Li kʼusitik tsjakʼ jkʼel vunetike
Li kʼusitik tsjakʼ jkʼel vunetike
¿Mi persa van skʼan smak sjolik li ermanaetik ti tsjelubtasik ta senya kʼop li mantal chal ermanoetik ta tsobajeletike o li ta mukʼta tsobajeletike?
Ta jutuk mu skotoluk veltae, li ermanae skʼan smak sjol kʼalal jaʼ tspas li kʼusi jaʼ oy ta sba spasel smalal o jun ermano ta tsobobbaile. Jaʼ jech kʼuchaʼal chal li mantal yaloj Pablo liʼe: «Me muʼyuc macal sjol tscʼopanic Dios, xchiʼuc chalic cʼusi ch-acʼbat snaʼic yuʼun Dios li antsetique, jaʼ chacʼ ta qʼuexlal [...] li sjolique». ¿Kʼu yuʼun? Yuʼun «li antsetique jaʼ sjolic li viniquetique» (1 Cor. 11:3-10). Ta melel, li ants ti oy kʼusi tsmak-o sjol ti ta smelol noʼox ta kʼelel o ti lek noʼox sba yutsile chakʼ ta ilel ti yichʼoj lek ta mukʼ ti kʼuyelan chapal ch-abtej stsobobbail Diose (1 Tim. 2:11, 12). a
¿Mi jaʼ jech skʼan spas li ermana kʼalal tsjelubtas ta yan kʼop li mantal chetʼes jun ermano kʼuchaʼal chal li beiltasel ta Vivlia taje? Ta melel, ta skoj ti jaʼ noʼox tsjelubtas li kʼusi chal li buchʼu chetʼes mantale, maʼuk yakal chchanubtasvan li ermanae. Liʼe jaʼ jech chkʼot ta pasel li ta kʼopetik ti skʼan alel ta ketike, yuʼun li buchʼutik te chaʼiik mantale jaʼtik onoʼox tskʼelik batel li buchʼu chal mantale xchiʼuk chaʼiik ti kʼusi chal li buchʼu tsjelubtas tal ta yan kʼope. Jaʼ yuʼun chaʼa, li ermanaetik ti tsjelubtasik ta yan kʼope maʼuk ti jaʼ xa kʼelbilik tajek yuʼun li buchʼutik te chaʼiik mantale. Jech onoʼox, bateltike xuʼ jaʼ skʼel batel li buchʼu chal mantale ti maʼuk tskʼel li buchʼutik te chaʼiik mantale xchiʼuk xuʼ chotol noʼox xtok. Ti vaʼ yelane mu persauk smak sjolik. Veno, pe li sjelubtasel ta senya kʼope jelel tajek.
Ta sventa li senya kʼope, ta skoj li kʼusitik achʼ lokʼemik tale, jaʼ mas chichʼ kʼelel li buchʼu
tsjelubtase, yuʼun te chvinaj ta mukʼta pantaya, yan li ermano chal tal mantale yikʼaluk van mu xvinaj. Jaʼ yuʼun chaʼa, li ermanaetik ti tsjelubtasik ta senya kʼop li mantale skʼan smak sjolik yileluk sventa chakʼ ta ilel ti jaʼ mas kʼun yabtelike.Ti vaʼ yelan jel taj une, ¿mi jaʼ van skʼan xal ti skʼan smak sjol li ermana kʼalal tsjelubtas ta senya kʼop li kʼusitik chjelav ta Chanob vun sventa Kabteltik yuʼun Dios, ta skʼelobil chol mantal xchiʼuk li sloʼil chakʼ ermanoetik li ta Xchanel Vivlia ta Tsobobbail, li ta Tsobajel sventa Tunelal o li ta Xchanel Li Jkʼel osil ta toyole? Oy van bakʼintik ti mu persauk smak sjolike, yuʼun jamal chilik li buchʼutik te chaʼiik mantal ti maʼuk chetʼes tsobajel li ermanae. Jech kʼuchaʼal liʼe, kʼalal tsjelubtasbeik ta senya kʼop li sloʼil chal ermanoetik ta tsobajele, li mantal ch-echʼ yetʼes jun ermanae o li skʼelobil chol mantale. Pe skʼan smak sjol kʼalal tsjelubtasik ta senya kʼop li mantal chetʼes ermanoetik ta tsobajeletik taje o kʼalal chetʼesik li Xchanel Li Jkʼel osil ta toyole, li Xchanel Vivlia ta Tsobobbail o kʼalal tsjelubtasik li kʼejojetike. Li ta tsobajele yikʼaluk van tsjelubtasik li kʼusi chal ermanoetik, ermanaetik, ololetik o li moletike. Ta skoj ti jech taj une, jaʼ van mas lek ti akʼo smak sjol sjunul tsobajel li ermanae.
[Tsʼib ta yok vun]
a Mi cha kʼan cha chanbe mas lek skʼoplale kʼelo li livro «Tey me comanic o ta stojol ti scʼuxul yoʼnton ti Diose» ta pajina 209 kʼalal ta 212.