Jchanbetik li stukʼil yoʼonton Itaie

«CAJVALTIC DIOS, voʼot ti toj echʼem avuʼele, toj tsotsic, toj labalic sba li avabtele. Puru melel, puru tucʼ scotol cʼusi chapas, voʼot ajvalilot yuʼun scotol cristianoetic ta jujun banamil. Cajval, muʼyuc bochʼo ti mu xiʼ ta atojole; muʼyuc bochʼo ti mu xal alequilale [o stukʼil avoʼonton].» Li kʼusi la skʼejintaik ta vinajel «li bochʼo ivuʼ yuʼunic stsalel li jtiʼvanej bolom xchiʼuc li slocʼobale» jaʼ chakʼ ta ilel ti tukʼ yoʼonton li Jpasvaneje (Apo. 15:2-4). Li Jeovae tskʼan ti jechuk stsʼites stalelal li yajtuneltak kʼuchaʼal taje (Efe. 4:24).

Pe li Satanase yakʼojbe tajek yipal ta snamajesel ta stojolal Dios stekel li krixchanoetik ti chtunik ta stojolale. Akʼo mi jech, jaʼ mas ep ti tukʼ-o yakʼoj sbaike, akʼo mi tsots tajek chil svokolik. ¡Toj tsots me skʼoplal chil Jeova ti jech tukʼ yoʼontonike! Xi chal li Vivliae: «Li Mucʼul Diose jaʼ lec scʼanoj li bochʼo tucʼ cʼusi tspase, mu scomtsan o li bochʼo lecubtasbilic xa yuʼune [o tukʼ yoʼontone]» (Sal. 37:28). Sventa skoltautik ta stsʼikel vokoliletik li Diose, te tsakal tal yuʼun ta sKʼop li epal krixchanoetik ti tukʼ yoʼonton echʼike. Jun li krixchano taje jaʼ li Itai ti likem ta Gate.

 Jun jyanlum krixchano ti te oy ta Israele

Li Itaie jaʼ jun chanem jpas kʼop, yaʼeluke te likem li ta ojtikinbil lum Filistea yuʼun Gate, jaʼ ti bu vokʼ li mukʼta natil krixchano Goliate xchiʼuk li yantik yajkontra Israel ti toj xibilike. Li Itaie lokʼik batel xchiʼuk vakib sien xchiʼiltak, vaʼun te la spas snaik ta nopol Jerusalén. Te ch-albat sbi ta Vivlia kʼalal chalbe skʼoplal ti jatav li ajvalil David kʼalal kontrainvan li skerem ti Absalón sbie.

Li Davide snaʼoj lek ti kʼuyelan chaʼi sba li Itai xchiʼuk sviniktake, yikʼaluk van vul ta sjol ti kʼalal jatavik batel ta Filistea xchiʼuk li vakib sien yajsoltarotak ti ta Israel likemike xchiʼuk ti te la spas snaik ta yosilal Gat kʼalal jaʼo yakal ta ajvalil li Aquise (1 Sam. 27:2, 3). ¿Kʼusi van tspasik li Itai xchiʼuk li sviniktak ta skoj ti kontraine xa David yuʼun li Absalone? ¿Mi ta xkontrainvanik ek, mi tskoltaik van li Davide o mi mu van bu tstikʼ sbaik?

Sventa jtakʼtik taje, jkʼeltik ti kʼusi kʼot ta pasel kʼalal jaʼo yakal chlokʼ ta Jerusalén li Davide. Kʼalal yakal xlokʼ ta Jerusalene te paj «ta slajeb xa na», taje yikʼaluk van jaʼ skʼan xal ti te paj ta slajeb na li ta jteklum taje, jaʼo kʼalal poʼot xaʼox xjelavik echʼel li ta jot bevoʼ Cedrón ti jaʼ te stukʼil batel li vits Olivatike (2 Sam. 15:17, Ch). Vaʼun li Davide la skʼel li sviniktak kʼalal yakal chjelavik echʼele. Te laj yil ti maʼuk noʼox te oy li tukʼil j-israeletik ti sventainoje, moʼoj, yuʼun te oy «ceretetic» xchiʼuk «peletetic». Pe oy to yan jkoltavanejetik te xtok: jaʼ li Itai xchiʼuk li vakib sien sviniktake (2 Sam. 15:18).

Li ajvalile laj yaʼibe smelolal ti kʼuyelan chaʼi sba li Itai ta skoj ti lokʼem ta slumale, jaʼ yuʼun xi laj yalbee: «¿Cʼu yuʼun ti tal achiʼinuncutic ec li voʼote? Jaʼ lec ti chasut batele, jaʼ xachiʼin li achʼ ajvalile [ti jaʼ chalbe skʼoplal li Absalone]. Yuʼun li voʼote yan alumal; jatovenot loqʼuel tal ta alumal. Xchiʼuc jaʼ to noʼox lavul volje. Mu smeloluc ti chaquicʼot batel ta anil yuʼun chbat achiʼinune, yuʼun li vuʼune mu jnaʼ cʼuxi chibat ec. Jaʼ lec sutan batel, icʼo sutel scotol li achiʼiltaque. Mucʼul Dios chayacʼboxuc bendición, xchiʼuc jaʼ chaxchiʼinoxuc o scotol cʼacʼal» (2 Sam. 15:19, 20).

