Li yichʼel ta mukʼ Jeova ta kutsʼ kalaltike jtunel tajek sventa xi jkol

¿MI XNOP avuʼun kʼu to yelan chakʼ xiʼel li «mucʼta pleito ta scʼacʼalil yuʼun li Dios ti echʼem svuʼele»? (Apo. 16:14.) Li j-alkʼop Miquease toj labal sba kʼuyelan laj yalbe skʼoplal li pas kʼop taje: «Li mucʼtic vitsetique ta xʼunij [...] jech chac cʼu chaʼal chab ti ch-unij ta cʼoqʼue; ta xbein yalel ta stenlejaltic jech chac cʼu chaʼal voʼ ti chchʼac batel sbee» (Miq. 1:4). ¿Kʼusi tstaik li buchʼutik mu xichʼ ta mukʼ Jeovae? Toj abol sba chlajik. Li Vivliae chal: «Toj ep bochʼo ta xcham yuʼun Mucʼul Dios cʼalal me la sta scʼacʼalile; buyuc noʼox quilajtic chcomic cʼalal ta jujujot stiʼil banamil» (Jer. 25:33).

Ta skoj li pʼijubtaseletik taje, li totil-meʼiletike —ti oy stuk tstsʼites yalab o xnichʼnabike— skʼan sjakʼbe sbaik mi kuxul chkom li yalab xnichʼnabik ti snaʼik xa rason mi tal li mukʼta lajelale. Li Vivliae chal ti kuxul chkomik mi lek tsotsik ta mantale, pe sventa taje tsakbil ta venta li sjabilalike (Mat. 24:21).

¿Kʼu yuʼun tsots skʼoplal jchʼakbetik yorail xkichʼtik ta mukʼ Jeova li ta kutsʼ kalaltike?

Totil-meʼiletik, skʼan xavakʼbeik tajek yipal xa «tojobtasic lec, [xa] chanubtasic lec ta sventa [...] Cajvalti[k]» li avalab anichʼnabike (Efe. 6:4). Ep sbalil ti chkichʼtik vulesbel ta joltik ti akʼo jchan jVivliatik xchiʼuk li kalab jnichʼnabtike. Ti kerem-tsebetike ta jkʼantik xkoʼolajik kʼuchaʼal li yajtsʼaklomtak Cristo ta Filipos ti lek albat skʼoplalik yuʼun Pablo ta skoj ti lek chchʼunbeik smantal li Jeovae. Xi laj yalanbee: «Voʼoxuc ti lec jcʼanojoxuque, lec laj achʼunic ti cʼalal te jchiʼucoxuque. Pero mu me jaʼuc noʼox, echʼem to me jech xachʼunic ti cʼalal nom oyune. Jaʼuc me batem ta avoʼntonic xapasbeic yabtelal li coltael ataojique, tsotsuc me scʼoplal chavaʼyic, xiʼanic me yuʼun li Diose» (Fili. 2:12).

¿Mi chchʼunbeik smantal Jeova kʼalal muʼyuk te achiʼukik li avalab anichʼnabike? ¿Kʼu yelan stalelalik li ta chanob vune? ¿Kʼuxi xuʼ xa tijbeik yoʼonton yoʼ xakʼik venta ti jaʼ mas lek mi chchʼunbeik skotol ora smantaltak Jeova akʼo mi mu teuk akʼelojike?

Li yichʼel ta mukʼ Jeova ta kutsʼ kalaltike xuʼ stsatsubtasbe tajek xchʼunel yoʼonton li avalab anichʼnabe. Jkʼeltik oxtos kʼusitik xuʼ jpastik sventa xichʼ tabel sbalil li xchanel Vivlia ta kutsʼ kalaltike.

