Oyuk sbalil xkiltik li kaviltik ta tsobobbaile
Oyuk sbalil xkiltik li kaviltik ta tsobobbaile
«Li Diose yantic o yabtel laj yacʼbe jujuchop jbecʼtaltic jech chac cʼu chaʼal la scʼan yoʼnton stuque.» (1 COR. 12:18)
1, 2. 1) ¿Kʼu yuʼun xuʼ jpat koʼontontik ti oy lek kavil jkotoltik li ta tsobobbaile? 2) ¿Kʼusitik chichʼ takʼel li ta xchanobil liʼe?
LEʼ XA onoʼox tal ta skʼakʼalil j-israeletik ti jaʼ tstunes tsobobbail li Jeova sventa tsbeiltas xchiʼuk tsmakʼlin ta mantal li steklumale. Jech kʼuchaʼal liʼe, kʼalal stsalojik xaʼox slumal Hai li j-israeletike «li Josuee te lic yapta ta jujubel li mantaletic yuʼun Diose. Te laj yaptabe scʼoplal li bendicione xchiʼuc li vocoletique jech chac cʼu chaʼal tsʼibabil ta svunale [...,] laj yapta scotol ta stojol xchiʼiltac» (Jos. 8:34, 35).
2 Li ta baʼyel siglo ta jkʼakʼaliltike albat yuʼun jtakbol Pablo li Timoteo ti tsobobbaile jaʼ li «sna Diose, [NM]» «jaʼ yoyal; jaʼ snacleb cʼotem li cʼusi melele» (1 Tim. 3:15). Li avie, li ermanoetik ti jaʼik li melel yajtsʼaklomtak Cristo ta spʼejel Balumile jaʼ kʼotemik li ta «sna Diose». Li ta kapitulo 12 ta baʼyel karta sventa ermanoetik ta Corintoe te laj yalbe skʼoplal Pablo ti xkoʼolaj kʼuchaʼal sbekʼtal stakopal jun krixchano li tsobobbaile. Akʼbat snaʼ yuʼun Dios ti skotol li kʼusitik oy ta jbekʼtal jtakopaltike toj jtunelik akʼo mi jelel li yabtelike. Xi laj yale: «Li Diose yantic o yabtel laj yacʼbe jujuchop jbecʼtaltic jech chac cʼu chaʼal la scʼan yoʼnton stuque». Jech xtok laj yal «ti bu mu xʼechʼ to lec ta qʼuelel ti jbecʼtaltique, jaʼ ta jmactic ta cʼuʼil [...] yoʼ jech ichʼbil ta mucʼ ta xcʼot ti bu xa mu lecuc ta qʼuelele» (1 Cor. 12:18, 23, Ch). Jaʼ jech li yabtel jun tukʼil yajtsʼaklom Cristo ta «sna Diose», maʼuk ti jaʼ mas leke o ti jaʼ toj chopole; ti kʼusi noʼoxe jaʼ ti jelele. ¿Kʼuxi xuʼ jta kaviltik li ta stsobobbail yajtsʼaklom Cristoe xchiʼuk ti xkakʼtik ta ilel ti oy sbalil chkiltike? ¿Kʼusi chakʼ ta ilel ti kʼuyelan li kaviltik ta tsobobbaile? ¿Xchiʼuk kʼusi skʼan jpastik sventa «chil scotolic ti lec chbat [kuʼuntike]»? (1 Tim. 4:15.)
Kʼuxi chkakʼtik ta ilel ti oy sbalil chkil li kaviltike
3. ¿Kʼuxi xuʼ jta kaviltik li ta tsobobbaile xchiʼuk ti xkakʼtik ta ilel ti oy sbalil chkiltike?
