Tsmuyubtabe yoʼonton Jeova li stukʼil koʼontontike
Tsmuyubtabe yoʼonton Jeova li stukʼil koʼontontike
«Jnichʼon, bijan me, jech xcuxet noʼox coʼnton avuʼun; jech xuʼ ta jtacʼbe li bochʼo chopol chiyalbun jcʼoplale.» (PRO. 27:11)
1, 2. 1) ¿Kʼusi la xchibal kʼopta Satanás jech kʼuchaʼal chal slivroal Jobe? 2) ¿Kʼuxi jnaʼojtik ti yakal-o tstsal yaʼi Jeova li Satanase?
LI Jeovae laj yakʼ ti akʼo spasbe ta preva stukʼil yoʼonton Job li Satanase. Ti kʼusi kʼot ta pasel une, jaʼ ti chʼay stekel xchonbolomtake, xnichʼnab xchiʼuk ipaj li stuke. Pe li Diabloe maʼuk noʼox la xchibal kʼoptabe li stukʼil yoʼonton Jobe, yuʼun xi laj yale: «Xuʼ chacʼ cʼusitic yan ta sventa chcʼuxubin sbecʼtal stuc. Yuʼun li cristianoe xuʼ chacʼ scotol cʼusi oy yuʼun, jaʼ noʼox venta me cuxul chcom stuque». Jaʼ jech oy kʼusi la xchibal kʼopta ti ep krixchanoetik te smakojbe skʼoplale xchiʼuk ti te-o ta jkʼakʼaliltike (Job 2:4).
2 Te van vakibuk sien jabil yechʼel ti kʼusi kʼot ta pasel ta stojolal Jobe, xi la stsʼiba Salomón li kʼusi akʼbat snaʼ yuʼun Jeovae: «Jnichʼon, bijan me, jech xcuxet noʼox coʼnton avuʼun; jech xuʼ ta jtacʼbe li bochʼo chopol chiyalbun jcʼoplale» (Pro. 27:11). Jamal xvinaj ti tskʼan-o tstsal yaʼi Jeova li Satanás ta skʼakʼalil Salomone. Ta mas tsʼakale oy kʼusi akʼbat yil yuʼun Dios li jtakbol Juane, te laj yil ti tsabe smul yajtuneltak Dios li Satanás kʼalal laj yichʼ nutsel lokʼel ta vinajele (taje jaʼo kʼot ta pasel kʼalal likem xaʼox ta abtel li Ajvalilal yuʼun Dios ta 1914). Jaʼ jech-o tspas li Diablo ta jkʼakʼaliltik ti oyutik tajek ta slajebal li kʼusitik chopol liʼe, yakal-o chchibal kʼoptabe stukʼil yoʼonton li yajtuneltak Diose (Apo. 12:10).
3. ¿Kʼusitik tsots skʼoplal ta jchantik li ta slivroal Jobe?
3 Li ta xchanobil liʼe ta jkʼeltik oxtos kʼusitik tsots skʼoplal ti te ta jchantik ta slivroal Jobe. Baʼyel, li Satanase jaʼ li sbatsʼi kontra krixchanoetike xchiʼuk ti jaʼ oy ta sba li kontrainel tsnuptan steklumal Diose. Xchibal, kʼusiuk noʼox prevail jnuptantik xuʼ me tukʼ-o koʼontontik mi nopol oyutik ta stojolal Jeovae. Yoxibal, ta me skoltautik Jeova kʼalal ta jnuptantik vokolil jech kʼuchaʼal la skolta li Jobe. Ta melel, ta me skoltautik ta sKʼop, ta s-organisasion xchiʼuk ta xchʼul espiritu.
Mu me jchʼay ta joltik buchʼu li jbatsʼi kontratike
4. ¿Buchʼu ta smul ti kʼu yelan oy li balumil avie?
