Li anjeletike: «tacbilic noʼox yuʼun Dios, yuʼun acʼo bat [koltavanikuk]»

«Li jʼalmantaletique jaʼ noʼox chtunic yuʼun Dios. Tacbilic noʼox yuʼun Dios, yuʼun acʼo bat scoltaic li bochʼotic scʼoplal chcolic sbatel osile.» (HEB. 1:14)

1. ¿Kʼu yuʼun tspat tajek koʼontontik li kʼusi chal Mateo 18:10 xchiʼuk Hebreos 1:14?

 JUN veltae laj yal Jesús ti mu stakʼ smakbeik ta be yok li yajtsʼaklomtake, xi laj yale: «Qʼuelo me abaic, mu me muʼyucuc stu chavilic junuc li ololetic liʼi. Chacalboxuc avaʼyic, li jʼalmantaletic yuʼunic te ta vinajele scotol ora te chilbeic o sat li [sTotik] te oy ta vinajele» (Mat. 18:10). Xi laj yal li Pablo ta sventa li anjeletik eke: «Li jʼalmantaletique jaʼ noʼox chtunic yuʼun Dios. Tacbilic noʼox yuʼun Dios, yuʼun acʼo bat scoltaic li bochʼotic scʼoplal chcolic sbatel osile» (Heb. 1:14). Taje tspat koʼontontik ta jyalel, yuʼun chakʼ kiltik ti chtunesatik yuʼun Dios li anjeletik sventa tskoltautike. ¿Kʼusi mas chakʼ kiltik ta sventa anjeletik li Vivliae? ¿Kʼuxi tskoltautik? ¿Xchiʼuk kʼusi xuʼ jchanbetik li ta stalelalike?

2, 3. ¿Kʼusi yabtel tspasik li kuxlejaletik ti mu xkiltike?

² Ta smiyonal oy yaj-anjeltak ta vinajel li Diose xchiʼuk «ti oy [sjuʼelike], ti [ts]pasic scotol li cʼusitic [ch-albatike]» (Sal. 103:20; kʼelo Apocalipsis 5:11). Li kuxlejaletik taje oy lek snopbenal yuʼunik ta jujuntal, oy stalelalik ta jujuntal xchiʼuk jaʼ jech stalelalik kʼuchaʼal li sTotike. Toj lek chapalik ti kʼuyelan ch-abtejike xchiʼuk toj tsotsik skʼoplal ti kʼusi tspasik ta s-organisasion Diose. Jaʼ baʼyel oy li bankilal anjel Miguele, ti jech sbi yichʼoj ta vinajel li Jesuse (Dan. 10:13; Jud. 9). «Oy xa onoʼox cʼalal lic meltsajuc talel scotol ti cʼusitic oye.» Jaʼ «li Cʼope», o jaʼ li Jkʼopojel yuʼun Diose xchiʼuk ti buchʼu la stunes Jeova kʼalal la spas skotol li kʼusitike (Col. 1:15-17, Ch; Juan 1:1-3).

³ Oy anjeletik ti pasbilik ta mantal yuʼun li bankilal anjele, jaʼ li «serafinetic» ti chalik ti toj chʼul li Jeovae xchiʼuk jaʼ tskʼelik ti sakuk lek ta mantal li steklumale. Te xtok li «querubinetic» ti tspakbeik skʼoplal li mukʼul pas mantal yuʼun Diose (Gén. 3:24; Isa. 6:1-3, 6, 7). Li yan anjeletik o j-ichʼ kʼopetike oy yan yabtelik ek ti jaʼ onoʼox li spasbel kʼusi tskʼan yoʼonton Diose (Heb. 12:22, 23).

4. 1) ¿Kʼu yelan laj yilik anjeletik kʼalal laj yichʼ pasel li Balumile? 2) ¿Kʼusi kʼot ta pasel jechuk ti lekuk la stunes snopbenik li Adán xchiʼuk Evae?