3 Jtos ti kʼusi skʼan jpastik sventa jta li kaviltik ta tsobobbaile xchiʼuk ti xkakʼtik ta ilel ti oy sbalil chkiltike jaʼ ti baxbolukutik jchʼunbetik smantal li «jʼabtel ti jun [«tukʼ», NM] yoʼnton [...], ti lec bije» xchiʼuk li yajkʼopojel ti jaʼ li Jtsop Jbeiltasvaneje (kʼelo Mateo 24:45-47). Jech oxal chaʼa, skʼan me jkʼeltik mi yakal ta jchʼuntik li beiltasel chakʼbutik li tukʼil j-abtele. Jech kʼuchaʼal liʼe, oy xa ta sjayibal tal jabil ti jamal lek albilutik mantaletik ta sventa ti kʼuyelan ta jlap jkʼuʼ jpokʼtike, ti kʼuyelan ta jmeltsan jbatike, li kʼusitik ta jchʼay-o koʼontontike xchiʼuk li stunesel Internete. ¿Mi tukʼ ta jchʼuntik li tojobtaseletik ti jaʼ chkichʼtik-o chabiel ta mantale? Jech xtok, kichʼojtik albel ti akʼo jchʼakbetik yorail yichʼel ta mukʼ Jeova ta kutsʼ kalaltike. ¿Mi jtsakojtik lek ta mukʼ li mantal taje? ¿Mi jchʼakojtik jun akʼobal ta sventa taje? Mi tojol kerem o mi tojol tsebutike, ¿mi ta jchantik lek li Vivlia sventa jtunestik lek li kʼakʼal taje? Mi ta jchikintatik li kʼusi chal tukʼil j-abtele ta me xakʼbutik sbendision li Jeovae xchiʼuk ta me xakʼbe ek li kutsʼ kalaltike.
4. ¿Kʼusitik skʼan teuk ta joltik ta sventa li kʼusitik voʼotik noʼox ta jnop jtuktike?
4 Yikʼaluk van oy buchʼu chal ti voʼotik ta jnop jtuktik ti kʼuyelan ta jlap jkʼuʼ jpokʼtike, ti kʼuyelan ta jmeltsan jbatike xchiʼuk ti kʼusi ta jchʼay-o koʼontontike. Pe li yajtsʼaklomtak Cristo ti ep sbalil chil li yavilik ta tsobobbaile, snaʼojik ti maʼuk noʼox skʼan stsakik ta venta ti kʼusi lek chaʼi stukik kʼalal oy kʼusi tsnop tspasike. Li kʼusi skʼan mas xakʼ ta yoʼontonike jaʼ ti kʼusi tsnop Jeovae, ti te ta jtatik ta Vivliae. Li mantal ta Vivliae «jaʼ luz cʼotem cuʼun[tik]» xchiʼuk «jaʼ toj cʼotem cuʼun[tik] sventa chquil jbe[tik]» (Sal. 119:105). Ta skoj li kʼusitik ta jnop ta jpastik xtoke skʼan me jkʼeltik lek ta sventa li chol mantal ta jpastike xchiʼuk ta sventa li krixchanoetik ta jpat jxokontike, mi chtunik ta stojolal Jeova o mi moʼoj (kʼelo 2 Corintios 6:3, 4).
5. ¿Kʼu yuʼun skʼan mu xkakʼtik x-ayan ta koʼontontik ti ta jkʼan ta jchʼak jbatike?
5 Ti «icʼ ta xanave, ti ta xʼabtej ta yoʼntonic ti buchʼutic mu xchʼunic ti cʼusi ta xal ti Diose» solel toj echʼ xa noʼox pʼolem ti xkoʼolaj xa kʼuchaʼal li ikʼ chkichʼtike (Efe. 2:2, Ch). Ti vaʼ yelan stalelal krixchanoetike xuʼ me xakʼ jchʼuntik ti muʼyuk chtun kuʼuntik li beiltasel chakʼ s-organisasion Jeovae. Mu jkʼan jech jtalelaltik kʼuchaʼal «li Diotrefese [ti mu] xichʼ ta mucʼ» li kʼusi laj yal Juane (3 Juan 9, 10). Jaʼ yuʼun mu me xkakʼtik x-ayan ta koʼontontik ti ta jkʼan ta jchʼak jbatike. Mu me jchibal kʼoptatik ta jtalelaltik o ta kʼusitik chkaltik li kʼusi tstunes Jeova yoʼ xchiʼinutik ta loʼil avie (Núm. 16:1-3). Jaʼ lek oyuk sbalil xkiltik ti jtaoj jmotontik ta skoltael li tukʼil j-abtele xchiʼuk kakʼbetik me yipal ta xchʼunbel smantal xchiʼuk ti xkakʼ akʼo spasutik ta mantal li viniketik ti jaʼ jbabeik li ta jtsobobbailtike (kʼelo Hebreos 13:7, 17).