4 Jaʼ mas ep li krixchanoetik ti chat-o tajek yoʼontonik li kʼusi yakal chkʼot ta pasel ta balumile, pe mu xaʼibeik smelolal ti kʼu yuʼun chkil tajek jvokoltike. Mu xaʼibeik smelolal ta skoj ti mu skʼan xakʼik venta ti oy li Satanase, ti jaʼ li batsʼi j-akʼ vokolile. Melel onoʼox ti ep vokoliletik yakʼoj tal ek li krixchanoetike. Kʼalal lik xchʼak sbaik tal ta stojolal Jpasvanej li baʼyel jtot jmeʼtike, li Adán xchiʼuk Evae, li krixchanoetike muʼyuk kʼusi lek lik spasik tal. Pe jaʼ Diablo ti la sloʼla Evae xchiʼuk ti la stijbe yoʼonton ti akʼo stoy sba ta stojolal Diose. Jaʼ ti la sokes tal li kuxlejal kʼuchaʼal chkiltik avie, ti yantik sok batele xchiʼuk ti jaʼ sventainoje. Ta skoj ti jaʼ «yajval banamile», jaʼ jech tajek stalelal ek li krixchanoetik kʼuchaʼal Satanase: toybail, tsalbail o ut-utbail, itʼixal, skʼanel tajek kʼusitik, muʼyuk stukʼil oʼontonal xchiʼuk ti mu skʼan xchʼunik mantale (2 Cor. 4:4; 1 Tim. 2:14; 3:6; kʼelo Santiago 3:14, 15). Li talelaletik taje yakʼoj talel kʼopetik ta politika xchiʼuk ta relijion, pʼajbail, manbail ta takʼin xchiʼuk ti muʼyuk noʼox smelolike, taje jaʼ yakʼojbe tajek svokol li krixchanoetike.
5. ¿Kʼusi skʼan jpastik ta sventa ti oy kʼusitik labalik sba jchanojtike?
5 Pe li yajtunelutik Jeovae xuʼ oy mukʼ jmotontik chkaʼi jbatik, yuʼun jnaʼojtik buchʼu ta smul ti kʼuyelan abol sba ta jyalel li balumile. ¿Mi mu tstijuk avoʼonton ta yalbel krixchanoetik ta chol mantal li kʼusi melel taje? ¿Mi mu xa muyubajuk chavaʼi ti cha pakbe skʼoplal li sbi melel Diose xchiʼuk ti cha chapbe krixchanoetik ti tslajes Satanás li Jeovae xchiʼuk ti tslajes stekel li jvokoltike?
6, 7. 1) ¿Buchʼu ta smul li kontrainel chil steklumal Diose? 2) ¿Kʼuxi xuʼ jchanbetik stalelal li Eliue?
6 Maʼuk noʼox oy ta sba Satanás li epal vokoliletik chkʼot ta pasel ta balumile, yuʼun jaʼ ta smul xtok li kontrainel chil steklumal Diose. Jpʼel ta yoʼonton tspasutik yaʼi ta preva. Xi albat yuʼun Jesucristo li jtakbol Pedroe: «Aʼyio avaʼi, Simón, Simón, ti pucuje laj xa scʼan ti acʼo avichʼic lilinel jech cʼu chaʼal ta xichʼ icʼael ti trigoe» (Luc. 22:31, Ch). Li voʼotik ti yakal ta jtsʼaklitik li Cristo eke ta me xkiltik jtosuk preva. Jaʼ yuʼun laj yal Pedro «ti xʼavet noʼox» kʼuchaʼal «león» ti tskʼan tstiʼutik yaʼi li Diabloe. Xi laj yal li Pablo eke: «Li bochʼo scotol yoʼnton chtun o yuʼun li Jesucristoe ta onoʼox xichʼ ep utsʼintael» (1 Ped. 5:8; 2 Tim. 3:12).
7 Mu me stakʼ ti jnoptik ti jaʼ ta smul Jeova kʼalal tsnuptan vokolil jun ermanoe. Jech kʼuchaʼal laj xa kiltike, jaʼ ta smul li Satanase. Mu me jechuk jpastik kʼuchaʼal la spas li yamigotak Job ta alel ti la snamajes sbaik ta stojolale, moʼoj, jaʼ jech jpastik kʼuchaʼal Eliú ti kʼot ta mero yamigo li Jobe. Jkolta li kermanotaktik ti akʼo stsalik li kajkontratik Satanase (Pro. 3:27; 1 Tes. 5:25). Ti kʼusi ta jkʼantike jaʼ ti tukʼuk-o yoʼonton kʼalal oy kʼusi tsnuptane, yuʼun me jaʼ jech xuʼ smuyubtabe yoʼonton li Jeovae.
