Chanbo stalelal li Jesuse: oyuk stsatsal avoʼonton xa chol mantal

«Laj yacʼbun lec stsatsal coʼntoncutic li Dios cuʼuntique, jech te cʼot jcholcutic avaʼyic li scʼope.» (1 TES. 2:2)

1. ¿Kʼu yuʼun toj labal sba li lekil aʼyej ta sventa li Ajvalilal yuʼun Diose?

 ¡XI JMUYUBAJ tajek kʼalal chkaʼitik lekil aʼyeje! Muʼyuk yan lekil aʼyej ti xkoʼolaj xchiʼuk li kʼusi laj yalbe krixchanoetik li Jesuse: li lekil aʼyej ta sventa li Ajvalilal yuʼun Diose. Li aʼyejetik taje jaʼ chalbutik skʼoplal slajeb li vokoliletike, li chameletike, li kʼusi kʼux chkaʼitike xchiʼuk li lajelale. Jech noxtok, tspat koʼontontik ti xuʼ xi jkuxi sbatel osile, chakʼ jnaʼtik li kʼusi tskʼan tspas Diose xchiʼuk chchanubtasutik kʼuyelan xuʼ lek xkil jbatik xchiʼuk li Diose. Xuʼ van jnoptik ti skotol xmuyubajik ta yaʼiel li aʼyejetik taje. Pe bu cha ta, jutuk mu skotoluk li krixchanoetike muʼyuk bu lek chaʼiik.

2. ¿Kʼusi la skʼan laj yal Jesús kʼalal «vuʼun ta jventa chlic scontrain sbaic», ti xie?

² Xi laj yalbe yajtsʼaklomtak li Jesuse: «Mu me xanopic ti yuʼun tal cacʼ coʼlajuc yoʼntonic li cristianoetic liʼ ta banamile. Mu yuʼunuc tal cacʼ coʼlajuc yoʼntonic; vuʼun ta jventa chlic scontrain sbaic. Vuʼun ta jventa chlic scontrain sbaic jun vinic xchiʼuc stot, xchiʼuc chlic scontrain smeʼ li tsebe, xchiʼuc chlic scontrain smeʼelʼalib li alibale. Te noʼox chlic scontrain sbaic ta snailal stuquic» (Mat. 10:34-36). Jaʼ jech, mu skʼan  xchʼamik lekil aʼyej li krixchanoetike yuʼun jutuk mu skotoluk tspʼajik. Jlom krixchanoetike skontrainojik li buchʼutik chalik batel li aʼyeje, akʼo mi jaʼ yutsʼ yalalik.

3. ¿Kʼusi skʼan oy kuʼuntik sventa jpastik-o batel li abtelal ta chol mantale?

³ Li kʼusitik melel chkakʼtik ta ojtikinel li yajtsʼaklomutik Cristoe jaʼ me koʼol xchiʼuk li kʼusi laj yakʼ ta chanel Jesuse, xchiʼuk ti kʼuyelan la spasik krixchanoetik ta baʼyel sigloe jaʼ me jech ek li krixchanoetik avie. Stalel onoʼox jech, xi onoʼox laj yalbe yajtsʼaklomtak li Jesuse: «“Li bochʼo mozo noʼoxe maʼuc mucʼ cʼotem ta stojol li yajvale”, xacutoxuc onoʼox. Me laj yutsʼintaicun ec li vuʼune, jaʼ noʼox jech chayutsʼintaoxuc ec» (Juan 15:20). Melel onoʼox ti mu ta skotoluk balumil ti lek xvinaj ti chkichʼtik nutsel yuʼun li krixchanoetike, pe ep ta velta ti muʼyuk lek chi j-ilate o ti kontrainbilutike. Jaʼ yuʼun skʼan oyuk xchʼunel koʼontontik xchiʼuk stsatsal koʼontontik sventa jpastik-o batel li abtelal ta chol mantale (kʼelo 2 Pedro 1:5-8).

