Kʼalal jmoj ta jkolta jbatike tskoltautik sventa xi jchʼi ta mantal

TI TSKOLTA sbaike jaʼ jtos kʼusi tsots skʼoplal sventa li buchʼutik tskʼanik akʼo xchʼi ta mantal li yutsʼ yalalike. Kʼalal la spas li baʼyel nupultsʼakal li Jeovae, laj yal ti skʼan skolta sbaike: jaʼ chkʼot ta «yajcoltaubbail» Adán li Evae (Gén. 2:18). Jaʼ yuʼun li ta nupultsʼakale skʼan skolta sbaik li vinik xchiʼuk antse (Ecl. 4:9-12). Jech noxtok li totil-meʼiletik xchiʼuk li alab-nichʼnabiletike skʼan skolta sbaik sventa spas yuʼunik li yabtel akʼbilik yuʼun Jeovae.

Yichʼel ta mukʼ Jeova ta utsʼ-alalil

Li Barry xchiʼuk Heidie oy voʼob yalab xnichʼnabik, yakʼojik venta ti toj tsots skʼoplal ti skolta sbaik sventa mu xiktaik xchanel Vivlia ta yutsʼ yalalik xchiʼuk ti chkoltaatik sventa xchʼiik ta mantale. Xi chal li Barrye: «Bakʼintike chkakʼbe yabtel li ololetik ta sventa li xchanel Vivlia ta kutsʼ kalalkutike. Jech kʼuchaʼal liʼe, ti akʼo xchapan sloʼilik ti te lokʼemik ta ¡Despertad! Jech xtok ta jchanilankutik skʼelobiltak chol mantal sventa snaʼikuk kʼusi chalik li ta chol mantale». Xi chal li Heidi eke: «Jkotol jtsakojkutik ta vun li kʼusi ta jkʼan ta jtakutik ta sventa mantale xchiʼuk ta jkʼelkutik bakʼintik kʼalal jaʼo ta jchankutik li Vivliae sventa xkakʼkutik venta kʼusitik jpasojkutik xa». Li nupultsʼakal taje yakʼojik venta ti oy sbalil kʼalal oy junantik akʼobal muʼyuk buchʼu tskʼel television sventa junuk yoʼonton tskʼel Vivlia li utsʼ-alalile.

Tsobajeletik

Li Mike xchiʼuk Denise la stsʼites chanvoʼ yalab xnichʼnabik. ¿Kʼusi sbalil laj yil yutsʼ yalalik ta skoj ti la skolta sbaike? Xi chal li Mike: «Akʼo mi lek ta jchapankutik sventa sob chi kʼotkutik li ta tsobajeletike bakʼintike mu jechuk chkʼot ta pasel, pe laj kakʼkutik venta ti xuʼ spas kuʼunkutik mi ta jkolta jbakutike». Xi chal li Denise: «Kʼalal kʼoxik toʼox li kalab jnichʼnabkutike chkakʼbekutik yabtelik. Jech kʼuchaʼal liʼe, li jtsebkutik ti Kim sbie chkoltavan ta spasel veʼlil xchiʼuk ta xlechanel». Xi tsvules ta sjol li skeremik ti Michael sbie: «Ta jujun martes ta akʼobale chichʼ toʼox pasel jun tsobajel ta jnakutik. Jaʼ yuʼun ta jchʼubakutik li nae, ta jpaskutik aspirar xchiʼuk ta jcholkutik li xilaetike». Yan skeremik ti Matthew sbie, xi chal eke: «Li jtote sob chkʼot ta jnakutik kʼalal jaʼo oy tsobajele xchiʼuk tskʼel mi chapalunkutik xa». ¿Kʼusi kʼotem ta pasel un?

Oy sbalil kʼalal chkakʼbetik yipale

Xi chal li Mike: «Li voʼon xchiʼuk Denise li ochkutik ta prekursor ta 1987 kʼalal te toʼox jchiʼinojkutik ta naklej li oxvoʼ kalab jnichʼnabkutike. Li jtsebkutik xchiʼuk jun jkeremkutike ochik ta prekursor ek, li yantik xtoke abtejemik ta jlom abtelaletik sventa svaʼanel Betel. Jech noxtok, li ta kutsʼ kalalkutike jtaoj jmuyubajelkutik ti jkoltaojkutik 40 ta voʼ krixchanoetik sventa xakʼ sbaik ta stojolal li Jeovae xchiʼuk ti xichʼik voʼe. Xchiʼuk jkoltaoj jbakutik ta svaʼanel ti bu xuʼ chichʼ ichʼel ta mukʼ Jeovae, bakʼintike ta yantik lum».

Ta melel, oy sbalil ti chkakʼbetik yipal sventa jkolta jbatike. ¿Mi oy to van kʼusitik yan xuʼ spas li avutsʼ avalale? Ta melel, kʼalal oy ta avoʼontonik cha kolta abaike jaʼ tskolta sventa xchʼi-o ta mantal li avutsʼ avalale.

[Lokʼol ta pajina 28]

Li xchanilanel skʼelobiltak chol mantale chkoltavan sventa jchantik mas kʼuyelan xuʼ jcholtik mantal