¿Kʼusi chakʼ ta ilel ta jtojolaltik li orasion ta jpastike?

«Voʼot chavaʼibun li jcʼopcutique; voʼot noʼox xuʼ chtal ta atojol scotol li cristianoetique.» (SAL. 65:2)

1, 2. ¿Kʼu yuʼun xuʼ ta sjunul yoʼonton spasik orasion li yajtuneltak Diose?

 LI JPASVANEJE ta onoʼox xaʼibe li kʼusi chal li tukʼil yajtuneltak kʼalal tskʼanik vokol ta orasione. Jaʼ yuʼun xuʼ jpat lek koʼontontik ti chaʼi li kʼusi chkalbetike. Manchuk mi ta smiyonal noʼox yajrextikotak Jeova jaʼo koʼol tspasik orasion, ch-aʼibat skʼopik ta jujuntal.

² Ta skoj ti spatoj lek yoʼonton ta stojolal Jeova li jtsʼibajom yuʼun salmoe, ti jaʼ li Davide, xi kʼejine: «Voʼot chavaʼibun li jcʼopcutique; voʼot noʼox xuʼ chtal ta atojol scotol li cristianoetique» (Sal. 65:2). Ta sventa ti tukʼ yoʼonton chtun ta stojolal Jeovae takʼbat li kʼusi la skʼane. Toj lek me ti xi jakʼbe jbatike: «¿Mi chakʼ ta ilel ti jpatoj lek koʼonton ta stojolal Dios ti kʼuyelan ta jpas orasione xchiʼuk ti jaʼ mas tsots skʼoplal chkaʼi ti jpasbe li yabtele? ¿Kʼusi chakʼ ta ilel ta jtojolal li j-orasiontake?».

Bikʼituk xkakʼ jbatik ti chi jnopaj ta stojolal Jeovae

3, 4. 1) ¿Kʼu yelan skʼan jtalelaltik kʼalal ta jpastik orasione? 2) ¿Kʼusi skʼan jpastik mi oy bu la jpastik tsatsal mulile, vaʼun ti oy xa kʼusitik chlik jnoptik yuʼune, jaʼ xkaltik, ti chlik loʼilajuk koʼontontike?

³ Mi ta jkʼantik ti akʼo stakʼbutik Jeova li kʼusi ta jkʼanbetike skʼan me bikʼit xkakʼ jbatik kʼalal chi jnopaj ta stojolale (Sal. 138:6). Skʼan me jkʼanbetik ti akʼo skʼel li kʼusi oy ta koʼontontike, jaʼ jech kʼuchaʼal xi la skʼan Davide: «Qʼuelun lec avil cʼu xiʼelan, Dios cuʼun; otquino lec li cʼusi oy ta coʼntone; qʼuelbun avil cʼu xʼelan coʼnton, otquino lec avil li cʼusitic ta jnope. Qʼuelavil me oy cʼusi chopol ta coʼntone; tuqʼuibtasun batel ta be sventa sbatel osil» (Sal. 139:23, 24). Pe maʼuk noʼox me skʼan jpastik orasion, skʼan me jchʼamtik xtok li beiltasel chakʼ Diose xchiʼuk li tojobtasel chakʼ ta sKʼope. Jvules me ta joltik ti xuʼ yuʼun ta sbeiltaselutik batel li «ta be sventa sbatel osil[e]», jaʼ xkaltik, ta me skoltautik ti lekuk xi jkuxi sventa jtatik li kuxlejal sbatel osile.

