Skʼan lekuk jtalelaltik li yajtunelutik Diose
Skʼan lekuk jtalelaltik li yajtunelutik Diose
«Jaʼ chanbeic yoʼnton li Diose.» (EFE. 5:1)
1, 2. 1) ¿Kʼu yuʼun toj tsots skʼoplal li lekil talelaletike? 2) ¿Kʼusi ta jkʼelbetik skʼoplal li ta xchanobil liʼe?
XI LA stsʼiba Sue Fox ta venta li lekil talelalile: «Li lekil talelaletike toj tsots me skʼoplal chtun kuʼuntik skotol kʼakʼal. Skʼan lekuk koʼontontik skotol ora xchiʼuk ta buyuk noʼox. Yuʼun toj lek kʼusitik chkʼot ta pasel yuʼun». Li krixchanoetik ti snaʼ x-ichʼvanik ta mukʼe muʼyuk bu nopajtik noʼox chlik yuʼunik kʼop xchiʼuk yantik, xchiʼuk mi oy bu snuptanik jeche ta ora chchapaj yuʼunik. Pe kʼalal muʼyuk bu lek jtalelaltike yan-o kʼusi chkʼot ta pasel yuʼun: chlik-o kʼop, ilinel xchiʼuk chakʼ at-oʼonton.
2 Li melel yajtsʼaklomutik Cristoe jaʼ ojtikinbilutik-o ti lek jnaʼ xi j-ichʼvan ta mukʼe. Akʼo mi jech, skʼan me vikʼiluk lek jsatik sventa mu jchantik li chopol talelal ti jaʼ xa pʼolem ta jyalel li avie. Li ta xchanobil liʼe, ta jkʼelbetik skʼoplal beiltaseletik ta Vivlia ti jaʼ tskoltautik ta spʼajel li xchopol talelal balumile xchiʼuk ti jaʼ chnopaj-o tal krixchanoetik ta yichʼel ta mukʼ ta melel li Jeovae. Sventa xkaʼibetik lek smelolal kʼusi smakoj batel ti chi j-ichʼvan ta mukʼe, jkʼelbetik skʼoplal stalelal li Jeova xchiʼuk xNichʼone.
Li Jeova xchiʼuk xNichʼone: toj lek ta chanbel slekil yoʼontonik xchiʼuk ti ch-ichʼvanik ta mukʼe
3. ¿Kʼusi toj lek xuʼ jchanbetik Jeova ta sventa li slekil oʼontonale xchiʼuk li ichʼel ta mukʼe?
3 Li Jeovae toj lek ta chanbel li slekil yoʼontone xchiʼuk ti ch-ichʼvan ta mukʼe. Akʼo mi jaʼ li Mukʼul Jpas mantal ta vinajel-balumile, chichʼ ta mukʼ li krixchanoetike xchiʼuk skʼanojan. Jech kʼuchaʼal liʼe, kʼalal la skʼopon Abraham xchiʼuk Moisés li Jeovae, la stunes jpʼel hebreo kʼop ti jaʼ jun mantal ti te laj yakʼ ta ilel ti ichʼvan ta mukʼe (Gén. 13:14; Éxo. 4:6). Kʼalal oy kʼusi muʼyuk lek tspas li yajtuneltake, xi chal Vivlia ta stojolal li Jeovae: «Atalel jcʼuxubinvanejot, toj lec avoʼnton, toj cʼuncʼun chlic scʼacʼal avoʼnton; jaʼ toj mucʼ li cʼuxubinel avuʼune, xchiʼuc puru melelic li acʼope» (Sal. 86:15). ¡Mu xkoʼolaj ta jyalel kʼuchaʼal yan krixchanoetik ti mu xa snaʼ kʼusi tspasik kʼalal muʼyuk tspasbat li kʼusi tskʼanike!
4. ¿Kʼuxi xuʼ jchanbetik stalelal li Jeova kʼalal oy buchʼu chchiʼinutik ta loʼile?
