Chchanbeik stalelal Jesús li utsʼ-alaliletik yajtsʼaklomtak Cristoe

«Li Cristoe [...] laj yacʼboxuc avilic cʼusi tscʼan chapasic, yuʼun jech acʼo atsʼaclinic batel.» (1 PED. 2:21)

1. 1) ¿Kʼusi yabtel la spas li xNichʼon Dios kʼalal laj yichʼ pasel li kʼusitike? 2) ¿Kʼusi chaʼi ta stojolal krixchanoetik li Jesuse?

 KʼALAL la spas vinajel xchiʼuk Balumil li Diose, la xchiʼin ta abtel li xNichʼon ti jaʼ li «pʼijil j-abtele [NM]». Li Nichʼonile la skolta sTot ta snopel kʼuyelan tspasik li epal chonbolometike xchiʼuk li tsʼiʼleletik ti oy ta Balumile. Xchiʼuk koltavan ta smeltsanel li paraiso ti bu chnaki li krixchanoetike, ti laj yichʼik pasel jech kʼuchaʼal Jeovae. Li xNichʼon Diose, ti laj yichʼ ojtikinel kʼuchaʼal Jesús ta mas tsʼakale, «toj jun [y]oʼnton [laj yaʼi] ta stojol li cristianoetique» (Pro. 8:27-31; Gén. 1:26, 27).

2. 1) ¿Kʼusi yakʼojbe jpas mulil krixchanoetik li Jeovae? 2) Albo skʼoplal bu jtosukal ta kuxlejal chakʼ beiltasel li Vivliae.

² Kʼalal la spas smul li Adán xchiʼuk Evae, li spojel krixchanoetike ikʼataj ta jtos kʼusi tsots skʼoplal sventa chkʼot ta pasel li kʼusi tskʼan yoʼonton Jeovae. Jaʼ yuʼun, la stak tal xNichʼon sventa chakʼ xkuxlejal ta jtojolaltik (Rom. 5:8). Jech xtok, laj yakʼbutik li sKʼop sventa ta jta jmuyubajeltik akʼo mi jmulavil krixchanoutike (Sal. 119:105). Jech kʼuchaʼal liʼe, li lekil tojobtaseletik ta jtatik ta Vivliae tskoltautik sventa jmojuk oy xchiʼuk xmuyubaj li kutsʼ kalaltike. Jaʼ jech taje, li slivroal Genesise chal ti vinike skʼan «xnabi ta ants» vaʼun «ta spasic ta jun ti xchibalique» (Gén. 2:24, Ch).

3. 1) ¿Kʼusi laj yakʼ ta chanel Jesús ta sventa li nupunele? 2) ¿Kʼusi ta jchantik batel?

³ Kʼalal la xchol mantal li Jesuse, lek jamal laj yal ti jaʼ sventa sjunul kuxlejal li nupunele. Jech noxtok, laj yakʼ ta chanel jayibuk  beiltaseletik ta Vivlia ti chkoltavan sventa mu jpastik li kʼusi chakʼ ta vokol li smuyubajel nupultsʼakale xchiʼuk skotol li utsʼ-alalile (Mat. 5:27-37; 7:12). Li ta mantal liʼe, ta jchantik li kʼusi laj yakʼ ta ilel Jesús ta stalelal xchiʼuk li ta skʼopojele xchiʼuk ti kʼuxi xuʼ skolta sventa mas xmuyubajik li malaliletike, li ajnilaletike, li totil-meʼiletike xchiʼuk li alab-nichʼnabiletike.

Chichʼ ta mukʼ yajnil li malalil yajtsʼaklom Cristoe

4. ¿Kʼusi xkoʼolajik-o xchiʼuk Jesús li malaliletik yajtsʼaklom Cristoe?