⁴ ¿Kʼusi skʼan jpastik mi oy bu la jpastik tsatsal mulile, vaʼun ti oy xa kʼusitik chlik jnoptik yuʼune, jaʼ xkaltik, ti chlik loʼilajuk koʼontontike? (Kʼelo Salmo 32:1-5.) Mu me stakʼ jmakbetik ye li kʼusi chal jol koʼontontike, yuʼun li kʼusitik ta jnoptik ta skoj li jmultike ta me xi slajesutik, jaʼ jech kʼuchaʼal chlik takijuk yibel jtekʼ teʼ ta skoj li kʼepelale. Laj yat tajek yoʼonton David ta skoj li smule, yikʼaluk van ipaj-o. Pe kʼalal jamal laj yalbe li Diose jaʼ to xkuxet laj yaʼi. ¡Nopo xa noʼox avaʼi kʼu to yelan xmuyubaj kʼalal laj yaʼi ti chʼaybat smul yuʼun Diose! Jaʼ me jech xkuxet chkaʼitik ek mi jamal chkalbetik Dios li jmultike. Jech xtok, ta me skoltautik moletik sventa jchaʼtam jbatik li ta mantale (Pro. 28:13; Sant. 5:13-16).

Jkʼanbetik vokol Dios xchiʼuk jtojbetik ta vokol

5. ¿Kʼusi smakoj ti kʼalal xi jvokolet ta stojolal Jeovae?

⁵ Kʼusiuk ti kʼusi chkat-o koʼontontike, skʼan me jchʼuntik li tojobtasel chal Pablo liʼe: «Mu me cʼusi xloʼilaj avoʼntonic yuʼun. Me oy cʼusi scʼan avuʼun chavaʼyique, cʼanbeic Dios, vocoletanic ta stojol, xchiʼuc tojbeic ta vocol» (Fili. 4:6). Kʼalal xi jvokolete jaʼ skʼan xal «ti oy kʼusi ta jkʼantik ti tsots chkaltike o ti bikʼit tajek chkakʼ jbatik ta skʼanele». Kʼalal oy ta vokol li jkuxlejaltike o kʼalal chkichʼtik kontrainele jaʼo me mas skʼan jkʼanbetik vokol Jeova sventa tskoltautik xchiʼuk sventa sbeiltasutik.

6, 7. ¿Kʼusitik srasonal oy kuʼuntik ti chkalbetik kolaval Jeova kʼalal ta jpastik orasione?

⁶ Veno, pe ¿kʼusi chkakʼtik ta ilel ti jaʼ noʼox ta jpastik orasion kʼalal oy kʼusi chtun kuʼuntike?  Li Pabloe laj yal ti skʼan «[jtojtik] ta vocol» xtok kʼalal ta jkʼantik vokole. Ta melel, toj ep me srasonal kuʼuntik sventa jtojbetik ta vokol li Jeovae, jaʼ jech kʼuchaʼal David ti xi laj yale: «Voʼot noʼox atuc oy ta aventa ichʼel ta mucʼ, albel alequilal. Voʼot noʼox oy atsatsal, oy avuʼel; aventainoj scotol. Yuʼun jaʼ avuʼun scotol li cʼusitic oy ta vinajel xchiʼuc ta banamile. Voʼot chapas ta mantal scotol, yuʼun voʼot noʼox banquilalot atuc. Jaʼ yuʼun Dios cuʼun, liʼ chaquichʼotcutic ta mucʼ; liʼ chcalcutic slequilal yutsilal achʼulbi» (1 Cró. 29:11-13).

⁷ Li Jesuse laj yalbe koliyal Jeova ta skoj li veʼlile. Jech kʼuchaʼal liʼe, koliyal laj yalbe Jeova ta sventa li pan xchiʼuk yaʼlel tsʼusub kʼalal la slikes li Veʼlil ta bat kʼakʼal yuʼun Kajvaltike (Mat. 15:36; Mar. 14:22, 23). Jaʼ me jech skʼan jpastik ek, skʼan koliyal xkaltik ta sventa li kʼusi ta jlajestike, pe jech xtok un, skʼan «[jtojbetik] ta vocol [...] li sqʼuelubiltac stsatsal tspas ta stojol cristianoetique» «ti toj tucʼ li tojobtaseletic» yuʼune xchiʼuk ti yakʼojbutik sKʼope, jaʼ xkaltik, li mantaletik te chal ta Vivliae (Sal. 107:15; 119:62, 105).

