¿Mi xuʼ xa «bat» ta Macedonia?

JAʼO te oy ta tiʼnab ta lum Troas (Asia Menor) li jtakbol Pablo kʼalal laj yil ta xvayich ti xi chkʼanbat vokol yuʼun jun vinik ta Macedoniae: «Batic ta Macedonia banamil, bat coltauncutic». Jaʼ yuʼun li Pablo xchiʼuk xchiʼiltake, «la [snaʼik] ti jech la scʼan Dios te chbat [xcholik] li Lequil Aʼyej ta sventa Cajvalti[k]» ta stojolal li jnaklejetik ta yosilal Roma taje. ¿Kʼusi kʼot ta pasel yuʼunik? Ep krixchanoetik kʼot ta yoʼontonik li mantale, jech kʼuchaʼal Lidia xchiʼuk yutsʼ yalal ti te nakalik ta Filipose, jun lum ti toj lek ojtikinbile (Hech. 16:9-15).

Jaʼ jech ta sjunul yoʼonton chcholik mantal avi ek li yajrextikotak Jeovae. Batemik ta xcholel mantal ti bu chtun tajek jcholmantaletike xchiʼuk te tslokʼes stukik ti kʼuyepal chlaj stakʼinike. Jaʼ jech la spas Lisa ti likem ta Canadae bat tunuk ta Kenia, yuʼun tskʼan chchol mas li mantale. Jaʼ jech la spasik ek li Trevor xchiʼuk Emily, laj yikta li snaik ta Canadae bat tunikuk ta Malaui sventa xcholik mas mantal. Li Paul xchiʼuk Maggie ta Inglaterra eke lek xa yaʼi ti la spasik juvilar sventa xtunik mas ta stojolal Jeovae, jaʼ yuʼun batik ta África oriental. ¿Mi jech oy ta avoʼonton cha pas ek? ¿Mi xuʼ xa bat ta yan balumil? Jkʼeltik avil jlomuk beiltaseletik ta Vivlia xchiʼuk jlomuk kʼusitik xuʼ xa pas sventa lek xkʼot ta pasel ti bu chbat tunane.

Jkʼel jbatik kʼukelantik ta melel

Ti kʼusi baʼyel skʼan xa kʼele jaʼ ti kʼusi oy ta avoʼontone. Li Jesuse laj yal ti jaʼ mas tsots skʼoplal li mantal liʼe: «Cʼano me ta scotol avoʼnton li Dios avuʼune, xchiʼuc ta scotol achʼulel, xchiʼuc ta scotol ajol». Jaʼ yuʼun chaʼa, ti chbat tunkutik ta yan balumile jaʼ ta skoj ti jkʼanojtik li Jeovae xchiʼuk ti ta jkʼan ta jpastik li abtel ta spasel  ta yajtsʼaklom Cristo li krixchanoetike. Xi laj yal xtok li Jesuse: «Li xchibale jaʼ coʼol tsots scʼoplal xchiʼuc li sba mantale. Jech chal: “Cʼano me achiʼil jech chac cʼu chaʼal cʼux ta avoʼnton abecʼtal atuc”». Oy me ta koʼontontik ta jkolta li jchiʼiltaktik mi jkʼanojtike (Mat. 22:36-39; 28:19, 20). Ta melel, jaʼ me skʼan stij koʼontontik li kʼanelale. Maʼuk me jecheʼ xanbal ti chbat tunkutik ta yan balumile: skʼan xkakʼbetik yipal xchiʼuk ti xkil jvokoltike. Li Remco xchiʼuk Suzanne ti likemik ta Países Bajos ti batik ta Namibiae, xi chalbeik skʼoplale: «Jaʼ liʼ oyunkutik-o ta skoj ti kʼanvanemunkutike».

Xi chal Willie ti jaʼ jun jkʼelvanej ta sirkuito ta Namibiae: «Li ermanoetik ti mas xa jal pajik liʼe, muʼyuk bu la snopik ti skʼan xichʼik koltaele, moʼoj, jaʼ oy ta yoʼonton chkoltavanik ta chol mantal xchiʼuk ti xtunik ta stojolal yantike».