6. ¿Kʼu yuʼun skʼan jkʼel lek kʼuyelan li jkuxlejaltike?
6 ¿Kʼusitik mas stakʼ jpastik sventa xkakʼtik ta ilel ti oy sbalil chkiltik li kaviltik ta tsobobbaile? Jkʼeltik lek kʼuyelan li jkuxlejaltike, vaʼun kakʼtik venta mi yakal chkakʼtik ta ilel ti toj «tsots scʼoplal [chkaʼitik] li abtel quichʼoj[tik]e» xchiʼuk ti chkichʼtik ta mukʼ li Jeovae (Rom. 11:13). Oy buchʼutik ti xuʼ x-ochik ta prekursor regulare. Yantike chtunik ta tsʼakal ora, chtunik ta misioneroal, ta jkʼelvanejetik ta sirkuito, ta distrito o chtunik ta Betel. Yantik xtoke chtunik ta svaʼanel Salonetik sventa Tsobobbail. Akʼo mi jaʼ mas ep li ermanoetik ti muʼyuk bu jech chtunik ta stojolal Jeova taje, chakʼbeik yipal ta yakʼbel li kʼusitik chtun yuʼun ta mantal li yutsʼ yalalike xchiʼuk ti ta sjunul yoʼonton chcholik mantal jujun xemanae (kʼelo Colosenses 3:23, 24). Xuʼ me jpat lek koʼontontik ti oy kaviltik ta steklumal Jeova mi baxbolutik chi jtun ta stojolale xchiʼuk ti ta sjunul koʼontontike.
Ti kʼusi chakʼ ta ilel ti kʼuyelan li kaviltik ta tsobobbaile
7. ¿Kʼuxi chakʼ ta ilel li kaviltik ta tsobobbail ti kʼuyelan jkuxlejaltike?
7 Toj tsots me skʼoplal ti jkʼeltik kʼuyelan li jkuxlejaltike, yuʼun ti xkaltike, jaʼ onoʼox chakʼ ta ilel ti kʼusi xuʼ jpastik li ta yabtel Jeovae. Bakʼintike, li kʼusi tspas jun ermano ta tsobobbaile toj jelel xchiʼuk li kʼusi tspas jun ermanae. Jech xtok te skʼoplal ti kʼuyelan jabilaltike xchiʼuk mi ip noʼox chkaʼitike. Li Proverbios 20:29 chal ti «stoyobbail [o yutsilal] queremetique jaʼ li stsatsalique» yan «li yichʼel ta mucʼ moletique jaʼ li saquil sjolique». Ta melel, li kerem-tsebetik ta tsobobbaile xuʼ spasik tsatsal abtelaletik ta skoj ti oy yipalike, yan li mol-meʼeletike toj ep sbalilik ta skoj ti oy spʼijilik xchiʼuk ti ep kʼusitik xchanoj ta xkuxlejalike. Ta melel, skʼan me jvules ta joltik ti kʼusitik tspas kuʼuntik ta s-organisasion Jeovae jaʼ ta skoj li slekil yoʼonton ta jtojolaltike (Hech. 14:26, Ch; Rom. 12:6-8).
8. ¿Kʼuxi chakʼ kiltik ti kʼuyelan kaviltik ta tsobobbail ta skoj li kʼusi tskʼan koʼontontike?
8 Pe oy to kʼusi yan chakʼ kiltik ti kʼuyelan li kaviltik ta tsobobbaile. Sventa xkalbetik smelolale jnopbetik skʼoplal chaʼvoʼ tsebetik ti smuk xvix sbaike. Koʼoltik li xkuxlejalike. Koʼol tijbatem yoʼontonik yuʼun stot smeʼik ti akʼo xtunik ta prekursora regular mi laj li xchanunike. Pe kʼalal lokʼik ta chanun ti vaxaklajuneb xaʼox sjabilalike, li june och ta prekursora, pe jaʼuk li june la sta yabtel ti sjunul kʼakʼal skʼan x-abteje. ¿Kʼu yuʼun ti jelel li kʼusi la snop tspasike? Jaʼ ti jelel li kʼusi tskʼanike. ¿Mi mu jechuk ti jaʼ eputik ti jaʼ ta jpastik li kʼusi tskʼan koʼontontike? Jaʼ yuʼun chaʼa, skʼan me jnoptik lek li kʼusi ta jkʼan akʼo spas kuʼuntik ta yabtel Jeovae. ¿Mi xuʼ van xkepajes kabteltik ta stojolal Jeova akʼo mi oy kʼusi skʼan jel ta jkuxlejaltik? (2 Cor. 9:7.)
