Li sbekʼ kʼusitik melele chkʼot kʼalal to namal Balumil

LI República yuʼun Tuva ta Rusiae te oy ta jot stiʼil Siberia ta sur, ta stsʼak Mongolia. Ep li buchʼutik te nakalike toj nom oyik, jaʼ yuʼun vokol chichʼ cholbel mantal ta sventa li Ajvalilal yuʼun Diose. Akʼo mi jech, leʼ xa jayibuk kʼakʼale te la stsob sbaik ep krixchanoetik ta Kyzyl, li kapital yuʼun Tuvae. Li María ti jaʼ jun prekursora ti te nakal ta jteklum taje, laj yaʼi ti te tstsob sbaike xchiʼuk la snop ti jaʼ lek yorail sventa xuʼ xchol li lekil aʼyeje.

Xi chal María li kʼusi kʼot ta pasele: «Li ta chanob vun bu chi chanubtasvane la xchapan jun seminario (tsobajel sventa chanubtasel) sventa kʼuxi ta poxtael li kʼusitik chopol nopem ta lajesel, jech kʼuchaʼal droga, pox o yan kʼusitike. Malabil chkʼot 50 ta voʼ krixchanoetik ti nom likemik talel ta Tuvae. Li ta tsobajel taje kʼot jchanubtasvanejetik, psicólogos (buchʼutik chchanbeik stalelal krixchanoetik), buchʼutik tskʼelbeik slekilal ololetik xchiʼuk yantik». Li Mariae jaʼo lek yorail laj yil sventa chchol mantal, pe oy kʼusi vokol un. Xi chale: «Mu jnaʼ xi loʼilaj lek jaʼ yuʼun toj vokol chkaʼi li xcholel mantal ta buyuk noʼoxe. Pe la jkʼanbe akʼo xakʼbun stsatsal koʼonton Jeova sventa stsal kuʼun li xiʼele xchiʼuk ti xuʼuk jchol mantale». ¿Kʼusi kʼot ta pasel yuʼun?

Xi chale: «La jta jlik revista ¡Despertad! ti chalbe skʼoplal fobia (kʼusitik chiʼ-o li krixchanoetike), vaʼun xi la jnope: “Xuʼ van lek chil junuk psicólogo”, jaʼ yuʼun laj kichʼ batel li ta chanob vune. Li vaʼ kʼakʼale ay ta j-ofisina jun jchanubtasvanej ants ti ay li ta tsobajel taje, vaʼun laj kakʼbe li revistae. Ta sjunul yoʼonton la xchʼam. Laj yalbun ti oy kʼusi chiʼ-o eke. Ta yokʼomale laj kichʼbe batel li livro Lo que los jóvenes preguntan. Respuestas prácticas (volumen 1) la xchʼam xtok. Ta skoj ti toj lek la xchʼame la jnop ti jech van lek chilik li yantik eke. Jaʼ yuʼun laj kichʼ batel jun kaja livro Los jóvenes preguntan xchiʼuk yan vunetik». Mu ta jaluk noʼoxe xokol kom li kajae. Xi chal li Mariae: «Li jchanubtasvanej ants ti la jchiʼin ta loʼile oy jayvoʼuk xchiʼiltak ti ayik ta j-ofisina xchiʼuk xi la sjakʼbikune: “¿Bu yakal chakʼik li livroetike?”». ¡Jaʼ te tukʼ kʼotik ti bu yakal chakʼike!

Ta jun sabado tsuts li tsobajel taje. Pe li kʼakʼal taje jaʼo muʼyuk ch-abtej li Mariae, pe laj yikta komel jlom vunetik ta mexaetik ta s-ofisina xchiʼuk xi la stsʼiba komel ta spisarone: «Jchanubtasvanejetik: xuʼ xavichʼik batel sventa avuʼunik li vunetik liʼe xchiʼuk xuʼ xavichʼbeik batel li buchʼutik xavojtikinike. Li kʼusi chal li vunetik liʼe tskoltaoxuk ta avabtelik xchiʼuk tstsatsubtas li avutsʼ avalalike». ¿Kʼusi kʼot ta pasel? Xi chal li Mariae: «Te li echʼ ta j-ofisina li vaʼ kʼakʼal taje, vaʼun laj kil ti jutuk mu skotoluk laj yichʼik batele. Ta anil noʼox la jsaʼ mas livroetik xchiʼuk revistaetik». Kʼalal tsuts xaʼox li tsobajel taje, li Mariae laj xaʼox yakʼ 380 revistaetik, 173 livroetik xchiʼuk 34 foyetoetik. Li buchʼutik ayik li ta tsobajel taje laj yichʼik batel li vunetik ti bu likemik tale. Xi tstsutses sloʼil li Mariae: «Solel xi muyubaj ti kʼot xa li sbekʼ kʼusitik melel ta namal lumetik yuʼun Tuvae» (Ecl. 11:6).

[Lokʼol ta pajina 32]

RUSIA

[Lokʼol ta pajina 32]

REPÚBLICA YUʼUN TUVA