Kʼuxubino me li avermanotak ti pakʼchikinetike

LI STEKLUMAL Diose jaʼ jun mukʼta utsʼ-alalil ti naka yermano sbaike. Ti te lik tal ta stojolal voʼne viniketik xchiʼuk antsetik ti tukʼ laj yakʼ sbaike, jech kʼuchaʼal Samuel, David, Sansón, Rahab, Moisés, Abraham, Sara, Noé xchiʼuk Abel. Toj ep ermanoetik ti pakʼchikinetik li ta mukʼta utsʼ-alalil taje. Jech kʼuchaʼal liʼe, li baʼyel chaʼvoʼ yajrextikotak Jeova ta Mongoliae jaʼ jun nupultsʼakal ti pakʼchikinetike. Koliyal ti tukʼ yoʼonton laj yakʼ sbaik li kermanotaktik ti pakʼchikinetik ta Rusia xtoke, laj yichʼ pasel kanal ta Tribunal Europeo de Derechos Humanos.

Mu to voʼneuke, li «jʼabtel ti jun [«tukʼ», NM] yoʼnton [...], ti lec bije» slokʼesoj videoetik ta senya kʼop ti chalbe skʼoplal Vivliae. Xchiʼuk xchapanoj tsobobbailetik xchiʼuk mukʼta tsobajeletik li ta kʼop taje (Mat. 24:45). Ep tajek staojbe sbalil pakʼchikinetik li kʼusitik spasoj taje. a ¿Mi oy van ajakʼojbe aba junuk velta kʼu to stsatsal chaʼiik xchanel kʼusi melel ta sventa Dios xchiʼuk ti xchʼiik ta mantal kʼalal chʼabal toʼox li kʼusitik taje? ¿Mi oy anopoj kʼusi xuʼ xa pas sventa xa kolta li pakʼchikinetik ta alumale?

Kʼalal muʼyuk toʼox li kʼusi oy xa kuʼuntik avie

Ti xa jakʼbe li ermanoetik ti pakʼchikinetik ti oy xa ta sjayibal jabil yochelik ta mantal kʼuxi laj yojtikinik li Diose, ¿kʼusi van chalik? Yikʼaluk van cha yalbeik kʼuyelan laj yaʼi sbaik kʼalal la xchanbeik sbi li Diose, ti jaʼ jelbat-o xkuxlejalike xchiʼuk ti jaʼ la sta-o stsatsal yoʼontonik ti jayib jabil chʼabal toʼox yuʼunik li videoetik ta senya kʼop ti chakʼ ta chanel li kʼusi mas vokolik ta aʼibel smelolale. Yikʼaluk van xal avaʼi kʼuyelan laj yaʼi sbaik kʼalal muʼyuk toʼox buchʼu tsjelubtas ta senya kʼop li kʼusitik ch-echʼ ta tsobajele o ti muʼyuk toʼox tsobajeletik ta senya kʼope. Yuʼun ti kʼusi tspasike jaʼ ti oy buchʼu chchoti ta xokonik sventa stsʼibabatik ta vun yoʼ xaʼibeik smelolal li kʼusi chichʼ alele. Jaʼ jech la xchan mantal vukub jabil jun ermano, jaʼ to ti kʼalal oy xa buchʼu tsjelubtas ta senya kʼope.

Li mol-meʼel ermanoetik ti pakʼchikinetike xvul to ta sjolik ti kʼuyelan laj yaʼiik li chol mantale xchiʼuk ti chcholbeik mantal li buchʼutik xaʼiik kʼoponele. Ta jun skʼobike stsakojik li vun ti bu tsʼibabil kʼuyelan chcholik mantale, li ta jun skʼobike jaʼ te stsakojik li achʼ revistaetik Li Jkʼel osil ta toyole xchiʼuk !Despertad! Jaʼ jun tsatsal abtelal chaʼiik xtok yakʼbel chanubtasel ta Vivlia yan pakʼchikin, yuʼun kʼajomal oy yuʼunik li vunetik ti muʼyuk buchʼu xaʼibe lek smelolal yuʼunike. Yikʼaluk van xvul ta sjolik ti toj chopol laj yaʼi sbaik li ermanoetik kʼalal mu xaʼibeik smelolal yantik li kʼusi tskʼan chalike, jaʼ yuʼun mu xa xuʼ xloʼilaj chaʼiik ta sventa li mantale. Jech xtok, snaʼojik kʼusi skʼan xal ti ta jkʼantik ta sjunul koʼontontik li Jeovae, pe mu snaʼik kʼuxi chakʼ ta xkuxlejalik li mantaletik xchanojike.

Akʼo mi toj ep li makel ta be tsta li kermanotaktik ti pakʼchikinetike tukʼ-o yoʼontonik (Job 2:3). Ta sjunul yoʼonton smalaoj chkoltaatik yuʼun Jeova (Sal. 37:7). Li avi une ep tajek bendision ch-akʼbatik yuʼun Jeova ti mu jechuk snopoj tstaike.