4. ¿Kʼu yuʼun skʼan oyuk stsatsal yoʼonton ta xcholel mantal li Pabloe?

⁴ Mi oy junuk velta tsots chavaʼi cha lokʼ ta chol mantal o cha xiʼ ta spasel jtosuk abtelal ta sventa chol mantale, xuʼ van tspat avoʼonton snaʼel ti oy jech yaʼioj sbaik li yan tukʼil jchol mantaletik eke. Jech kʼuchaʼal liʼe, li jtakbol Pabloe jaʼ jun jchol mantal ti tsots yoʼontone xchiʼuk ti lek xaʼibe smelolal li kʼusi melele, pe oy bakʼintik ti mu kʼunuk laj yaʼi ta xcholel li mantale. Xi laj yalbe li yajtsʼaklomtak Cristo ta Tesalonicae: «Xanaʼic ti laj quichʼcutic utsʼintael, laj quichʼcutic qʼuexlaltasel ta Filipose, pero laj yacʼbun lec stsatsal coʼntoncutic li Dios cuʼuntique, jech te cʼot jcholcutic avaʼyic li scʼope, acʼo me toj ep laj quichʼcutic contrainel» (1 Tes. 2:2). Jaʼ jech, li ta Filipose li j-abteletike la smajik ta teʼ li Pablo xchiʼuk Silase, li xchiʼil ta chol mantale; ta tsʼakale la stikʼik ta chukel xchiʼuk xtok «la slatsʼbe yacanic ta latsʼubteʼ» (Hech. 16:16-24). Akʼo mi jech, la sta stsatsal yoʼontonik sventa chcholik-o batel li mantale. ¿Kʼuxi xuʼ jpastik jech ek? Sventa xichʼ takʼele, jkʼeltik kʼusi la spasik yan yajtuneltak Dios ta skʼakʼalil Vivlia xchiʼuk kakʼtik venta kʼusi koltaatik sventa oyuk stsatsal yoʼontonik ta yalel batel li kʼusi melel ta sventa Jeovae.

Skʼan oyuk stsatsal koʼontontik sventa jtsaltik li kontrainele

5. ¿Kʼu yuʼun skʼan oyuk onoʼox tsatsal yoʼontonik li yajtuneltak Diose?

⁵ Akʼo mi jaʼ li buchʼu mas lek laj yakʼ ta ilel tsatsal oʼontonal li Jesucristoe, li tsatsal oʼontonale jaʼ jun talelal ti skʼan oyuk onoʼox yuʼunik li yajtuneltak Jeova ta slikebal tal li kuxlejale. ¿Kʼu yuʼun? Yuʼun jech kʼuchaʼal onoʼox laj yal Jeova kʼalal echʼ li toybail ta Edene, ta onoʼox xlik kontrainatuk yuʼun sviniktak Diablo li yajtuneltak Diose (Gén. 3:15). Li buchʼu baʼyel jech kʼot ta stojolale jaʼ li tukʼil Abele, ti milat yuʼun sbankil ti Caín sbie. Li tukʼil Enoc ti kuxi kʼalal skʼan toʼox xtal li Nojelal ta voʼe, laj yichʼ kontrainel ek kʼalal laj yal ti chtal Dios xchiʼuk ep ta mil yaj-anjeltak sventa chakʼbe stoj smul li jsaʼ muliletike (Jud. 14, 15). Melel onoʼox ti muʼyuk bu ojtikinbil li aʼyej laj yale. La spʼajik Enoc li krixchanoetike, la smilik jechuk ti muʼyukuk «iʼicʼat batel yuʼun li Diose». ¡Toj echʼ noʼox lek stsatsal yoʼonton laj yakʼ ta ilel ti xuʼ jchanbetik li vinik taje! (Gén. 5:21-24.)

6. ¿Kʼu yuʼun skʼan tsotsuk yoʼonton li Moisés sventa tskʼopon li faraone?

