Jkʼantik me batel mas li kermanotaktike

«Cʼano abaic jech chac cʼu chaʼal la scʼanutic li Cristoe.» (EFE. 5:2)

1. ¿Kʼusi ti tsots skʼoplal chichʼik-o ojtikinel laj yalbe yajtsʼaklomtak Jesuse?

 LI CHOL mantal ta naetike jaʼ li kʼusi ojtikinbilik-o li yajrextikotak Jeovae. Akʼo mi jech, li Jesuse laj yalbe li melel yajtsʼaklomtak ti oy to kʼusi yan chichʼik-o ojtikinele. Xi laj yale: «Ta xcalboxuc comel jun achʼ mantal, cʼanano me abaic. Jech chac cʼu chaʼal la jcʼanoxuc li vuʼune, jaʼuc me jech chacʼanan abaic li voʼoxuque. Me jech chapasique, jech ta snaʼic o scotol cristianoetic ti voʼoxuc cajchancʼopoxuque» (Juan 13:34, 35).

2, 3. ¿Kʼu yelan chil ep krixchanoetik kʼalal chilik ti oy kʼanbail ta tsobobbaile?

² Muʼyuk jech kʼanbail ta balumil jech kʼuchaʼal skʼanoj sbaik li melel yajtsʼaklomtak Cristoe. Ti kʼuyelan skʼanoj sbaike jaʼ jech kʼuchaʼal yip jun iman, yuʼun jaʼ tspas ta jun li yajtuneltak Jeovae xchiʼuk jaʼ chnopaj-o tal krixchanoetik li ta tsobobbaile. Jaʼ jech chakʼ ta ilel ti kʼusi kʼot ta stojolal Marcelinoe, jun vinik ta Camerún ti tupʼ sat ta skoj ti la snuptan vokolil ta yabtele. Kʼalal mu toʼox jaluk yechʼel ti la snuptan vokolile, lik yalik batel ti jaʼ la jun j-akʼchamele, vaʼun jaʼ la yuʼun tupʼ sat. Pe li spastor xchiʼuk junantik jchʼunolajeletike muʼyuk bu la spatbeik yoʼonton, moʼoj, la slokʼesik li ta chʼulna bu chkʼote. Jun kʼakʼale ikʼe batel ta tsobajel yuʼun jun yajrextiko Jeova, pe li Marcelinoe mu skʼan lek, yuʼun chiʼ mi te sta pʼajel xtok.

³ Kʼalal bat ta Salon sventa Tsobobbail li Marcelinoe labal to laj yil ti lek tajek la xchʼamike. Patbat tajek yoʼonton xtok li chanubtaseletik ta Vivlia te laj yaʼie. Lik batuk ta stekel tsobajeletik, chʼi ta mantal, vaʼun laj yichʼ voʼ ta 2006. Li avie chalbe xa mantal li yutsʼ yalaltake, li slakʼnatake xchiʼuk ep krixchanoetik chchanubtas ta Vivlia. Li buchʼutik chchanubtase tskʼan ti jechuk kʼanbil chaʼi sbaik kʼuchaʼal kʼanbil yuʼun yajtuneltak Dios li stuke.

4. ¿Kʼu yuʼun skʼan jchʼuntik li tojobtasel laj yakʼ Pablo ti «cʼano abaic» xie?