4 Chakʼ ta ilel slekil yoʼonton xtok Jeova ta sventa ti kʼuyelan chchikinta li kʼusi chal krixchanoetike. Kʼalal oy kʼusitik la sjakʼ Abraham ta sventa li krixchanoetik ta Sodomae, oy smalael yuʼun ti kʼuyelan la stakʼ batele (Gén. 18:23-32). Muʼyuk bu la snop Dios ti jaʼ noʼox chʼay kʼakʼal xal ti la stsak ta mukʼ li kʼusitik tsvul-o yoʼonton Abrahame. Yuʼun chchikinta li kʼusitik chal ta s-orasion yajtuneltake xchiʼuk kʼalal tskʼanik vokol kʼalal tsutes yoʼontonike (kʼelo Salmo 51:11, 17). ¿Mi mu jechuk ti skʼan jchanbetik stalelale, ti skʼan lek jchikintatik li kʼusi chalik li buchʼutik chchiʼinutik ta loʼile?
5. ¿Kʼuxi mas lek chkil-o jbatik xchiʼuk yantik mi ta jchanbetik slekil yoʼonton Jesuse?
5 Li slekil oʼontonale jaʼ jtos stalelal Jeova ti la xchan li Jesucristoe. Akʼo mi toj ep skʼan xchʼakbe skʼakʼalil li yabtel ta stojolal Diose xchiʼuk ti xakʼ yipal li Jesuse, oy onoʼox smalael yuʼun xchiʼuk ichʼvan ta mukʼ. Ta skotol onoʼox ora oy ta yoʼonton ta skoltael li buchʼutik chil svokolike, li buchʼutik ip ta kʼaʼemal chamele, li maʼsatetike xchiʼuk li jkʼan limuxnae. Stekel ora koltavan, akʼo mi maʼuk-o yorail yilel. Ta jutuk mu skotoluk veltae chtuchʼ ta be li kʼusi yakal tspas sventa tskolta li buchʼutik chil svokolike. Toj lek la stsak ta mukʼ xtok li buchʼutik laj yakʼ xchʼunel yoʼontonik ta stojolale (Mar. 5:30-34; Luc. 18:35-41). Mi ta jchanbetik li slekil yoʼontone xchiʼuk ti toj lek baxbolutik xi jtun ta stojolal yantike, ta me xil li kutsʼ kaltike, li jlakʼnataktike xchiʼuk li yan krixchanoetike. Jech xtok, ta me xkichʼtik ta mukʼ ta jtalelaltik li Jeovae xchiʼuk mas me xi jmuyubaj.
6. ¿Kʼu yelan stalelal li Jesús ti skʼan jchanbetik ta sventa li slekil xchiʼuk xkʼuxul yoʼontone?
6 Li jnitvanejetik ta relijion yuʼun judioetike xi laj yalbeik skʼoplal li krixchanoetik ti mu xojtikinik Mantale: «¡Chapal xa scʼoplal chbat stoj smulic!», jaʼ yuʼun muʼyuk bu laj yichʼik ta mukʼ (Juan 7:49). Pe li Jesuse mu jechuk la spas; laj yichʼ ta mukʼ li krixchanoetike, taj une laj yakʼ ta ilel kʼalal ta sbi la skʼopon li krixchanoetike, jech kʼuchaʼal la spas ta stojolal Marta, María, Zaqueo xchiʼuk yantik (Luc. 10:41, 42; 19:5). Jech onoʼox ta melel ti jaʼ chkiltik-o kʼuyelan ta jtsaktik ta mukʼ yantik ti kʼuyelan xkuxlejalike, pe li yajtunelutik Jeovae skʼan me xkakʼbetik yipal ti ta slekiluk koʼontontik xi jtsakvan ta mukʼe. a Muʼyuk bu ti jaʼ xa mu xi jtsakvan-o ta mukʼ ti kʼuyelan xkuxlejal li kermanotaktike xchiʼuk ti mu xa xkichʼtik ta mukʼ li yan krixchanoetik ti staik-o ichʼel ta mukʼe (kʼelo Santiago 2:1-4).
7. ¿Kʼuxi tskoltautik li beiltaseletik ta Vivlia sventa xi j-ichʼvan ta mukʼ ti mu ventauk bu nakalutike?