⁶ Jnoptik xtok ti kʼuyelan laj yakʼ ta ilel stsatsal yoʼonton Moisés kʼalal la skʼopon faraón ta Egiptoe, jun ajvalil ti kuybil ta jun dios ti maʼuk noʼox yajkʼopojel diosetike, ti jaʼ la xnichʼon li dios sventa Kʼakʼal ti Ra sbie. Li ajvalil taje xuʼ van laj yichʼ ta mukʼ li slokʼol stuke, jech kʼuchaʼal la spasik yan faraonetike. Li tsatsal ajvalil taje, ti jtoyba xchiʼuk ti pim ta mantale muʼyuk toʼox buchʼu xuʼ xalbe kʼusi skʼan spas. Ti kʼusi chale yuʼun chʼunbil. Li Moisés ti bikʼit yakʼoj sba xchiʼuk ti jaʼ jun jchabichij ti manxoe, ay jayibuk velta ta stojolal li vinik taje manchuk mi muʼyuk takbil ta ikʼel. ¿Kʼusi laj yal ta stojolal faraón li Moisese? Laj yalbe ti akʼo skolta lokʼel epal miyon j-israeletik ti mosoinbilike xchiʼuk tsots laj yalbe ti ch-akʼbat tsatsal vokoliletik yuʼun Dios li Egipto mi mu skolta lokʼele. ¿Mi tsots van yoʼonton skʼan spas li Moisese? ¡Jech kʼuxi un! (Núm. 12:3; Heb. 11:27.)

7, 8. 1) ¿Kʼusitik vokolil la snuptanik li yajtuneltak Dios ta voʼnee? 2) ¿Kʼusi koltaatik-o li tukʼil jtuneletik sventa mu xiʼik ta yakʼel ta ojtikinel li melel yichʼel ta mukʼ Diose?

 ⁷ Ep siglo ta tsʼakale, li j-alkʼopetik xchiʼuk yan tukʼil yajtuneltak Diose skʼan van oyuk stsatsal yoʼontonik sventa tspakbeik skʼoplal li melel yichʼel ta mukʼ Dios ta jun balumil ti toj chopol ti oy ta skʼob Diabloe. Li Pabloe xi laj yalbe skʼoplalike: «Oy imilatic ta ton, ichamic ta utsʼintael, ituchʼatic ta sierra, imilatic ta espada. Oy muc xnaqui ta snaic; buyuc noʼox oyic batel, slapojic snuculil chij, o me snuculil tentsun. Solel muʼyuc cʼusi oy yuʼunic; toj ep iʼutsʼintaatic; toj chopol cʼusi ipasbatic» (Heb. 11:37). ¿Kʼusi koltaatik sventa tukʼ-o li yoʼontonike? Jun-chib versikulo baʼyele, li jtakbole laj yal kʼusi patbat-o yoʼonton li Abele, Abraham xchiʼuk Sara: «Muʼyuc to yichʼoj cʼalal ichamic li cʼusi albilic onoʼox yuʼun Dios ch-acʼbatique. Pero yilojic xa batel ta nom laj yaʼyic, xcoʼlaj xa xchiʼuc staoj laj yaʼyic» (Heb. 11:13). Li j-alkʼopetik xchiʼuk yan yajtuneltak Jeova ti tsots yoʼonton laj yakʼ sbaik ta stojolal ti kuxiik kʼalal muʼyuk toʼox talem Cristoe, jech kʼuchaʼal Elías xchiʼuk Jeremiase, kuch yuʼunik ta skoj ti jaʼ te laj yakʼ-o satik li ta kʼusitik yaloj tspas Diose (Tito 1:2).