⁴ Ti jkʼanoj jbatik li yajtsʼaklomutik Cristoe jaʼ chnitvan, pe jech xtok un xuʼ me sikub mi muʼyuk kʼusi ta jpastik sventa jechuk-oe. Jech kʼuchaʼal liʼe, kʼalal oy bu tsanbil kʼokʼ ta akʼobaltik ti kʼalal sik tajeke jaʼ chnopaj-o tal krixchanoetik sventa chkʼatinik. Pe mi muʼyuk xa buchʼu tstikʼbe siʼil li kʼokʼe ta xtupʼ. Jaʼ jech ta sventa li kʼanelale, sventa jkʼanoj-o jbatike oy kʼusi skʼan jpastik ta jujuntal. Xi laj yal jtakbol Pablo ti kʼusi skʼan jpastike: «Cʼano abaic jech chac cʼu chaʼal la scʼanutic li Cristoe, yuʼun laj yacʼ sba ta milel ta jcojtic. Jaʼ smoton Dios icʼot, jaʼ milbil matanal ti oy lec smuil laj yaʼay li Diose» (Efe. 5:2). ¿Kʼusi stakʼ jpastik sventa jkʼanoj-o jbatike? Jtakʼtik echʼel taje.

«Jamo avoʼntonic ta jtojolcutic»

5, 6. ¿Kʼu yuʼun laj yalbe jcorintoetik li Pablo ti akʼo sjam yoʼontonike?

⁵ Xi laj yalbe yajtsʼaklomtak Cristo ta voʼneal Corinto li Pabloe: «Corintoetic ti coʼol jchiʼil jbatique, laj xa jam que jtiʼcutic ta atojolic, yuʼun jamal laj xa calboxuc avaʼiic ti cʼusi oy ta coʼntoncutique. Muʼyuc cʼusi mucul ta coʼntoncutic ta atojolic. Jaʼ voʼoxuc ti oy cʼusi mucul ta avoʼntonic ta jtojolcutique. Ta jcʼanboxuc vocol un chaʼe jech cʼu chaʼal junuc totil ta scʼanbe vocol ti xnichʼnabe. Jamo avoʼntonic ta jtojolcutic jech cʼu chaʼal jamal coʼntoncutic ta atojolique» (2 Cor. 6:11-13, Ch). ¿Kʼu yuʼun «jamo avoʼntonic» x-utatik yuʼun li Pabloe?

 ⁶ Jnoptik avaʼi kʼuxi lik tal li tsobobbail ta lum taje. Li Pabloe kʼot ta Corinto ta slajebaltik batel sjabilal 50, ep laj yil vokoliletik te, pe muʼyuk bu xiʼo. Mu ta sjaliluk une, ep krixchanoetik la xchʼamik li lekil aʼyeje. Li jtakbole «te ijocʼtsaj oʼlol xchibal jabil» li ta Corintoe, ti kʼu sjalil te oye tsots laj yakʼ yipal sventa chchanubtas xchiʼuk tstsatsubtas li achʼ tsobobbaile. Jamal lek xvinaj ti skʼanoj tajek li yajtsʼaklomtak Cristo tee (Hech. 18:5, 6, 9-11). Jaʼ yuʼun oy ep srasonal ti skʼan skʼanik ek li Pabloe. Pe oy buchʼutik ti ilinike, yikʼaluk van muʼyuk lek laj yaʼiik kʼalal jamal tojobtasatike (1 Cor. 5:1-5; 6:1-10). O xuʼ van jaʼ la stsakik ta mukʼ ti la skajtsanik mulil «li mucʼtiquil jcholcʼopeti[ke]» (2 Cor. 11:5, 6). Kʼusiuk srasonal ti jech la spasike, pe li Pabloe tskʼan ti akʼo xkʼanat yuʼun li yermanotake. Jaʼ yuʼun laj yalbe ti akʼo sjam yoʼontonike, ti akʼo mas to lekuk xilik li Pabloe xchiʼuk li yantik yajtsʼaklomtak Cristoe.

7. ¿Kʼusi xuʼ jpastik sventa jam lek koʼontontik xchiʼuk ti jkʼantik mas li kermanotaktike?