8. ¿Kʼu yuʼun muʼyuk xuʼ yuʼun Satanás ti akʼo xikta ta skʼupil kʼoptael Jeova li Jobe?
8 Kʼalal lik spas ta preva Job li Diabloe jaʼ baʼyel la spojbe li xchonbolomtake, ti jaʼ van mas te tsta-o stakʼine. Jech xtok, li xchonbolomtak Job taje jaʼ tstunes junantik sventa chakʼbe ta chikʼbil matanal li Jeovae. «Sob chliquic ta yocʼomal; chchicʼ smoton Dios ta sventa li jujun xnichʼnabe, yuʼun, chacʼ ta lecubtasel ta sventa smulic. Yuʼun li Jobe jech snopoj ta yoʼnton: “Oy yicʼal oy bu tsta smulic; oy bu chchopolcʼopojic ta stojol Dios ta yoʼntonic li jnichʼnabe”, xi. Jaʼ yuʼun jaʼ jech la spasilan o.» (Job 1:4, 5.) Pe kʼalal lik akʼatuk ta preva li Jobe mu xa xuʼ xakʼ li chikʼbil matanal jech kʼuchaʼal nopem xaʼie, yuʼun chʼay skotol li «cʼusitic oy [yuʼun]» ti jaʼ toʼox tskʼupil kʼopta-o Jeovae (Pro. 3:9). Akʼo mi jech, xuʼ to tskʼupil kʼopta ta ye, vaʼun jaʼ jech la spas.
Oyuk kʼusi jpastik sventa nopoluk oyutik ta stojolal Jeova
9. ¿Kʼusi ti mas tsots skʼoplal oy kuʼuntike?
9 Xuʼ me oy kʼusi jpastik sventa nopoluk oyutik ta stojolal Jeova, mi oy o muʼyuk jtakʼintik, mi ep xa jabilaltik o mi moʼoj, mi ip noʼox chkaʼi jbatik o mi muʼyuk. Kʼusiuk li prevail ta jnuptantike, mi nopol oyutik ta stojolal Jeovae jaʼ me tskoltautik ti tukʼuk-o koʼontontik ta stojolale xchiʼuk ti ta jmuyubtabetik yoʼontone. Jech xtok, akʼo mi jaʼ to chlik xchanik mantal li krixchanoetike, yakʼoj ta ilel stukʼil yoʼontonik xchiʼuk ti muʼyuk chiʼike.
10, 11. 1) ¿Kʼusi la spas jun ermana ta Rusia kʼalal la snuptan prevaetike? 2) ¿Kʼuxi lek laj yakʼ ta ilel jun ermana ti mu meleluk li kʼusi chal Satanase?
10 Jkʼelbetik skʼoplal Valentina Garnovskaya, jaʼ jun li ta epal ermanaetik ta Rusia ti tukʼ-o laj yakʼ yoʼontonik kʼuchaʼal Jobe. Li ta sjabilal 1945, kʼalal te van jtobuk jabil yichʼoje, cholbat mantal yuʼun jun ermano, pe jaʼ noʼox chib velta ay vulaʼanatuk ta tsʼakal sventa ch-albat li kʼusi chal Vivliae. Akʼo mi muʼyuk xa bu laj yil-o ermano li Valentinae lik xcholbe mantal li slakʼnatake. Ti kʼusi kʼot ta pasel ta skoj taje jaʼ ti bat ta chukel vaxakib jabile xchiʼuk ti akʼbat spas tsatsal abtele. Lokʼ ta chukel ta 1953, vaʼun ta anil noʼox lik xchol mantal xtok. Akʼo mi jech, la xchukik yan velta, pe taj une lajuneb xa jabil tikʼe ta chukel. Kʼalal oy xaʼox jayib jabil xchukele, la sjelubtasik batel ta yan chukinab ti bu oy yan ermanaetik ti oy jlik sVivliaike, jun veltae akʼbat yil yuʼun jun ermana li Vivlia taje. Toj yan sba yutsil laj yaʼi Valentina taje, yuʼun kʼajomal noʼox jun velta yiloj li Vivliae, jaʼo ti kʼalal cholbat mantal yuʼun li ermano ta 1945.