⁴ Li kuxlejaletik ta vinajel taje xmuyubajik tajek  kʼalal imeltsaj li Balumile xchiʼuk xkuxet noʼox yoʼonton la spasik li abtelal ti akʼbatik yuʼun Jeova kʼalal yakal tspas li bu toj kʼupil sba yavil li krixchanoetike (Job 38:4, 7). Li Jeovae «jutuc xa noʼox biqʼuit [la spas] jech chac cʼu chaʼal [...] jʼalmantaleti[k]» li krixchanoe, akʼo mi jech, xuʼ chakʼ ta ilel li stalelal Dios ti toj labalik sbae, yuʼun ta slokʼol la spas (Heb. 2:7; Gén. 1:26). Ti lekuk la stunes snopbenik li Adán xchiʼuk Evae, kuxiik-o jechuk xchiʼuk snitilulik sventa tskʼupinik li nichimaltike xchiʼuk ti jaʼ-o yutsʼ yalalik li anjeletik ta vinajel ti toj pʼijik spasoj Jeovae.

5, 6. ¿Kʼusi toybail lik li ta vinajele, xchiʼuk kʼusi la spas Dios ta skoj taje?

⁵ Laj van yat yoʼontonik ta melel li chʼul anjeletik kʼalal lik stoy sbaik jlom li ta yutsʼ yalal Diose. Yuʼun oy jun ti mu xa lekuk chaʼi ti tskʼupil kʼopta Diose; yuʼun jaʼ xa tskʼan ichʼel ta mukʼ. Li anjel taje, ti jaʼ xa noʼox oy ta yoʼonton tskʼan ichʼel ta mukʼe, la xchibal kʼoptabe li ajvalilal yuʼun Jeovae xchiʼuk lik svaʼan jun mukʼul pas mantal yuʼun ek. Jaʼ jech kʼataj ta Satanás, ti jaʼ smelolal «Jkontrainvaneje». Ta sventa jun jutbil kʼop ti tsʼibabil komel skʼoplale, la stijbe yoʼonton Adán xchiʼuk Eva li Satanase, sventa jech stoy sbaik ek ta stojolal li Jpasvanej yuʼunik ti toj lek yoʼontone (Gén. 3:4, 5; Juan 8:44).

⁶ Ta anil noʼox lik xchapanbe smul Satanás li Jeovae, vaʼun xi laj yal li baʼyel albil kʼop ta Vivliae: «Ta jpas ta atojolic ti contra xavil abaic xchiʼuc ti antse. Jaʼ noʼox jech xtoc ti anitilultaque xchiʼuc snitilultac ti antse, contra ta xil sbaic. Ti snitilul ti antse ta xpechʼbot ta teqʼuel ti ajole. Ti voʼote jaʼ noʼox ta xatabe ta tiʼbel ti snucʼ [o xchak] yacane» (Gén. 3:15, Ch). Jech kʼuchaʼal laj xa kiltike, kontra chil sbaik li Satanás xchiʼuk li «antse». Li ants taje xkoʼolaj kʼuchaʼal yajnil Jeova ti skʼanoj tajeke, jaʼ li s-organisasion ta vinajele, li tukʼil anjeletike. Akʼo mi «mucul to ox» li kʼusitik skʼan xal li albil kʼop taje, ti ta kʼunkʼun chvinaj batel smelolale, la spat lek oʼontonal li kʼusi laj yal Jeova ta sventa li kʼusi chkʼot ta pasel ta tsʼakale. Li Diose oy buchʼu la stʼuj ta vinajel sventa tslajes skotol li jtoybaetike xchiʼuk ti jaʼ ch-abolaj ta stsobel «ti cʼusitic oy ta vinajele, xchiʼuc ti cʼusitic oy ta banomile» (Efe. 1:8-10, Ch).

7. ¿Kʼusi la spas jlom anjeletik ta skʼakʼalil Noé, xchiʼuk kʼusi pasbatik yuʼun Jeova?