Xi xa jakʼbe aba kʼalal mi laj xaʼox akʼel lek ti kʼusi oy ta avoʼontone: «¿Kʼusitik kiloj ta jkuxlejal ti xuʼ xtun kuʼune? ¿Mi lek xi tojob ta chanubtasvanej ta sventa li lekil aʼyeje? ¿Mi jnaʼ xi kʼopoj ta yan kʼop? ¿Mi oy ta koʼonton ta xchanel yan kʼop?». Mi jech kʼot ta nopel avuʼune, loʼilajan lek xchiʼuk li avutsʼ avalale. Jakʼbo li moletik ta tsobobbaile. Pe ti kʼusi mas skʼane jaʼ ti xa kʼopon li Jeovae. Ti vaʼ yelan cha kʼel lek kʼu avelan ta melele jaʼ me cha skoltaot ta skʼelel mi xuʼ avuʼun xchiʼuk mi oy ta avoʼonton ta melel ti cha tun ta yan balumile (kʼelo li rekuadro «¿Mi xavojtikin aba lek?»).

Bu van xuʼ xa bat

Kʼalal laj yichʼ yabtel li Pablo sventa akʼo xbat koltavanuk ta Macedoniae ta xvayich laj yil, pe li Jeovae muʼyuk me jech tsbeiltasutik avi  kʼuchaʼal taje. Pe xuʼ me jnaʼtik kʼusi balumilal skʼanik koltael jech kʼuchaʼal chkiltik ta revista liʼe xchiʼuk li ta yan vunetike. Pasbo junuk slistail li lumetik taje. Mi mu xuʼ avuʼun xa chan yan kʼop yilel li avie xchiʼuk ti muʼyuk to bu anopoj cha bat-o ta yan balumile, jaʼ mas xa kʼelbe skʼoplal li balumiletik ti jaʼ jech chkʼopojik kʼuchaʼal cha kʼopoje. Mi laj une jakʼbo mas skʼoplal li balumil ti bu cha kʼan cha bat avaʼie. Kʼelbo skʼoplal mi skʼan visa sventa xuʼ xa och li ta lum taje, mi sik o mi kʼixin, kʼusi chi jxanav-o, mi xibal sba o mi lek noʼox sba, kʼuxi stojol li kʼusitik tee xchiʼuk yan kʼusitik. Jakʼbo yaʼyej li buchʼutik tunemik xa ta yan balumile. Mu me xchʼay ta ajol xa kʼopon li Jeovae. Yikʼaluk van xa jalij jutuk ta skʼelel ti bu xuʼ cha tune. Vuleso me ta ajol ti kʼalal mu toʼox chbatik ta Macedonia li Pablo xchiʼuk xchiʼiltake «ipajesatic yuʼun Chʼul Espíritu ti mu to me xbat xcholic scʼop Dios ta Asia banamile», xchiʼuk ti kʼalal ch-och xaʼox yaʼiik ta Bitiniae «ipajesatic yuʼun li Chʼul Espiritue» (Hech. 16:6-10).

Yikʼaluk van tal xa ta ajol bu jotukal xuʼ xa bat. Li kʼusi skʼan xa pas avi une jaʼ ti xa tak echʼel akarta li ta Beteletik ti smakoj li lumetik taje. Alo sloʼil akuxlejal ta mantal, jakʼo me skotol ti kʼusi cha kʼan cha naʼe, jakʼo kʼuxi stojol li kʼusitike, li anailale, kʼuyelan li poxtaele xchiʼuk mi oy ta tael abtel. Akʼbo akartatak li Komite sventa Abtelal ta tsobobbaile. Vaʼun li moletike ta me xakʼik echʼel yan karta ti chalbe skʼoplal alekil talelale, mi laje tstakik echʼel li ta Beteletik ti jaʼ smakoj li lumetik bu cha kʼan cha bate. Ta sventa ti kʼusi cha yalbeik tal une, jaʼ te chavil bu mas lek chavaʼi.

