¿Mi achʼakojbe xa yorail sventa cha chan li Vivliae?

LI JABIL echʼe, li Jtsop Jbeiltasvaneje laj yal ti oy kʼusi chjel li ta tsobajeletike, ti jaʼ mas xa chakʼ yorail jchantik sKʼop Dios xchiʼuk li kutsʼ kalaltike. Mi voʼot jolilot ta utsʼ-alalile, mu me xchʼay xavaʼi xa chan jujun xemana xchiʼuk avajnil xchiʼuk mi oy avalab anichʼnab li kʼusitik chtun avuʼunike. Mi tojol kerem o tojol tsebot ti chʼabal to kʼusi tsots abainoje, xuʼ xa tunes akʼakʼal sventa xa chanunaj atuk.

Epal ermanoetike jamal yalojik ti xmuyubajik tajek ti xuʼ xa mas xchʼakik jun akʼobal sventa chichʼik ta mukʼ Jeova li ta yutsʼ yalalike. Jech kʼuchaʼal jun mol ta tsobobbail ti Kevin a sbie, xi la stsʼibae: «Mu x-al kuʼunkutik kʼu to yelan xi muyubajkutik li buchʼu te oyunkutik ta tsobobbaile. Li molunkutik ta tsobobbaile ta jloʼiltakutik kʼuyelan ta jtuneskutik li akʼobal sventa chi chanunajkutik xchiʼuk kutsʼ kalalkutik xchiʼuk ti jaʼ jech ta jchʼunkutik li smantal Jtsop Jbeiltasvaneje».

Jenny ti mol ta tsobobbail li smalale xi la stsʼiba eke: «Oy oxvoʼ jtsebkutik: li june yichʼoj voʼlajuneb, li june buluchib, li slajebe chib jabil. Muʼyuk to jal jbatelkutik ta jun tsobobbail ta senya kʼop xchiʼuk toj jal chichʼ kuʼunkutik yoʼ jchapan jbakutik sventa skotol li tsobajeletike. Li avi ti jel xa li tsobajeletik une, oy xa xokol jun akʼobal mas sventa chkichʼkutik ta mukʼ Jeova ta kutsʼ kalalkutik».

John xchiʼuk JoAnn, jun nupultsʼakal ti jaʼik prekursor regularetike, xi la stsʼibaike: «Toʼoxe toj tsots chkaʼi jchaʼvoʼalkutik ti jmoj ta jchan jVivliakutik jujun xemanae, yuʼun persa ta jsabekutik yorail ta skoj ti ep kʼusitik skʼan pasel ta tsobobbaile. Ti jel li tsobajeletike, jaʼ jun matanal laj yakʼbutik Jeova sventa xi jtsatsub li ta mantale, kʼusi noʼoxe, jaʼ ti skʼan lek jtunestik li kʼakʼale».

Tony, jun tojol kerem ti te van 25 sjabilale, xchʼakoj jujun akʼobal ta martes sventa chchanunaj stuk xchiʼuk tsabe yorail ta yantik kʼakʼal yoʼ chchapan sba sventa li tsobajeletike. Xi chale: «Jmalaoj xa tajek chkʼot li jujun martese. Li akʼobal taje toj tsots skʼoplal chkaʼi, yuʼun jchʼakoj sventa Jeova. Te van chibuk ora ta jchan kʼusitik ti tskoltaun sventa mas lek xkil jba xchiʼuke, xchiʼuk ta skoj ti oy mas yorail kuʼune, xuʼ mas jnopbe skʼoplal li loʼiletik ta Vivliae». ¿Kʼusi sbalil staoj li kerem taje? «Li kʼusitik ta jchan avie mas chkʼot ta koʼonton», xi, xchiʼuk xi chalbe jun svinajebe: «Li ta livro Perspicaciae la jkʼel kʼuyelan lek xil sbaik li David xchiʼuk Jonatane xchiʼuk ep kʼusitik laj jchan ta sventa li slekil yoʼonton Jonatane. Jaʼ to te laj kaʼibe lek smelolal kʼusi smakoj batel ti chi jkʼot ta lekil amigoile. Jmalaoj ta sjunul koʼonton jujun martes sventa xuʼ jta yan kʼusitik ta jchan ti xkoʼolaj sbalil kʼuchaʼal perla tone».

Ta melel, skotol li yajtuneltak Jeovae tstabeik ep sbalil mi lek tstunes skʼakʼalik sventa tsaʼik kʼusitik chtun yuʼunik xchiʼuk mi chichʼik ta mukʼ Dios ta yutsʼ yalalike.

[Tsʼib ta yok vun]