⁷ Li ta skʼakʼalil Noee laj yikta «yavil acʼbili[k]» jlom anjeletik xchiʼuk lik yichʼ sbekʼtalik kʼuchaʼal krixchano sventa tspasik li kʼusi tskʼan yoʼontonik ta Balumile (Jud. 6; Gén. 6:1-4). Li Jeovae laj yakʼ ta ikʼal osil li jtoybaetik taje sventa chakʼbe stoj smulik. Jaʼ yuʼun kʼatajik ta pukujetik xchiʼuk Satanás «ti ta icʼ chanovique ti muʼyuc sbecʼtalique» xchiʼuk kontra chilik ta jyalel li yajtuneltak Diose (Efe. 6:11-13; 2 Ped. 2:4).

¿Kʼuxi tskoltautik li anjeletike?

8, 9. ¿Kʼuxi stunesoj yaj-anjeltak Jeova sventa tskolta li yajtuneltake?

⁸ Li anjeletike la skoltaik epal yajtuneltak Dios, jech kʼuchaʼal Abraham, Jacob, Moisés, Josué, Isaías, Daniel, Pedro, Juan, Pablo, xchiʼuk li Jesuse. Jech xtok, la spasik li chapanel yuʼun Diose, la sjelubtasik albil kʼopetik xchiʼuk chanubtasvanik jech kʼuchaʼal li kʼusi te chal ta sMantal Moisese (2 Rey. 19:35; Dan. 10:5, 11, 14; Hech. 7:53; Apo. 1:1). Ta skoj ti oy xa kuʼuntik sliklej li sKʼop Diose mu xa persauk yilel ti xalbutik smantaltak Dios li anjeletike (2 Tim. 3:16, 17). Akʼo mi jech, jech-o tspasbeik li kʼusi tskʼan Diose xchiʼuk tskoltabeik li yajtuneltake, akʼo mi mu xkiltik.

⁹ Li Vivliae chal ti «jʼalmantal yuʼun Mucʼul Diose te setel ta spat xocon li bochʼotic jaʼ yichʼojic o ta mucʼ Mucʼul Diose, yuʼun ta scoltaic» (Sal. 34:7; 91:11). Ta skoj ti xchibal kʼoptaojbe stukʼil yoʼonton yajtuneltak Dios li Satanase, jaʼ yuʼun chakʼ Jeova ti akʼo xkichʼtik pasel ta preva ep ta tose (Luc. 21:16-19). Pe li Diose snaʼoj kʼu sjalil o kʼu yepal chkichʼtik pasel ta preva, yuʼun yiloj lek kʼusi ora ti laj xa kakʼtik ta ilel li jtukʼiltike (kʼelo 1 Corintios 10:13). Li anjeletike chapalik onoʼox lek sventa chkoltavanik mi jaʼ jech oy ta yoʼonton Diose. Jech kʼuchaʼal liʼe, la skoltaik li Sadrac, Mesac, Abednego, Daniel xchiʼuk Pedro. Pe muʼyuk la skoltaik li Esteban xchiʼuk Santiago ti lajik ta milel yuʼun yajkontraike (Dan. 3:17, 18, 28; 6:22; Hech. 7:59, 60; 12:1-3, 7, 11). ¿Kʼu yuʼun? Yuʼun jelel li kʼusitik smakojan taje. Jaʼ jech kʼot ta stojolalik li ermanoetik ti takatik batel ta tsatsal abtel kʼalal yakal li ajvalilal ta nazie, oy jayvoʼ ti lajike, pe jaʼ ep ti chabiatik yuʼun Jeova sventa muʼyuk xchamike.

10. ¿Kʼusi yan tstunes Jeova sventa tskoltautik, ti maʼuk noʼox li anjeletike?

¹⁰ Li Vivliae muʼyuk chal mi oy kaj-anjeltik ta  jujuntal sventa chchabiutik. Li kʼusi chale jaʼ ti xuʼ ta sjunul koʼontontik jkʼanbetik ta orasion Dios ti «cʼalal oy cʼusi ta jcʼanbetic jech chac cʼu chaʼal tscʼan stuque, ta jnaʼtic ti ta xaʼay jcʼoptique» (1 Juan 5:14). Ta melel, li Jeovae xuʼ stak talel junuk yaj-anjel sventa tskoltautik, pe mu van jechuk tspas ta skotol velta. Jech kʼuchaʼal liʼe, xuʼ tstijbe yoʼonton junuk ermano sventa tskoltautik xchiʼuk tspat koʼontontik. O xuʼ van chakʼ jpʼijiltik xchiʼuk kipaltik sventa xkuch kuʼuntik li «chʼix pajal, [Ch]» ta jbekʼtaltik ti jaʼ jech yakal chilbajinutik yaʼel «li banquilal pucuje» (2 Cor. 12:7-10; 1 Tes. 5:14).