Xi chal li Willie ti laj xa kalbetik skʼoplale: «Li ermanoetik ti lek kʼusi kʼotem ta pasel yuʼunik liʼe jaʼ li buchʼutik baʼyel ay skʼelik kʼuyelan li lume, sventa snopik lek bu jotukal ti xmuyubajik noʼoxe. Jun nupultsʼakale laj yakʼ venta ti toj vokol chaʼiik li kuxlejal ta jun lum ti stuk bu chʼikile, jaʼ yuʼun bat tunikuk ta jun jteklum ti bu chtun jcholmantale xchiʼuk ti xnop laj yilik ti kʼuyelan li kuxlejal tee».

Li vokoliletik chichʼ nuptanele

Toj ep me vokolil ta jnuptantik kʼalal chkikta li jnatik sventa chbat tunkutik ta yan balumile. Xi chal Lisa ti laj xa kalbetik skʼoplale: «Toj vokol ta tsʼikel ti jtuk chkaʼi jbae». ¿Kʼuxi tsal yuʼun? Ta xamigoin li ermanoetik xchiʼuk ermanaetik ta tsobobbaile. Laj yakʼ ta yoʼonton ta xchanbel sbi skotol li ermanoetike, jaʼ yuʼun chchiʼinan ta loʼil kʼalal skʼan toʼox xlik li tsobajele xchiʼuk kʼalal lajem xaʼoxe. Chbat xchiʼinan ta chol mantal xchiʼuk chikʼ batel ta vulaʼal ta sna xtok. Jaʼ jech ep staoj yamigotak. Xi chal kaʼitike: «Muʼyuk bu chopol chkaʼi ti jech jpasoj tale. Ta melel, ep bendision yakʼojbun li Jeovae».

Kʼalal chʼi xaʼox yalab xnichʼnabik li Paul xchiʼuk Maggie, bat tunikuk ta yan lum, jaʼ yuʼun laj yikta li snaik ti oy xaʼox ta 30 jabil te nakalike. Xi chal li Paule: «Labal to laj kilkutik  ti muʼyuk vokol laj kaʼikutik ta yiktael li kʼusitik oy kuʼunkutike. Pe li kʼusi toj tsotse jaʼ ti kʼalal laj kikta li kutsʼ kalalkutike, kalojkutike mu toj tsotsuk ta iktael. Kʼalal tikʼilunkutik xaʼox ta avione li okʼkutik ta jyalel. Li kʼusi mas kʼun ta pasel jechuke jaʼ ti xiuk laj kalbe jbakutike: “Mu xuʼ kuʼuntik. Tsots ta pasel”. Pe la jpat koʼontonkutik ta stojolal Jeova. Jech xtok, la jta ep kamigotakkutik, jaʼ la stij mas koʼontonkutik ti akʼo mu xkikta jbakutike».

Li Greg xchiʼuk Crystal ti likemik ta Canadae batik ta Namibia, yuʼun ta inglés chkʼopojik te. Pe laj yakʼik venta ta tsʼakal ti skʼan xchanik junuk batsʼi kʼop tee. Xi chalike: «Oy bateltik ti chi chibajkutike. Pe laj kakʼkutik lek venta ti jaʼ to xuʼ xkaʼibekutik smelolal kʼuyelan stalel xkuxlejalik mi ta jchanbekutik li skʼopike. Jaʼ la skoltaunkutik xtok sventa xi nopkutik ti laj kamigoinkutik li ermanoetike».

Yiloj me ermanoetik kʼalal bikʼit chkakʼ jbatike xchiʼuk kʼalal xi jmuyubaj noʼox ti bu chi jkʼote. Li Jenny ta Irlandae xmuyubaj noʼox tsvules ta sjol li utsʼ-alaliletik ti te kʼotik ta chol mantal ta slumale. Xi chale: «Tal koltavanikuk ta melel, maʼuk ti tal saʼik koltaele. Toj lek xchʼamvanik. Toj labal to laj kil ti kʼuyelan baxbolik xchiʼuk ti xmuyubajik noʼoxe, jaʼ yuʼun jech la jpas ek ti kʼuyelan tspasike». Li Jenny xchiʼuk smalale misioneroetik xa ta Gambia li avie.