Nopo avaʼi ta stojolal jun ermano ti pakʼchikin ti tsots tajek chakʼ yipale, oy yajnil xchiʼuk jaʼ jun totil. Kʼalal muʼyuk toʼox video ta senya kʼope ta onoʼox sjelubtas li xchanel Vivlia ta yutsʼ yalale. Xi chvul ta sjol li skereme: «Vokol  onoʼox tajek chaʼi chanun li jtote, yuʼun ti kʼusi tstunes sventa chchanubtasunkutike jaʼ noʼox li vunetike. Ep ta velta ti mu xaʼibe lek smelolal li kʼusi chchane. Li voʼonkutik ek ti bikʼitunkutike mu masuk ta jkoltakutik. Kʼalal mu jechuk smelolal li kʼusi chchapbunkutike ta anil noʼox ta jtukʼibtaskutik. Akʼo mi jech, skotol onoʼox velta jaʼ chetʼes xchanel Vivlia ta utsʼ-alalil li jtote, yuʼun jaʼ mas toj tsots skʼoplal laj yaʼi ti akʼo xkojtikinkutik Jeovae, jaʼ mas mu tsotsuk skʼoplal laj yaʼi ti chil kʼexlal bakʼintik ta skoj ti mu xaʼi lek li inglese».

Yan xtoke jaʼ ti kʼusi kʼot ta stojolal Richarde, jun ermano ti yichʼoj mas ta 70 jabil ti te nakal ta Brooklyn (Nueva York). Ojtikinbil lek ti chkʼot ta stekel tsobajeletike, akʼo mi pakʼchikin xchiʼuk ti maʼsate. Sventa chbat li ta tsobajele tstsak jkot metro (xkoʼolajtik kʼuchaʼal tren), vaʼun chchapbe echʼel li skotlebtak metro sventa snaʼ bu chyale. Oy jun velta ta yorail siktik ti toj echʼ xa noʼox chyal taive laj yalik ti muʼyuk ch-echʼ tsobajele. Laj yichʼ albel stekel li ermanoetik ta tsobobbaile, pe jaʼuk li Richarde te van kʼu yuʼun ti muʼyuk xaʼie. Kʼalal laj yakʼ venta li ermanoetike bat saʼik, vaʼun te vaʼal la staik ta stiʼ Salon sventa Tsobobbail, jun yoʼonton tsmala ti akʼo xjam li stiʼ salone. Kʼalal laj yichʼ jakʼbel kʼu yuʼun ti jech lokʼ ta kaye ti vaʼ to yelan taive, xi la stakʼe: «Yuʼun jkʼanoj li Jeovae».

¿Kʼusi xuʼ xa pas li voʼote?

¿Mi xuʼ van xa chan jpʼel-chaʼpʼeluk senya kʼop mi oy pakʼchikinetik ta alumale? Toj lek me yoʼontonik maʼ stukike xchiʼuk mu snaʼ xlubtsajik kʼalal chchanubtasvan ta skʼopike. Yikʼaluk van oy bu xa nup ta be junuk pakʼchikin o ti xa ta ta chol mantale. ¿Kʼusi xuʼ xa pas? Akʼo persa xa chiʼin ta loʼil. Bakʼeso li asate, li abekʼtale, oy kʼusi xa tsʼiba ta vun, paso divujo xchiʼuk tuneso fotoetik. Akʼo mi xalbot ti muʼyuk ta yoʼonton mantale, albo junuk yajrextiko Jeova ti pakʼchikin ti la loʼilaj xchiʼuke o albo junuk ermano ti snaʼ senya kʼope. ¿Kʼu yuʼun? Yuʼun mas to me lek chaʼi kʼalal ta skʼop stuk chichʼ albel li mantale.

Yikʼaluk van yakal cha chan senya kʼop li voʼote xchiʼuk ti ta senya kʼop li atsobobbaile. ¿Kʼuxi xuʼ xa chan lek? Kʼelavil, akʼo mi oy van jcholmantaletik ti xaʼiik kʼoponele, ¿kʼu yuʼun mu naka ta senya kʼopuk xa loʼilaj? Jaʼ me jech chlik anopbe skʼoplal kʼusitik ta senya kʼop, jaʼ xkaltik, chkil ta jnopbentik li kʼusitik chichʼ alele. Oy van bateltik ti cha kʼan xa cha kʼopoj avaʼie, ta skoj ti jaʼ mas kʼune. Pe jech kʼuchaʼal chichʼ chanel yan kʼopetike, sventa jchantike skʼan me xkakʼbetik yipal.

