼusi xuʼ chkakʼtik ta ilel xchiʼuk kʼusi oy ta jbatik ta jujuntal?

¹² Akʼo mi jech, li Diabloe mu xlubtsaj ta spasel ta preva li yajtuneltak Diose. Jaʼ yuʼun ta jujuntal xuʼ chkakʼtik ta ilel ta stukʼil koʼontontik —xchiʼuk oy ta jbatik— ti yakal chi jtun ta stojolal Jeova ta skoj ti jkʼanojtike, ti maʼuk sventa ta jsaʼ jlekilal jtuktike. ¿Kʼu yelan chkiltik li kʼusi jbainojtike? ¿Mi mu jaʼuk jun mukʼta matanal chkiltik? Jech xtok, ta me jta spatobil koʼontontik ti jnaʼojtik ti chakʼ kiptik Jeova sventa chkuch kuʼuntike xchiʼuk ti jaʼ jech oy noʼox spajeb jvokoltik kʼuchaʼal la spas ta stojolal Jobe (1 Cor. 10:13).

Li Satanase jaʼ jun tsatsal jkontrainvanej xchiʼuk jvalopatinvanej

13. ¿Kʼusi chalbe skʼoplal slivroal Job ti te tsakal skʼoplal li Satanase?

¹³ Li Tsʼibetik ta Griego Kʼop ti chalbe skʼoplal Cristoe toj ep kʼusitik chalbutik ta sventa li Diabloe xchiʼuk li stoybaile. Jech kʼuchaʼal li ta  slivroal Apocalipsise, te chalbe skʼoplal ti tspakbe skʼoplal li sderecho ta Mukʼul Jpas mantal li Jeovae xchiʼuk ti chakʼbe slajeb sbatel osil li bankilal yajkontrae. Jech li ta Tsʼibetik ta Hebreo Kʼop eke te chalbe skʼoplal li kʼusi kʼexlal sba la spas Satanase, jaʼ ti oy kʼusi la xchibal kʼoptae xchiʼuk ti tsloʼla ox yaʼi li krixchanoetike. Jech kʼuchaʼal chal kaʼitik li slivroal Jobe, maʼuk sventa bat skʼupil kʼopta Jeova li Diablo kʼalal ay li ta chib tsobajel ta vinajele. Muʼyuk kʼusi lek snopoj tspas. La sabe smul li Jobe, vaʼun ti kʼalal albat yuʼun Jeova ti xuʼ chilbajine «ilocʼ batel ta stojol li Mucʼul Diose» (Job 1:12; 2:7).

14. ¿Kʼusi la spasbe Job li Satanase?

¹⁴ Kʼuchaʼal chkiltike, li slivroal Jobe chakʼ ta ilel ti jaʼ stsatsal kontra krixchanoetik li Satanase. Li tsobajel chalbe skʼoplal ta Job 1:6 xchiʼuk Job 2:1, mu stakʼ naʼel lek kʼu sjalil xil sba, pe ti kʼu sjalil taje toj ep laj yil svokol li Jobe. Ta skoj ti tukʼ laj yakʼ sba li moltotile, li Jeovae xi laj yalbe li Diabloe: «Acʼo me chacʼan ox chajip ta lum ta jech noʼox [li Jobe], pero staoj yav jun yoʼnton o; muʼyuc bu la saʼ smul ta jtojol». Li Satanase mu skʼan xakʼ venta ti mu meleluk li kʼusi laj yale; la skʼan ta persa ti akʼo to xichʼ pasel ta jun tsatsal preva li Jobe. Jaʼo laj yakʼ ta preva Job ti kʼalal jaʼo jkʼulej tajeke xchiʼuk laj yakʼ ta preva ti kʼalal ta povreal kome, taje te jamal laj yakʼ ta ilel Satanás ti muʼyuk ta yoʼonton ta jyalel li povreetike xchiʼuk li buchʼutik oyik ta vokolile. Ta melel, spʼajoj tajek li buchʼutik tukʼ oyik ta stojolal Diose (Job 2:3-5). Akʼo mi ep tajek laj yil svokol li Jobe, tukʼ-o laj yakʼ sba xchiʼuk laj yakʼ ta ilel ti jaʼ jun jut kʼop li Diabloe.

15. ¿Kʼuxi xkoʼolajik xchiʼuk Satanás li jvalopatinej mantaletik avi kʼakʼale?

¹⁵ Li Satanase jaʼ ti buchʼu baʼyel la svalopatin li mantale. Li jvalopatinej mantaletik avi kʼakʼale xkoʼolajik tajek kʼuchaʼal li Satanase. Nojemik ta veneno ta skoj ti chchopol kʼoptaik li tsobobbaile, li jkʼelvanejetik xchiʼuk li Jtsop Jbeiltasvaneje. Oy junantike mu skʼan stunesbeik li sbi Dios ti jaʼ Jeovae, xchiʼuk chʼabal ta yoʼontonik chchanik mas ta stojolal xchiʼuk chʼabal ta yoʼontonik chtunik ta stojolal. Li jvalopatinej mantaletike tstsakik ta kʼop li tukʼil yajtuneltak Jeovae, jech kʼuchaʼal tspas li stotik ti jaʼ li Satanase (Juan 8:44). Jaʼ yuʼun ti muʼyuk ta jchiʼintik ta loʼil o ta jkap jbatik xchiʼuk li jvalopatinej mantaletike (2 Juan 10, 11).

