Malaliletik, chanbeik ti kʼuyelan chkʼanvan li Cristoe

KʼALAL jun xaʼox akʼobal skʼan xcham li Jesuse, xi laj yalbe li tukʼil yajtakboltake: «Ta xcalboxuc comel jun achʼ mantal, cʼanano me abaic. Jech chac cʼu chaʼal la jcʼanoxuc li vuʼune, jaʼuc me jech chacʼanan abaic li voʼoxuque. Me jech chapasique, jech ta snaʼic o scotol cristianoetic ti voʼoxuc cajchancʼopoxuque» (Juan 13:34, 35). Jech, li melel yajtsʼaklomtak Cristoe skʼan me skʼanan sbaik ta jujuntal.

Li Pabloe xi laj yalbe ta mas jelavel li malaliletik ti jaʼik yajtsʼaklomtak Cristoe: «Viniquetic, cʼano me avajnilic jech chac cʼu chaʼal scʼanoj steclumal li Cristoe, yuʼun laj yacʼ sba ta milel ta scoj» (Efe. 5:25). Jkʼeltik kʼuxi xuʼ xakʼ ta xkuxlejal malaliletik li mantal ta Vivlia taje, mas to me li buchʼu chtun ta stojolal Jeova li yajnilike.

Chchabi stsobobbail li Cristoe

Xi chal li Vivliae: «Li viniquetique tscʼan jech acʼo scʼan yajnilic ec jech chac cʼu chaʼal cʼux ta yoʼnton sbecʼtal stuquique. Li bochʼo lec scʼanoj yajnile jaʼ scʼanoj sba stuc chcʼot. Yuʼun muʼyuc bochʼo tsbaj li sbecʼtal stuque. Lec tsmacʼlin, lec chcʼuxubin jech chac cʼu chaʼal tspasbe steclumal li Cristoe» (Efe. 5:28, 29). Akʼo mi jpas mulil li yajtsʼaklomtak Jesuse, ta sjunul yoʼonton la skʼan, la xkʼuxubin xchiʼuk oy tajek slekil yoʼonton ta stojolalik. Jech xtok, jaʼ la skʼel li kʼusi lek tspasike, maʼuk la skʼelbe li spaltailike (Efe. 5:27).

Jech kʼuchaʼal laj yakʼ ta ilel ti skʼanoj tsobobbail li Jesucristoe, jaʼ jech skʼan xakʼbe yil yajnil ek li yajtsʼaklom Cristoe, chakʼ ta ilel ta skʼopojel xchiʼuk ta kʼusitik tspas. Ichʼbil me ta kʼux chaʼi xchiʼuk xmuyubaj noʼox me li ajnilal ti nopajtik noʼox chichʼ akʼbel ta ilel ti kʼanbile. Akʼo mi oy jpʼej kʼupil sba sna xchiʼuk ep kʼusitik oy yuʼun li jun antse, pe mi muʼyuk chchabiat yuʼun li smalale xchiʼuk mi muʼyuk tsakbil ta ventae xuʼ me muʼyuk xmuyubaj.

¿Kʼusitik skʼan spas li yajtsʼaklom Cristo sventa chakʼ ta ilel ti skʼanoj li yajnile? Kʼalal oyik ta stojolal krixchanoetike skʼan me lek skʼopon, tskʼupil kʼopta kʼalal stakʼ chile xchiʼuk chalbe ti kʼusitik lek kʼotem ta pasel ta yutsʼ yalal ta skoj li kʼusi lek tspas li antse. Pe skʼan me xakʼ ta ilel ti skʼanoj xtok kʼalal stuk oyike. Kʼalal tstsakbe skʼob, tstseʼinta, tsmey xchiʼuk ti kʼalal tskʼupil kʼoptae xuʼ van mu toj epuk sbalil yilel, pe bu cha ta, xuʼ me te oy-o ta yoʼonton li antse.

«Mu xqʼuexov ti chal: “Jaʼ jchiʼiltac ta voqʼuel”»

Mi jaʼuk bu xkʼexav li Cristo ti «jchiʼiltac ta voqʼuel» xut li yajtsʼaklomtak ti tʼujbil chbatik ta vinajele (Heb. 2:11, 12, 17). Mi nupunemot xchiʼuk jun yajtsʼaklom Cristoe, mu me xchʼay ta ajol ti jaʼ avermana ta mantal li avajnile. Li kʼusi laj yalbe Jeova kʼalal laj yakʼ sba ta stojolale jaʼ me mas tsots skʼoplal, jaʼ mu sta li kʼusi laj yal kʼalal nupune, akʼo mi jaʼ to laj yichʼ voʼ ti kʼalal nupunem xaʼoxe. Jaʼ yuʼun, kʼalal chakʼbe akʼo yakʼ sloʼil ta tsobobbail jun ermana li buchʼu te chal tal mantal ta plataformae, oy me lek srasonal ti «ermana», xute. Jaʼ me avermana ek li ta tsobobbaile xchiʼuk li ta anaike. Jaʼ yuʼun skʼan xa tsak ta mukʼ xchiʼuk xavichʼ ta kʼux li ta anaike xchiʼuk li ta Salon sventa Tsobobbaile.

