¿Mi xvul ta ajol?

¿Mi akʼupinoj skʼelel Li Jkʼel osil ta toyole, ti achʼik to lokʼem tale? Mi jeche, paso preva mi xtakʼ avuʼun li kʼusitik liʼe:

• ¿Kʼu yuʼun toj tsots skʼoplal ti tukʼuk koʼontontik li yajtsʼaklomutik Cristoe?

Yuʼun jaʼ jmoton jtaojtik ti chkakʼtik ta ilel ti ta slekil koʼontontik chkakʼ jbatik ta ventainel li ta mukʼul pas mantal yuʼun Jeovae xchiʼuk jaʼ jech chkakʼtik ta ilel ti jaʼ jun jut kʼop li Satanase. Jech xtok jaʼ tskʼel stukʼil koʼontontik sventa chchapanutik li Jeovae, yuʼun jaʼ me te chvinaj mi xuʼ jpat koʼontontik stael li kʼusi chtal ta jelavele (15/12, pajina 4-6).

• ¿Kʼusi sbitak Jesús ti chakʼ ta ilel ti stuk noʼox jech li yabtel ta sventa li kʼusi tskʼan yoʼonton Diose?

«Li jun noʼox Xnichʼon Diose», li «Cʼope», li «Bochʼo Jechuc», li «Jcʼopojel cuʼuntic ta sventa li cʼusi achʼ chapanbile», li Mero Bankilal Palee xchiʼuk li albil Nitilulale (15/12, pajina 15).

• ¿Kʼuxi xuʼ xi jmuyubaj noʼox kʼalal ta jcholtik mantale?

Skʼan jchapan koʼontontik, skʼan jnoptik ti ep kʼusi ta jtatik ta skoltael li krixchanoetike. Skʼan jnoptik xtok ti ta jlikestik chanubtasel ta Vivlia kʼalal ta jcholtik mantale. Xchiʼuk mi mu skʼanik ta jyalel mantal li krixchanoetike, xuʼ jsabetik yan smelolal kʼuxi ta jcholtik mantal sventa xkʼot ta yoʼonton kuʼuntik li krixchanoetike (15/1, pajina 8-10).

• ¿Kʼuxi chtun yuʼun yajtsʼaklomtak Cristo li chanubtaseletik ta Vivlia ta sventa ti kʼu yelan chilik li kostumbreetik ta muklomale?

Akʼo mi chokʼitaik kʼalal oy buchʼu chcham yuʼunik li yajtsʼaklomtak Cristoe, snaʼojik lek ti mu xa kʼusi xaʼi li buchʼutik chamemike. Jaʼ yuʼun, akʼo mi chakʼik vokolil li buchʼutik maʼuk yajrextiko Jeovae, muʼyuk bu tspasik li kʼusitik chakʼ ta ilel ti chʼunbil ti oy la kʼusi xuʼ spas ta jtojolaltik li animae. Jech oxal, sventa mu xlik kʼope, jlom krixchanoetike tstsʼibaik komel ta vun ta sventa ti kʼuyelan tskʼanik mukele (15/2, pajina 29-31).

• ¿Mi jaʼ van skʼoplal vunetik ti yakʼoj ta naʼel Dios ti chʼay skʼoplal ta tsʼakal li «svun li Jaser» xchiʼuk li «Slibroal Leto yuʼun ti Diose»? (Jos. 10:13; Núm. 21:14, Ch.)

Maʼuk. Yileluke jaʼ vunetik o tsʼibetik ta skʼakʼalil Vivlia ti laj yalbeik skʼoplal junantik jtsʼibajometik yuʼun Vivliae. Pe taje maʼuk yakʼoj ta naʼel Dios (15/3, pajina 32).