⁷ ¿Li voʼotik une? ¿Kʼuxi xuʼ jam lek koʼontontik xchiʼuk ti jkʼan mas li kermanotaktike? Stalel onoʼox ti jaʼ mas lek chkaʼitik kʼalal jaʼ ta jchiʼintik li krixchanoetik ti koʼol jabilaltik xchiʼuke o ti koʼol kʼuyelan jkuxlejaltike xchiʼuk ti jaʼ mas ta jkʼan jal ta jchiʼintik li buchʼutik koʼol kʼusi ta jkʼupintik xchiʼuke. Pe mi jaʼ tsnamajesutik ta stojolal yantik taje skʼan me xkepajes li kamigotaktike. Xi xa jakʼbe abae: «¿Mi jaʼ mas ta jchiʼin ta chol mantal li buchʼu mas kamigo jba xchiʼuke? ¿Mi vokol chkaʼi ta xchiʼinel ta veʼel, ta tajimol o ta yan kʼusitik li yan ermanoetike? ¿Mi muʼyuk ta jkʼopon li buchʼutik achʼ to chkʼot ta Salon sventa Tsobobbaile, ti ta jnop ti jaʼ akʼo yakʼ persa stukik sventa xamigoinikun ta mas tsʼakale? ¿Mi ta jchiʼin ta loʼil stekel ermanoetik li ta tsobobbaile, akʼo mi kerem-tsebik to o mi mol-meʼelik xa?».

8, 9. ¿Kʼuxi tskoltautik li tojobtasel ta Romanos 15:7 ti akʼo jkʼantik mas li kermanotaktike?

⁸ Li kʼusi la stsʼibabe echʼel jromaetik li Pabloe tskoltautik sventa jaʼuk jpastik li kʼusi lek ta stojolal kermanotaktike (kʼelo Romanos 15:7). Li jpʼel griego kʼop ti jelubtasbil kʼuchaʼal «chacʼuxubin aba acotolic», xi li ta versikulo liʼe, jaʼ skʼan xal «ta slekil koʼontontik chi j-ikʼvan ochel, ti lek jnaʼ xi jchʼamvane xchiʼuk ti xkʼot ta kamigotik eke». Li ta skʼakʼalil Vivliae, kʼalal chikʼ batel yamigoik ta snaike skʼan xalbeik ti xmuyubajik tajek ti jech bat vulaʼanvanuke. Jaʼ jech xchʼamojutik ta tsobobbail li Cristo ek kʼuchaʼal taje xchiʼuk jaʼ jech chi j-albat mantal ti akʼo jech jpastik ta stojolal yantik eke.

⁹ Kʼalal cha chiʼin ta loʼil ta Salon sventa Tsobobbail li ermanoetike o ta yan butikuke, ¿kʼu yuʼun mu xa chʼakbe yorail jlikeluk sventa cha chiʼin ta loʼil li buchʼu voʼne xa aviloje o li buchʼutik voʼne xa achiʼinoj ta loʼile? Mi jaʼ jech cha pas ta stojolal yan ermanoetik li ta yan tsobajel xtoke, te me chavakʼ venta ti oy kʼusi lekik tajek la aloʼiltaik xchiʼuk jutuk mu skotoluk li ermanoetik ta tsobobbaile. Mu xavat avoʼonton mi mu xa ta ta chiʼinel ta loʼil skotol ermanoetik ta jun noʼox tsobajele; muʼyuk me buchʼu xuʼ x-ilin mi mu xa ta ta chiʼinel ta loʼil ta  jujun tsobajele.

10. ¿Butik xuʼ jta kamigotaktik li ta steklumal Diose, xchiʼuk kʼusi stakʼ jpastik sventa jtabetik lek sbalile?