Mu xaviktaik

Li Vivliae chal ti tsabe lek yorail kʼalal ta stsob xnichʼnabtak ta vinajel li Diose (Job 1:6). Xuʼ jech xa pas ek. Sabo skʼakʼalil xchiʼuk yorail li Akʼobal sventa Yichʼel ta Mukʼ Jeova ta Kutsʼ Kalaltike xchiʼuk mu xa jelik li yoraile. Jech xtok, nopo kʼusi yan kʼakʼal xuʼ xa tsob abaik mi yuʼun muʼyuk pas ti kʼuyelan achapojik xaʼoxe.

Pʼijan me; mi echʼ xaʼox kʼu sjalil cha tsob aba xchiʼuk avutsʼ avalale, xuʼ van xlik chʼayuk sbalil chavil ti skʼan jech-o xa pase, vaʼun xuʼ xlik avikta li chanun ta avutsʼ avalale. Mu me xchʼay xavaʼi ti jaʼ mas skʼan xavakʼ ta avoʼonton skʼelel li avalab anichʼnab ti jaʼik jchan Vivliaetik ti mas kʼelbilik yuʼun Satanase (1 Ped. 5:8). Mi naka kʼel television cha pasik o yan kʼusi ti mu tsotsuk skʼoplale, ti jaʼ mu xa tsob aba xchiʼuk avutsʼ avalal sventa chavichʼik ta mukʼ Jeovae, la xa me spasoxuk ta kanal Satanás unbi (Efe. 5:15, 16; 6:12; Fili. 1:10).

Akʼo xichʼ tabel sbalil

Li yichʼel ta mukʼ Jeova ta kutsʼ kalaltike skʼan xichʼ tabel sbalil, maʼuk noʼox naka ta jkʼeltik li  vunetike. ¿Kʼusi xuʼ xa pas yoʼ spas avuʼun taje? Bateltike xuʼ jaʼ xa loʼilta li kʼusitik tsnupik ta yokʼomal o ta yan to xemana li avalab anichʼnabe. Jech xtok, xuʼ van xa chapan sventa xtojobik xcholel mantal. Teuk me ta ajol, ti kerem-tsebetike mas kʼupil chaʼiik spasel li kʼusitik lek chlokʼ yuʼunike. Jaʼ yuʼun mu xiʼik spasel kʼusuk abtelal sventa Dios mi la xchanik baʼyel skʼelobiltak chol mantale xchiʼuk kʼusi xuʼ stakʼik mi oy kʼusi albatik ti xuʼ xpaj-o sloʼilike (2 Tim. 2:15).

Jech xtok xuʼ xa chʼakbeik yorail yoʼ xchan kʼuxi xuʼ spoj sba avalab anichʼnabik kʼalal oy kʼusi tsujatik spasel yuʼun xchiʼiltake. Li kapitulo 15 ta livro Lo que los jóvenes preguntan. Respuestas prácticas (volumen 2) xuʼ lek jtunel avuʼunik. Li bu chal «Estrategia contra la presión de grupo» (pajina 132 xchiʼuk 133) te xuʼ xichʼ tael kʼusitik lek xuʼ xichʼ pasel. Jech xtok, tstijbe yoʼonton kerem tsebetik sventa tsnop kʼusitik xuʼ spas mi oy kʼusi la snuptanike. Ta slajebal xa li pajina 133 xi chale: «Ensaya la escena con un familiar o con un adulto en quien confíes». Jech oxal, toj jtunel mi oy jech bateltik cha pasik kʼalal chavichʼik ta mukʼ Jeova xchiʼuk avutsʼ avalalike.

Li ta Akʼobal sventa Yichʼel ta Mukʼ Jeova ta Kutsʼ Kalaltike, li totil-meʼiletike chkoltaatik yoʼ xchanubtas yalab xnichʼnabik ti toj ep sbalil ti kʼalal oy ta yoʼontonik stael li abtelaletik ta steklumal Jeovae. Ta kapitulo 38 volumen 2 ta livro Los jóvenes preguntan, ti bu chal «¿Qué haré con mi vida?», xie, oy kʼusitik toj lekik te chal ta sventa taje. Kʼalal cha chanike, koltao avalab anichʼnab yoʼ xaʼibeik smelolal ti kʼusi mas lek xuʼ spas ta xkuxlejalike jaʼ ti chtunik ta stojolal Jeovae. Tijbo yoʼonton sventa chtunik ta prekursoral, ta Betel, akʼo xbatik ta Chanob vun sventa Xchanubtasel Jtuneletik o akʼo xlik spasbeik yabtel Dios ta tsʼakal ora.