Jchanbetik stalelal li Jesuse

11. 1) ¿Kʼuxi la skoltaik Jesús li anjeletike? 2) ¿Kʼusi laj yakʼ ta ilel Jesús kʼalal tukʼ laj yakʼ sba ta stojolal Diose?

¹¹ Jkʼeltik kʼuxi la stunes yaj-anjeltak Jeova ta stojolal li Jesuse. Li anjeletike kak laj yalik li svokʼel Jesuse, ti kʼalal chaʼkuxie xchiʼuk la skoltaik ti kʼalal ay ta Balumile. Jech kʼuchaʼal liʼe, jun li anjel taje la spatbe yoʼonton Jesús kʼalal poʼot xaʼox stsakee. Pe muʼyuk la skoltaik kʼalal chukee xchiʼuk kʼalal laj yichʼ milele (Mat. 28:5, 6; Luc. 2:8-11; 22:43). ¿Kʼu yuʼun? Yuʼun jech kʼuchaʼal tskʼan Jeovae, li Jesuse skʼan xakʼ ta matanal li xkuxlejale; vaʼun jaʼ jech laj yakʼ ta ilel ti xuʼ tukʼ yoʼonton xakʼ sba li jun tukʼil vinik akʼo mi xlaj-o ta milele. Jaʼ yuʼun li Jeovae la xchaʼkuxes, laj yakʼbe xkuxlejal ta vinajel ti muʼyuk slajebe, laj «[yakʼbe] scotol [s]vuʼel» xchiʼuk ti jaʼuk spas ta mantal skotol li anjeletike (Mat. 28:18; Hech. 2:32; 1 Ped. 3:22). Jaʼ jech ivinaj lek ti jaʼ «snitilul ti antse», jaʼ xkaltik, li yajnil Jeovae (Gén. 3:15, Ch; Gál. 3:16).

12. ¿Kʼuxi chkakʼtik ta ilel ti jaʼ ta jpastik li kʼusitik lekik kʼuchaʼal la spas Jesuse?

¹² Li Jesuse snaʼoj ti mu lekuk ti xakʼ ta preva Jeova kʼalal chakʼ ta vokol ta jech noʼox li xkuxlejale xchiʼuk ti smalaoj xa chtal pojatuk yuʼun li anjeletike (kʼelo Mateo 4:5-7). Skʼan me xkakʼbetik yipal xchanbel stalelal li Jesuse xchiʼuk ti «[lekuk] xa cʼusitic ta jpastic batel[e]». Akʼo mi jpatoj lek koʼontontik ta stojolal Jeova kʼalal ta jnuptantik kontrainele, mu me xkakʼtik ta vokol ta jech noʼox li jkuxlejaltike (Tito 2:12).

Li kʼusi xuʼ jchantik ta stojolal li tukʼil anjeletike

13. ¿Kʼusi chakʼ jchantik li 2 Pedro 2:9-11 ta sventa li anjeletike, xchiʼuk kʼuxi xuʼ jchanbetik li stalelalike?

¹³ Kʼalal laj yalbe Pedro ti mu lekuk li kʼusi tspasik li buchʼutik «chchopol kʼopojik ta stojolal» yajtuneltak Jeova ti tʼujbil chbatik ta vinajele, laj yichʼik albel ti toj lek ta chanbel stalelalik li anjeletike. Akʼo mi toj echʼem sjuʼelik, bikʼitik chakʼ sbaik xchiʼuk «ta skoj ti yichʼojik ta mukʼ Jeovae» muʼyuk tsvaʼan sbaik ta jchapanvanej xchiʼuk muʼyuk buchʼu tsabeik smul (kʼelo 2 Pedro 2:9-11, NM). Jchanbetik stalelalik, mu me jvaʼan jbatik ta xchapanel li yantike, jtsaktik me ta mukʼ li buchʼutik sbainojik ta sbeiltasel li tsobobbaile xchiʼuk kakʼbetik me skotol ta skʼob Jeova ti jaʼ li Mukʼta Jchapanvaneje (Rom. 12:18, 19; Heb. 13:17).