Jkʼopontik Dios ta stojolal li yantike

8, 9. ¿Kʼu yuʼun skʼan jpastik orasion ta stojolal li kermanotaktike?

⁸ Maʼuk noʼox skʼan jpastik orasion ta jventatik, moʼoj, skʼan jpastik orasion ta stojolal li kermanotaktike, akʼo mi mu xkojtikintik. Akʼo mi mu van xojtikin skotol yajtsʼaklomtak Cristo ta Colosas li Pabloe, xi laj yale: «Cʼalal ta jcʼopan Dios ta atojolic jujun veltae, ta jtojbecutic ta vocol li Diose, jaʼ li Stot Cajvaltic Jesucristoe. Yuʼun caʼyojcutic ti oy lec xchʼunojel avoʼntonic ta stojol Cristo Jesuse, xchiʼuc ti lec chacʼanic scotol li yuʼuntac Diose» (Col. 1:3, 4). Li Pablo xtoke la spas orasion ta stojolal li yajtsʼaklomtak Cristo ta Tesalonicae (2 Tes. 1:11, 12). Li orasion chkalbetik skʼoplal taje jaʼ te chvinaj ti kʼu kelantike xchiʼuk ti kʼuyelan chkiltik li kermanotaktike.

⁹ Kʼalal ta jpastik orasion ta stojolal kermanotaktike, mi jaʼ li buchʼu tʼujbil chbatik ta vinajele o mi jaʼ li yan chijetike, jaʼ te chvinaj ti tsots skʼoplal chkiltik li s-organisasion Diose (Juan 10:16). Li Pabloe laj yalbe yajtsʼaklomtak Cristo ta Éfeso ti akʼo spasik orasion ta stojolale, «yuʼun acʼo sjambun que», xi, yoʼ jech xakʼ ta ojtikinel «li Lequil Aʼyej ti muʼyuc toʼox vinajeme» (Efe. 6:17-20). ¿Mi nopem xavaʼi cha pas orasion ta stojolal li avermanotake?

10. ¿Kʼusi xuʼ xkʼot ta pasel ta jtojolaltik mi ta jpastik orasion ta stojolal yantike?

¹⁰ Kʼalal ta jpastik orasion ta stojolal yantike yikʼaluk van jaʼ xlik jeluk-o ti kʼusi ta jnoptik ta stojolalike. Mi oy junuk ermano ti muʼyuk bu lek xkil jbatik xchiʼuke, ¿mi jun van koʼontontik ta jpastik orasion ta stojolal mi chopol kʼusi ta jpasbetike? (1 Juan 4:20, 21.) Kʼuchaʼal chkiltike, mi jech ta jpastik orasion kʼuchaʼal laj xa kaltike toj ep me sbalil xchiʼuk jaʼ tspasutik ta jun. Jech xtok, jaʼ jech chkakʼtik ta ilel kʼanelal kʼuchaʼal li Cristoe (Juan 13:34, 35). Li kʼanelal taje jaʼ jtos yabtel li chʼul espiritue. ¿Mi ta jkʼanbetik xchʼul espiritu li Jeovae? ¿Mi ta jkʼanbetik ti akʼo jkʼan jbatik, xkuxet noʼox koʼontontik, jun noʼox koʼonton jkotoltik, oy smukʼul koʼontontik, lek noʼox chi jkʼopojutik, oy slekil koʼontontik, oy xchʼunel koʼontontik, mu jtoybautikuk xchiʼuk ti jnaʼ jpajes jbatike? (Luc. 11:13; Gál. 5:22, 23.) Mi jech ta jpastike, li kʼusi chkaltik xchiʼuk li kʼusi ta jpastike jaʼ me chakʼ ta ilel ti yakal ta jpastik li kʼusi tskʼan chʼul espiritue (kʼelo Gálatas 5:16, 25).