⁸ Skotolik smalaoj tstaik jun kuxlejal ti bu toj leke xchiʼuk ti bu oy muyubajele. Li ta achʼ balumile xuʼ staik li tukʼilale xchiʼuk ti «chcolic loqʼuel ta svocolic» koliyal li abtelal ta paleal tspas Jesucristo xchiʼuk li 144,000 (Rom. 8:21). Oy to kʼusi yan akʼbat-o stsatsal yoʼontonik li yajtuneltak Dios ta voʼne jech kʼuchaʼal li Jeremiase. Jaʼ li kʼusi jpʼel laj yal Dios ti chakʼ kʼotuk ta pasele, ti xi albat yuʼun Jeova li j-alkʼope: «Ta stsaquicot ta cʼop, pero mu xastsalicot, yuʼun te jchiʼinojot, vuʼun ta jcoltaot» (Jer. 1:19). Jech li voʼotik eke tspat koʼontontik kʼalal ta jnopbetik skʼoplal li kʼusitik yaloj tspas Dios ta tsʼakale xchiʼuk ti jpʼel yaloj chchabiutik ta mantale (Pro. 2:7; kʼelo 2 Corintios 4:17, 18).

Ta skoj ti kʼanvan li Jesuse akʼbat stsatsal yoʼonton ta xcholel mantal

9, 10. ¿Kʼu yelan laj yakʼ ta ilel stsatsal yoʼonton Jesús ta stojolal 1) li jnitvanejetik ta relijione, 2) li mayoletike, 3) li mero bankilal palee xchiʼuk 4) li Pilatoe?

⁹ Li Jesús, ti ta jchanbetik stalelale, ep kʼuyelan laj yakʼ ta ilel stsatsal yoʼonton. Jech kʼuchaʼal liʼe, akʼo mi chpʼajat tajek yuʼun li jnitvanejetik ta relijion ti lek ichʼbilik ta mukʼe, muʼyuk la skʼunibtas li smantal Dios ta stojolalike. Muʼyuk bu xiʼ ta yalel ti jecheʼ tskuy sbaik ta tukʼil krixchanoetik xchiʼuk ti tsjutik kʼope. Li Jeovae laj yal ti tstoj smulike, vaʼun li Jesuse lek tukʼ xchiʼuk jpʼel yoʼonton laj yal. Xi laj yalbe jun veltae: «¡Toj abul abaic, voʼoxuc li jchanubtasvanejoxuc ta smantal Diose xchiʼuc voʼoxuc li fariseooxuque, jloʼlavanejoxuc! Jaʼ jechoxuc jech chac cʼu chaʼal muquinaltic ti lec sac bonbile. Ta spat xocone lec xa cʼupil sba yilel. Pero li yute nojem ta sbaquil animaetic xchiʼuc ta cʼusitic yan te cʼaʼemic. Jaʼ jechoxuc ta qʼuelel li voʼoxuque. Tucʼoxuc xa yilel ta stojol li cristianoetique, pero li yut avoʼntonique nojem ta loʼlavanej xchiʼuc ta scotol cʼusitic yan chopol» (Mat. 23:27, 28).

¹⁰ Kʼalal bat tsakatuk yuʼun mayoletik te ta nichimaltik Getsemaní li Jesuse, jamal laj yal ti jaʼ Jesús li stuke (Juan 18:3-8). Ta tsʼakale ikʼat batel ta Sanedrín sventa chjakʼbat smul yuʼun li mero bankilal palee. Akʼo mi snaʼoj ti yakal tsabat smul sventa chmilate, muʼyuk bu xiʼ ta yalel ti jaʼ li Mesiase xchiʼuk ti jaʼ xNichʼon Diose. Xi to laj yal xtoke: «Ta to xavilic chotolun ta sbatsʼicʼob li  Bochʼo echʼem svuʼele. Ta to xavilic chiyal tal ta toc ta vinajel, vuʼun ti Xnichʼon cristiano licʼote», xi (Mar. 14:53, 57-65). Ta tsʼakal jutuke, laj yichʼ ikʼel batel ta stojolal Pilato, ti oy toʼox ta skʼob tskolta batele. Pe muʼyuk kʼusi laj yal kʼalal la sjutbeik smule (Mar. 15:1-5). Skʼan tsotsuk yoʼonton ta skoj taje.