7 Li Dios xchiʼuk xNichʼone ta slekil yoʼonton chichʼik ta mukʼ li krixchanoetik ti jelel slumalik xchiʼuk stsʼunbalike. Taje jaʼ jech ichʼbilik ta mukʼ chkʼotik xchiʼuk jaʼ chnopajik-o tal li buchʼutik chaʼiik takitiʼil ta mantale. Ta melel, li lekil talelale mu me parejouk ta skotol lumetik. Jaʼ yuʼun, muʼyuk me slistail ti kʼuyelan persa skʼan jpas jtalelaltike, moʼoj, yuʼun ti kʼusie chkakʼ akʼo skoltautik li beiltaseletik ta Vivliae, ti jaʼ kʼun noʼox jtalelaltik yuʼune xchiʼuk ti chkichʼtik-o ta mukʼ yuʼun li yantike, buuk ti jlumaltike. Li avi une, ta jkʼeltik kʼuxi xuʼ mas lek spas kuʼuntik li kabteltik ta stojolal Dios kʼalal chi j-ichʼvan ta mukʼe.
Skʼan xi jkʼopoj xchiʼuk xi jchiʼinvan ta loʼil
8, 9. 1) ¿Kʼusitik nopem xkaʼitik spasel ti chakʼ ta ilel ti muʼyuk lek jtalelaltike? 2) ¿Kʼuxi chtun kuʼuntik li kʼusi chal Mateo 5:47 ta sventa ti kʼuyelan jtalelaltik ta stojolal li yantike?
8 Li krixchanoetik ta epal lumetik ti sujomik noʼox bu chbatik li avie, mu labaluk ti muʼyuk xa bu «echʼan me» xut sbaik, o ti «te xa bat» xiik kʼalal tsnup sbaik ta bee. Veno, pe taje maʼuk me skʼan xal ti skʼan jkʼopontik skotol li krixchanoetik ti ep te chanavik ta jun kayee. Akʼo mi jech, oy ep ti butik lek ti xi jkʼopoje xchiʼuk ti skʼan jech jpastike. ¿Mi nopem xavaʼi cha kʼopoj? ¿O mi tukʼ noʼox cha xanav batel ti muʼyuk cha tseʼin jutebuk xchiʼuk ti mu kʼusi chavale? Akʼo mi mu jechuk oy ta yoʼonton li jun krixchanoe, xuʼ me xnop xaʼi spasel li kʼusi muʼyuk lek taje, ti jaʼ svinajeb ti muʼyuk lek stalelale.
9 Xi la sjakʼ li Jesuse: «Me jaʼ noʼox chacʼopanic li bochʼotic xavotquin aba achiʼuquique, ¿cʼusi lec chapasic li voʼoxuque? Yuʼun jaʼ jech tspasic ec li yanlum cristianoetique» (Mat. 5:47). Ta sventa ti tsots skʼoplal skʼan xi jkʼopoje, li jchanubtasvanej Donald Weiss xi chale: «Muʼyuk buchʼu lek chaʼi ti mu xkʼopone xchiʼuk ti mu xa bu ilbile. Ta melel mu kʼusi stakʼ jpak-o jkʼoplaltik ta stojolal li buchʼu muʼyuk la jtsaktik ta mukʼe. Li xpoxile jaʼ liʼe: kʼopono li yantike xchiʼuk chiʼino ta loʼil». Ta melel: mi ta jkʼel jbatik lek ti kʼuyelan ta jchiʼintik ta loʼil li yantike xchiʼuk ti oy ta koʼontontike, lek me kʼusi chkʼot ta pasel kuʼuntik.
10. ¿Kʼuxi ti mas lek chkʼot-o ta pasel kuʼuntik li chol mantal kʼalal lek jtalelaltike? (Kʼelo li rekuadro «Stseʼetuk noʼox asat xlik kʼopojan».)