11. ¿Kʼu yuʼun muʼyuk chopol kʼalal chkalbetik yantik ti akʼo spasik orasion ta jtojolaltike?

 ¹¹ Toj tsots me skʼoplal ti spasik orasion ta stojolal yalab xnichʼnabik ek li totil-meʼiletike. Jech kʼuchaʼal liʼe, mi laj yaʼi jun totil o meʼil ti oy ta yoʼonton tspas kopiar yaʼi eksamen li yalab xnichʼnabe, xuʼ me spas orasion ta stojolalik xchiʼuk ti xakʼbe yil ta Vivlia ti toj tsots skʼoplal ti skʼan jamal xi jkʼopoje xchiʼuk ti mu xi jlaj ta sujele. Xi laj yalbe ermanoetik ta Corinto li Pabloe: «Ta jcʼopancutic Dios ta atojolic ti mu me xcʼot ta pasel cʼusi chopol avuʼunique» (2 Cor. 13:7). Lek chil Jeova ti kʼalal bikʼit chkakʼ jbatik ta jpastik orasion ta stojolal yantike xchiʼuk jaʼ me te chvinaj ti kʼu kelantike (kʼelo Proverbios 15:8). Jech xtok, xuʼ xkalbetik yantik ti akʼo spasik orasion ta jtojolaltik jech kʼuchaʼal laj yal Pabloe: «Cʼopanic Dios ta jtojolcutic. Ta jnaʼcutic lec ti muʼyuc cʼusi chopol jpasojcutique, xchiʼuc ti jech coʼntoncutic o ta jcʼancutic lec tucʼ chbat cuʼuncutic scotole» (Heb. 13:18).

Mas to chvinaj kʼu kelantik li ta j-orasiontike

12. ¿Kʼusi skʼan oyuk ta joltik kʼalal ta jpastik orasione?

¹² ¿Mi chvinaj ta j-orasiontik ti jaʼutik jun yajtunel Jeova ti xi jmuyubaj noʼoxe? ¿Mi kakʼoj ta koʼontontik chol mantal xchiʼuk ti xkʼot ta pasel kuʼuntik li kʼusi tskʼan tspas Diose, li spakbel skʼoplal mukʼul pas mantal yuʼune xchiʼuk li xchʼultajesbel sbie? Taje skʼan me oyuk ta joltik kʼalal ta jpastik orasione. Jech onoʼox, li orasion laj yal Jesús akʼo jpastike xi chlike: «Jtotic Dios, te oyot ta vinajel, ichʼbiluc ta mucʼ abi. Acʼo sta yorail chapas mantal, acʼo pasuc cʼusi tscʼan avoʼnton liʼ ta banamil jech chac cʼu chaʼal te ta vinajele» (Mat. 6:9, 10).

13, 14. ¿Kʼusi chakʼ ta ilel ta jtojolaltik kʼalal ta jpastik orasione?

¹³ Kʼalal ta jpastik orasione jaʼ te chvinaj li kʼusi ta jkʼantike, li kʼusi oy ta koʼontontike xchiʼuk li kʼusi ta jnoptike. Li Jeovae snaʼoj kʼu kelantik. Xi chal Proverbios 17:3: «Li cʼanal taqʼuin xchiʼuc saquil taqʼuine ta cʼocʼ chichʼ qʼuelel me jaʼ ta melel, pero li yoʼnton cristianoe jaʼ tsqʼuel stuc li Mucʼul Diose». Jaʼ jech, li stuke xil kʼusi oy ta koʼontontik (1 Sam. 16:7). Snaʼoj lek li kʼusi ta jnoptik ta stojolal kermanotaktike, ta sventa tsobajeletik xchiʼuk ta sventa li chol mantale. Xchiʼuk snaʼoj kʼusi ta jnoptik xtok ta stojolal li yermanotak Cristo tʼujbil chbatik ta vinajele (Mat. 25:40). Snaʼoj lek mi ta jkʼantik ta melel li kʼusi ta jkʼantike o mi jaʼ noʼox ta jkʼantik ta skoj ti jech nopem xkaʼitike, ti ta jchaʼalilantik li kʼusi kalojtik xa onoʼoxe. Xi laj yal li Jesuse: «Cʼalal chacʼopanic Diose, mu me teuc noʼox liquel-liquel avuʼun cʼusi chavalic jech chac cʼu chaʼal tspas li yanlum cristianoetic ti mu xotquinic Diose. Yuʼun tsnopic ti jaʼ to jech ch-aʼibat o scʼopic me ep ta velta chalilanique» (Mat. 6:7).