Mi chavakʼbe yipal ta stunesel li senya kʼope ta me xavakʼ ta ilel ti akʼanoj li avermanotak ti pakʼchikinetike xchiʼuk ti avichʼoj ta mukʼe. Nopo xa noʼox xavaʼi kʼuyelan chaʼi sbaik jujun kʼakʼal ti mu xaʼiik kʼusi chal li xchiʼiltakik ta abtele xchiʼuk ta chanune. Xi chal kaʼitik jun pakʼchikine: «Skotol kʼakʼal chloʼilajik li krixchanoetik ta jpat jxokone. Nopajtik noʼox ti jtuk chkaʼi jbae xchiʼuk ti pʼajbilune, jaʼ yuʼun chi lubtsaj xchiʼuk chi ilin-o xtok. Mu xa noʼox x-al kuʼun yaʼel ti kʼuyelan chkaʼi jba bakʼintike». Jech oxal chaʼa, kakʼbetik me yipal ti jaʼuk me te  sta siketel yoʼontonik ta tsobajeletik li kermanotaktik ti pakʼchikinetike, ti maʼukuk noʼox me sta tal sveʼelik ta mantale, moʼoj, yuʼun ti kʼusie akʼo jun yoʼonton xloʼilajik xchiʼuk yan ermanoetik xchiʼuk ti skʼupinik ti chchiʼinik ta loʼile (Juan 13:34, 35).

Jech xtok, skʼan me jtsaktik ta mukʼ li bikʼtal grupoetik sventa li buchʼutik pakʼchikinetik ti te tstsob sbaik ta stsobobbail li buchʼutik xaʼiik kʼoponele. Veno, pe skʼan me oy buchʼu sjelubtas un. Sventa xaʼibeik lek smelolal skotol li kʼusi chjelav ta tsobajele, skʼan xchotiik ta baʼyel fila li ta Salon sventa Tsobobbaile, yuʼun jaʼ jech chilik lek li kʼusi chal jelubtasej kʼope xchiʼuk li buchʼu chal mantale. Vinajem tal ti ta ora chnop chaʼi li tsobobbaile, jaʼ yuʼun muʼyuk bu chchʼay-o koʼontontik. Jaʼ jech chichʼ pasel li ta mukʼta tsobajeltik ti chichʼ jelubtasel ta senya kʼope. Li buchʼutik tsjelubtasik li senya kʼope staik-o lekil kʼoptael, yuʼun chakʼbeik yipal ti lekuk tukʼ smelol sjelubtasik xchiʼuk ti lekuk ta aʼibel smelolal li kʼusi chalike, jaʼ jech kʼuchaʼal tspas jun ermano ti pakʼchikine.

Yikʼaluk van oy jun grupo sventa senya kʼop ta atsobobbail o ti oy jayvoʼuk pakʼchikinetik ti skʼan jelubtasbel ta senya kʼop li tsobajele. ¿Kʼusi xuʼ pas sventa chavakʼ ta ilel ti oy ta avoʼonton li avermanotak ti pakʼchikinetike? Yikʼaluk van xuʼ avuʼun ti xavikʼ batel ta vulaʼal ta nae, vaʼun mi xuʼ avuʼune xuʼ xa chanbe jpʼel-chaʼpʼeluk skʼopik. Mu me xavakʼ smakot ta be ti mu xa naʼ li senya kʼope. Xuʼ me xa pat lek avoʼonton ti tstsal avuʼun taje, jun noʼox me avoʼonton ch-echʼ avuʼunik ti kʼalal chavakʼbe yil ti akʼanoje (1 Juan 4:8). Toj ep me kʼusitik spas yuʼunik li kermanotaktik ti pakʼchikinetike. Toj lek xloʼilajik, lek xilik ta ora kʼusi lek xchiʼuk kʼusi chopol xchiʼuk xmuyubajik noʼox. Xi chal kaʼitik jun ermano ti pakʼchikin stot smeʼe: «Ti kʼu sjalil kuxulun tale jaʼ jchiʼuk-o li krixchanoetik ti pakʼchikinetike, toj ep kʼusitik spasojik ta jtojolal, voʼon mas juteb ti kʼusi spas kuʼun ta stojolalike. Toj ep kʼusitik xuʼ jchantik ta stojolal li kermanotaktik ti pakʼchikinetike».

Li buchʼutik tukʼ chichʼik ta mukʼ Diose kʼanbilik yuʼun Jeova, mi xaʼiik kʼoponel o mi muʼyuk. Ta melel, li xchʼunel yoʼontonik kermanotaktik ti pakʼchikinetike xchiʼuk ti chkuch yuʼunik vokolile jaʼ me mas toj kʼupil-o sba li s-organisasion Jeovae. Jaʼ yuʼun, ¡kʼuxubino me!

[Tsʼib ta yok vun]

[Lokʼol ta pajina 31]

Yikʼaluk me mas xkʼot ta yoʼonton mantal li pakʼchikin mi chichʼ albel ta senya kʼope

[Lokʼol ta pajina 32]

Jaʼuk me te sta siketel yoʼontonik ta tsobajeletik li kermanotaktik ti pakʼchikinetike