Pe oy totil-meʼiletik ti chakʼ tajek ta yoʼontonik li kʼusi tskʼan sta li yalab xnichʼnabike, ti jaʼ mu stsakik ta venta li kʼusitik yakal xa tspas yuʼunike. Jech, lek ti ta jtijbetik yoʼonton kalab jnichʼnabtik yoʼ chtunik ta Batel, chbatik ta misioneroal o ti xakʼbeik yipal staik yan abtelale. Pe vuleso ta ajol, mi cha suj tajek sventa tsta li kʼusi cha kʼan voʼote, xuʼ me sok xchiʼuk xchibaj yoʼontonik (Col. 3:21). Oyuk sbalil xavil li kʼusi staojan xa avalab anichʼnabe xchiʼuk patbo yoʼonton, maʼuk xa kʼel li kʼusi mu to tstaike. Teuk ta ajol ti skʼan xlokʼ ta yoʼonton stukik ti chtunik ta stojolal Jeovae, ti maʼuk sventa tslekubtas avoʼontonike (Mat. 22:37). Koltaano yoʼ xkʼuxubinik skotol li kʼusitik spasoj Jeovae, xchiʼuk jaʼuk xtijbat yoʼonton xtunik ta stojolal ti skʼanojike.

Akʼo xichʼ kʼupinel li chanune

Li yoxtosal kʼusi stakʼ pasel sventa lek kʼusi chkʼot ta pasel li ta xchanel Vivlia xchiʼuk utsʼ-alalile; jaʼ ti toj kʼupiluk sba xichʼ pasele. ¿Kʼuxi xuʼ spas avuʼun taje? Xuʼ van xa chikinta o xa kʼel xchiʼuk xa chanik xchiʼuk avutsʼ avalal junuk drama o video ti slokʼesoj li organisasione. Jech xtok xuʼ van jmoj xa kʼelik li Vivliae xchiʼuk xa sabeik yajval buchʼu tskʼel jujutuchʼ o ti xa vaʼanbeik yajval xtok li buchʼutik te chkʼopojanuk tale.

Li revista ¡Despertad! xchiʼuk Li Jkʼel osil ta toyole oy kʼusitik yichʼoj tal ti jtunelik sventa xichʼ chanel ta utsʼ-alalile. Jech kʼuchaʼal li ta pajina  31 ta ¡Despertad! te ta jtatik jvokʼ ti bu chal «¿Qué respondería usted?». Jech xtok, Li Jkʼel osil ta toyole oy bateltik yichʼoj tal li jvokʼ bu chal «Sventa kerem-tsebetik», xie, ti oy kʼusitik te ta jtatik ti chal akʼo jsabetik mas skʼoplale, xchiʼuk li bu chal: «Chanubtaso avalab anichʼnabik», xie, jaʼ pasbil sventa li ololetike.

Mi oy avalab anichʼnab ti chexik toe xuʼ jtunel tajek avuʼun li kʼusitik ta xlokʼilan ta ¡Despertad! ti bu chal «Los jóvenes preguntan», xie, xchiʼuk li livro Los jóvenes preguntan volumen 2. Kʼalal cha chanik li livro taje, mu xchʼay xavaʼiik skʼelel li rekuadro ta slajebal jujun kapitulo ti bu chal «Y tú, ¿qué piensas?», yuʼun maʼuk noʼox tsvules ta joltik li kʼusi la jchantike, moʼoj, jaʼ sventa xloʼilaj xchiʼuk yalab xnichʼnab li totil-meʼiletike.