⁴ Li Diose jaʼ laj yakʼ ta jolil ta utsʼ-alalil li malalile, jech kʼuchaʼal laj yakʼ ta Jolil ta tsobobbail li Jesuse. Xi laj yal li jtakbol Pabloe: «Li vinique jaʼ jolil cʼotem yuʼun li yajnile, jech chac cʼu chaʼal li Cristoe jaʼ Jolil cʼotem yuʼun scotol li steclumale, jaʼ li sbecʼtal cʼoteme. Xchiʼuc jaʼ Jcoltavanej yuʼun. Viniquetic, cʼano me avajnilic jech chac cʼu chaʼal scʼanoj steclumal li Cristoe, yuʼun laj yacʼ sba ta milel ta scoj» (Efe. 5:23, 25). Jech kʼuchaʼal la stsak ta venta li yajtsʼaklomtake, li Jesuse jaʼ jech laj yakʼ ta ilel ti kʼuyelan skʼan stsak ta venta yajnilik li yajtsʼaklomtake. Jech oxal chaʼa, jkʼeltik kʼuxi la stunes li yabtel akʼbat yuʼun sTote.

5. ¿Kʼuxi la stunes li yabtel akʼbil Jesús ta stojolal yajtsʼaklomtake?

⁵ Li Jesuse «toj lec [y]oʼnton, biqʼuit [laj yakʼ sba]» (Mat. 11:29). Jech xtok, stalel onoʼox ti jpʼel-o ta yoʼonton li kʼusi la spase xchiʼuk muʼyuk bu laj yikta sba ta spasel li kʼusi oy ta sbae (Mar. 6:34; Juan 2:14-17). Ta slekil yoʼonton la stojobtas li yajtsʼaklomtak kʼalal sta-o laj yile (Mat. 20:21-28; Mar. 9:33-37; Luc. 22:24-27). Pe jech xtok, muʼyuk bu naka noʼox te xvulvun mi jaʼuk laj yakʼan ta kʼexlal. Mi jaʼuk laj yakʼ ta aʼiel ti muʼyuk skʼanojane o ti mu xuʼ yuʼunik spasel li mantaletik laj yakʼe. Moʼoj, la slekil kʼoptabe li stalelalike xchiʼuk la spatbe yoʼonton (Luc. 10:17-21). Jech oxal chaʼa, muʼyuk bu labal chkaʼitik ti ta ora noʼox ch-ichʼat ta mukʼ yuʼun yajtsʼaklomtak ta skoj ti lek chkʼanvane xchiʼuk ti chkʼuxubinvane.

6. 1) ¿Kʼusi xuʼ xchanik li malaliletik kʼalal chilik ti kʼuyelan la stsak ta venta li yajtsʼaklomtak Jesuse? 2) ¿Kʼusi tojobtasel chakʼbe malaliletik li Pedroe?

⁶ Ti kʼuyelan laj yakʼ ta ilel stalelal li Jesuse chchanubtasvan ti skʼan mu simaronuk spas sba li malalil yajtsʼaklom Cristoe. Moʼoj, skʼan xichʼ ta mukʼ xchiʼuk akʼo skʼan li yajnile xchiʼuk ti maʼuk noʼox xkʼuxubin sba stuke. Li jtakbol Pedroe laj yalbe li malaliletik ti akʼo xchanbeik ti kʼuyelan ta xkʼuxul yoʼonton la stsak ta venta yantik li Jesuse xchiʼuk ti «jaʼ noʼox jech» xichʼik ta mukʼ li yajnilik eke (kʼelo 1 Pedro 3:7). Jaʼ yuʼun chaʼa, ¿kʼuxi xuʼ lek spas yabtel ta jolil li jun yajtsʼaklom Cristoe pe ti chakʼ ta ilel ti chichʼ ta mukʼ xtok li yajnile?

7. ¿Kʼuxi xuʼ xichʼ ta mukʼ yajnil li yajtsʼaklom Cristoe? Alo kʼuxi.

