¿Mi xvul ta ajol?

¿Mi akʼupinoj skʼelel Li Jkʼel osil ta toyole, ti achʼik to lokʼem tale? Mi jeche, paso preva mi xtakʼ avuʼun li kʼusitik liʼe:

• ¿Kʼusi chakʼ jchantik ti kʼalal la skolta Pedro li Jesús ti ta xaʼox xjikʼav ta nabe? (Mat. 14:28-31.)

Mi oy junuk kermanotik ti yakal chchʼay xchʼunel yoʼonton chkiltike, jtsakbetik skʼob xkaltik ek xchiʼuk jtsatsubtasbetik xchʼunel yoʼonton (15/9, pajina 8).

• ¿Kʼu yuʼun jchʼunej mantalutik akʼo mi jpas mulilutik?

Skʼan skotoluk koʼontontik xkakʼ jbatik ta stojolal Dios, jaʼ xkaltik, jchapan li koʼontontike: kʼalal skʼan toʼox jnuptantik junuk prevae skʼan me xkakʼ ta koʼontontik xchʼunbel smantal Jeova akʼo mi oy kʼusi xkʼot ta pasel (Sal. 78:8). Jtos ti kʼuxi xuʼ jchapan li koʼontontike jaʼ ti baxbolukutik ta xchanel li Vivliae xchiʼuk li vunetik sventa yajtsʼaklom Cristoe (15/9, pajina 12, 13).

• ¿Kʼusi skʼan jpastik sventa xkichʼtik chanubtasel yuʼun li Diose?

Jun ti kʼusi toj tsots skʼoplale jaʼ ti manxoukutike xchiʼuk ti xkakʼ jbatik ta chanubtasele. Xi la stsʼiba li jtsʼibajom yuʼun salmoe: «Li Mucʼul Diose toj lec, toj tucʼ; [...] jaʼ chchanubtas ta spasel cʼusi tucʼ li bochʼo mu cʼusi snaʼique», jaʼ xkaltik, li buchʼu manxoike (Sal. 25:8, 9) (15/9, pajina 21).

• ¿Kʼusi vokol la stsʼik Jeova ta skoj ti la spojutike?

Toj tsots la stsʼik svokol li Jeovae, yuʼun toj echʼem ilbajinbat li xNichʼone xchiʼuk la slabanik. Jech kʼuchaʼal chakʼ kiltik li albil kʼopetike ta sjunul yoʼonton laj yakʼ ox ta matanal Isaac li Abrahame, jaʼ jech li Jeova eke laj yakʼ ti akʼo xcham kʼuchaʼal jpas tsatsal mulil li xNichʼone (15/9, pajina 28, 29).

• ¿Kʼusi chakʼ jchantik li Proverbios 24:27 ti jaʼ chalbe skʼoplal liʼe: «Xuʼ chavaʼan li anae»?

Jaʼ ti skʼan snaʼ lek li jun vinik ti kʼusitik tsbain mi tskʼan chnupune xchiʼuk ti kʼalal skʼan toʼox xnupune skʼan xchapan sba lek baʼyel, sventa tsmakʼlin li yutsʼ yalale xchiʼuk ti chchabi ta mantale (15/10, pajina 12).

• ¿Kʼu yuʼun tstabeik sbalil alab-nichʼnabiletik kʼalal chi jchanunaj xchiʼuk kutsʼ kalaltike?

Yuʼun kʼalal jech ta jpastike jaʼ me jech chkʼuxubinik skotol li kʼusitik spasoj Jeovae xchiʼuk jaʼ me jech lek tsotsik-o ta mantal (15/10, pajina 30, 31).

• ¿Mi persa van skʼan smak sjolik li ermanaetik ti tsjelubtasik ta yan kʼop li mantal chal ermanoetik ta tsobajeletike o li ta mukʼta tsobajeletike?

Li buchʼutik te chaʼiik mantale jaʼtik onoʼox tskʼelik batel li buchʼu chal mantale xchiʼuk chaʼiik ti kʼusi chal li buchʼu tsjelubtas tal ta yan kʼope. Jaʼ yuʼun chaʼa, li ermanaetik ti tsjelubtasik ta yan kʼope maʼuk ti jaʼ xa kʼelbilik tajek yuʼun li buchʼutik te chaʼiik mantale. Ti vaʼ yelane mu persauk smak sjolik kʼalal tsjelubtasik ta yan kʼop li jun kʼop ti ta eal chichʼ alele (15/11, pajina 12).

• ¿Kʼuxi xuʼ jam lek koʼontontik xchiʼuk ti jkʼantik mas li yantike?

Skʼan jkʼopontik li buchʼutik achʼ to chkʼot ta Salon sventa Tsobobbaile xchiʼuk jchiʼintik ta loʼil li kerem-tsebetike o li mol-meʼeletike. Jchʼakbetik yorail jlikeluk sventa jchiʼintik ta loʼil li buchʼutik voʼne xa jchiʼinojtik ta loʼile. Nopajkutik batel ta stojolal yan ermanoetik li ta mukʼta tsobajeletike xchiʼuk kal kʼusi jbitik (15/11, pajina 20-22).

• ¿Kʼu yuʼun xuʼ xkaltik ti toj lek ta chanbel slekil talelal li Jeova xchiʼuk Jesuse?

Akʼo mi jaʼ li Mukʼul Jpas mantal ta vinajel-balumil li Jeovae, chichʼ ta mukʼ li krixchanoetike xchiʼuk skʼanojan. Jech kʼuchaʼal liʼe, kʼalal la skʼopon Abraham xchiʼuk Moisés li Jeovae, la stunes jpʼel hebreo kʼop ti jaʼ jun mantal ti te laj yakʼ ta ilel ti ichʼvan ta mukʼe (Gén. 13:14; Éxo. 4:6). Jech xtok, oy ta yoʼonton chchikinta li kʼusi chkalbetike (Gén. 18:23-32). Jaʼ jech li Jesús eke, ta slekil yoʼonton la skolta li krixchanoetike. Jech ta melel, nopajtik noʼox ti ta sbi la skʼopon li krixchanoetike (15/11, pajina 25).