9, 10. ¿Kʼusi xuʼ jpastik mi muʼyuk ta koʼontontik chkepajestik li kabteltik ta stojolal Jeovae?
9 Pe ¿mi jaʼ ta skoj ti lek noʼox chkaʼitik ti muʼyuk mas chkakʼ kipaltik ta spasel li kʼusitik ta tsobobbaile xchiʼuk ti muʼyuk noʼox kʼusi tstij koʼontontik yaʼele? Li skarta Pablo ti la stakbe echʼel li ermanoetik ta Filipose, xi chale: «Jaʼ Dios laj yacʼ ta avoʼntonic ti chacʼan chapasic cʼusitic leque, xchiʼuc jaʼ chacʼ cʼotuc ta pasel avuʼunic li cʼusi tscʼane». Ta melel, li Jeovae xuʼ stij koʼontontik spasbel mas li yabtele (Fili. 2:13; 4:13, NM).
10 ¿Mi mu jechuk ti jaʼ skʼan jkʼanbetik taje? Jaʼ jech la spas li ajvalil David ti xi la skʼan ta orasione: «Mucʼul Dios, acʼbun quil li beetic avuʼune; chanubtasun ta stamel li biqʼuit be avuʼune. Beiltasun batel ta spasel li cʼusi melelic avuʼune; chanubtasun me, yuʼun voʼot Diosot. Voʼot Jcoltavanejot cuʼun; voʼot noʼox jpatoj coʼnton o ta atojol scotol cʼacʼal» (Sal. 25:4, 5). Jaʼ me jech xuʼ jkʼanbetik ek ti akʼo stij koʼontontik ta spasbel li kʼusi lek chile. Kʼalal ta jnopbetik skʼoplal ti toj echʼ noʼox ep sbalil chil kabteltik li Jeova xchiʼuk xNichʼone, li koʼontontike toj echʼ xa noʼox me tskʼan tstoj ta vokol (Mat. 26:6-10; Luc. 21:1-4). Vaʼun ti oy ta koʼontontik stojbel ta vokol li Diose jaʼ me tstij koʼontontik skʼanbel ti akʼo xi jchʼi ta mantale. Jchanbetik li stalelal Isaiase. Kʼalal xi la sjakʼ Jeovae: «¿Bochʼo ta jtac batel? ¿Bochʼo xuʼ chbat cʼopojuc ta jventatic?», xi takʼav li Isaiase: «Liʼ oyun vuʼune, tacun batel» (Isa. 6:8).
Kʼuxi xuʼ xi jchʼi ta mantal
11. 1) ¿Kʼu yuʼun toj tsots skʼoplal ti akʼo xakʼbeik yipal li ermanoetik ta sbainel li kʼusitik skʼan pasel ta organisasione? 2) ¿Kʼusi skʼan spas li ermano sventa x-akʼbat sbain mas li kʼusitik skʼan pasel ta tsobobbaile?
11 Jaʼ noʼox li ta kabteltik chlik ta septiembre yuʼun 2007 kʼalal ta agosto yuʼun 2008, laj yichʼik voʼ 289,678 krixchanoetik ta spʼejel Balumil, taje jaʼ chakʼ ta ilel ti ep skʼan ermanoetik sventa tskʼelik li chijetike. ¿Kʼusi skʼan spasik li viniketik ta tsobobbaile? Jaʼ ti akʼo spasik li kʼusi chkʼanbatik ta Vivlia li jun yajkoltaobba mole xchiʼuk li moletike (1 Tim. 3:1-10, 12, 13; Tito 1:5-9). Sventa jech taje skʼan me tsots x-abtejik li ta chol mantale, ti akʼo lekuk spasik li matanal ch-akʼbatik ta tsobobbaile, ti akʼo lekuk chapanbil li sloʼil chakʼik ta tsobajeletike xchiʼuk ti oyuk ta yoʼontonik li yermanotakike. Mi jaʼ jech tspasike yakal me chakʼik ta ilel ti oy sbalil chil li yavilik ta tsobobbaile.