⁷ Jtos ti kʼuyelan xuʼ xichʼ ta mukʼ yajnil li jun yajtsʼaklom Cristoe jaʼ ti stsak ta venta kʼusi tsnop li yajnile xchiʼuk li kʼusi oy ta yoʼonton kʼalal mu to tspas li kʼusi snopoj ti xuʼ oy kʼusi chakʼ kʼotuk ta pasel ta yutsʼ yalale.  Jech kʼuchaʼal liʼe, xuʼ van tsnop tsjel yabtel li malalile o chbatik ta naklej ta yan bu jotukal. O xuʼ van jaʼ ta sventa kʼusitik chichʼ nopel jujun kʼakʼal, kʼuchaʼal ti bu chbatik ta vakasione o kʼuxi xuʼ xchapanik li kʼusitik sventa takʼin ta skoj ti yantik xtoy batel li kʼusitike. Ta skoj ti oy kʼusi chkʼot ta pasel yuʼun li ta utsʼ-alalile, chakʼ ta ilel ti chichʼ ta mukʼ yajnil kʼalal baʼyel chalbe li kʼusi tspase. Taje ep sbalil chichʼ tabel xtok, mi jech tspase ta melel xuʼ lek noʼox smelolal chkʼot ta nopel yuʼun li malalile, jech li ajnilal eke xuʼ me mas ta sjunul yoʼonton tskolta (Pro. 15:22). Li yajtsʼaklom Cristo ti chichʼ ta mukʼ yajnile chkʼanat xchiʼuk ch-ichʼat ta mukʼ, pe li kʼusi mas tsots skʼoplale jaʼ ti lek ch-ilat yuʼun Jeovae (Efe. 5:28, 29).

Chichʼ tajek ta mukʼ smalal li ajnilal yajtsʼaklom Cristoe

8. ¿Kʼu yuʼun muʼyuk kʼusi lek laj yakʼ ta ilel li Evae?

⁸ Li Jesuse ta sjunul yoʼonton laj yichʼbe ta mukʼ li yabtel sTot ta jolile, vaʼun jaʼ jech laj yakʼ ta ilel kʼuyelan skʼan spas ta stojolal smalalik li antsetik yajtsʼaklom Cristoe. ¡Toj echʼ noʼox jelel li stalelal Jesús xchiʼuk li Evae! Li baʼyel ajnilal echʼ ta Balumile muʼyuk kʼusi lek laj yakʼ ta ilel ta sventa li antsetike. Li Jeovae yaloj onoʼox ti jaʼ jolil chkʼot ta utsʼ-alalil li Adane xchiʼuk ti jaʼ tstunes sventa chakʼ ta naʼel li mantaletik yuʼune. Pe li Evae muʼyuk la stsak ta venta li mantal laj yichʼ Adane (Gén. 2:16, 17; 3:3; 1 Cor. 11:3). Melel onoʼox ti laj ta loʼlael li Evae, pe kʼalal albat yuʼun li kiletel chon ti xojtikin li kʼusi snaʼoj Diose, baʼyel la sjakʼbe jechuk li smalale. Pe mu jechuk la spas, yuʼun jaʼ la spas li kʼusi oy ta sba Adane (Gén. 3:5, 6; 1 Tim. 2:14).

9. ¿Kʼu yuʼun jaʼ jun slekil kʼelobil ta sventa xchʼunel mantal li Jesuse?

⁹ Yan li Jesuse toj lek kʼusi laj yakʼ kiltik, yuʼun skotol ora laj yichʼbe ta mukʼ yabtel li Jolil yuʼune. Li stalelale jamal laj yakʼ ta ilel ti «muʼyuc snopoj ti sujoj sba yoʼ xcoʼolaj xchiʼuc Dios[e]». Moʼoj, «laj yicta comel ti cʼu sʼelan bu to ox oye, cʼot jech cʼu chaʼal junuc jtunel» (Fili. 2:5-7, Ch). Li avie jech to stalelal akʼo mi kʼotem xa ta Ajvalil. Bikʼit chakʼ sba ta spasel li kʼusi ch-albat yuʼun sTote xchiʼuk ta onoʼox xchʼunbe smantal (Mat. 20:23; Juan 5:30; 1 Cor. 15:28).

10. ¿Kʼuxi xuʼ xakʼ ta ilel ti tspas kʼusi ch-albat yuʼun smalal li ants yajtsʼaklom Cristoe?