10 Jkʼelbetik skʼoplal li Tom xchiʼuk Carol, jun nupultsʼakal yajtsʼaklom Cristo ti te nakalik ta jun mukʼta lum ta Norteamérica. Li kʼusi tspasik li nupultsʼakal taje, jaʼ ti chakʼik persa ti lekuk xchiʼin sbaik ta loʼil xchiʼuk li slakʼnatakike sventa lekuk xkʼot ta pasel yuʼunik li yabtelik ta chol mantale. Li Tome xi laj yalbe skʼoplal li Santiago 3:18: «Ta jpaskutik persa ti lekuk xkil jbakutik xchiʼuk li krixchanoetike. Chi nopajkutik ta stojolal li buchʼutik ta pana oyike xchiʼuk chbat jkʼoponkutik li buchʼutik te ch-abtejike. Stseʼet noʼox jsat chbat jkʼoponkutik xchiʼuk jaʼ ta jloʼiltakutik li kʼusi oy ta yoʼontonike: ta sventa yalab xnichʼnabik, stsʼiʼik, snaik, yabtelik xchiʼuk yantik. Ta sjalile yamigounkutik xa chilik». Li Carol eke xi chale: «Chkalbe kʼusi jbikutik ta yan kʼakʼal vaʼun ta jakʼbekutik li sbiike. Ta xkalbekutik li kʼusi ta jpaskutik tee, pe mu toj jaluk ta jchiʼinkutik ta loʼil un. Ta mas tsʼakale, xuʼ xkalbekutik skʼoplal mas ta sventa li lekil aʼyeje». Jaʼ jech ep krixchanoetik lik spat yoʼontonik ta stojolal li Tom xchiʼuk Carole. Ep ti buchʼutik xchʼamojik xa vunetik ti chalbe skʼoplal Vivliae, yantike yakʼojik ta ilel ti oy ta yoʼontonik ta melel li mantale.
Kʼalal mu kʼunuk chkaʼitik chi j-ichʼvan ta mukʼe
11, 12. ¿Kʼu yuʼun mu labaluk chkiltik ti tsots stalelal chakʼ sbaik ta jtojolaltik li krixchanoetik kʼalal ta jcholtik mantale, xchiʼuk kʼusi skʼan jpastik kʼalal jeche?
11 Ep krixchanoetik ti tsots stalelal chakʼ sbaik bateltik kʼalal ta jcholbetik mantale. Pe mu labaluk chkiltik taje, yuʼun xi onoʼox la spʼijubtas yajtsʼaklomtak li Jesuse: «Me laj yutsʼintaicun ec li vuʼune, jaʼ noʼox jech chayutsʼintaoxuc ec» (Juan 15:20). Pe kʼalal tsots xa ta jtakʼbetik ek ta skoj li kʼusi chopol chalike yikʼaluk me jaʼ stsatsaj-o mas li kʼope. ¿Kʼusi stakʼ jpastik un chaʼa? Xi laj yal li jtakbol Pedroe: «Ichʼic noʼox ta mucʼ Cajvaltic Cristo ta avoʼntonic. Chapalucoxuc me scotol cʼacʼal cʼusi chatacʼbeic me oy bochʼo chasjacʼboxuc ta sventa li cʼusi apatoj avoʼnton chamalaique. Pero ta smucʼuluc avoʼnton xavalic; ichʼvananic me ta mucʼ» (1 Ped. 3:15, 16). Jech ta melel, kʼalal ta slekil koʼontontik ta jtakʼtik, manxoutik xchiʼuk ti chi jtsakvan ta mukʼe xuʼ me jaʼ skʼunibtasbe stalelal li buchʼu chopol kʼusi tspasbutike (Tito 2:7, 8).
12 ¿Mi xuʼ kak jchapan jbatik sventa jechuk jpastik kʼuchaʼal tskʼan Dios kʼalal oy kʼusi chopol chi j-albate? Stakʼ kʼuxi un. Xi chalbutik li Pabloe: «Li cʼusi chavalique oyuc me lec smuil, oyuc me lec xchiʼil. Nopo lec cʼusi chavalbeic li bochʼotic chataic ta cʼopanele» (Col. 4:6). Mi ta jnopes jbatik sventa xkichʼ ta mukʼ li kutsʼ kalaltike, li jchiʼiltaktik ta abtel xchiʼuk ta chanune, li kermanotaktik xchiʼuk li jlakʼnataktike, jaʼ me jech lek chapalutik sventa xkuch kuʼuntik li labanel xchiʼuk utel jech kʼuchaʼal skʼan spas jun yajtsʼaklom Cristoe (kʼelo Romanos 12:17-21).
13. ¿Kʼusi kʼot ta pasel ti chakʼ ta ilel ti xuʼ xkʼunib stalelal li buchʼu mu skʼan mantal kʼalal chi j-ichʼvan ta mukʼe?