Kʼalal cha chanunajike mu epuk kʼusitik xa jakʼilan ti xuʼ xchibajik-oe. Mu me xa suj avol o anichʼon sventa tsots xapta li kʼusi la stsʼiba ti bu chal «Tus reflexiones», xie, o ta yan ti bu oy kʼusi albat spas li ta livro taje. Li ta pajina 3 xi ch-albat jtuchʼ mantal li totil-meʼiletike: «Mi cha kʼan tstsʼibaik kʼusi oy ta yoʼontonik ta melel li avalab anichʼnabike, toj tsots skʼoplal xavakʼ ta avoʼontonik ti mu xa kʼelbeik li kʼusitik tstsʼibaike. Mi jech cha pasike xuʼ van xlokʼ ta yoʼonton stukik xa yalboxuk».

Naʼo lek ti chakʼbe bendision Jeova ti chavakʼbeik yipal yoʼ mu xaviktaik li chanun xchiʼuk avutsʼ avale, ti akʼo xichʼ tabel sbalile xchiʼuk ti akʼo xichʼ kʼupinele. Jaʼ sventa tsotsukoxuk ta mantal akotolik mi cha tsobilan abaik sventa jmoj chavichʼik ta mukʼ li Jeovae.

[Rekuadro ta pajina 31]

Kʼusitik yan xuʼ xa pas

«Li kʼusitik ch-echʼ ta tsobajele jaʼ ta jchankutik kʼalal ta jtsob jbakutik xchiʼuk li jtsebtakkutik xchiʼuk jmalale, ta slajebe chkalbekutik ti akʼo spasik junuk divujo ti chalbe skʼoplal li kʼusi la jchankutike. Bateltike ta jvaʼanbekutik yajval li buchʼutik te chkʼopojanuk tal ta Vivliae o ta jchankutik skʼelobiltak chol mantal. Chkichʼkutik ta venta sjabilal li tsebetike xchiʼuk chkakʼkutik persa sventa kʼupiluk sba, oyuk kʼusi xchanik xchiʼuk akʼo mu xakʼ chʼaj li chanune.» (J. M., Estados Unidos.)

«Jun ants ti ta jchanubtaskutike, oy jun skerem ti ta jkʼan chkakʼbekutik yil kʼu toʼox yelan chichʼ tunesel li balbal vunetik ta skʼakʼalil Vivliae. Jech oxal la jpaskutik ta jun balbal vun li slivroal Isaiase. La jtupʼkutik li snumeroal kapituloetik xchiʼuk versikuloetike, vaʼun la jlokʼeskutik ta komputadora sliklej li livroe. Vaʼun la jtsʼakkutik li vunetike xchiʼuk la jpakʼbekutik jun tuvo li ta jujujot stiʼil li vune. Li kereme laj kalbekutik ti akʼo spas kʼuchaʼal Jesús kʼalal te oy ta snail tsobobbail ta Nazarete. Li ta Lucas 4:16-21 chal ti Jesuse “la sjam li balbil vun [ti la stsʼiba Isaiase], jaʼ te la sta” li kʼusi tsaʼe (Isa. 61:1, 2). Li kereme vokol tajek la sta li tekstoe yuʼun toj nat li balbal vune. Te laj yakʼ venta ti lek xtojob li Jesuse. Toj labal to laj yil, jaʼ yuʼun xi laj yale: “¡Stuk xa noʼox jech maʼ li Jesuse!”. » (Y. T., Japón.)

[Lokʼol ta pajina 30]

Snaʼ kʼusi tspas avalab anichʼnab mi la chanilanik kʼuxi xuʼ spoj sba mi oy kʼusi sujat spasel yuʼun xchiʼiltakike

[Lokʼol ta pajina 31]

Akʼo persa ti kʼupiluk sba x-echʼ li Akʼobal sventa Yichʼel ta Mukʼ Jeova ta Kutsʼ Kalaltike