Li kʼusitik tsjakʼ jkʼel vunetike

¿Mi ta van xchaʼkuxi li jun olol ti chamem vokʼe?

Ti buchʼu muʼyuk jech snuptanoj kʼuchaʼal taje yikʼaluk van tsots chaʼi ta nopel ti kʼuyelan chaʼi sbaik li totil-meʼiletik ti jech snuptanojik vokolile. Oy junantike kʼux ta jyalel chaʼiik. Jech kʼuchaʼal liʼe, jun ermanae voʼob to velta yal yol. Akʼo mi laj to yil chaʼvoʼ yol ta tsʼakal xchiʼuk ti la stsʼitese, te-o lek ta sjol ti kʼuyelan la xchiʼin li yalabtak ti muʼyuk lek xvokʼe. Kʼalal chcham xaʼoxe vul to ta sjol ti jayib sjabilalik jechuk li yalabtak ti kuxulikuke. ¿Mi xuʼ van spat yoʼonton totil-meʼiletik ti chilik chchaʼkuxi li yalab xnichʼnabik ti muʼyuk kuxul xvokʼe?

Toj kʼun li stakʼobile: mu jnaʼtik, yuʼun li Vivliae muʼyuk tsjambutik lek smelolal mi ta xchaʼkuxi li ololetik ti chamem vokʼike. Li kʼusi ta jtatik ta sKʼop Diose jaʼ beiltaseletik ta sventa li loʼil taje, ti chakʼ jutuk spatobil koʼontontike.

Kʼalal mu to ta jtakʼtik taje, jkʼeltik baʼyuk chib sjakʼobil ti lek snitojbe sba skʼoplalike. Baʼyel, ¿kʼusi ora chlik xkuxlejal jun olol chil li Jeovae: mi jaʼo kʼalal chkome o mi jaʼo kʼalal chvokʼe? Xchibal, ¿kʼu yelan chilbe xkuxlejal li jun olole: mi jaʼ xa van jun krixchano chil o mi jaʼ noʼox van uni selulaetik chil ti stsoboj sba xchiʼuk yan kʼusitik ti sjaloj sbae? Li beiltaseletik ta Vivliae jaʼ chakʼbutik stakʼobil li chib sjakʼobil taje.

Jaʼ jech kʼuchaʼal chal li sMantal Moisese, li xkuxlejal jun olole maʼuk to te chlik ti kʼalal chvokʼe, yuʼun likem xa onoʼox. Jaʼ yuʼun, li buchʼu ta smil jun olol ti muʼyuk to vokʼeme ta me xichʼ milel ek. Xi chal li Mantale: «Skʼan chavakʼ kuxlejal ta kuxlejal» (Éxo. 21:22, 23, NM). a Jaʼ yuʼun, li jun olol ti te ta yalajeb smeʼe jaʼ xa jun kuxlejal. Li mantal taje skoltaoj epal miyon yajtsʼaklomtak Cristo ta yaʼibel lek smelolal ti mu stakʼ syales yolike, yuʼun jaʼ jun tsatsal mulil ta stojolal Dios.

Jech kʼuchaʼal chkiltike, li xkuxlejal jun olole jaʼo chlik ti kʼalal chkom yol li antse. Veno, pe ¿mi oy van sbalil chil Jeova li kuxlejal taje? Li Mantal ti laj xa kalbetik skʼoplale, chal ti ta la xichʼ milel li buchʼu tsmil jun uni olole. Lek jamal ta aʼiel chaʼa ti ep sbalil chil Dios li kuxlejal taje. Jech xtok ep tekstoetik ta Vivlia chakʼ ta aʼiel ti jaʼ xa jun krixchano chil Jeova li olol ti muʼyuk to vokʼeme. Jech kʼuchaʼal liʼe, li ajvalil Davide xi laj yalbe Jeova li kʼusi akʼbil snaʼ yuʼun Diose: «Laj acʼatajesun ta xchʼut ti jmeʼe. [...] Laj avil ta aba ta asat cʼu sʼelan lic chapajuc talel ti jbecʼtale scotol taje tsʼibabil com ta jpoc avun un». «Li sbekʼ asate laj yil ti kʼalal li kom ta chʼutile, tsʼibabil avuʼun ta alivro skotol li kʼusitik yuʼune, li skʼakʼaliltak kʼalal imeltsaj tale xchiʼuk kʼalal chʼabal toʼox mi junuk li kʼusitik ta jbekʼtale.» (Sal. 139:13-15, Ch; 139:16, NM; Job 31:14, 15.)

Li Jeovae yiloj ti kʼuyelan chtal li jun olole xchiʼuk ti kʼuyelan li yipale. Jech kʼuchaʼal liʼe, kʼalal jaʼo xchiʼuk Jacob xchiʼuk Esaú li yajnil Isaac ti Rebeca sbie, lik smaj sbaik ta yut chʼutil li uni ololetike. Vaʼun li Jeovae laj yal jun albil kʼop ta sventa li ololetike, yuʼun oy kʼusi laj yil ta stojolalik ti oy kʼusi chkʼot ta pasel yuʼunik ta mas tsʼakale (Gén. 25:22, 23; Rom. 9:10-13).

Li Juan J-akʼvanej ta voʼe jaʼ yan skʼelobil xtok ti toj lek ta albel skʼoplale. Xi chal jun Evanjelio: «Cʼalal laj yaʼay icʼopanat yuʼun María li Isabele [Elisabet], tsots la xijilan sba li yol xchiʼinoje. Li Isabele iventainbat yoʼnton yuʼun li Chʼul Espiritue» (Luc. 1:41). Li ta teksto taje li doktor Lucase la stunes jpʼel griego kʼop ti jaʼ chalbe skʼoplal li jun olol ti mu to bu vokʼeme o ti vokʼem xae. Jaʼ onoʼox la stunes li jpʼel kʼop kʼalal laj yalbe skʼoplal Jesús kʼalal te oy ta veʼeb vakaxe (Luc. 2:12, 16; 18:15).

