Ayanuk lek kibeltik xchiʼuk ayanuk lek snakleb koʼontontik

¿MI OY aviloj jpetsuk teʼ ti xlaʼet ta skoj tsatsal ikʼe? Akʼo mi toj tsots li ikʼe, mu xlom. ¿Kʼu yuʼun? Yuʼun lek nat stsakoj lum li yibele. Xuʼ jechutik kʼuchaʼal li jpets teʼ taje. Kʼalal ta jnuptantik tsatsal vokoliletik ta jkuxlejaltike, xuʼ xkuch kuʼuntik mi lek ch-ayan kibeltik xchiʼuk ch-ayan lek snakleb li koʼontontike (Efe. 3:14-17). ¿Kʼusi jaʼ li snakleb taje?

Li sKʼop Diose jpʼel chal ti «jaʼ stuc li Cristo [Jesús]» «li ton iʼoch ta mero chiquin na» yuʼun stsobobbail yajtsʼaklomtake (Efe. 2:20; 1 Cor. 3:11). Xi chalbutik xtoke: «Te me oyanic o ta stojol. Acʼo lec avibelic, acʼo lec anaclebic ta stojol ta sventa li xchʼunojel avoʼntonique». Mi ta jchʼuntik li tojobtasel taje, xuʼ me xkuch kuʼuntik skotol li kʼusitik tskontrain xchʼunel koʼontontike, te tsakal skʼoplal xchiʼuk «li bochʼotic toj lec yaʼyel li cʼusitic chalique» ti te lokʼem tal ti bu «mu meleluc cʼusi chali[k]» li krixchanoetike (Col. 2:4-8).

«Cʼu sjamlej, cʼu snatil, cʼu staylej, cʼu smucʼul»

¿Kʼuxi ti xuʼ chkakʼ lek kibeltik xchiʼuk ti oyuk snakleb li xchʼunel koʼontontike? Jtos ti kʼuyelan xuʼ jpastike jaʼ ti jtsʼun lek kibeltike, jaʼ xkaltik, kʼalal ta jchanilantik li sKʼop Diose. Li Jeovae oy ta yoʼonton ti akʼo «[xkaʼibetik] smelol xchiʼuc scotol yantic yuʼuntac Dios cʼu sjamlej, cʼu snatil, cʼu staylej, cʼu smucʼul» li mantale (Efe. 3:18). Jech oxal chaʼa, mu me stakʼ ti jun xa yoʼonton li buchʼu xaʼibe xa jutuk smelolale, ti jaʼ noʼox chaʼibe smelolal li «chanubtasel ta sliqueb» skʼan chanel ta sKʼop Diose (Heb. 5:12; 6:1). Moʼoj, jechuke jkotoltik xi jmuyubaj ta saʼel li kʼusitik mas tsots ta aʼibel smelolal ta Vivliae (Pro. 2:1-5).

¿Mi jaʼ skʼan xal ti jaʼ noʼox skʼan oy lek yojtikinel kuʼuntik sventa chkakʼ lek kibeltik xchiʼuk ti oyuk snakleb ta koʼontontik li kʼusi melele? Moʼoj. Yuʼun li Satanás eke xojtikin lek li kʼusi chal Vivliae. Oy to kʼusi skʼan: jaʼ «ti [xkojtikintik] li kʼanelal yuʼun Cristo ti x-echʼ to skʼoplal ta stojolal li yojtikinele» (Efe. 3:19, NM). Jaʼ yuʼun, kʼalal ta jchantik ta skoj ti jkʼanojtik li Jeova xchiʼuk li mantale, li melel yojtikinel ta jtatik ta sKʼop Diose tstsatsubtas xchʼunel koʼontontik (Col. 2:2).

 Akʼo ta preva li kʼusi xavaʼibe smelolale

¿Kʼu yuʼun mu xa kʼel mi xavaʼibe lek smelolal jlom chanubtaseletik ti baʼyel skʼan chanel ta Vivliae? Xuʼ van jaʼ tstij avoʼonton sventa xavakʼbe mas yipal li xchanel aVivlia atuke. Jech kʼuchaʼal liʼe, jkʼeltik li baʼyel versikuloetik ta skarta Pablo ti la stakbe batel li jchʼunolajeletik ta Efesoe, ti te xvinaj ta rekuadro «Scarta jchʼunolajeltic ta Éfeso». Kʼelo li versikuloetik taje, vaʼun kʼelo mi xavaʼibe smelolal li bu oy ta nitil tsʼibe. Jkʼeltik ta jujuntal.

