Li kʼusitik tsjakʼ jkʼel vunetike

Li Jesuse la xan sjunul Israel sventa chchol mantal, pe ¿kʼu yuʼun laj yal jtakbol Pedro ti «muc xanaʼbeic smelol» xut judioetik xchiʼuk ajvaliletik kʼalal la skʼanik ti akʼo xichʼ milel ta persa li Jesuse? (Hech. 3:17.)

Kʼalal laj yalbe jtsop judioetik li jtakbol Pedro ti jaʼ oy ta sbaik ti laj li Mesiase, xi laj yalbee: «Jnaʼ ti jaʼ ta scoj muc xanaʼbeic smelol ti jech laj apasbeic li Jesuse. Jech noxtoc muc snaʼbeic smelol ec li jʼabteletic avuʼunique» (Hech. 3:14-17). Oy junantike jaʼ van ta skoj ti muʼyuk xakʼik venta ti jaʼ Mesías li Jesuse o junantik xtoke jaʼ van ta skoj ti muʼyuk xaʼibeik smelolal li chanubtasel laj yakʼe. Li junantik xtoke jaʼ van ta skoj ti chʼabal ta yoʼontonik li mantale, ti oy kʼusi baʼyel chopol la snopik ta stojolale, ti itʼix laj yaʼiike xchiʼuk ti la spʼajike.

Jkʼeltik kʼusi chopol kʼot ta stojolal epal judioetik ta skoj ti chʼabal ta yoʼontonik ta melel li mantale. Li Jesuse nopem xaʼi ti ep lokʼol kʼop tstunes kʼalal chchanubtasvane, vaʼun jaʼ to chchapbe mas smelolal mi oy buchʼutik tskʼan tsnaʼik mase. Pe oy junantik judioetike muʼyuk ta yoʼontonik xchanel mas, vaʼun ta jech noʼox xtanlajetik batel. Jech, oy jun veltae toj chopol laj yaʼiik li yajtsʼaklomtak ta skoj ti la stunes jun lokʼol kʼop li Jesuse (Juan 6:52-66, Ch). Mi jaʼuk buchʼu laj yakʼ venta ti la stunes lokʼol kʼop Jesús sventa chakʼ ta preva mi oy ta yoʼonton tsjel stalelalik xchiʼuk ti kʼuyelan snaʼik snopele (Isa. 6:9, 10; 44:18; Mat. 13:10-15). Xchiʼuk muʼyuk la stsakik ta mukʼ jun albil kʼop ta Vivlia ti chal ti tstunes onoʼox lokʼol kʼop li Mesías kʼalal chchanubtasvane (Sal. 78:2).

Li yantike oy kʼusi baʼyel chopol la snopik ta stojolal li Jesuse, jaʼ yuʼun la spʼajik. Jech kʼuchaʼal liʼe, kʼalal bat chanubtasvanuk ta nail tsobobbail te ta slumal li Jesús ti jaʼ li Nazarete, li krixchanoetike chʼayal to kʼot yoʼontonik. Pe maʼuk laj yakʼ ta yoʼontonik ti jaʼ li Mesías ti albil onoʼox skʼoplale, moʼoj, jaʼ mas la stsakik ta mukʼ ti bu likeme. Xi la sjakʼbe sbaike: «¿Bu laj xchan talel scotol ti vinic leʼe? [...] ¿Mi mu jaʼuc jcarpintero ti vinic leʼe, squerem ol ti Mariae, xchiʼil ta voqʼuel ti Jacoboe, ti Josee, ti Judase, ti Simone? ¿Mi mu liʼuc jchiʼuctic ta naclej ti yixleltaque?» (Mar. 6:1-3, Ch). Jaʼ jech, ta skoj ti abol noʼox sba ti bu likem li Jesuse, la spʼajbeik li chanubtasel chakʼe.

¿Kʼusi xuʼ xkaltik ta stojolal li jnitvanejetik ta relijione? Jutuk mu skotolikuk jaʼ jech snopbenik kʼuchaʼal li judioetike, jech oxal, jutuk tajek la xchikintaik li kʼusi laj yal Jesuse (Juan 7:47-52). Ch-itʼixajik ta stojolal xtok, yuʼun jaʼ mas lek ilbil yuʼun li krixchanoetike (Mar. 15:10). Pe mu me jchʼay ta joltik ti toj chopol laj yaʼiik jlom jnitvanejetik ta relijion ti kʼalal jamal laj yal Jesús ti jecheʼ noʼox tspakʼta sbaike xchiʼuk ti chloʼlavanike (Mat. 23:13-36). Jaʼ mas lek laj yaʼiik ti muʼyuk mas chaʼibeik smelolale, jaʼ yuʼun xi albatik yuʼun li Jesuse: «Toj abul abaic, voʼoxuc ti lec achanojic smantal Diose. Yuʼun laj xa anacʼbeic sllavial li bijubtasele. Mu xa xuʼ chaʼoch atuquic ec [li ta Ajvalilal yuʼun Diose], xchiʼuc chamaquic ta be noxtoc li bochʼotic tscʼan to ta xʼochique» (Luc. 11:37-52).

Oxib jabil xchiʼuk oʼlol la xchol lekil aʼyej ta Israel li Jesuse. Jech xtok, la xchanubtas ep yajtsʼaklomtak sventa jech spasik li abtelale (Luc. 9:1, 2; 10:1, 16, 17). Toj lek la spas yabtelik li Jesús xchiʼuk li yajtsʼaklomtake, jaʼ yuʼun xi xvulajetik likel li fariseoetike: «Qʼuelavilic, scotol cristianoetic chbat xchiʼinic li Jesuse» (Juan 12:19). Kʼuchaʼal chkiltike, maʼuk skʼan xal ti yuʼun mu snaʼik mi jsetʼuk ta sventa Jesús li judioetike. Ti kʼusie chaʼa, jaʼ ti muʼyuk snabeik smelolal ti kʼusi yabtel tspas kʼuchaʼal Mesías li Jesuse. Ti oyuk ta yoʼontonike xuʼ la yojtikinik mas li Jesús jechuke, pe bu cha ta, mu jechuk la spasik. Jlome jaʼ ta smulik ek ti kʼalal la smilike. Jaʼ yuʼun ep ti buchʼutik xi albatik yuʼun li jtakbol Pedroe: «Jchiʼiltac, sutanic talel ta stojol ti Diose yoʼ jech chʼaybil ta xcʼot ti amulique, ti ataicuc xcuxet avoʼntonic yuʼun ti Diose, ta sventa ti yaloj ta stac talel ti Jesucristo ta atojolique, ti voʼne xa laj stʼuj talel yoʼ ta xcʼot ta jcoltavanej avuʼunique» (Hech. 3:19, 20, Ch). Jech kʼuchaʼal chkiltik une, ta smilal noʼox judioetik la xchʼamik li tojobtasel taje xchiʼuk «ep paleetic la xchʼunic ec». Vaʼun skotolik taje lik yaʼibeik smelolal, la sutes yoʼontonik xchiʼuk lek xa ilatik yuʼun Jeova (Hech. 2:41; 4:4; 5:14; 6:7).