¹⁰ Li antsetik yajtsʼaklom Cristoe skʼan me xchanbeik stalelal Jesús xchiʼuk ti xchʼunbeik smantal li smalalike (kʼelo 1 Pedro 2:21 xchiʼuk 3:1, 2). Xi jkoʼoltastike. Jun kereme oy kʼusi tskʼan tspas ti persa chal kʼuyelan chilik li stot xchiʼuk smeʼe, vaʼun tskʼanbe permiso li smeʼe. Ta skoj ti muʼyuk to sloʼiltaoj xchiʼuk smalale, li kʼusi mas leke jaʼ ti sjakʼbe skerem mi yalojbe xa li stote. Mi muʼyuk toe, li meʼile skʼan me sjakʼbe baʼyel smalal sventa jmoj tsnopik li kʼusi chalbe skeremike. Mi muʼyuk koʼol kʼusi tsnopike, jaʼ lek ti stuk noʼox sloʼiltaike. Ta melel, li ajnilale mu van skʼan skontrain li  smalale o ti chchibal kʼopta li kʼusi chal ti te skʼeloj li skeremike (Efe. 6:4).

Lek chchanbeik stalelal Jesús li totil-meʼiletike

11. ¿Kʼu yuʼun toj lek xuʼ xchanbeik stalelal Jesús li totil-meʼiletik xtoke?

¹¹ Akʼo mi muʼyuk la saʼ yajnil xchiʼuk chʼabal xnichʼnab li Jesuse, toj lek ti xchanbeik stalelal li totil-meʼiletik yajtsʼaklom Cristoe. ¿Kʼu yuʼun? Yuʼun ta slekil yoʼonton xchiʼuk oy smalael yuʼun ti la xchanubtas li yajtsʼaklomtake, laj yakʼ ta ilel ta skʼopojel xchiʼuk ta kʼusitik la spas. Laj yakʼbe yil kʼuxi xuʼ spas yuʼunik li abtel laj yakʼbee (Luc. 8:1). Ti kʼuyelan tsakatik ta ventae chanubtasatik kʼuyelan skʼan xichʼ sbaik ta mukʼ ek (kʼelo Juan 13:14-17).

12, 13. ¿Kʼusi skʼan spasik li totil-meʼiletik yajtsʼaklom Cristo sventa tstikʼbe ta yoʼonton smantal Dios li yalab xnichʼnabike?

¹² Li ololetike stalel onoʼox ti chchanbeik li kʼusi lek xchiʼuk kʼusi chopol tspas stot smeʼike. Jaʼ yuʼun skʼan xi sjakʼbe sba li totil-meʼiletike: «¿Kʼusi yakal chkakʼbekutik xchan li kalab jnichʼnabkutike? ¿Kʼu sjalil ta jkʼelkutik li televisione xchiʼuk li chʼayob oʼontonale? ¿Kʼu sjalil ta jcholkutik mantal xchiʼuk ta jchankutik li Vivliae? ¿Kʼusi ti baʼyel chkakʼ ta jkuxlejalkutik ta utsʼ-alalile? ¿Mi jaʼ mas tsots skʼoplal chkilkutik li yichʼel ta mukʼ Diose? ¿Mi jaʼ jech chvinaj ta jkuxlejalkutik taje?». Sventa chakʼbe ta yoʼontonik smantal Dios xnichʼnab li totil-meʼiletike, baʼyel skʼan oyuk ta yoʼonton stukik (Deu. 6:6).

¹³ Mi chakʼbeik yipal ta yakʼel ta xkuxlejalik li beiltaseletik ta Vivlia ta sventa kʼusitik jujun kʼakʼal li totil-meʼiletike, ta me xakʼik venta li yalab xnichʼnabike xchiʼuk mas me ch-ichʼbatik ta mukʼ li kʼusi chalike. Pe mi chakʼik venta ti muʼyuk chakʼ ta xkuxlejalik li beiltaseletik chakʼbeik xchan yalab xnichʼnabike, xuʼ van tsnopik ti muʼyuk tsotsik skʼoplal o muʼyuk ta stabeik lek sbalil li mantaletik ta Vivliae. Mi jech taje, xuʼ van jaʼ stsʼujik-o ta spasel kʼusitik ta sventa balumil li alab-nichʼnabiletike.

14, 15. ¿Kʼusitik sventa mantal xuʼ xakʼbe ta yoʼonton yalab xnichʼnabik li totil-meʼiletike, xchiʼuk kʼuxi xuʼ spasik?