¹⁴ Li kʼusi chkaltik kʼalal ta jpastik orasion xtoke jaʼ te chvinaj kʼu to yepal jpatoj koʼontontik ta s stojolal li Diose. Xi laj yalbe Jeova li Davide: «Voʼot jnacʼubbail cʼotemot. Jaʼ jech cʼotemot cuʼun jech chac cʼu chaʼal toyol qʼuelub osil ti lec tsotse, yuʼun voʼot chacoltaun ta sventa li cajcontrae. Ta jcʼan te chinaqui o ta chʼulna avuʼun sbatel osil, jech lec nacʼalun o ta yolon axicʼ chicʼot» (Sal. 61:3, 4). Li Vivliae chal ti chakʼ xyaxinal Dios ta jtojolaltike, jaʼ xkaltik, chchabiutik (Apo. 7:15). Toj lek ta aʼiel ti kʼalal ta jkʼopontik Jeova ta skoj ti jnaʼojtik ti te xchiʼinojutik kʼalal ta jnuptantik prevaetike (kʼelo Salmo 118:5-9).

15, 16. Mi oy ta koʼontontik ta jbaintik mas abtelaletik ta tsobobbaile, ¿kʼuxi xuʼ skoltautik li orasion sventa jnaʼtik lek li kʼusi oy ta koʼontontike?

¹⁵ Kʼalal ta sjunul koʼonton ta jpastik orasione jaʼ me tskoltautik ta snaʼel li kʼusi oy ta koʼontontik ta melel ta sventa li kʼusi ta jkʼantike. Jech kʼuchaʼal liʼe, mi ta jkʼan oy kʼusi ta jbaintik li ta steklumal Diose, ¿mi jaʼ ta skoj ti bikʼitik chkakʼ jbatik ta skʼanel chi jtun ta melel xchiʼuk ti mas ep chi j-abtej ta  stojolal li Ajvalilal yuʼun Diose? ¿O mi jaʼ van ta skoj ti cha kʼan cha «[kom] ta banquilal» xchiʼuk ti cha pas ta mantal li yantike? Taje mu me jechuk chichʼ pasel ta steklumal li Jeovae (kʼelo 3 Juan 9, 10 xchiʼuk Lucas 22:24-27). Mi ta sjunul koʼonton ta jkʼopontik li Jeovae, jaʼ me tskoltautik ta skʼelel mi muʼyuk lek li kʼusi oy ta koʼontontike xchiʼuk ti akʼo jlokʼestik ti kʼalal muʼyuk to yakʼoj yibel ta koʼontontike.

¹⁶ Ta melel, ep van ermanaetik oy ta yoʼonton ti xkʼotik ta yajkoltaobba mol li smalalike o ti xkʼotik ta mol ta mas tsʼakale. Maʼuk noʼox me skʼan spasik orasion ta sventa taje, skʼan me lek ta chanbel stalelal xakʼik ta ilel sventa jech skolta li smalalik yoʼ xchʼiik echʼel ta mantale. Liʼe toj tsots skʼoplal, yuʼun li kʼusi tspas xchiʼuk chal yutsʼ yalal li jun yajtsʼaklom Cristoe jaʼ me jech chloʼilaj li tsobobbail ta stojolale.

