Li kʼusitik tsjakʼ jkʼel vunetike

¿Kʼusi ora laj yichʼ nutsel lokʼel ta vinajel li Satanase? (Apo. 12:1-9.)

Akʼo mi muʼyuk chal Apocalipsis kʼusi ora lek kʼot ta pasel taje, chal kʼusitik kʼotanuk ta pasel ti jaʼ tskoltautik ta skʼelel jutuk ti kʼusi ora laj yichʼ nutsele. Li kʼusi baʼyel kʼot ta pasele jaʼ li svokʼel Ajvalilal yuʼun Mesiase. Jnaʼojtik ti kʼalal vaʼi xaʼox li Ajvalilal taje lik «mucʼta pleito ta vinajel», vaʼun ta skoj ti muʼyuk kuch yuʼun li Diabloe laj yichʼ nutsel lokʼel ta vinajel.

Li Vivliae chalbe lek smelolal ti «itsʼaqui scʼacʼalil» li «yanlum cristianoetic» ta 1914, vaʼun jaʼ te lik ochuk ta abtel li Ajvalilal yuʼun Diose (Luc. 21:24). a ¿Kʼu sjalil jelav sventa laj yichʼ nutsel lokʼel ta vinajel li Satanás kʼalal echʼ li pas kʼop ta vinajele?

Li Apocalipsis 12:4 xi chale: «Li chone [Satanás] te cotol icʼot ta stsʼel li ants ti ta xa xcuxe, yuʼun tsmala chvocʼ li yole, yuʼun tscʼan tstiʼ ta ora». Taje jaʼ chakʼ ta ilel ti ta slajes ta anil yaʼi li Ajvalilal yuʼun Diose, mi stakʼ chile jaʼ noʼox mi vokʼe. Akʼo mi koltavan Jeova sventa mu jaʼuk spas kanal li Satanase, li Diabloe solel jpʼel ta yoʼonton ti tslajes yaʼi li Ajvalilal yuʼun Dios ti jaʼ to lik ta abtele. Ta melel, li «Miguele xchiʼuc li jʼalmantaletic yuʼune» oy kʼusi la spasik ta anil sventa chchabiik li Ajvalilal yuʼun Diose, la snutsik lokʼel ta vinajel «li [dragón] xchiʼuc li jʼalmantaletic yuʼune». Jaʼ jech, ti laj yichʼ tsalel xchiʼuk ti laj yichʼ nutsel lokʼel li Satanase, jaʼo van kʼot ta pasel kʼalal mu toʼox jaluk svokʼel li Ajvalilal ta 1914.

Ti kʼusi skʼan jtsaktik ta venta xtoke, jaʼ li xchaʼkuxesel yajtsʼaklomtak Cristo ti chbatik ta vinajele. Jech kʼuchaʼal chal Vivliae, jaʼo lik ti kʼalal mu toʼox jaluk xchotiel li Ajvalilal yuʼun Diose (Apo. 20:6). b Akʼo mi jech, li Vivliae muʼyuk chal mi te la xchiʼin ta pas kʼop li yajtsʼaklomtak ti chbatik ta vinajel kʼalal la stsak ta kʼop li dragón xchiʼuk li spukujtake. Jaʼ yuʼun kʼalal lik chaʼkuxiikuk li xchiʼiltak Cristoe, kʼotem xaʼox ta pasel li pas kʼop ta vinajele xchiʼuk nutsbil xaʼox lokʼel li Satanás xchiʼuk spukujtake.

Jaʼ yuʼun chaʼa: akʼo mi muʼyuk chal Vivlia kʼusi ora lek laj yichʼ nutsel lokʼel li Satanás xchiʼuk li spukujtake, skotol li kʼusi laj xa kalbetik skʼoplale chakʼ kiltik ti jaʼo kʼot ta pasel kʼalal mu toʼox jaluk yochel ta Ajvalil ta vinajel ta 1914 li Jesucristoe.

[Tsʼibetik ta yok vun]