¹⁴ Li totil-meʼiletik yajtsʼaklom Cristoe snaʼojik ti maʼuk noʼox ti chakʼbeik kʼusitik chtun yuʼun yalab xnichʼnabik sventa stsʼitesike. Jech oxal chaʼa, mu me lekuk mi chichʼik albel ti akʼo yakʼbeik yipal ta stael kʼusitik sventa tsta slekilalik ta takʼine (Ecl. 7:12). Li Jesuse laj yakʼbe xchan li yajtsʼaklomtak ti jaʼuk mas tsots skʼoplal chilik li kʼusitik sventa mantale (Mat. 6:33). Li totil-meʼiletike skʼan me xchanbeik stalelal li Jesuse xchiʼuk ti akʼo yakʼbeik yipal ta yakʼbel ta yoʼonton yalab xnichʼnabik li stael kʼusitik sventa mantale.

¹⁵ Jtos ti kʼusi xuʼ spas totil-meʼiletike jaʼ ti xakʼik akʼo yojtikin ermanoetik ti yakal x-abtejik ta tsʼakal orae. Li jun kereme tstsatsubtasbat yoʼonton mi chchiʼin prekursoretik o li jkʼelvanej ta sirkuito xchiʼuk yajnile. Li misioneroetik, li buchʼutik chtunik ta Betel xchiʼuk li ermanoetik ti ch-abtejik ta yantik balumile stalel onoʼox ti tsloʼiltaik kʼu to yepal xmuyubajik  ti yakal chtunik ta stojolal Jeovae. Ta melel oy van ep kʼusitik labalik sba tsloʼiltaik. Ti jech ta sjunul yoʼonton chtunike xuʼ skolta sventa lek kʼusi chkʼot ta nopel yuʼunik li kerem-tsebetike, ti xakʼbeik yipal stael kʼusitik ti oy sbalile xchiʼuk ti xchanik vun sventa noʼox smakʼlin sba stukike.

¿Kʼusi chkoltaatik sventa xchanbeik stalelal Jesús li alab-nichʼnabiletike?

16. ¿Kʼuxi laj yichʼ ta mukʼ stot smeʼ liʼ ta Balumil li Jesuse xchiʼuk li sTot ta vinajele?

¹⁶ Kerem-tseb, lek me kʼusi xuʼ xa chan ta stojolal li Jesús eke. Li stuke laj onoʼox xchʼunbe smantal li stot smeʼ liʼ ta Balumile, li José xchiʼuk Mariae (kʼelo Lucas 2:51). Akʼo mi snaʼoj ti jaʼ jpas muliletike, li Diose jaʼ yakʼojbe ta sba xchabiel xchiʼuk ti staik-o ti xichʼik ichʼel ta mukʼe (Deu. 5:16; Mat. 15:4). Kʼalal mukʼta krixchano xaʼoxe jaʼ jech la spas ti kʼuyelan tskʼan yoʼonton sTot ta vinajele xchiʼuk muʼyuk laj yakʼ sba ta tsalel li ta prevaetike (Mat. 4:1-10). ¿Kʼusi van cha pas mi mu xa kʼan xa chʼunbe smantal li atot ameʼe? ¿Kʼuxi xuʼ xa chanbe stalelal li Jesuse?

17, 18. 1) ¿Kʼusi prevaetik tstaik li kerem tsebetik ta stojolal li xchiʼilik ta chanune? 2) ¿Kʼusi xuʼ xkoltaatik sventa stsal yuʼunik li prevaetike?

¹⁷ Jutuk mu skotoluk li achiʼiltak ta chanune, ta melel muʼyuk van ta yoʼontonik li mantaletik ta Vivliae. Xuʼ van oy ta yoʼontonik xa pas li kʼusi muʼyuk lek ilbile xchiʼuk ti tslabanoxuk mi «moʼoj» xavute. ¿Kʼusi van cha pas mi chchopol kʼoptaoxuk ta skoj ti muʼyuk cha pas li kʼusi tskʼanike? Mi cha xiʼ yuʼune xchiʼuk mi cha pas li kʼusi chalike, chat me yoʼonton avuʼun li atot ameʼe xchiʼuk li Jeovae. Jech xtok, ¿kʼu van yelan chbat akuxlejal mi la apas li kʼusi tspas achiʼiltake? Xuʼ van cha kʼan cha och ta prekursor, cha tun ta Betel o cha kʼot ta yajkoltaobba mol, o yakal van xa nop chbat tunan bu muʼyuk mas jchol mantaletike. Mi jaʼ cha chiʼinan achiʼiltak ta chanune, ¿mi ta van skoltaot ta stael li kʼusitik taje?