Kʼalal ta jpastik orasion ta stojolal epal krixchanoetike

17. ¿Kʼu yuʼun lek ti jsaʼtik kʼusi ora xuʼ jpastik orasion jtuktike?

¹⁷ Li Jesuse nopem xaʼi tsabe yorail tspas orasion stuk, chnamaj echʼel ta stojolal li epal krixchanoetike (Mat. 14:13; Luc. 5:16; 6:12). Jaʼ me jech skʼan jsabetik yorail ek. Kʼalal tsʼijil noʼox ti bu ta jpastik orasione xchiʼuk ti muʼyuk kʼusi chchʼay koʼontontike, mas me kʼun chkaʼitik ti jaʼ jnoptik spasel li kʼusi lek chil Diose xchiʼuk ti jaʼ lekutik-o ta mantale. Veno, pe li Jesuse la spas orasion ta stojolal epal krixchanoetik. ¿Kʼu yelan skʼan jpastik orasion kʼalal ta jta jmotontik spasel orasion ta stojolal epal krixchanoetike?

18. ¿Kʼusi skʼan te oyuk ta sjolik li ermanoetik kʼalal tsta smotonik ta spasel orasion ta tsobobbaile?

¹⁸ Li ta jtsobobbailtike oy tukʼil viniketik ti jaʼ chkʼopojik kuʼuntik ta orasione (1 Tim. 2:8). Kʼalal mi tsuts li orasione skotol li buchʼutik tee xuʼ chalik «jechuk». Veno, pe sventa jech chalike skʼan me lekuk chaʼiik ti kʼusi laj yichʼ alel li ta orasione. Li ta orasion padrenuestroe muʼyuk kʼusi te laj yal Jesús ti xuʼ oy buchʼu chopol xaʼie o ti tsok-o yoʼontone (Luc. 11:2-4). Jech xtok, muʼyuk bu x-och ta xcholbel skʼoplal li kʼusi chopol tsnuptanike mi jaʼuk li kʼusitik chtun yuʼunik ta jujuntale. Li kʼusitik chtun kuʼuntik ta jujuntale skʼan jaʼ to xichʼ alel li ta orasion ta jpas jtuktike maʼuk kʼalal oyutik ta stojolal epal krixchanoetike. Jech xtok, skʼan me mu xkakʼtik ta aʼyel li kʼusi mukul skʼoplal kʼalal ta jpastik orasion ta stojolal epal krixchanoetike.

19. ¿Kʼu yelan skʼan jpas jtalelaltik kʼalal chichʼ pasel orasion ta stojolal epal krixchanoetike?

¹⁹ Kʼalal oy buchʼu chkʼopoj ta jtojolaltik ta orasione skʼan me xkakʼtik ta ilel ti ta «[jxiʼtatik] ti Diose», skʼan xi j-ichʼvan ta mukʼ (1 Ped. 2:17, Ch). Oy kʼusitik ti muʼyuk van chopol ta pasel li kʼusitik nopem xkaʼitik spasel kʼalal jaʼo xuʼ jpastike xchiʼuk ti jaʼo yoraile, pe ti mu lekuk jaʼo jpastik kʼalal jaʼo yorail tsobajele (Ecl. 3:1). Jech kʼuchaʼal liʼe, mi oy buchʼu chal ti akʼo stsakbe sba skʼob jtsop ermanoetik kʼalal jaʼo chichʼ pasel orasione, junantik li buchʼutik tee —ti yikʼaluk van te kapal skʼoplalik  jvulaʼaletike— xuʼ van chopol xaʼiik o xchʼaybat yoʼontonik. Junantik ermanoetike lek van ti ta smelol noʼox tstsakbe skʼob yajnilike, pe mi tsmey leke xuʼ van oy buchʼu xmak-o yok. Xuʼ van xakʼ ta ilel ti jaʼ mas batem ta yoʼonton ti lekuk oy xchiʼuk li xchiʼile ti jaʼ mu tsotsuk skʼoplal yilel li Jeovae. Jaʼ yuʼun chaʼa, skʼan me xi j-ichʼvan ta mukʼ, «scotol li cʼusiuc noʼox ta jpastique, acʼo jpastic ta sventa lec chbat scʼoplal cuʼuntic li Diose». Mu me jpastik li kʼusitik xuʼ xchʼay-o yoʼontonike, ti kʼusi xuʼ chopol chilik li yantike o ti xuʼ xmak-o yokike (1 Cor. 10:31, 32; 2 Cor. 6:3).

