Jamal lek xvinaj ti jaʼ noʼox jaʼ lek li ajvalilal tspas Jeovae
Jamal lek xvinaj ti jaʼ noʼox jaʼ lek li ajvalilal tspas Jeovae
«Jaʼ sventainojbe yabtel scotol ajvaliletic li Bochʼo te oy ta vinajele.» (DAN. 4:17)
1, 2. ¿Kʼu yuʼun muʼyuk kʼusi lek kʼotem ta pasel yuʼun li ajvaliletike?
MUʼYUK kʼusi lek kʼotem ta pasel yuʼunik ta melel li ajvalil krixchanoetike. Jun srasonale jaʼ ti chʼabal lek spʼijilike. Jamal lek xvinaj ti mu kʼusi lek spas yuʼunik li politikoetike, yuʼun jaʼ pʼolem li buchʼutik «jaʼ noʼox tspasic cʼusi tscʼan stuquic», «ta xbat yoʼntonic yuʼun taqʼuin», «tstoy sbaic», «muʼyuc ta yoʼntonic yichʼel ta mucʼ Dios», «muʼyuc xcʼuxul yoʼntonic, ta saʼbeic smul yantic, muʼyuc spajeb chaʼyic li cʼusi tscʼan yoʼntonique», «simaronijemic o ta jyalel, jaʼ tscontrainic o li cʼusitic leque», «ta xʼacʼvanic ta cʼabal» xchiʼuk «toj mucʼ chacʼ sbaic» (2 Tim. 3:2-4).
2 Oy xa ta sjayibal siglo ti la svalopatinik ajvalilal tspas Dios li baʼyel jtot jmeʼtike. La snopik ti jaʼ van jech chchʼak sbaik yalojike, pe bu cha ta, jaʼ laj yakʼ sbaik ta ventainel yuʼun li Satanase, «li banquilal jpasmantal liʼ ta banamile». Oy xa ta vakmil jabil ti toj chopol kʼusitik chkʼot ta pasel li ta ventainel yuʼun Diabloe, pe mas to chil svokol avi li krixchanoetike (Juan 12:31). Ta skoj ti vaʼ yelan oy avi li balumile, li vun Historia Oxford del siglo XX chal ti jecheʼ xa «chichʼ saