Jtos ti kʼusi chichʼik-o ojtikinel li melel yajtsʼaklomtak Cristoe

Ti ta melel lek snaʼ xchʼamvan jun krixchanoe xchiʼuk ti chlokʼ ta yoʼontone, jaʼ jtos ti kʼusi chichʼ-o ojtikinel li melel yajtsʼaklomtak Cristoe. Kʼalal yichʼojik xaʼox li chʼul espiritu ta Pentecostés ta sjabilal 33 ta jkʼakʼaliltike, ep ti buchʼutik jaʼ to pasik ta yajtsʼaklom Cristoe te to pajik ta Jerusalén. Taje jaʼ sventa chchanik mas ta sventa li lekil aʼyej sventa Ajvalilal yuʼun Dios yoʼ to mu sut batel ta snaik ti jeltos butikuk likemik tale. Li yajtsʼaklomtak Cristo ti nakalik ta Jerusalene lek chʼamvanik, laj yikʼ ochel ta snaik, la xchon kʼusitik oy yuʼunik xchiʼuk jmoj laj yuʼuninik skotol li kʼusitik oy yuʼunike (Hech. 2:42-46). Ta mas jelavele, li jtakboletike la xchapanik lek kʼuxi tspukbeik sveʼel li meʼon antsetik ti te xchiʼukik ti oy kʼusitik chtun yuʼunike (Hech. 6:1-6).

Lek me skʼan xi jchʼamvan li yajtsʼaklomutik Cristoe. Akʼo mi ep yiloj svokolik ta nutsel xchiʼuk ti ep kʼusitik laj yichʼik pojbele, xi albatik yuʼun li Pabloe: «Mu me xchʼay ta avoʼntonic ti tscʼan chaʼicʼvan ochel ta anaique» (Heb. 13:2; 10:34). Li Pedroe laj yal ti skʼan ta sjunul yoʼontonik skʼan kʼusi xakʼike: «Iqʼuic ochel li bochʼo chcʼot ta anaique;mu me xabicʼtalvulajeticuc xapasic» (1 Ped. 4:9; koʼoltaso xchiʼuk 2 Corintios 9:7). Li Pabloe laj yakʼ ta ilel ti oy kʼusi toj tsots skʼoplal sbainojik li yajtsʼaklomtak Cristo ta stojolal li xchiʼiltakik ta chʼunolajele, jaʼ yuʼun xi la stsʼibae: «Jpastic cʼusi lec [...]. Pero jaʼ echʼem to tscʼan ta jpastic ta stojol ti bochʼo coʼol jchʼunojtic Dios jchiʼuctique» (Gál. 6:10).

Sventa oy buchʼu x-och ta jkʼelvanej li ta stsobobbail yajtsʼaklom Cristoe skʼan me lekuk snaʼ xchʼamvan, yuʼun toj tsots skʼoplal li talelalil taje (1 Tim. 3:2; Tito 1:7, 8). Li Pablo eke laj yalbe Timoteo, jun jkʼelvanej ta tsobobbail ta Éfeso, ti skʼan la xichʼ tsakbel sbiik li meʼon antsetik ti jaʼik yajtsʼaklomtak Cristo sventa xichʼik koltael yuʼun tsobobbail «me iʼicʼvan ochel ta snai[ke]» (1 Tim. 5:9, 10).