¿Kʼusi skʼan jkʼantik?

20. ¿Kʼuxi xuʼ xa chapbe smelolal li kʼusi chal ta Romanos 8:26, 27?

²⁰ Xuʼ van bakʼintike mu xtal ta joltik kʼusi ta jkʼantik kʼalal ta jpas orasion jtuktike. Li Pabloe xi laj yale: «Mu jnaʼtic cʼu xʼelan lec ta jcʼopantic li Diose. Pero li Chʼul Espiritue jaʼ tsvaʼan sba ta jcoltaeltic, xʼocʼolet tsjelubtasbe Dios li cʼusi mu xa jnaʼtic cʼuxi ta alele. Pero li Dios ti chil cʼusi oy ta coʼntontique snaʼbe cʼusi oy ta yoʼnton li Chʼul Espiritue» (Rom. 8:26, 27). Li Jeovae laj yakʼ ti akʼo xichʼ tsʼibael epal orasionetik li ta Vivliae. Ta skoj ti jaʼ laj yakʼ ta naʼele snaʼoj lek ti kʼusi la skʼan laj yalik li buchʼutik la stsʼiba Vivliae. Jech xtok, lek xi jyojtikinutik. Jaʼ yuʼun chchʼam li orasionetik yakʼoj ta naʼel taje, xkoʼolaj kʼuchaʼal voʼotik laj kaltik xchiʼuk ti chkʼot ta pasel yuʼune. Li Jeovae tstakʼ li j-orasiontik kʼalal «tsvaʼan sba ta jcoltaeltic» li chʼul espiritue. Kʼalal mas chkojtikintik li sKʼop Diose, mas me kʼun chtal ta joltik li kʼusi ta jkʼantike.

21. ¿Kʼusi ta jkʼelbetik skʼoplal li ta yan xchanobile?

²¹ Kʼuchaʼal laj xa kiltike, ti kʼuyelan ta jpastik orasione chakʼ ta ilel kʼu kelantik. Chakʼ ta ilel mi nopol oyutik ta stojolal Dios xchiʼuk mi xkojtikinbetik lek li sKʼope (Sant. 4:8). Li ta yan xchanobile ta jkʼelbetik skʼoplal junantik orasionetik xchiʼuk li kʼusi laj yalik sventa chichʼik ta mukʼ Dios ti te tsakal ta Vivliae xchiʼuk tskoltautik ta skʼelel kʼuyelan ta jpastik orasion.

¿Kʼusi cha takʼ?

• ¿Kʼu yelan skʼan jtalelaltik kʼalal ta jpastik orasione?

• ¿Kʼu yuʼun skʼan jpastik orasion ta stojolal li kermanotaktike?

• ¿Kʼusi chakʼ ta ilel ta jtojolaltik xchiʼuk kʼusi oy ta koʼontontik li orasion ta jpastike?

• ¿Kʼu yelan skʼan jpas jtalelaltik kʼalal chichʼ pasel orasion ta stojolal epal krixchanoetike?

[Sjakʼobiltak sventa xchanobil]

[Lokʼol ta pajina 4]

¿Mi nopem xavaʼi cha kʼupil kʼopta Jeova xchiʼuk ti cha tojbe ta vokole?

[Lokʼol ta pajina 6]

Ti kʼuyelan ta jpas jtalelaltik kʼalal chichʼ pasel orasion ta stojolal epal krixchanoetike skʼan me jaʼ yichʼobil ta mukʼ Jeova