11. ¿Kʼu yuʼun jmoj ch-abtej li tsatsal oʼontonal xchiʼuk li kʼanelale?

¹¹ Li kʼusi noʼox laj yalbe Pilato li Jesuse jaʼ liʼe: «Jaʼ sventa ti tal vocʼcune, xchiʼuc jaʼ sventa ti lital liʼ ta banamile, yuʼun tal cal li cʼusi melele» (Juan 18:37). Takat tal yuʼun sTot ta vinajel sventa chchol li lekil aʼyeje, ta skoj ti skʼanoj tajek sTot li Jesuse xmuyubaj noʼox la spas li abtelal taje (Luc. 4:18, 19). Jech noxtok, skʼanoj krixchanoetik li Jesuse xchiʼuk xojtikinbe li svokolike. Jech li voʼotik eke, mu xi jxiʼ ta xcholel mantal yuʼun jkʼanojtik li Diose xchiʼuk li jchiʼiltaktike (Mat. 22:36-40).

Li chʼul espiritue chakʼ stsatsal koʼontontik ta xcholel mantal

12. ¿Kʼusi kʼot ta pasel ti laj yakʼ muyubajuk li baʼyel yajtsʼaklomtak Cristoe?

¹² Kʼalal echʼem xaʼox jayibuk xemana slajel li Jesuse, li yajtsʼaklomtake xmuyubajik kʼalal laj yilik kʼuyelan chikʼ talel mas krixchanoetik li Jeovae. Ta jun noʼox kʼakʼale laj yichʼik voʼ oxmil judioetik xchiʼuk jyanlumetik ti koʼol xa xchʼunojik xchiʼuk judioetike, ti ta yantik lum likemik ti batik ta skʼinal Pentecostés ta Jerusalene. ¡Kʼu to noʼox van yelan chalbeik skʼoplal ta Jerusalén taje, li yibel judaismoe! Li Vivliae xi chal ta sventa taje: «Scotolic la snaʼic ti te oy Dios ta stojolique, toj labal sba laj yaʼyic, yuʼun ep sqʼuelubil stsatsal Dios iʼacʼbat spasic li yajtacbolaltac Jesuse», xi (Hech. 2:41, 43).

13. ¿Kʼu yuʼun la skʼan stsatsal yoʼontonik li yajtsʼaklomtak Cristoe, xchiʼuk kʼuxi la stakʼ Jeova li s-orasionike?

¹³ Li jnitvanejetik ta relijione sok tajek sjolik xchiʼuk la stikʼik ta chukel li Pedro xchiʼuk Juane, te chabibilik sjunul akʼobal xchiʼuk albatik mantal ti akʼo mu xa xcholbeik skʼoplal li Jesuse. Kʼalal lokʼik ta chukele, li chaʼvoʼ jtakboletike laj yalbeik li ermanoetik li kʼusi kʼot ta pasele. Chat yoʼontonik ta skoj li kontrainele, vaʼun skotolik la skʼoponik Jeova xchiʼuk xi la skʼanbeike: «Acʼbun lec stsatsal coʼntoncutic ti jamal acʼo calcutic o acʼop, vuʼuncutic li avajtuneluncutique», xutik. ¿Kʼusi kʼot ta pasel? «Scotolic inoj ta yoʼntonic stsatsal ti Chʼul Espiritue. Jech jamal laj yalic batel li scʼop Diose; muʼyuc xiʼel laj yaʼyic.» (Hech. 4:24-31.)

14. ¿Kʼuxi tskoltautik ta chol mantal li chʼul espiritue?

