Ta smeloluk noʼox xichʼ tunesel li poxe

Ti ta smelol noʼox chichʼ tunesel li kʼusitike jaʼ me jun tojobtasel ta Vivlia. Jech li pom eke lek kʼalal ta smelol noʼox chichʼ lajesele; pe mi ep chichʼ lajesele ch-ilbajinvan (Pro. 25:27). Jaʼ jech ta sventa li matanaletik yakʼoj Jeova ta sventa li yaʼlel tsʼusube xchiʼuk li yan kʼusitik stakʼ uchʼel ti yichʼoj poxe: skʼan jechuk xichʼ tunesel kʼuchaʼal chal li Jeovae. Mi chjelav yuchʼel xchiʼuk ti muʼyuk chichʼ chʼunel li mantaletik ta Vivlia ta sventa li matanaletik taje, muʼyuk me lek ch-ilvan-o li Jeovae, chlik-o kʼop xchiʼuk chmilvan. Li Vivliae lek chalbe skʼoplal taje, ta smantaltak xchiʼuk li ta kʼusitik kʼotem ta pasele (Pro. 23:29-31).

Oy bateltik ti muʼyuk lek ti chichʼ uchʼel poxe, akʼo mi uni juteb tajek, yuʼun xuʼ ch-ipajesvan. Ta yan xtoke yikʼaluk van muʼyuk chuchʼ pox jun krixchano sventa mu smakbe ta be yok li xchiʼiltake, ta skoj ti skʼanoje xchiʼuk ti oy ta yoʼontone (Rom. 14:21).

Li Jeovae laj yalbe paleetik xchiʼuk jlevietik ti chichʼik milel mi chuchʼik kʼusiuk poxal kʼalal tspas li yabtel akʼbilik ta chʼulna pasbil ta nukule xchiʼuk li ta chʼulnae (Lev. 10:8, 9; Eze. 44:21). Xuʼ chuchʼik kʼalal jaʼo muʼyuk tspas li yabtelike, jaʼ noʼox ti ta smeloluk noʼox une (1 Cró. 9:29). Kʼalal tspas yabtelike, «mu lecuc me chuchʼic pox li ajvaliletique; mu lecuc me chyacubic li banquilaletique. Me jech te chuchʼilanic o poxe, xuʼ chlic chʼayuc ta yoʼntonic li mantaletique, jech mu xa stucʼulanbeic o yaʼyej li bochʼo abul sbaique» (Pro. 31:4, 5). «Tscʼan mu xyacub» li jchabivanejetik ta stsobobbail yajtsʼaklomtak Cristoe xchiʼuk «li bochʼo ta xʼoch ta yajcoltaubbail jcholcʼopetique tscʼan lec scʼoplalic, [...] tscʼan mu xyacubic» ek (1 Tim. 3:3, 8).