14. ¿Kʼuxi xuʼ jchanbetik ti bikʼit chakʼ sbaik li anjeletike?

¹⁴ Jkʼeltik to avil kʼuyelan toj labalik sba yakʼoj ta ilel anjeletik ti bikʼit chakʼ sbaike. Jech kʼuchaʼal liʼe, kʼalal jakʼbat kʼusi sbiik jlome, muʼyuk bu laj yalik  (Gén. 32:29; Jue. 13:17, 18). Kʼajomal noʼox jnaʼojbetik sbi chaʼvoʼ anjeletik, Miguel xchiʼuk Gabriel, yuʼun li Vivliae muʼyuk chalbe sbi li anjeletik ti ta smiyonal noʼox te oy ta vinajele. Jaʼ jech taje, muʼyuk chkichʼtik ta mukʼ li anjeletik ti mu staik-o ichʼel ta mukʼe (Luc. 1:26; Apo. 12:7). Kʼalal lik skejan sba Juan ta stojolal jun anjel sventa chichʼ ta mukʼe, xi albate: «Mu xapas jech, yuʼun coʼol yajtunelutic Dios xchiʼuc li achiʼiltaque» (Apo. 22:8, 9). Jaʼ noʼox me skʼan xkichʼtik ta mukʼ li Jeovae xchiʼuk jaʼ noʼox me skʼan jkʼopontik ta orasion (kʼelo Mateo 4:8-10).

15. ¿Kʼuxi chakʼ ta ilel anjeletik ti toj lek ta chanbel ti oy smalael yuʼunike?

¹⁵ Toj lek ta chanbel ti xmalaj yuʼunik xtok li anjeletike. Oy tajek ta yoʼontonik ta snaʼel li kʼusitik mukul yuʼun Diose. Jech kʼuchaʼal chal Vivliae, «li jʼalmantaletique [ta] sqʼuel yaʼyic ec ti jech chcʼot ta pasele» (1 Ped. 1:12). Pe oy jlom li kʼusitik mukul taje, muʼyuk to bu akʼbil snaʼik. Pe ¿kʼu yelan chilik taje? Jun yoʼonton tsmalaik kʼusi ora chakʼ ta naʼel «ta sventa steclumal Dios» «ti ep ta chop sbijil[e]» (Efe. 3:10, 11).

16. ¿Kʼuxi xuʼ chtun yuʼun anjeletik ti kʼu yelan jtalelaltike?

¹⁶ Li Vivliae chal kaʼitik ti xkoʼolaj kʼuchaʼal «[chakʼik] elov» ta stojolal anjeletik li yajtsʼaklomtak Cristo ti chil svokolike (1 Cor. 4:9). Tskʼelik lek li jtalelaltike xchiʼuk xkuxet noʼox yoʼontonik kʼalal chilik ti tukʼ chkakʼ jbatike. Jech xtok, xmuyubajik tajek kʼalal tsutes yoʼonton li jun jpas mulile (Luc. 15:10). Xchiʼuk oy jtos stalelal ermanaetik ti yilojik lek li anjeletike. Li Vivliae chal ti «antsetique tscʼan chacʼbe senyail ta sjolic ti ventainbil yuʼun smalalique, yuʼun qʼuelbilic yuʼun li yajʼalmantaltac Diose» (1 Cor. 11:3, 10). Jech ta melel, toj kʼupil chilik ti chchʼunbeik smantal li jolil yuʼunike xchiʼuk ti jech chchʼunik ek li yan yajtuneltak Diose. Kʼalal ta jchʼuntik mantale ta xchanik jtalelaltik li xnichʼnabtak Jeova ti mu xkiltike.