¹⁴ Kʼuchaʼal chkiltike, koliyal li tsatsal chʼul espiritu yuʼun Jeovae, li yajtsʼaklomtak Cristoe la sta li stsatsal yoʼontonik sventa chcholik-o batel li mantale. Jech li avi eke, skotol krixchanoetik chkalbetik li kʼusi melele, manchuk mi kajkontratik, maʼuk ta skoj ti yuʼun jtaleltik mu jnaʼ xi jxiʼe, yuʼun jaʼ ta skoj ti chakʼbutik xchʼul espiritu li Jeovae, jaʼ noʼox venta mi ta jkʼanbetike. Jaʼ jech, koliyal ti tskoltautik Jeovae xuʼ stsʼik kuʼuntik kʼusuk kontrainel (kʼelo Salmo 138:3).

Mu xi jxiʼ ta xcholel mantal li yajtsʼaklomutik Cristoe

15. ¿Kʼu yelan chchʼak krixchanoetik li kʼusi melele?

¹⁵ Jech kʼuchaʼal ta voʼnee, li avi eke chchʼak krixchanoetik li kʼusi melele. Jlome lek chaʼiik, yan li jlome mu xaʼibeik smelolal mi jaʼuk chichʼik ta mukʼ ti kʼuyelan chkichʼtik ta mukʼ Diose. Jech kʼuchaʼal laj yal Jesuse, oy buchʼutik tsloʼiltautik, tsnaʼleutik xchiʼuk tspʼajutik (Mat. 10:22). Bakʼintik xtoke chopol tsvinajesik jkʼoplaltik xchiʼuk tslokʼesik aʼyejetik ta jtojolaltik ta television, ta radio o ta yantik ti chopol kʼusi chalike (Sal. 109:1-3). Akʼo mi jech, li steklumal Jeovae mu xiʼ ta xcholel ta spʼejel Balumil li lekil aʼyeje.

16. ¿Kʼuxi xuʼ jnaʼtik ti xuʼ sjelbe snopben krixchanoetik kʼalal mu xi jxiʼ ta jcholbetik mantale?

¹⁶ Pe ti jech tsots koʼontontike xuʼ xjel stalelal kuʼuntik ti kʼuyelan chil li aʼyej sventa Ajvalilal yuʼun Dios li krixchanoetike. Jun ermana ti nakal ta Kirguistane xi chale: «Xi laj yalbun jun vinik li ta chol mantale: “Jchʼunoj Dios li voʼone, pe maʼuk li sDios yajtsʼaklomtak Cristoe. ¡Mi la chaʼtal ta jnae, ta jkolta li jtsʼiʼe!”. Jaʼ to laj kil ti ta spate te chukul ta kadena jkot mukʼta bulldog  tsʼiʼ. Akʼo mi jech, ta jayibuk kʼakʼal ta tsʼakale, kʼalal jaʼo laj yichʼ pukel li tratado Aʼyejetik sventa Ajvalilal yuʼun Dios numero 37, ti jaʼ sbi “¡Chnopaj xa slajeb li jecheʼ relijione!”, li chaʼbat li ta na taje sventa ta jkʼel mi ta jta ta kʼoponel yan yutsʼ yalal. Pe jaʼ onoʼox ilokʼ talel noxtok li vinike. Ta ora noʼox la jkʼopon Dios xchiʼuk xi laj kalbe li vinike: “Liʼote, xvul to ta jol ti li jloʼilajutik leʼ xa ta yoxibal kʼakʼale xchiʼuk xvul ta jol ek li atsʼiʼe, pe mu xuʼ jel komel chkaʼi li anae, yuʼun jech kʼuchaʼal voʼote, jchʼunoj ek li jun noʼox melel Diose. ¿Mi anaʼoj xa ti poʼot xa chakʼbe kastigo li relijionetik ti chopol skʼoplal yuʼunik Diose? Li tratado liʼe chalbe mas skʼoplal taje”. Labal to sba laj kaʼi ti la xchʼam li vinike. Laj kalbe ti chi bat xae, vaʼun li jelav ta yan na. Pe te van chib-oxibuk minuto ta tsʼakale, laj kil ti te xtal ta anil xchiʼuk ti stsakoj tal li tratadoe. Kʼalal la staune, xi laj yalbune: “Laj xa jkʼel. ¿Kʼusi skʼan ta jpas sventa mu xkʼot ta jtojolal li skʼakʼal yoʼonton Diose?”». Lik xchan Vivlia li vinik taje xchiʼuk lik batuk ta tsobajeletik.