¹⁰ Kʼalal oy buchʼu chbat jchiʼintik ta loʼile jaʼ me li kʼusi baʼyel skʼan jpastik sventa lek tajek xi jloʼilaj xchiʼukike xchiʼuk ti xkʼot ta kamigotaktike. Jech kʼuchaʼal liʼe, mi chi jnopaj batel ta stojolal yan ermanoetik ta mukʼta tsobajele, chkal kʼusi jbitik xchiʼuk ti chlik loʼilajkutike, ta me jta yan kamigotaktik ti ta jkʼan ta jkʼopon kaʼitik yan veltae. Li buchʼutik chkoltavanik ta svaʼanel Salon sventa Tsobobbail xchiʼuk li buchʼutik tskoltaik ermanoetik ti chil svokolike ep kʼusitik jmoj chil ta xkuxlejalik. Jaʼ me te chil kʼuyelan stalelal li yermanoike xchiʼuk ti xamigoin sbaik leke. Ta melel, li ta steklumal Diose ep tajek bu xuʼ jta kamigotik kʼuchaʼal taje. Mi ta jam mas koʼontontike xchiʼuk ti ta jsaʼ mas kamigotaktike, mas to me ch-ayan kuʼuntik li kʼanbail ti jaʼ junutik-o yuʼun li yajtunelutik Diose.

Jchʼakbetik yorail sventa jchiʼintik ta loʼil li yantike

11. ¿Kʼusi stalelal Jesús ti toj lek xvinaj te chal ta Marcos 10:13-16?

¹¹ Stekel li yajtsʼaklomutik Cristoe skʼan me xkakʼtik persa ti jtakʼtikuk chiʼinel ta loʼil kʼuchaʼal echʼ Jesuse. Oy jun veltae ep totil-meʼiletik laj yikʼ batel yalab xnichʼnabik ta stojolal li Jesuse, pe li yajtsʼaklomtake laj ox spajes yaʼiik. ¿Kʼusi la spas li Jesuse? Xi laj yale: «Acʼo talicuc ta jtojol li ololetique; mu me xapajesic. Yuʼun li bochʼotic jaʼ jechic jech chac cʼu chaʼal ololetique jaʼ chventainatic yuʼun Dios». Vaʼun «la spet ololetic li Jesuse, laj yacʼ scʼob ta sbaic, laj yacʼbe bendición» (Mar. 10:13-16). Nopo xa noʼox avaʼi kʼu to yelan xmuyubajik li kʼoxetik ti laj yilik ti kʼanbilik tajek yuʼun li Mukʼta Jchanubtasvaneje.

12. ¿Kʼusi nopem xkaʼitik spasel ti xuʼ jaʼ smakutik sventa mu jchiʼintik ta loʼil li ermanoetike?

¹² Skʼan xi jakʼbe jbatik ta jujuntale: «¿Mi jun yoʼonton chnopajik tal ta jtojolal li ermanoetike, o mi toj echʼ xa noʼox ep kabtel chkakʼ ta ilel yilel?». Akʼo mi oy kʼusitik ti nopem xkaʼitik ta spasel ti mu chopoluke yikʼaluk van jaʼ smakutik sventa mu jchiʼintik ta loʼil li ermanoetike. Mi nopem xkaʼitik stunesel jselulartik o chkaʼitik son ta audifono kʼalal jaʼo te oyutik xchiʼuk yan krixchanoetike, yikʼaluk van chkakʼtik ta ilel ti jaʼ lek ti muʼyukuk teike. Mi naka tunesej agenda electrónica ta jpastik chil li yantike, yikʼaluk van tsnopik ti mu jkʼan xi jloʼilaj xchiʼukike. Melel onoʼox ti «oy yorail chʼanxijchi[e]». Pe kʼalal te oyutik xchiʼuk yan krixchanoetike jaʼ «yorail chijcʼopoj» (Ecl. 3:7). Yikʼaluk van oy buchʼu xi chale: «Yuʼun jtalel onoʼox ti mu jnaʼ xi kʼopoje» o «Yuʼun mu jkʼan tajek xi kʼopoj kʼalal chi julav jujun sobe». Akʼo mi jech, ti kʼusi mas leke jaʼ ti xkakʼtik persa ti akʼo jchiʼintik ta loʼil li yantike; taje jaʼ jech chkakʼtik ta ilel ti jkʼanojtike, yuʼun li kʼanelale «muc jaʼuc noʼox tsaʼ cʼusi lec chaʼay stuc» (1 Cor. 13:5).