Tskolta sbaik ta chol mantal li anjeletike

17, 18. ¿Kʼuxi jnaʼojtik ti tskoltautik ta chol mantal li anjeletike?

¹⁷ Li anjeletike oy kʼusitik spasojik ta sventa li kʼusitik toj tsotsik skʼoplal kʼotem ta pasel «ta scʼacʼalil Cajvaltique». June jaʼ ti kʼalal laj yichʼ vaʼanel li Ajvalilal yuʼun Dios ta 1914, jech xtok «li banquilal jʼalmantal Miguele xchiʼuc li jʼalmantaletic yuʼune» la slokʼesik ta vinajel li Satanás xchiʼuk li spukujtake  (Apo. 1:10; 11:15; 12:5-9). Li jtakbol Juane «laj [yil] yan jʼalmantal te xvilet ta toyol ta vinajel. Jaʼ te yichʼoj li Lequil Aʼyej sventa sbatel osil, yuʼun jaʼ chcholbe scotol jnaclumetic ta jujun banamil». Xi chal li anjele: «Xiʼanic me yuʼun li Diose; albeic slequilal. Yuʼun laj xa sta yorail chchapanvan. Ichʼic me ta mucʼ, yuʼun jaʼ la spas li vinajel banamile, xchiʼuc li nabetique, xchiʼuc scotol li nioʼetique» (Apo. 14:6, 7). Jech ta melel, li Diabloe skontrainoj ta jyalel li abtelal ta xcholbel skʼoplal li Ajvalilal yuʼun Diose, pe xuʼ me jpat lek koʼontontik ti tskoltautik ta spasel li anjeletike (Apo. 12:13, 17).

¹⁸ Li avie muʼyuk xa bu tskʼoponutik li anjeletik sventa tsbeiltasutik echʼel ta stojolal li buchʼutik tskʼanik mantal kʼuchaʼal la spasik ta stojolal Felipee, ti beiltase echʼel ta stojolal jun eunuco vinik ti likem ta Etiopiae (Hech. 8:26-29). Akʼo mi jech, ep ta jyalel svinajeb ti chkoltavanik ta chol mantal li anjeletike, akʼo mi mu xkil ta jsatik, xchiʼuk tskoltautik ta saʼel «li bochʼotic scʼoplal onoʼox chcuxiic sbatel osile» (Hech. 13:48). a Pe skʼan me jpastik ek un li kʼusi jbainojtike: jcholtik-o me li mantale xchiʼuk kakʼbetik me yipal ta saʼel li buchʼutik tskʼan chichʼik ta mukʼ «ta espiritu xchiʼuk ta melel» li jTotike (Juan 4:23, 24, NM).

19, 20. ¿Kʼusi yabtel tspasik li anjeletik kʼalal mi kʼot ta pasel li kʼusitik «ta slajebal cʼacʼal[e]»?

¹⁹ Kʼalal laj yalbe skʼoplal jkʼakʼaliltik li Jesuse laj yal ti «ta slajebal cʼacʼal[e]», li anjeletike «chtal [la] svoqʼuic loqʼuel li bochʼotic chopolic ti te capal xchiʼuc li bochʼotic tucʼ yoʼntonique» (Mat. 13:37-43, 49). Li anjeletike ch-abtejik li ta stsutsebal abtel ti tstsobvanike xchiʼuk ti chakʼbeik smarkail o seyoal li buchʼutik tʼujbil chbatik ta vinajele (kʼelo Mateo 24:31; Apo. 7:1-3). Maʼuk noʼox taje, yuʼun li anjeletike chchiʼinik ta abtel li Jesús kʼalal chchʼak «li xchije xchiʼuc li [tentsune]» (Mat. 25:31-33, 46).