¹⁸ Kerem-tseb, mi chichʼ akʼel ta preva li xchʼunel avoʼontone, vuleso ta ajol li kʼusi la spas Jesuse. Li stuke mu jutebuk tsʼuj li ta prevaetike, tukʼ laj yakʼ-o sba xchiʼuk la spakbe skʼoplal li kʼusitik xchʼunoje. Ti cha vules ta ajol ti kʼuyelan laj yakʼ ta ilel stalelale chakʼbot yipal avoʼonton sventa chavalbe «moʼoj» li achiʼiltak kʼalal chalbot ti akʼo xa pas li kʼusi anaʼoj ti chopole. Jech kʼuchaʼal li Jesuse, nopo avaʼi li muyubajel cha ta ti cha tun ta stojolal Jeovae xchiʼuk ti cha chʼunbe smantal sbatel osile (Heb. 12:2).

Li kʼusi chakʼ muyubajel ta utsʼ-alalile

19. ¿Kʼuxi ta tael li melel muyubajele?

¹⁹ Li Jeova xchiʼuk Jesuse jaʼ tskʼanik li kʼusi lek ta sventa li krixchanoetike. Akʼo mi jsaʼ mulilutik, xuʼ jtatik jutuk muyubajel (Isa. 48:17, 18; Mat. 5:3). Li Jesuse maʼuk noʼox laj yakʼbe xchan kʼusitik melel ti tsotsik skʼoplal sventa xmuyubaj li yajtsʼaklomtake, yuʼun la xchanubtas xtok ta sventa ti kʼuyelan xuʼ mas lek xkuxiike. Laj yakʼ komel ta ilel kʼuxi xuʼ lek noʼox smelolal jkuxlejaltik xchiʼuk li jtalelaltike. Kʼusuk li kabteltik ta kutsʼ kalaltike, jkotoltik xuʼ jtabetik sbalil li kʼusi laj yakʼ ta ilele. Jaʼ yuʼun malaliletik, ajnilaletik, totil-meʼiletik xchiʼuk alab-nichʼnabiletik, ¡pasik-o batel li kʼusi laj yakʼ komel ta ilel li Jesuse! Mi cha chʼambeik li chanubtasel chakʼe xchiʼuk mi cha pasik li kʼusi laj yakʼ ta ilele, cha kʼupinik jun kuxlejal ta utsʼ-alalil ti xmuyubaj noʼoxe.

¿Mi xa nabe li stakʼobile?

• ¿Kʼuxi xuʼ stunes li yabtel akʼbil yuʼun Dios li malalile?

• ¿Kʼuxi xuʼ xchanbeik stalelal Jesús li ajnilaletike?

• ¿Kʼusi xuʼ xchanbeik Jesús li totil-meʼiletik ta sventa ti kʼuyelan la stsak ta venta li yajtsʼaklomtake?

• ¿Kʼusi xuʼ xchanik ta stojolal Jesús li kerem-tsebetike?

[Sjakʼobiltak sventa xchanobil]

[Lokʼol ta pajina 8]

¿Kʼusi skʼan spas li malalil kʼalal muʼyuk to snopoj kʼusi tspas ti xuʼ oy kʼusi chakʼ kʼotuk ta pasel ta yutsʼ yalale?

[Lokʼol ta pajina 9]

¿Kʼuxi chakʼ ta ilel li ants yajtsʼaklom Cristo ti chichʼ ta mukʼ kʼusi ch-albat yuʼun smalale?

[Lokʼol ta pajina 10]

Li alab-nichʼnabiletike chchanbeik slekil talelal stot smeʼik