13. ¿Kʼusi tojobtasel laj yakʼbe Timoteo li Pablo ta sventa ti kʼuyelan skʼan xil li ermanoetik ta tsobobbaile?

¹³ Li Pabloe la yalbe kerem Timoteo ti akʼo yichʼ ta mukʼ skotol li ermanoetik ta tsobobbaile (kʼelo 1 Timoteo 5:1, 2). Jaʼ jech skʼan jpastik ek: li mol-meʼeletike jaʼuk jech xkiltik kʼuchaʼal jtot jmeʼtik, li buchʼu mas kerem-tsebik toe jaʼuk jchiʼiltik ta vokʼel xkiltik. Mi jaʼ jech jtalelaltik kʼuchaʼal taje, muʼyuk me chopol chaʼi sbaik kʼalal te jchiʼuktike.

14. ¿Kʼusi sbalil ta jtabetik kʼalal jaʼ ta jloʼiltatik li kʼusi tspat oʼontonale?

¹⁴ Mi ta jnopes jbatik ta sloʼiltael xchiʼuk yantik li kʼusitik tspat koʼontontike, ta me jkolta jbatik sventa lekikuk-o ta mantal xchiʼuk li kʼusi oy ta yoʼontonike. Jun ermano ti ch-abtej ta Betele, xvul to lek ta sjol ti kʼalal lik tunuk tee toj lek chiʼinat ta loʼil yuʼun li buchʼutik te chtunik ta Betel ti lek chanemike. Li kʼusi ch-albat sventa chpatbat yoʼontone jaʼ koltaat sventa kʼanbil chaʼi sba yuʼun li ermanoetik ta Betele. Li avie jaʼ jech chchiʼin ta loʼil ek li ermanoetik tee.

Kʼalal bikʼit chkakʼ jbatike jaʼ chkoltavan sventa jchap li jkʼoptike

15. ¿Kʼusi chakʼ ta ilel ti oy van bu xlik kʼop yuʼun li yajtsʼaklomtak Cristoe?

 ¹⁵ Li Evodia xchiʼuk Sintiquee jaʼ chaʼvoʼ yajtsʼaklomtak Cristo ta voʼneal Filipos ti toj vokol laj yaʼi ta xchapanel skʼopik yaʼeluke (Fili. 4:2, 3). Li Pablo xchiʼuk Bernabee tsots laj yut sbaik ti jaʼ la svokʼ-o sbaike, ti kʼot ta xchikin yantike (Hech. 15:37-39). Li kʼusitik kʼot ta pasel taje jaʼ chakʼ ta ilel ti oy van bu xlik kʼop yuʼun li yajtsʼaklomtak Cristoe. Melel onoʼox chaʼa, tskoltautik Jeova sventa xchapaj taje xchiʼuk ti xkamigoin jbatik yan velta xtoke, pe oy me kʼusi tskʼan ti akʼo jpastike.

16, 17. 1) ¿Kʼu yuʼun toj tsots skʼoplal ti bikʼit xkakʼ jbatik kʼalal ta jchapan jkʼoptike? 2) ¿Kʼuxi chakʼ ta ilel kʼalal la sta sbaik Jacob xchiʼuk Esaú ti toj tsots skʼoplal ti bikʼit xkakʼ jbatike?

¹⁶ Jech kʼuchaʼal persa skʼan oyuk syaveal sventa stsan smotoral jkot karoe, jaʼ jech persa skʼan oyuk junuk jyavetik xkaltik sventa jchapantik jtosuk kʼop: jaʼ ti bikʼit xkakʼ jbatike (kʼelo Santiago 4:10). Jaʼ jech chakʼ kiltik li kʼusi ta jkʼeltik batel tana ti lokʼem ta Vivliae, li yave xkaltike jaʼ tskoltautik ti akʼo xkakʼ ta jkuxlejaltik li beiltaseletik ta Vivlia sventa xchapaj li jkʼoptike.