12. ¿Kʼuxi chakʼ ta ilel keremetik ti skʼanojik li mantale?
12 ¿Kʼusi skʼan spas li kerem ermanoetik, mas to li chex keremetik sventa xchʼiik ta mantal li ta tsobobbaile? Jaʼ ti xojtikinik lek li Vivliae, sventa x-epaj spʼijilik xchiʼuk xjam lek sjol yoʼontonik (Col. 1:9). Sventa jech taje, skʼan me baxbolik ta xchanel li sVivliaike, xakʼ sloʼilik, xetʼesik mantal o yantik kʼusitik li ta tsobajele. Skʼan xakʼbeik yipal xtok spasel li kʼusi skʼan sventa x-ochik li ta «tiʼna» ti jaʼ sbelel li jeltos abteletik ta stojolal Dios ta tsʼakal orae (1 Cor. 16:9). Mi jaʼ baʼyel chakʼ ta xkuxlejalik li chol mantale, xpatet noʼox me yoʼontonik xchiʼuk ep me bendision tstaik (kʼelo Eclesiastés 12:1).
13, 14. ¿Kʼuxi xuʼ xakʼik ta ilel ti ep sbalil chil yabtelik ta tsobobbail li ermanaetike?
13 Li ermanaetik eke xuʼ xakʼik ta ilel ti ep sbalil chil li smoton staojike, jaʼ ti chkʼot ta pasel ta stojolalik li kʼusi chal Salmo 68:11 ta Traducción del Nuevo Mundo: «Jaʼ chal stuk li Jeovae; li antsetik ti chalik batel li lekil aʼyeje jaʼ epal soltaroetik». Jtos ti kʼusi toj tsots skʼoplal skʼan spasik sventa xakʼik ta ilel ti ep sbalil chilik taje jaʼ ti spasik ta yajtsʼaklom Cristo li krixchanoetike (Mat. 28:19, 20). Jech ta melel, kʼalal chakʼ ta yoʼontonik li chol mantale, akʼo mi oy kʼusitik tstenik komel, ta me xakʼik ta ilel ti ep sbalil chil li yabtelik ta tsobobbaile.
14 Xi albat yuʼun Pablo li Titoe: «Li meʼeletique, albo yaʼyic ti acʼo yichʼbeic lec smelole. [...] Jaʼ tscʼan jaʼ acʼo yaqʼuic ta chanel li cʼusi leque. Yuʼun jech acʼo yacʼbeic xchan cʼu xʼelan acʼo scʼan lec smalalic li tsebetique, xchiʼuc cʼu xʼelan acʼo xcʼuxubin li yolique, ti acʼo sqʼuel sbaic leque, ti jaʼ acʼo spasic cʼusi leque, ti acʼo sqʼuel lec yut snaique, ti acʼo oyuc slequil yoʼntonique, xchiʼuc ti acʼo xchʼunbeic smantal smalalique, yuʼun jech mu xchopolcʼoptaat yuʼunic li scʼop Diose» (Tito 2:3-5). Kʼuchaʼal chkiltike, toj lek me kʼusi chkʼot ta pasel yuʼunik li ermanaetik ti lek xa chʼiemik ta mantale. Yichʼojik ta mukʼ li buchʼutik tsbeiltas tsobobbaile, lek kʼusitik chkʼot ta nopel yuʼunik ta sventa li chʼayob oʼontonale, ti kʼuyelan tslap skʼuʼ spokʼike xchiʼuk ti kʼuyelan tsmeltsan sbaike. Jaʼ jech toj lek chakʼ ta ilel stalelalik xchiʼuk chakʼik ta ilel ti ep sbalil chil li yavilik ta tsobobbaile.
15. ¿Kʼusi stakʼ spas li ermanaetik ti tojol tsebik sventa stsal yuʼunik ti stuk chaʼi sbaike?