Nopbil onoʼox yuʼun «cʼalal muʼyuc toʼox banamile»

Xi la stsʼibabe batel yermanotak li Pabloe: «[Li Diose] nopbil onoʼox yuʼun ti chijcʼot ta mero xnichʼon ta sventa li Jesucristoe». Li Jeovae la snop ti chchʼam sventa chkʼotik ta stukʼil utsʼ-alal ta vinajel li junantik krixchanoetike. Li chʼambil nichʼnabiletik taje chkʼotik ta ajvaliletik, ta paleetik xchiʼuk li Cristoe (Rom. 8:19-23; Apo. 5:9, 10). Kʼalal la skontrainbe ta sba velta li mukʼul pas mantal yuʼun Dios li Satanase, laj yakʼ ta aʼyel ti muʼyuk la lek pasbil li krixchanoetike. Jaʼ yuʼun, toj lek sta-o ti la stʼuj krixchanoetik li Jeova sventa chkoltavanik ta stupʼbel skʼoplal skotol li choplejal ta vinajel-balumile, ti te tsakal skʼoplal ek li buchʼu la slikese, li Diabloe. Manchuk mi jech, li Diose muʼyuk bu nopbil onoʼox yuʼun buchʼu junukal ta stʼuj kʼuchaʼal xnichʼnabtak, yuʼun la snop ti oy jtsop, o jtos, ti ch-ajvalilajik xchiʼuk Cristo ta vinajele (Apo. 14:3, 4).

¿Kʼusi skʼoplal li «banamil» laj yal Pablo kʼalal laj yalbe li yermanotak ti tʼujbilik kʼuchaʼal jtsop «cʼalal muʼyuc toʼox banamile»? Maʼuk chalbe skʼoplal li skʼakʼalil kʼalal  muʼyuk toʼox pasbil li krixchanoe o li Balumile. ¿Kʼuxi xa noʼox la smulinik Adán xchiʼuk Eva jechuk li kʼusi la spasik ti yuʼunuk nopbil xa onoʼox yuʼun Dios ti tspas smulik kʼalal muʼyuk toʼox bu pasbilike? Ti jechuk la spase, jech laj yakʼ ta ilel ti muʼyuk tstsak ta mukʼ li tukʼilale. Vaʼun chaʼa, ¿bakʼin la snop Jeova tslajes li toybail ta skontra li mukʼul pas mantal yuʼune, ti jaʼ la slikes Satanás, Adán xchiʼuk Evae? Jaʼo kʼalal spasoj xaʼox smul li baʼyel jtot jmeʼtike, pe jaʼo kʼalal muʼyuk toʼox vokʼem yalab xnichʼnabike xchiʼuk ti xlik jun balumil yuʼun krixchanoetik ti jmulaviletik xchiʼuk ti skʼanik pojele.

«Batsʼi ep cʼuxutic ta yoʼnton»

Li ta baʼyel versikuloetik ta slikeb karta sventa yajtsʼaklom Cristo ta Efesoe, li Pabloe chchol batel jayibuk kʼusitik chkʼot ta pasel ta skoj ti «batsʼi ep cʼuxutic ta yoʼnton» li Diose. ¿Kʼu yuʼun jech laj yal? Sventa lek jamal chakʼ ta ilel ti mu persauk tspoj jmulavil krixchanoetik li Jeovae.

Mi junuk buchʼu sta-o ta stuk noʼox li pojelale. Pe ta skoj ti skʼanoj tajek krixchanoetik li Jeovae, oy kʼusitik tsots skʼoplal la spas sventa tspojutik. Mi ta jnopbetik skʼoplal li jchoplejaltik xchiʼuk ti jpas mulilutike, li pojelale jaʼ me skʼelobil ti batsʼi ep kʼuxutik ta yoʼonton li Dios jech kʼuchaʼal laj yal Pabloe.

Li kʼusi snopoj onoʼox Dios ti muʼyuk toʼox vinajeme

Li ta slikebe, li Diose muʼyuk laj yal kʼuyelan tsmeltsan li kʼusitik chopol laj yakʼbe slikeb li Diabloe, «muʼyuc toʼox [vinajem]» skʼoplal (Efe. 3:4, 5). Ta tsʼakale, kʼalal ayan li stsobobbail yajtsʼaklomtak Cristoe, li Jeovae laj yal kʼutik yelan chkʼot ta pasel li kʼusi snopoj onoʼox tspas ta stojolal li krixchano xchiʼuk li Balumile. Li Pabloe laj yalbe skʼoplal ti «cʼalal [la sta] yorail yuʼune» li Diose la slikes jun ventainel —jtos ti kʼuyelan chichʼ chapanel sventa chichʼ kʼelel li kʼusitike— sventa tspas ta jun skotol li spasbentak ti oy spʼijile.