17. ¿Kʼu yelan la stsatsubtasbe yoʼonton jun yajchanun jun ermana ta skoj ti muʼyuk xiʼe?

¹⁷ Kʼalal tsots koʼontontike xuʼ chakʼbe stsatsal yoʼonton yantik. Jun ermana ta Rusia ti yakal chanav batel ta karoe ta xaʼox xakʼbe jlik revista jun ants, vaʼun jaʼo tots talel ta ora jun vinik, la spojbe li revistae, la sjat xchiʼuk la sten batel. Te une x-avet noʼox la xchopol kʼopta li ermanae, la sjakʼbe ta persa bu nakal xchiʼuk tsots laj yalbe ti akʼo mu xa xchol mantal li ta jteklume. La skʼopon Jeova li ermanae xchiʼuk vul ta sjol li kʼusi xi yaloj Jesuse: «Mu me xaxiʼic yuʼun li bochʼo ta smil abecʼtalique» (Mat. 10:28). Muʼyuk bu xiʼ li ermanae, kʼalal chyal xaʼoxe, xi laj yalbe li vinike: «Muʼyuk bu chkalbot bu nakalun mi jaʼuk chkikta ta xcholel mantal li ta jteklume», vaʼun iyal li ta karoe. Li kʼusi muʼyuk snaʼoje jaʼ ti te tikʼil batel jun ants ti yakal chchanubtas ta Vivlia li ermanae xchiʼuk ta skoj ti chiʼe muʼyuk ayem li ta tsobajeletike. Pe kʼalal laj yilbe stsatsal yoʼonton li ermanae lik batuk li ta tsobajeletike.

18. ¿Kʼusi xuʼ skoltautik sventa mu xi jxiʼ ta xcholel mantal jech kʼuchaʼal li Jesuse?

¹⁸ Li ta balumil ti namajem ta stojolal Diose, skʼan oyuk stsatsal koʼontontik sventa jchanbetik stalelal li Jesuse xchiʼuk ti jcholbetik skʼoplal li Ajvalilal yuʼun Diose. ¿Kʼuxi xuʼ spas avuʼun? Pato me avoʼonton ti oy kʼusi lek chtal ta tsʼakale. Kʼano mas li Diose xchiʼuk li krixchanoetike. Kʼanbo stsatsal avoʼonton li Jeovae. Xchiʼuk vuleso me ta ajol ti mu atukuke: te me xchiʼinojot-o li Jesuse (Mat. 28:20). Chakʼbot sbendision li Jeovae xchiʼuk tskoltaot, li chʼul espiritue chakʼbot stsatsal avoʼonton. Ta melel, jkotoltik xuʼ stsatsub koʼontontik xchiʼuk xi chkaltike: «Jaʼ Jcoltavanej cuʼun li Cajvale [li Jeovae], jech muʼyuc chixiʼ. ¿Cʼusi xuʼ yuʼun chispasbicun li cristianoetique?» (Heb. 13:6).

¿Kʼusi cha takʼ?

• ¿Kʼu yuʼun skʼan oyuk stsatsal yoʼontonik li yajtuneltak Diose?

• ¿Kʼusi xuʼ jchanbetik ...

... li yajtuneltak Dios ti kuxiik kʼalal muʼyuk toʼox talem Jesuse?

... li Jesuse?

... li baʼyel yajtsʼaklomtak Cristoe?

... li kermanotaktik avi kʼakʼale?

[Sjakʼobiltak sventa xchanobil]

[Lokʼol ta pajina 21]

Li Jesuse muʼyuk bu xiʼ ta yalbel smul li jnitvanejetik ta relijione

[Lokʼol ta pajina 23]

Li Jeovae jaʼ chakʼ stsatsal koʼontontik ta chol mantal