¹⁷ Li Jacobe laj yichʼbe sderecho ta baʼyel nichʼonil li xchiʼil ta vachil ti Esaú sbie, batsʼi ilin ta jyalel li Esaue xchiʼuk chmilvan ox yaʼi, jaʼ yuʼun jatav li Jacobe. La sta sbaik kʼalal echʼem xaʼox jtob jabile, pe kʼalal poʼot xaʼox tajek sta sbaike «ep ixiʼ [li Jacobe]; mu xa junuc yoʼnton icʼot», yuʼun chiʼ mi oy kʼusi spasbat yuʼun li sbankile. Vaʼun oy kʼusi la spas ti mu jechuk smalaoj li Esaue: «Vucub velta la spatan sba ta banamil cʼalal nopol xaʼox xtal li sbanquile». ¿Kʼusi kʼot ta pasel un? «Li Esaue ta anil bat snup ta be li Jacobe. La smey; la stsʼutsʼ. Te iʼocʼ xchibalic.» Mi xtiʼet toʼox yoʼonton li Esaue, jaʼ paj-o ti kʼalal bikʼit laj yakʼ sba li Jacobe, vaʼun jaʼ jech muʼyuk kʼusi xibal sba xkʼot ta pasel (Gén. 27:41; 32:3-8; 33:3, 4).

18, 19. 1) ¿Kʼu yuʼun voʼotik baʼyel skʼan xi jkʼopoj xchiʼuk ti jchʼuntik li tojobtaseletik ta Vivlia kʼalal chlik jkʼoptik xchiʼuk jun ermanoe? 2) ¿Kʼu yuʼun mu stakʼ xi jchibaj-o mi muʼyuk kʼusi xkʼot ta pasel yilel kʼalal tsots xaʼox kakʼoj kipaltik ta xchapanel li kʼope?

¹⁸ Ep tajek tojobtaseletik ta jtatik ta Vivlia ti jaʼ tskoltautik ta xchapanel li kʼopetike (Mat. 5:23, 24; 18:15-17; Efe. 4:26, 27). a Pe mi muʼyuk bikʼit chkakʼ jbatik sventa xkakʼ ta jkuxlejaltike, toj vokol me chkaʼitik xchapanel li kʼope. Mu me bu chchapaj jsetʼuk mi jaʼ ta jkʼantik akʼo bikʼit xakʼ sba li jun krixchanoe, yuʼun li voʼotik eke oy ta jkʼobtik li yave xkaltik taje.

 ¹⁹ Mu me xi jchibaj-o mi muʼyuk kʼusi xkʼot ta pasel yilel kʼalal tsots xaʼox kakʼoj kipaltik ta xchapanel li kʼope. Yikʼaluk van skʼan to snop lek li jun krixchanoe. Jvules ta joltik ti kʼusi kʼot ta pasel ta stojolal sbankiltak Josee. Kʼalal chʼamatike, ti jaʼ xaʼox jun vinik ti spatoj lek yoʼonton faraón ta stojolale, ep xaʼox jabil yechʼel ti kʼalal la xchonik batele. Akʼo mi jech, kʼalal laj yakʼik ta ilel ti sutesoj xaʼox yoʼontonik xchiʼuk ti la skʼanbeik akʼo xchʼaybat smulike, pasatik ta perton. Ta mas tsʼakale, jaʼ te lik tal jun mukʼta lum ta stojolalik ti yichʼojbe sbi li Jeovae (Gén. 50:15-21). Teuk me ta joltik ti kʼalal lek noʼox oyutik xchiʼuk li kermanotaktike, jaʼ me tspas ta jun xchiʼuk ti chmuyubaj yuʼun li tsobobbaile (kʼelo Colosenses 3:12-14, NM).