15 Bateltike vokol van tsta yavil ta tsobobbail chaʼiik li ermanaetik ti tojol tsebike. Xi chal jun ermanae: «Oy bateltik ti jtuk tajek chkaʼi jbae». Kʼalal laj yichʼ jakʼbel kʼusi tspas sventa stsal yuʼun taje xi la stakʼe: «Ti ta jpas orasion xchiʼuk ti ta jchan jVivliae jaʼ tsvules ta jol ti oy kavil ta steklumal Diose. Ta jsaʼ aʼyejetik ti tskoltaun ta yaʼibel smelolal kʼuyelan chilun li Jeovae xchiʼuk chkakʼ persa ta jkolta li yantik ermanoetik ta tsobobbaile. Taje jaʼ tskoltaun ti mu jaʼuk mas jnop ta jtojolale». Xi albat yuʼun Jeova li David ta Salmo 32:8: «Scotol cʼacʼal te oy o jsat ta atojol [sventa cha jchabiot]». Jaʼ jech, li Jeovae oy ta yoʼonton ta jujuntal li yajtuneltake, taje te tsakal skʼoplal ek li ermanaetik ti tojol tsebike. Jaʼ tskoltautik sventa jta kaviltik li ta steklumale.
Mu me xa ten komel li avavil ta tsobobbaile
16, 17. 1) ¿Kʼu yuʼun jaʼ ti kʼusi mas lek kʼotem ta nopel kuʼuntik ti la jchʼamtik li takel ta ikʼel chakʼ Jeova sventa xi j-och li ta steklumale? 2) ¿Kʼusi skʼan jpastik sventa mu xchʼay li kaviltik ta s-organisasion Jeovae?
16 Ta skoj ti toj echʼem kʼanvanem li Jeovae la stak ta ikʼel ta jujuntal li yajtuneltake xchiʼuk laj yakʼ ti akʼo lek tajek xil sbaik xchiʼuke. Xi laj yal li Jesuse: «Muʼyuc bochʼo xuʼ yuʼun ta xtal ta jtojol me muc icʼbiluc tal yuʼun li Jtot ti la stacun tale» (Juan 6:44). Li ta smilal xa noʼox miyon krixchanoetik oy ta balumil avie, voʼotik la stakutik ta ikʼel Dios sventa xi j-och li ta steklumale. Ti kʼusi mas lek kʼotem ta nopel kuʼuntike jaʼ ti la jchʼamtik li takel ta ikʼel taje, yuʼun jaʼ ta sventa ti jtaojbetik lek sbalil li jkuxlejaltike. ¡Jaʼ jun muyubajel xchiʼuk jun koʼontontik yuʼun ti oy kuni aviltik ta tsobobbaile!
17 Xi laj yal li jtsʼibajom yuʼun salmoe: «Mucʼul Dios, jun noʼox coʼnton yuʼun li achʼulna bu nacalote». Laje xi to laj yale: «Li cacane tucʼ batem o ta tuqʼuil be; Mucʼul Dios, ta xcal alequilal ta stojol scotol li ateclumale» (Sal. 26:8, 12). Li melel Diose oy kaviltik ta jujuntal yuʼun li ta steklumale. Jtamtik-o me batel li beiltasel chakʼ s-organisasione xchiʼuk kakʼ-o me batel ta koʼontontik spasbel li yabtele; mi jech ta jpastike muʼyuk me bu chchʼay kuʼuntik li kaviltik ta tsobobbaile.
¿Mi xvul ta ajol?
• ¿Kʼu yuʼun xuʼ xkaltik ti oy yavil ta tsobobbail li jujun yajtsʼaklom Cristoe?
• ¿Kʼuxi xuʼ xkakʼtik ta ilel ti oy sbalil chkiltik li kaviltik ta s-organisasion Diose?
• ¿Kʼusi chakʼ ta ilel ti kʼuyelan li kaviltik ta tsobobbaile?
• ¿Kʼuxi xuʼ xakʼik ta ilel li kerem-tsebetik xchiʼuk mol-meʼeletik ti oy sbalil chil li yavilik ta s-organisasion Diose?
[Sjakʼobiltak sventa xchanobil]
[Lokʼol ta pajina 16]
¿Kʼusi skʼan spas li ermanoetik sventa x-akʼbat sbainik mas li kʼusitik skʼan pasel ta tsobobbaile?
[Lokʼol ta pajina 17]
¿Kʼuxi xuʼ xakʼik ta ilel ti ep sbalil chil li yabtelik ta tsobobbail li ermanaetike?