11 Lokʼ ta chukel ta 1967 li Valentinae, vaʼun jaʼ to te laj yichʼ voʼ sventa chakʼ ta ilel ti laj xa yakʼ sba ta stojolal Jeovae. Kʼalal lokʼ xaʼox ta chukele lik xchol yan velta ta sjunul yoʼonton li mantale. Akʼo mi laj yichʼ chukel oxib jabil li ta 1969 xtoke, muʼyuk bu xikta-o li chol mantale. Kʼalal skʼan toʼox xcham ta sjabilal 2001 la skolta 44 krixchanoetik sventa xojtikinik li mantale. Chuke 21 jabil ta stekel xchiʼuk la spas tsatsal abteletik. Ta sjunul yoʼonton laj yikta skotol, akʼo mi tikʼe ta chukel ta skoj ti tskʼan tukʼ chakʼ sbae. Kʼalal jutuk xaʼox skʼan xchame xi laj yale: «Muʼyuk jna bu xuʼ xi naki. X-och noʼox ta jun maleta li kʼusitik oy kuʼune. Akʼo mi jech, xi muyubaj noʼox xchiʼuk jun koʼonton chi tun ta stojolal Jeova». Li xkuxlejal ermana taje jaʼ svinajeb lek ti mu meleluk li kʼusi chal Satanase, yuʼun li stuke chal ti ta la jvalopatintik Dios kʼalal chkiltik vokolile (Job 1:9-11). Jnaʼojtik lek ti la smuyubtabe yoʼonton Jeova li Valentinae xchiʼuk ti «oy ta [y]oʼonton» chchaʼkuxesate, jech kʼuchaʼal oy ta yoʼonton chchaʼkuxes li tukʼil yajtuneltak chamemike (Job 14:15, NM).
12. ¿Kʼu yuʼun ti lek xkil jbatik xchiʼuk Jeovae?
12 Ti lek xkil jbatik xchiʼuk Jeovae jaʼ ta skoj ti jkʼanojtike. Labalik sba chkiltik li stalelaltake xchiʼuk ta jpastik bu kʼalal xuʼ kuʼuntik li kʼusitik tskʼan yoʼontone. Mu yuʼunuk oy kʼusi ta jkʼantik kʼalal chi jtun ta stojolal Jeovae, moʼoj, yuʼun ta koʼontontik chlokʼ ti jkʼanojtike, mu jechuk ta jpastik kʼuchaʼal chal Diabloe. Li kʼanelal ta sjunul koʼontontik ta stojolal Jeova taje jaʼ tstsatsubtasutik xchiʼuk tskoltautik sventa tukʼuk-o koʼontontik kʼalal ta jnuptantik vokoliletike. Xchiʼuk tskoltautik li Jeovae, yuʼun «jaʼ ta xchabibe sbe xanebic li bochʼotic tucʼ yoʼntonique» (Pro. 2:8; Sal. 97:10).
13. ¿Kʼusi tsnop Jeova ta sventa li kabteltik ta stojolale?