«Li bendición yuʼun [Jeovae] jaʼ jcʼulejaltic»

Xkoʼolaj kʼuchaʼal kʼulejal laj yil Pablo kʼalal bat tunuk ta Macedoniae. Xi laj yalbe echʼel yajtsʼaklomtak Cristo ta Filipos kʼalal echʼem xaʼox van lajunebuk jabile: «Cʼalal chatʼabic ta coʼntone, persa onoʼox ta jtojbe ta vocol Dios ta aventaic» (Fili. 1:3).

Li Trevor xchiʼuk Emily ti ay tunikuk ta Malauie jaʼ jechtik laj yaʼi sbaik kʼuchaʼal Pablo kʼalal skʼan toʼox xbatik ta Chanob vun sventa Vivlia ta Galaad yuʼun Watchtower: «Oy bateltik ta jakʼbe jbakutik mi lek van ti ay tunkunkutik ta Malauie. Pe xi muyubajkutik ta melel. La stsatsubtas jnupunelkutik li kʼusi la jpaskutik tee xchiʼuk laj kakʼkutik venta ti chakʼbunkutik sbendision li Jeovae». Xi chalik li Greg xchiʼuk Crystal ti laj xa kalbetik skʼoplale: «Muʼyuk kʼusi yan toj lek stakʼ pasel li ta jkuxlejalkutike».

Jech onoʼox ta melel ti mu jkotoltikuk stakʼ xbat tunkutik ta yan balumile. Oy junantike te chbat tunikuk ti bu chtun mas jcholmantaletik te noʼox ta slumalike. Junantike tskoltaik li tsobobbailetik te noʼox nopol bu nakalike. Li kʼusi mas tsots skʼoplale jaʼ ti xkakʼbetik yipal bu kʼalal xuʼ kuʼuntik xi jtun ta stojolal Jeovae (Col. 3:23). Jaʼ me jech chkakʼtik venta ti melel li kʼusi yakʼoj ta naʼel Dios liʼe: «Li bendición yuʼun Mucʼul Diose jaʼ jcʼulejaltic chcʼot; mu jta jvocoltic yuʼun» (Pro. 10:22).

[Rekuadro ta pajina 5]

¿Mi xavojtikin aba lek?

Li kʼusi ta jakʼtik tana liʼe jaʼ me cha skolta ta snopel mi xuʼ avuʼun xa tun ta yan balumil. Albo ta orasion Jeova xchiʼuk kʼelo lek ta melel mi lek van ti xbat tunan ta yan balumile. Jech xtok kʼelo li mantaletik ta revista Li Jkʼel osil ta toyole ti chkalbetik skʼoplal liʼ ta olone.

• ¿Mi lek yijun ta mantal? («Chanbo li stalelal Pabloe vaʼun ta me xa chʼi ta mantal», ta 15 yuʼun mayo ta 2008, pajina 21.)

• ¿Mi lek xi tojob ta chanubtasvanej ta sventa li lekil aʼyeje? («El camino al éxito en el ministerio de precursor», ta 15 yuʼun mayo ta 1989, pajina 21.)

• ¿Mi xuʼ chkaʼi ti nom chkom li kutsʼ kalal xchiʼuk kamigotake? («Jesucristo, li Mukʼta misioneroe», ta 15 yuʼun fevrero ta 2008, pajina 12.)

• ¿Mi oy ta koʼonton ta xchanel yan kʼop? («El reto de servir en una congregación de habla extranjera», ta 15 yuʼun marso ta 2006, pajina 17.)

• ¿Mi oy jtakʼin chi bat xchiʼuk sventa ta jmakʼlin jba te? («¿Puede usted servir en el extranjero?», ta 15 yuʼun oktuvre ta 1999, pajina 23.)

[Lokʼol ta pajina 6]

Yiloj me ermanoetik kʼalal bikʼit chkakʼ jbatike xchiʼuk kʼalal xi jmuyubaj noʼox ti bu chi jkʼote

[Lokʼol ta pajina 7]

Li buchʼutik chbat ta nom ta skoj ti tskʼan chtunike lek kʼusi chkʼot ta pasel yuʼunik