Ta skoj ti kʼusitik laj kalbetik skʼoplale, ¿mi xuʼ  van xkaltik ti jelel chalbe skʼoplal Vivlia li jun olol ti mu to chvokʼe xchiʼuk li jun olol ti jaʼ to vokʼe? Moʼoj yilel. Jech xtok, ti jech chkaltike xkoʼolaj skʼoplal xchiʼuk li kʼusitik staojik ta ilel sientifikoetik avie. Jech kʼuchaʼal liʼe, li buchʼutik skʼelojbeik lek skʼoplale yakʼojik lek venta ti xaʼi jaxel o kʼoponel li jun olol ti muʼyuk to vokʼeme xchiʼuk ti xuʼ chakʼ ta ilel ti chaʼi li kʼusi ch-albat o tspasbate. Jaʼ yuʼun mu vokoluk ta chʼunel ti toj lek tajek xil sba xchiʼuk smeʼ li jun olol ti yakal chchʼi tal ta yut chʼutile.

Jech xtok, ti kʼu sjalil chchiʼin yol jun antse mu koʼoluk sjalil kʼuchaʼal yantike. Jnopbetik skʼoplal jun ants ti cham ta jun chib kʼakʼal li sneneʼ ti muʼyuk staoj yual vokʼe. Jnopbetik skʼoplal yan ants ti muʼyuk xyal li yole, pe ti cham ta yut chʼutil kʼalal jutuk xaʼox skʼan xvokʼe. ¿Mi lek van ti ta jnoptik ti jaʼ chchaʼkuxi yol li buchʼu kuxul ivokʼ ti muʼyuk tsʼaki lek yuale?

Ta jaypʼeluk noʼox kʼope, li Vivliae chalbutik ti jaʼo chlik xkuxlejal jun olol kʼalal chkom ta yalajeb smeʼe xchiʼuk ti jaʼ xa jun krixchano chil Jeova li jun olol ti muʼyuk to vokʼeme, yuʼun toj ep sbalil chilbe li xkuxlejale. Ta sventa li kʼusitik taje, oy jlom yajtsʼaklom Cristoe xuʼ van mu sta-o chaʼiik ta yalel ti muʼyuk chchaʼkuxi li ololetik ti chamem vokʼike. Yuʼun mi muʼyuk chchaʼkuxiike xuʼ van tsnopik ti tskʼunibtas li kʼusitik jchʼunojtik ta Vivlia ta sventa li syalesel olole, ti jaʼ te lokʼem tal li ta kʼusitik melel laj kalbetik skʼoplale.

Li ta mas voʼnee, li revista liʼe oy jaytos kʼusi la sjakʼ ti chakʼ ta ilel ti muʼyuk ta xchaʼkuxi yileluk li ololetik ti chamem ta xvokʼike. Jun li sjakʼobil taje jaʼ la ti mi tstikʼbe ochel Jeova ta yalajeb jun ants li xkuxlejal jun uni olol ti jaʼtik to komem sventa chchʼi ta yut chʼutil kʼalal mi kʼatajem xaʼox ta Paraiso li balumile. Pe kʼalal ep chanunaj, la snopbe lek skʼoplal xchiʼuk ti la spas ep orasion li Jtsop Jbeiltasvaneje, kʼot ta nopel yuʼun ti muʼyuk bu tsjel jsetʼuk spatobil koʼontontik ta sventa chaʼkuxesel li kʼusitik taje. Li Jesuse xi laj yale: «Scotol xuʼ yuʼun li Diose» (Mar. 10:27). Li kʼusi kʼot ta xkuxlejal stuk Jesuse jaʼ chakʼ ta ilel ti melel li kʼusi laj yale, yuʼun li xkuxlejale ta vinajel to likem talel, vaʼun laj yichʼ jelubtasel ta yalajeb jun ants ti muʼyuk to yiloj vinike, taje mi jaʼuk buchʼu spas yuʼun chil li krixchanoetike.

Ta sventa ti kʼusi laj xa kaltike, ¿mi jaʼ van skʼan xal ti chchaʼkuxiik li ololetik ti chamem vokʼike? Ta jkʼantik ti jamal lek chkom skʼoplale, li Vivliae muʼyuk tsjambutik lek smelolal taje, jaʼ yuʼun mu me stakʼ ti jpʼel xa noʼox li kʼusi chkaltike. Ta sventa ti ep tajek kʼusitik xuʼ jakʼtik ta sventa li loʼil taje, jaʼ yuʼun muʼyuk lek mi ta jnop jtuktike. Li kʼusi jnaʼojtike jaʼ ti jaʼ oy ta skʼob li Jeovae xchiʼuk ti jaʼ jun Dios ti toj echʼ noʼox chkʼanvan xchiʼuk chkʼuxubinvane (Sal. 86:15). Ta melel: li Jeovae «oy ta [y]oʼonton» chchaʼkuxes li buchʼutik chamemik sventa xchʼayes skotol li vokoliletik yakʼoj tal lajelale (Job 14:14, 15, NM). Xuʼ me jpat lek koʼontontik ti jaʼ tspas li kʼusi tukʼe. Jaʼ chpoxta skotol li jyayijemaltik yakʼoj chopol balumil liʼe, yuʼun li Jeovae yakʼojbe ta skʼob xNichʼon ti «ta slilinbe yabtel ti pucuje» (1 Juan 3:8, Ch).

[Tsʼib ta yok vun]

[Lokʼol ta pajina 13]

Li Jeovae chpoxta skotol li jyayijemaltik yakʼoj balumile