La skʼupil kʼoptabe sbi Jeova li Jobe

16. ¿Kʼu yelan laj yakʼ ta ilel stalelal Job ta stojolal li Jeovae?

¹⁶ La stunesbe sbi Jeova li Jobe xchiʼuk la skʼupil kʼoptabe. Muʼyuk bu chopol kʼopoj ta stojolal Dios ti kʼalal laj yaʼi ti cham li xnichʼnabtake. Melel onoʼox ti laj yal ti jaʼ laj yichʼ sutel Jeova li kʼusitik chʼay yuʼune, akʼo mi jech, laj onoʼox skʼupil kʼoptabe li sbie. Li Jobe xi laj yal jun spʼijil loʼil ta slajebe: «Ti jun oʼntonal ichʼbil ta mucʼ ti Diose: jaʼ bijilil maʼ taj une; ti yictael ta spasel ti chopole: jaʼ snopbenal maʼ taj une» (Job 28:28, Ch).

17. ¿Kʼusi koltaat-o Job sventa tukʼ-o xakʼ sba?

¹⁷ ¿Kʼusi koltaat-o Job sventa tukʼ-o xakʼ sba?  Jaʼ ti toj lek xa onoʼox xil sba xchiʼuk Jeova kʼalal mu toʼox chil li vokolil taje. Akʼo mi muʼyuk chichʼ alel kaʼitik mi snaʼoj Job ti oy kʼusi la xchibal kʼopta li Satanase, li stuke tukʼ-o laj yakʼ sba. Xi laj yal ta melel: «Muʼyuc ta jcomtsan o cʼu xʼelan coʼnton cʼalal to chicham» (Job 27:5). ¿Kʼusi la spas sventa lek tajek xil sba xchiʼuk li Diose? Ti kʼusie jaʼ ti xojtikin li Jeova ta skoj ti snaʼojbe skʼoplal ti kʼuyelan laj yil sbaik xchiʼuk Dios li Abraham, Isaac xchiʼuk Jacob ti jaʼ smoltotak li Jobe xchiʼuk ti te van snakʼoj ta yoʼonton li kʼusitik taje. Jech xtok, laj van yojtikinbe lek stalelal Dios kʼalal tskʼel lek li kʼusitik spasojane (kʼelo Job 12:7-9, 13, 16).

18. 1) ¿Kʼuxi laj yakʼ ta ilel Job ti yichʼoj ta mukʼ li Diose? 2) ¿Kʼuxi xuʼ jchanbetik li slekil talelal Jobe?

¹⁸ Li kʼusi la xchan ta sventa Jeova li Jobe, jaʼ tijbat-o yoʼonton ta skʼanel ti akʼo lek x-ilate. Jech, nopajtik onoʼox laj yakʼ matanal ta stojolal Dios ta sventa mi oy spasoj smul li yutsʼ yalale o ti «oy bu chchopolcʼopojic ta stojol Dios ta yoʼntoni[ke]» (Job 1:5). Akʼo mi toj tsots tajek li svokol Jobe, oy onoʼox kʼusi lek chal ta stojolal li Diose (Job 10:12). ¡Toj lek ta chanbel stalelal! Skʼan me xkojtikintik lek li Jeova eke xchiʼuk li kʼusitik tskʼan tspase. Skʼan me nopajtik noʼox jchʼakbetik yorail li kʼusitik sventa mantale, jech kʼuchaʼal li xchanel jVivliatike, li tsobajeletike, li spasel orasione xchiʼuk li chol mantale. Jech xtok, skʼan me xkakʼbetik yipal ti bu kʼalal xuʼ kuʼuntik ta yakʼel ta naʼel li sbi Diose. Jech kʼuchaʼal xmuyubaj noʼox yoʼonton Jeova ta skoj li stukʼil yoʼonton Jobe, jaʼ me jech xuʼ xmuyubaj yoʼonton kuʼuntik ek mi tukʼ koʼonton chkakʼ jbatike. Taje jaʼ chalbe skʼoplal li yan xchanobile.

¿Mi xvul ta ajol?

• ¿Kʼusi ti laj-o ta ilbajinel yuʼun Satanás li Jobe?

• ¿Kʼusitik prevail la snuptan li Jobe, xchiʼuk kʼusi la spas?

• ¿Kʼusi tskoltautik sventa jchanbetik stalelal li Jobe xchiʼuk ti tukʼuk koʼonton xkakʼ jbatike?

• ¿Kʼusi chakʼ jchantik ta sventa Satanás li slivroal Jobe?

[Sjakʼobiltak sventa xchanobil]

[Lokʼol ta pajina 4]

Li sloʼil xkuxlejal Jobe tsvules ta joltik li kʼusi chibal kʼoptabil ta sventa li mukʼul pas mantal yuʼun Jeovae

[Lokʼol ta pajina 6]

¿Kʼusitik xuʼ chakʼ ta preva li stukʼil koʼontontike?