13 Ti jkʼanojtik li Jeovae jaʼ me tstij koʼontontik ti akʼo jkʼupil kʼoptabetik li sbie. Akʼo mi jech, xuʼ van jnoptik ti toj jutuk kʼusi yakal ta jpastik sventa ta jkʼupil kʼoptatike. Mi jeche, mu me xchʼay ta joltik ti snaʼoj Jeova li kʼusi oy ta koʼontontike xchiʼuk ti muʼyuk bu tspʼajutik mi mu spas kuʼuntik ti kʼuyepal ta jkʼan ta jpastike. Ti kʼusi tsakbil ta ventae maʼuk ti kʼuyepal spas kuʼuntike, moʼoj, jaʼ ti kʼu yuʼun ta jpastike. Akʼo mi chat tajek yoʼonton Job ta skoj ti ep tajek laj yil svokole, laj yalbe li buchʼutik tsabat smul ti skʼanojbe tajek li smantaltak Jeovae (kʼelo Job 10:12; 28:28, Ch). Li ta slajebal kapitulo ta slivroal Jobe, li Diose te laj yalbe Elifaz, Bildad xchiʼuk Zofar ti chopol laj yil li kʼusi la spasike, yuʼun mu jamaluk kʼusi laj yalik ta stojolal li Jobe. Pe jaʼuk li Jobe lek ile, yuʼun chanib velta «cajtunel» xut xchiʼuk laj yalbe ti akʼo xkʼopoj ta stojolal li oxvoʼ viniketik taje (Job 42:7-9). ¡Toj tsots me skʼoplal ti jaʼuk jpastik skotol ora li kʼusi lek chi j-ile-o yuʼun Jeovae!
Li Jeovae tskolta li tukʼil yajtuneltake
14. ¿Kʼuxi la stukʼibtasbe snopben Job li Jeovae?
14 Tukʼ-o laj yakʼ sba li Jobe, akʼo mi jpas mulil. Melel onoʼox chaʼa, oy bateltik ti mu xa tukʼuk kʼusi la snop kʼalal jaʼo laj yil tajek svokole. Xi laj yalbe jun velta Jeovae: «Dios cuʼun, ta jcʼanbot vocol ta atojol, pero mu xavaʼibun li jcʼope; [...] ta avuʼel atsatsal chavutsʼintaun». Xchiʼuk jaʼ batem ta yoʼonton tspak skʼoplal ti chʼabal smul li Jobe. Jech kʼuchaʼal liʼe, xi laj yale: «Muʼyuc [jmul]» xchiʼuk «muʼyuc chopol cʼusi jpasoj; toj lec jcʼop la jcʼopan li Diose» (Job 10:7; 16:17; 30:20, 21). Akʼo mi jech la spas, kʼuxubine yuʼun li Jeovae. Ep kʼusi la sjakʼbe sventa mu xa epuk kʼusitik snop ta stojolal xchiʼuk ti akʼo xakʼ lek venta ti toj mukʼ li Diose, ti jaʼ toj bikʼit li krixchanoetike. La xchʼam tukʼibtasel li Jobe xchiʼuk la sjel li snopbene (kʼelo Job 40:8; 42:2, 6).
15, 16. ¿Kʼuxi tskoltautik Jeova li avie?
15 Li avi eke ta slekil yoʼonton xchiʼuk tsots tstojobtasutik li Jeovae. Xchiʼuk ep ta tos kʼuyelan yakʼojbutik bendision. Jech kʼuchaʼal liʼe, li Jesucristoe laj yakʼ xkuxlejal ta jtojolaltik. Koliyal taje xuʼ jtatik perton ta skoj jmultik xchiʼuk xuʼ nopol tajek oyutik ta stojolal Dios akʼo mi jpas mulilutik (Sant. 4:8; 1 Juan 2:1). Jech xtok, mi ta jkʼantike xuʼ me chakʼbutik xchʼul espiritu sventa tskoltautik ta stsalel li prevaetike. Xchiʼuk oy kuʼuntik sliklej li Vivliae. Mi ta jkʼeltik xchiʼuk mi ta jnopbetik lek skʼoplal li kʼusi chale, jaʼ me chchapanutik lek sventa stsal kuʼuntik kʼusiuk prevail. Kʼalal ta jchantike jaʼ me tskoltautik sventa xkaʼibetik lek smelolal ti kʼu yuʼun chibal kʼoptabil li mukʼul pas mantal yuʼun Jeova ta spʼejel vinajel-balumile xchiʼuk li stukʼil yoʼonton yajtuneltake.