13 Jkʼeltik batel kʼusi kʼot ta pasel ti jaʼ te chakʼ ta ilel ti oy kʼusi lek chkʼot ta pasel kʼalal lek jtalelaltik akʼo mi tsots li kʼusi ta jnuptantike. Li ta Japone oy jun vinik xchiʼuk jun slakʼna ti bat vulaʼanatuke, la slabanik li ermano ti kʼot stij tiʼnae. Muʼyuk x-ilin-o li ermanoe, ichʼvan ta mukʼ kʼalal kʼopoj komele, vaʼun ibat. Te chchol-o mantal, pe laj yakʼ venta ta nom ti chkʼelat echʼel yuʼun li jvulaʼale. Jaʼ yuʼun ti kʼalal nopaj echʼel li ermanoe xi laj yal li vinike: «Ta jkʼan akʼo xa pasbun perton. Akʼo mi chopol kʼusi la jpasbotkutik, laj kakʼ venta ti xa tseʼet noʼoxe. ¿Kʼusi stakʼ jpas sventa jechukun eke?». Li vinik taje chʼabal xa spatobil yoʼonton chaʼi sba, yuʼun chʼabal xa yabtel xchiʼuk jaʼtik to laj smeʼ. Li ermanoe laj yalbe ti chchanubtas ta Vivliae, vaʼun la xchʼam. Mu ta sjaliluk une chib xa velta chchanik Vivlia ta xemana.
Ti bu mas lek xuʼ jchantik li lekil talelalile
14, 15. ¿Kʼuxi chchanubtas yalab xnichʼnabik li yajtuneltak Dios ta skʼakʼalil Vivliae?
14 Li yajtuneltak Dios ta skʼakʼalil Vivliae tskʼelik lek li yalab xnichʼnabik ti akʼo xchanik mantaletik sventa x-ichʼvanik ta mukʼ li ta snaike. Akʼo avil venta ti ta slekil yoʼontonik xchiʼuk ti skʼanoj sbaik li Abraham xchiʼuk Isaac kʼalal la xchiʼin sbaik ta loʼil ti te ta jtatik ta Génesis 22:7. Te vinaj ta stojolal José ek ti lek chanubtasbil yuʼun stot smeʼe, yuʼun kʼalal jaʼo tikʼil ta chukele laj yichʼ ta mukʼ kʼalal ta yantik jchukeletik (Gén. 40:14, Ch). Ti kʼalal la xchiʼin ta loʼil li faraón xtoke jaʼ te laj yakʼ ta ilel ti xchanoj lek kʼuyelan stalelal skʼan spas ta stojolal li krixchanoetik ti tsots yabtelike (Gén. 41:16, 33, 34).
15 Jun li ta Lajuneb Mantal laj yakʼbe j-israeletik li Jeovae jaʼ liʼe: «Ichʼo ta mucʼ atot ameʼ, yuʼun jech jal chacuxi te ta banamil ti bu chacacʼboxuc vuʼun li Mucʼul Diosun avuʼunique» (Éxo. 20:12). Jtos ti kʼuyelan xuʼ xichʼ ta mukʼ stot smeʼike jaʼ ti skʼan stsakik ta ventae. Jech kʼuchaʼal liʼe, li stseb Jeftee laj yakʼ ta ilel ti la stsak lek ta venta stot kʼalal la spas li kʼusi laj yal stote, akʼo mi toj ep laj yil svokol ta skoj (Jue. 11:35-40).
16-18. 1) ¿Kʼuxi xuʼ xchanubtasik ta lekil talelal yalab xnichʼnabik li totil-meʼiletike? 2) Albo jlomuk sbalil kʼalal chichʼ akʼbel xchan lekil talelaletik li alab-nichʼnabiletike.
16 Tsots skʼoplal ti akʼo xichʼik chanubtasel ta sventa lekil talelalil li alab-nichʼnabiletike. Sventa snaʼik xchiʼinel ta loʼil krixchanoetik kʼalal mi pasik ta mukʼta krixchanoe, skʼan xchanik kʼuxi skʼan stakʼik li telefonoe, kʼalal chchiʼinik ta loʼil li jvulaʼaletike xchiʼuk ti kʼuyelan skʼan spas stalelalik kʼalal chveʼike. Skʼan jkoltatik sventa xaʼibeik smelolal kʼu yuʼun skʼan sjamik o xikik tiʼna kʼalal chjelav jun krixchanoe, ti lek yoʼontonik ta stojolal li mol-meʼeletike o li buchʼutik ipike xchiʼuk ti skʼan skoltaik li buchʼutik olik kʼusitik yichʼoj batele. Skʼan xaʼibeik smelolal kʼu yuʼun tsots skʼoplal ti ta slekiluk yoʼonton xi xalike: «Avokoluk», «Mi xa abolaj», «Kolaval», «Mu kʼusi», «¿Mi xuʼ xa koltaun?» xchiʼuk «Paso perton».