Li kʼusi baʼyel la spas sventa chkʼot ta pasel taje, lik ta Pentecostés ta jabil 33 ta jkʼakʼaliltik, jaʼo kalal lik stsob Jeova li buchʼutik tspasik mantal xchiʼuk Cristo ta vinajele (Hech. 1:13-15; 2:1-4). Li xchibal kʼusi la spase jaʼ ti lik stsob li buchʼutik chkuxiik ta jun paraiso ta Balumile, ti jaʼ tsventain li Ajvalilal yuʼun Mesiase (Apo. 7:14, Ch; 7:15-17; 21:1-5). Li jpʼel kʼop ventainel xie, maʼuk chalbe skʼoplal li Ajvalilal yuʼun Mesiase, yuʼun li Ajvalilal yuʼun Diose jaʼ to laj yichʼ vaʼanel ta 1914. Yuʼun jaʼ chalbe skʼoplal ti kʼuyelan chchapan batel kʼusitik li Dios sventa chkʼot ta pasel yuʼun li kʼusi snopoje, ti chchaʼpas ta jun li kʼusitik ta vinajel-balumile.

«Jaʼuc yijuben xa ajolic ta sventa li cʼusi chanopique»

Mi jchapanojbetik yorail ta jchan jtuktik li Vivliae, ta melel, tskoltautik ta yaʼibel smelolal «cʼu sjamlej, cʼu snatil, cʼu staylej, cʼu smucʼul» li mantale. Ta yan xtoke, melel onoʼox ti Satanase tstunes ti mu xa noʼox xi jxokob sventa jyochbetik yipal li xchanel Vivliae, o ti mu xa jchantik-o ta jyalele. Mu xkakʼtik akʼo xkʼot ta pasel yuʼun. Jtunestik li «jbijiltic» yakʼojbutik Dios sventa «jaʼuc yijuben xa [joltik] ta sventa li cʼusi [ta jnoptike]» (1 Juan 5:20; 1 Cor. 14:20). Jkʼeltik lek kʼu yuʼun jchʼunojtik li kʼusi jchʼunojtik sventa jtakʼtik mi oy buchʼu tsjakʼbutik ta sventa li kʼusi jpatoj-o koʼontontike (1 Ped. 3:15).

Nopo avaʼi ti te oyot ta Éfeso kʼalal laj yichʼ kʼelel ta baʼyel velta li skarta Pabloe. ¿Mi mu van lajuk stij avoʼonton sventa chavepajes li yojtikinel avuʼun ta stojolal li xNichʼon Diose? (Efe. 4:13, 14.) Laj van ta melel. Jaʼ yuʼun, li kʼusitik laj yakʼ ta naʼel Dios taje akʼo stij avoʼonton ta spasel jech li avi eke. Li skʼanel tajek Jeova xchiʼuk li melel yojtikinel Vivliae ta skoltaot sventa x-ayan lek avibel xchiʼuk x-ayan lek snakleb avoʼonton ta Cristo. Jaʼ tskoltaot sventa xkuch avuʼun kʼusuk tsatsal vokolil ti chakʼ talel Satanás yoʼ to muʼyuk talem slajeb li chopol balumile (Sal. 1:1-3; Jer. 17:7, 8).

[Rekuadro ta pajina 27]

«Scarta jchʼunolajeltic ta Éfeso»

«Acʼo ichʼatuc ta mucʼ li Diose jaʼ li Stot Cajvaltic Jesucristoe, jaʼ li bochʼo laj yacʼbutic scotol li bendición te oy ta vinajel ta sventa ti jun lijcʼot jchiʼuctic li Cristoe. Xchiʼuc la stʼujutic ta sventa Cristo ti cʼalal muʼyuc toʼox banamile, yuʼun jech muʼyuc jmultic, muʼyuc quicʼubaltic chijyilutic, yuʼun cʼanbilutic onoʼox yuʼun. Nopbil onoʼox yuʼun ti chijcʼot ta mero xnichʼon ta sventa li Jesucristoe, yuʼun jech la scʼan ta slequil yoʼnton stuc. Yuʼun jech acʼo calbetic slequilal, acʼo quichʼtic ta mucʼ ta sventa ti ep slequil yoʼntone, ta sventa ti la xcʼuxubinutique, ti lec xa chijyilutic ta sventa li Xnichʼon ti lec scʼanoje. Jaʼ li Xnichʼon ti la smanutic ta xchʼichʼal, yuʼun jech la jtatic o perdón yuʼun li jmultique, yuʼun batsʼi ep cʼuxutic ta yoʼnton. Ivinaj ti batsʼi ep cʼuxutic ta yoʼnton li Diose, yuʼun laj xa yacʼbutic jbijiltic, laj yacʼbutic cotquintic scotol. Laj xa yacʼbutic jnaʼtic li cʼusi snopoj ta voʼone ti muʼyuc bochʼo la snaʼe. Jaʼ li cʼusi chapal onoʼox yuʼun stuc chacʼ cʼotuc ta pasele. Jaʼ ti nopbil onoʼox chacʼbe sventain scotol cʼusitic oy li Xnichʼon cʼalal tsta yorail yuʼune. Jaʼ banquilal chcʼot yuʼun scotol cʼusitic oy ta vinajel xchiʼuc cʼusitic oy liʼ ta banamil.» (Efe. 1:3-10.)