16 Jech xtok, jaʼ jun mukʼta bendision ti te jkʼoplaltik li ta ermanoetik ta spʼejel Balumil ti tsmakʼlin ta mantal Jeova ta stojolal li «jʼabtel ti jun [«tukʼ», NM] yoʼnton [...], ti lec bije» (Mat. 24:45-47). Li ta sien mil tsobobbailetik oy kuʼuntik ta spʼejel Balumil li yajrextikoutik Jeovae te ch-echʼ tsobajeletik ti toj lek chanubtasel chakʼe xchiʼuk ti tskoltautik sventa stsal kuʼuntik li prevaetike. Taje te jamal vinaj ta stojolal jun chex tseb yajtsʼaklom Cristo ta Alemania ti Sheila sbie, ti ta jkʼelbetik batel skʼoplal tanae.
17. Albo junuk skʼelobil ti kʼu yuʼun toj tsots skʼoplal ti jchʼuntik li beiltasel chakʼ s-organisasion Jeovae.
17 Kʼalal jaʼo yakal ta chanun jun kʼakʼal li Sheilae, lokʼ echʼel ta salon li smaestroe, vaʼun li xchiʼiltak ta chanune la slokʼesik jun tabla ouija. Kʼalal laj yil li kʼusi chlik spasike lokʼ echʼel ta anil li Sheilae. Ta mas jelavele kʼot ta xchikin ti oy la buchʼutik laj yaʼi ti ay pukujetik tee xchiʼuk ti lokʼik la ta anil ta skoj xiʼele. ¡Toj lek ti kʼusi la spas Sheilae! Pe ¿kʼusi koltaat-o ti jech la spas ta anile? «Kʼalal skʼan toʼox jayibuk kʼakʼal skʼan xkʼot ta pasele —xi chal li Sheilae— laj yalbeik skʼoplal ta jun tsobajel ti toj xibal sba li tabla ouija taje. Jaʼ yuʼun chapalun xa onoʼox lek. Xchiʼuk ta jkʼan ta jlekubtasbe yoʼonton Jeova jech kʼuchaʼal chal Proverbios 27:11.» ¡Toj lek ti ay li ta tsobajel taje xchiʼuk ti la stsʼetanbe lek xchikinal li mantale!
18. ¿Kʼusi oy ta avoʼonton spasel?
18 Jchʼuntik-o me li beiltasel chakʼ s-organisasion Diose. Batik ta stekel li tsobajeletike, jkʼeltik li Vivliae xchiʼuk jchantik li vunetik sventa yajtsʼaklom Cristoe. Jaʼ me jech chkichʼtik li beiltasel xchiʼuk li koltael chtun kuʼuntike. Skʼan me nopolik noʼox jpastik orasion xtok xchiʼuk ti xkamigointik li yajtsʼaklomtak Cristo ti lek yijik ta mantale. Li Jeovae tskʼan ti xkuch kuʼuntike, spatoj yoʼonton ti tspas kuʼuntike xchiʼuk ti tukʼ koʼonton chkakʼ jbatike. Ta melel, jaʼ jun lekil matanal ti ta jkʼupil kʼoptabetik li sbie, ti tukʼ koʼonton chkakʼ jbatike xchiʼuk ti ta jmuyubtabetik yoʼonton li jDiostike.
¿Mi xa nabe li stakʼobile?
• ¿Kʼusi ti jaʼ ta smul Satanase?
• ¿Kʼusi ti mas tsots skʼoplal oy kuʼuntike?
• ¿Kʼu yuʼun ti lek xkil jbatik xchiʼuk Jeovae?
• ¿Kʼuxi tskoltautik Jeova li avie?
[Sjakʼobiltak sventa xchanobil]
[Lokʼol ta pajina 8]
¿Mi oy ta avoʼonton ta spukbel skʼoplal li kʼusitik labalik sba xavojtikine?
[Lokʼol ta pajina 9]
Xuʼ jkoltatik yan ermanoetik sventa tukʼ-o yoʼonton xakʼ sbaik
[Lokʼol ta pajina 10]
Ta sjunul yoʼonton laj yikta skotol sventa tukʼ-o chakʼ sba li Valentinae