Mi ataoj junuk avabtel ta tsobobbaile, yikʼaluk van tsots chavaʼi ta spasel li kʼusi abainoj ta  avutsʼ avalale. Pe mi parejo tspas yabtelik li moletik xchiʼuk li yajkoltaobbaike xchiʼuk ti oy smelolal chchʼakbe sba yabtelike, xuʼ me mas xa xokob ta skʼelel li ermana ti mas skʼan kʼelele, jaʼ xkaltik, li avajnile. Naʼo me ti oy yan ermanoetik ti stakʼ spas li avabtel cha pas ta tsobobbaile, pe mi junuk buchʼu xuʼ skʼel o stukʼulan li avajnile, jaʼ noʼox me li voʼote.

Jech xtok, li voʼote jolilot yuʼun li avajnile. Li Vivliae xi chale: «Li viniquetique jaʼ sjolic li Cristoe. Li antsetique jaʼ sjolic li viniquetique» (1 Cor. 11:3). ¿Kʼu yelan skʼan xa pas li avabtel taje? Skʼan ta kʼanelal xa pas, mu me stakʼ ti jaʼ xa chavalilan li versikulo liʼe xchiʼuk ti cha kʼan ichʼel ta mukʼ ta persae, moʼoj, yuʼun jaʼ jech skʼan xa kʼel li avajnil kʼuchaʼal laj yakʼ ta ilel Jesuse; taje jaʼ li kʼusi toj lek skʼan pasele (1 Ped. 2:21).

«Voʼoxuc lec jcʼopan jbatic»

Li Jesuse la sbiiltas ta yamigotak li yajtsʼaklomtake. Xi laj yalbee: «Li voʼoxuque muc xa noʼox cajʼabtelucoxuc chcaʼay, yuʼun li bochʼo jʼabtel noʼoxe mu snaʼ cʼusitic tspas li yajvale. Batsʼi jchiʼiloxuc [o kamigooxuk] xa, yuʼun laj xa calboxuc avaʼyic scotol li cʼusitic caʼyoj tal ta stojol Jtote» (Juan 15:14, 15). Jamal snaʼ skʼopon sbaik xchiʼuk jmoj bu chbatik. Jech kʼuchaʼal liʼe, ayik ta jun kʼin nupunel ta Canaán (Juan 2:2). Xchiʼuk oy butik toj lek xaʼi stsob sbaik, jech kʼuchaʼal li ta nichimaltik Getsemanie. Li Vivliae chal ti «te onoʼox ta xcʼot stsobilan sbaic xchiʼuc yajchancʼoptac li Jesuse» (Juan 18:2).

Li ajnilale skʼan stuk xa noʼox jech amigail chaʼi sba ta stojolal li smalale. Jaʼ yuʼun toj tsots skʼoplal ti jmojuk kʼusitik xa pasike. Akʼo avipalik ti jmojuk xa tunik ta stojolal Jeovae, jmojuk xa chan aVivliaik, jmojuk xa veʼik, jmoj xa lokʼik ta xanbal xchiʼuk chʼakbeik yorail sventa xa loʼilajik. Akʼo xvinaj ti maʼuk noʼox anup achiʼil abaike, moʼoj, akʼo vinajuk xtok ti avamigo abaik ta jyalele.

«Scʼanoj o cʼalal ta slajeb»

«Jaʼ jech scʼanoj o cʼalal ta slajeb» yajtsʼaklomtak li Jesuse (Juan 13:1). Oy malaliletik ti muʼyuk chchanbeik stalelal Jesuse. Oy junantike yiktaoj li yajnil ta skeremalike, bateltike jaʼ ta skoj ti jaʼ tskʼanik ti bu mas tseb toe (Mal. 2:14, 15).

Pe oy malaliletik kʼuchaʼal Willi ti chakʼ yipal chchanbeik stalelal Cristoe. Oy xa sjayibal jabil ti skʼan chabiel li yajnil ta skoj ti ipe. Akʼo mi jech, xi chal li ermanoe: «Xkoʼolaj kʼuchaʼal jun matanal likem talel ta vinajel chkil li kajnile. Jaʼ jech toj ep sbalil chkil. Jech xtok, oy xa ta 60 jabil ti laj kakʼ ke ti maʼuk noʼox ta jchabi kʼalal muʼyuk jvokolkutike, xchiʼuk mi jaʼuk bu ta jchʼay ta jol li kʼusi laj kale».

Malaliletik, chanbeik ti kʼuyelan chkʼanvan li Cristoe xchiʼuk ta xkʼuxuluk me avoʼonton xa chabi li avajnilike..., li avermanaike..., li avamigaike.

[Lokʼol ta pajina 20]

¿Mi jaʼ avamiga ta jyalel li avajnile?

[Lokʼol ta pajina 20]

«Viniquetic, cʼano me avajnilic»