²⁰ «Cʼalal chyal tal ta vinajel li Cajvaltic Jesucristoe xchiʼuc li yajʼalmantaltac ti echʼem svuʼelique» ta slajesik stekel «li bochʼotic mu xotquinic Diose» xchiʼuk li buchʼutik «mu scʼan xchʼunic li Lequil Aʼyej yuʼun Cajvaltic Jesucristoe» (2 Tes. 1:6-10). Li kʼusi akʼbat yil yuʼun Dios li Juane, te laj yil li kʼusi laj xa kalbetik skʼoplale: laj yil ti kajalik ta sakil kaʼ li Jesús xchiʼuk li yajsoltarotak ta vinajele, ti chapalik xa lek sventa tspasik li jun tukʼil pas kʼope (Apo. 19:11-14).

21. ¿Kʼusi tspas ta stojolal Satanás xchiʼuk spukujtak li anjel ti yichʼoj «sllavial li natil xabe, xchiʼuc [ti] yichʼoj tal jlic mucʼta cadena[e]»?

²¹ Xi chal li Juane: «Laj quil iyal tal ta vinajel jun jʼalmantal, yichʼojbe tal sllavial li natil xabe, xchiʼuc yichʼoj tal jlic mucʼta cadena». Li anjel taje jaʼ li bankilal anjel Miguele, ti chchuk li Diabloe, li spukujtake xchiʼuk ti tsjip yalel ta xabe. Li ta stsutsebal Ajvalilal ta Jmil Jabil yuʼun Cristoe ta me xichʼik koltael kʼuk yuni jalil, vaʼun jaʼ jech chilik slajeb preva li tukʼil krixchanoetike. Mi laje, ta me xichʼik lajesel li Satanás xchiʼuk li yan jtoybaetike (Apo. 20:1-3, 7-10; 1 Juan 3:8). ¡Laj xaʼox me skʼoplal un li toybail ta stojolal Diose!

22. 1) ¿Kʼusi yabtel tspas li anjeletik ta sventa li kʼusitik chkʼotanuk ta pasele? 2) ¿Kʼu yelan chkaʼitik ti vaʼ yelan yabtel li anjeletike?

²² Poʼot xa me xlaj li kʼusitik yuʼuntak Satanase, yan li voʼotike poʼot xa me jta jkolebaltik. Toj tsots me skʼoplal li kʼusi tspasik anjeletik ta sventa li kʼusitik chkʼotanuk ta pasele, ti jaʼ jech chichʼ pakbel skʼoplal li mukʼul pas mantal yuʼun Jeovae xchiʼuk ti jaʼ jech chkʼot ta pasel li kʼusi tskʼan Dios ta sventa li Balumile xchiʼuk ta sventa li krixchanoetike. Ta melel, «li jʼalmantaletique jaʼ noʼox chtunic yuʼun Dios. Tacbilic noʼox yuʼun Dios, yuʼun acʼo bat scoltaic li bochʼotic scʼoplal chcolic sbatel osile». ¡Toj ep ta jtojbetik ta vokol Jeova ti tskoltautik ta stojolal anjeletik sventa jpasbetik li kʼusi tskʼan Diose xchiʼuk ti jtatik li kuxlejal sbatel osile!

[Tsʼib ta yok vun]

¿Kʼusi cha takʼ?

• ¿Kʼuxi chapal lek ch-abtejik li kuxlejaletik ti mu xkiltike?

• ¿Kʼusi la spas jlom anjeletik ta skʼakʼalil li Noee?

• ¿Kʼuxi tstunes anjeletik sventa tskoltautik li Diose?

• ¿Kʼusi yabtel tspas ta jkʼakʼaliltik li anjeletike?

[Sjakʼobiltak sventa xchanobil]

[Lokʼol ta pajina 21]

Xmuyubaj noʼox tspasbeik kʼusi tskʼan yoʼonton Dios li anjeletike

[Lokʼol ta pajina 23]

Kʼuchaʼal chvinaj ta stojolal Daniele, li anjeletike chapalik onoʼox lek sventa chkoltavanik mi jaʼ jech oy ta yoʼonton li Diose

[Lokʼol ta pajina 24]

Mu me xi jxiʼ, yuʼun te xchiʼukutik ta chol mantal li anjeletike

[Stojel ta vokol ta pajina 24]

Balumil: NASA photo