«Acʼo vinajuc ta sventa cabteltic ti ta melel chijcʼanvanutique»

20, 21. ¿Kʼusi chakʼ jchantik Jesús kʼalal la spokbe yok yajtakboltake?

²⁰ Kʼalal jutuk xaʼox skʼan xcham li Jesuse, xi laj yalbe li yajtakboltake: «Ti cʼu xʼelan laj cacʼboxuc avilique, jaʼ jech xapasic ec» (Juan 13:15). Li Jesuse naka toʼox la spokbe yok li lajchaʼvoʼ yajtakboltake, pe li kʼusi la spase maʼuk noʼox ta skoj ti jech nopem xaʼiik spasel li krixchanoetike xchiʼuk maʼuk ta skoj ti chakʼ ta ilel ti lek yoʼontone. Kʼalal mu toʼox chalbe skʼoplal Juan taje xi la stsʼibae: «Ti cʼu xʼelan scʼanoj li yuʼuntac ta sliquebe, jaʼ jech scʼanoj o cʼalal ta slajeb» (Juan 13:1). Jech kʼuchaʼal chkiltike, li kʼusi tijbat-o yoʼonton ta spasel taje jaʼ ti kʼanvaneme, yuʼun li spokbel yok yantike jaʼ noʼox tspasik li mosoiletike. Li avi une jaʼ xa oy ta sbaik yakʼel ta ilel ti skʼananoj sbaike. Ta melel: li batsʼi kʼanelale jaʼ me skʼan xtijbat-o yoʼontonik li yajtsʼaklomtak Cristo ta yakʼel ta ilel ti oy ta yoʼontonik li yermanotakike.

²¹ Li jtakbol Pedro ti pokbat yok yuʼun li xNichʼon Diose, laj yaʼibe lek smelolal kʼu yuʼun ti jech la spase. Ta mas tsʼakale xi la stsʼibae: «Li voʼoxuque pocbil xa avoʼntonic ta sventa ti achʼunojic xa li scʼop Dios ti jaʼ melele, yuʼun chacʼanan abaic ta sventa ti achiʼil xa abaic ta voqʼuel cʼoteme. Jech tscʼan jʼechʼel chacʼanan abaic o ta scotol avoʼntonic xchiʼuc ta scotol atsatsalic» (1 Ped. 1:22). Li jtakbol Juan ti te oy ek li vaʼ kʼakʼal taje, xi la svulesbe ta sjol li yajtsʼaklomtak Cristoe: «Jnichʼnabtac, mu me jecheʼuc noʼox xlocʼ ta quetic ti chijcʼanvanutique. Acʼo vinajuc ta sventa cabteltic ti ta melel chijcʼanvanutique» (1 Juan 3:18). Jaʼ yuʼun chaʼa, kakʼtik ta ilel ta kabteltik ti jkʼanoj li kermanotaktike.

[Tsʼib ta yok vun]

¿Mi xvul ta ajol?

• ¿Kʼuxi xuʼ jam koʼontontik xchiʼuk ti jkʼantik mas li kermanotaktike?

• ¿Kʼusi xuʼ jpastik sventa jchʼakbetik yorail yoʼ jchiʼintik ta loʼil li yantike?

• ¿Kʼuxi tskoltautik ti bikʼit chkakʼ jbatik sventa jchap li jkʼoptike?

• ¿Kʼusi skʼan stij koʼontontik sventa chkakʼtik ta ilel ti oy ta koʼontontik li kermanotaktike?

[Sjakʼobiltak sventa xchanobil]

[Lokʼol ta pajina 21]

Ta slekiluk koʼontontik jchʼamtik li kermanotaktike

[Lokʼol ta pajina 23]

Jchiʼintik me ta loʼil kermanotaktik kʼalal stakʼ chkiltike