17 Mu vokoluk ti kʼalal ta jchanubtastik ta sventa lekil talelal li alab-nichʼnabiletike. Ti kʼusi lek xuʼ jpastike jaʼ ti jechuk jtalelaltike. Li Kurt ti 25 jabil yichʼoje, xi chal kaʼitik kʼuxi la xchanik ti lekuk stalelalik xchiʼuk li oxvoʼ xchiʼiltak ta vokʼele: «Chkilkutik ti lek tajek tskʼopon sbaik li jtot xchiʼuk jmeʼkutike, oy smalael yuʼunik xchiʼuk tstsakik ta venta li yan krixchanoetike. Kʼalal skʼan toʼox xlik li tsobajele xchiʼuk kʼalal mi tsuts xaʼoxe chbat xchiʼin ta loʼil mol-meʼeltik li jtote xchiʼuk chikʼun batel ek. Chkakʼ venta ti kʼuyelan chchiʼin ta loʼile xchiʼuk ti chichʼ tajek ta mukʼe». Xi to chal li Kurte: «Ta sjalile la jchan ek li lekil talelalil taje. Nop kaʼi ti chkichʼ ta mukʼ li krixchanoetike. Maʼuk ta jpas ti yuʼun jech skʼan jpase, moʼoj, yuʼun jaʼ jech oy ta koʼonton».
18 ¿Kʼusi chkʼot ta pasel mi chichʼik chanubtasel ta sventa lekil talelal li alab-nichʼnabiletike? Ti kʼusi jpʼel skʼoplale jaʼ ti xuʼ sta lek yamigoike xchiʼuk ti muʼyuk kʼop yuʼunik xchiʼuk yantike. Maʼuk noʼox taje, yuʼun jaʼ sventa lek chanemik ta sventa li kʼusi tsnuptanik ta tsʼakale, snaʼik me kʼuxi chchiʼinik ta loʼil li yajval abtelaletike xchiʼuk li xchiʼiltakik ta abtele. Jaʼ yuʼun chaʼa, li alab-nichʼnabiletik ti ch-ichʼvanik ta mukʼ xchiʼuk ti lek yoʼontonike xmuyubaj noʼox me yoʼonton yuʼun li stot smeʼike (kʼelo Proverbios 23:24, 25).
Jaʼ jelelutik-o ta stojolal balumil li jlekil talelaltike
19, 20. ¿Kʼu yuʼun skʼan oyuk ta koʼontontik xchanbel stalelal li jkʼanvanej Dios kuʼuntike xchiʼuk li xNichʼone?
19 Xi la stsʼiba li Pabloe: «Jaʼ chanbeic yoʼnton li Diose, yuʼun xnichʼnaboxuc xa, lec scʼanojoxuc» (Efe. 5:1). Mi ta jkʼan ta jchanbetik stalelal li Jeova xchiʼuk xNichʼone, skʼan me xkakʼ ta jkuxlejaltik li beiltaseletik ta Vivliae, jech kʼuchaʼal liʼ albil tal skʼoplal jlom ta xchanobile. Jaʼ jech mu me nakauk noʼox ta jpakʼta jbatik ti lek xa koʼontontik yilel ta skoj noʼox ti oy kʼusi ta jkʼantike, jech kʼuchaʼal ti ta jkʼan lek xilutik li buchʼutik mukʼ skʼoplalike o ti oy kʼusitik ta jkʼantik xi j-akʼbate (Jud. 16).
20 Li ta slajebal kʼakʼal ti toj chopol chventainvan li Satanase, jpʼel ta yoʼonton tslajes li lekil talelaletik yakʼoj Jeovae, jech kʼuchaʼal li yichʼel ta mukʼ yantike. Pe muʼyuk me chjuʼ yuʼun ta slajesbel li slekil talelal melel yajtsʼaklomtak Cristoe. Jaʼ yuʼun chaʼa, jpʼeluk me ta koʼontontik jchanbetik li slekil yoʼonton yakʼoj ta ilel Dios xchiʼuk xNichʼone. Mi jech ta jpastike, ti kʼuyelan chi jkʼopoj xchiʼuk ti kʼuyelan ta jpas jbatike jaʼ me jelelutik-o ta stojolal li buchʼutik tsots stalelalike. Jech xtok, ta me skʼupil kʼoptabe sbi Jeova li jtalelaltike xchiʼuk jaʼ me chnopaj-o tal krixchanoetik ti lek yoʼontonik sventa xichʼik ta mukʼ li Jeovae.