Li Itaie laj yakʼ ta ilel ti muʼyuk buchʼu chjelbat li stukʼil yoʼontone, jaʼ yuʼun xi la stakʼe: «Ajvalil, ta xcal ta jamal ta stojol Mucʼul Dios xchiʼuc ta atojol ec, me cuxulun, o me te chicham batel, te onoʼox chajchiʼinot batel buyuc noʼox chabat» (2 Sam. 15:21). Li kʼusi laj yale jaʼ van vul-o ta sjol David li kʼusi yaloj Rute, ti jaʼ li smeʼ syayae (Rut 1:16, 17). Kʼuxubaj ta yoʼonton jaʼ yuʼun xi laj yalbee: «Batic un chaʼe, ba chiʼinuncutic [li ta jot bevoʼ Cedrone]». Jech kʼuchaʼal chal Vivliae «jmoj batic xchiʼuc David ti Itaie, xchiʼuc ti svinictac ti volol ta stojole, xchiʼuc ti yan ti xvoletic ta stojolique» (2 Sam. 15:22, Ch).

«Sventa jchanubtaseltic»

Xi chal Romanos 15:4: «Scotol li cʼusitic tsʼibabil comele jaʼ sventa jchanubtaseltic». ¿Kʼusi chakʼ jchantik li slekil talelal Itaie? Jnoptik baʼyel ti kʼusi van srasonal ti jech tukʼ yoʼonton la skolta Davide. Akʼo mi jaʼ jun jfilista ti lokʼem ta slumale, laj yakʼ lek venta ti jaʼ melel kuxul Dios li Jeovae xchiʼuk ti jaʼ jun tʼujbil vinik yuʼun li Davide. Li Itaie maʼuk la stsak ta mukʼ ti mu lekuk xil sbaik li jfilistaetik xchiʼuk li j-israeletike. Li Itaie maʼuk smiloj mukʼta jpas kʼop Goliat chil li Davide xchiʼuk li yantik xchiʼiltake (1 Sam. 18:6, 7). Jaʼ jun vinik chil ti toj lek ta chanbel stalelale xchiʼuk ti skʼanoj Jeovae. Ti jech stalelale jaʼ ichʼe-o ta mukʼ yuʼun li ajvalil Davide xchiʼuk akʼbat sbain jvokʼ soltarotak kʼalal lik stsakik ta kʼop li yajsoltarotak Absalone (2 Sam. 18:2).

Li avi kʼakʼal eke maʼuk me ta jkʼeltik ti jelajtik xkuxlejal li krixchanoetike, li stsʼunbalike xchiʼuk ti yan-o lum bu likemike. Mu me stakʼ jchopol kʼoptatik ti buchʼu mu to xkojtikintike xchiʼuk mu me stakʼ xi jpʼajvan, jaʼ lek ti jkʼelbetik slekil talelal li krixchanoetike. Ti kʼuyelan lek laj yil sbaik li David xchiʼuk Itaie chakʼ kiltik ti xuʼ stsal kuʼuntik li kʼusi tsmakutik ta skʼanel jchiʼiltaktik mi xkojtikintik xchiʼuk mi jkʼanojtik li Jeovae.

 Kʼalal ta jnopbetik skʼoplal li stalelal Itaie lek me ti xi jakʼbe jbatike: «¿Mi tukʼ koʼonton ta stojolal li Bankilal David ti jaʼ li Jesucristoe? ¿Mi chkakʼ ta ilel ti tukʼ koʼonton kʼalal baxbolun ta chol mantal xchiʼuk ta spasel ta “jchʼunolajel” li krixchanoetike?» (Mat. 24:14; 28:19, 20). «¿Bu to van kʼalal xuʼ xkakʼ ta ilel li stukʼil koʼontone?»

Li joliletik ta utsʼ-alalil eke xuʼ snopbeik lek skʼoplal li stalelal Itaie xchiʼuk ti xchanbeike. Li kʼusi laj yalbe ta melel tʼujbil ajvalil yuʼun Jeova li vinik ti likem ta Gate xchiʼuk ti ta sjunul yoʼonton chchiʼin echʼele, oy kʼusi kʼot ta pasel yuʼun ta stojolal li krixchanoetik ti te tijilik batele. Jaʼ me jech oy kʼusi chkʼot ta pasel ta yutsʼ yalal kʼalal oy kʼusi tsnop tspas sventa yichʼel ta mukʼ Jeova li joliletik avi kʼakʼale. Akʼo mi chakʼ vokol kʼuk sjalil ti jech chichʼ nopele, mu me jchʼay ta joltik li kʼusi chal Vivlia liʼe: «Voʼote [Jeova] chacʼuxubin ec li bochʼo chcʼuxubinvane», jaʼ xkaltik, li buchʼu tukʼ yoʼontone (Sal. 18:25).

Kʼalal laj yal Vivlia ti kʼuxi koltavan ta pas kʼop ta skontra Absalón li Itaie, muʼyuk xa bu ch-albat skʼoplal yan velta. Akʼo mi jech, li kʼusi laj kilbetik jutuk ta xkuxlejal ti jaʼo oy tajek tsots vokol kʼalal ajvalilaj Davide, ep kʼusi chakʼ jchantik li ta stalelale. Ta sventa ti te albil skʼoplal ta Vivliae jaʼ yan svinajeb ti oy tajek sbalil chil Jeova li stukʼil oʼontonale xchiʼuk ti chakʼ matanal ta skoje (Heb. 6:10).