[Tsʼibetik ta yok vun]
a Ta jlom lumetike maʼuk jech smelol ti kʼalal ta sbi xa tskʼopon jun krixchano mi jaʼ itsʼinal to o mukil to ti buchʼu chkʼopoje, jaʼ to mi albat ti akʼo jech spase. Li yajtsʼaklomtak Cristoe toj lek me ti stsakik ta mukʼ mi yuʼun jech nopem xaʼiik li krixchanoetik taje.
¿Mi xvul ta ajol?
• ¿Kʼusi toj lek xuʼ jchanbetik Jeova xchiʼuk xNichʼon ta sventa li slekil oʼontonale xchiʼuk li ichʼel ta mukʼe?
• ¿Kʼu yuʼun jaʼ lek-o skʼoplal jun yajtsʼaklom Cristo ti lek noʼox yoʼonton tskʼopon li krixchanoetike?
• ¿Kʼuxi tskoltautik ta spasel lek kabteltik ta stojolal Dios kʼalal chi j-ichʼvan ta mukʼe?
• ¿Kʼuxi xuʼ xakʼbeik xchan lekil talelaletik yalab xnichʼnabik li totil-meʼiletike?
[Sjakʼobiltak sventa xchanobil]
[Lokʼol ta pajina 27]
Stseʼetuk noʼox asat xlik kʼopojan
Ep krixchanoetike muʼyuk lek tstakʼbeik li buchʼutik mu xojtikinike. Ta skoj ti skʼanojik Dios xchiʼuk xchiʼiltakik li yajrextikotak Jeovae, chakʼik persa ti snaʼikuk slikesel sloʼilik xchiʼuk li krixchanoetike, yuʼun tskʼan chalbeik li kʼusitik chal Vivliae. ¿Kʼusi cha skoltaot sventa spas avuʼun taje?
Li beiltasel te ta jtatik ta Filipenses 2:4 toj echʼ xa noʼox tsots skʼoplal, yuʼun tstij koʼontontik ta xchʼunel li mantal liʼe: «Mu me jaʼuc noʼox xbat asat ta aventa atuquic, acʼo oyuc ta avoʼntonic noxtoc li yantique». Jtsaktik ta mukʼ li buchʼu ta jchiʼintik ta loʼile: ta skoj ti mu xi jyojtikinutike, jaʼ van yuʼun mu toj lekuk ta xaʼi sba. ¿Kʼusi xuʼ jpastik sventa jpatbetik yoʼontone? Ti stseʼet noʼox jsatik xlik jkʼopontike toj lek me, pe mu me jaʼuk noʼox skʼan jpastik taje.
Kʼalal chlik jchiʼintik ta loʼil junuk krixchanoe yikʼaluk van ta jtuchʼbetik ta be li kʼusi tsnope. Mi muʼyuk ta koʼontontik li kʼusi oy ta yoʼontone xchiʼuk ti ta jkʼantik ti jaʼ akʼo yalbe skʼoplal li kʼusi ta jkʼantike, xuʼ van muʼyuk lek chaʼi. Jaʼ yuʼun chaʼa, mi la avakʼ venta jutuk ti kʼusi yakal tsnope, ¿kʼu yuʼun mu jaʼuk xa tunes sventa xlik loʼilajan xchiʼuk? Taje jaʼ jech la spas Jesús kʼalal te la sta jun ants ta poso te ta Samariae (Juan 4:7-26). Li ants taje bat slup tal yaʼal, jaʼ yuʼun jaʼ lik sloʼilta Jesús taje; vaʼun toj lek lik loʼilajikuk ta sventa mantaletik.
[Lokʼol ta pajina 26]
Mi lek jnaʼ jkʼopontik li krixchanoetike yikʼaluk van jaʼ lek xuʼ jcholbetik-o mantal
[Lokʼol ta pajina 28]
Skʼan onoʼox me lek jtalelaltik xkakʼtik ta ilel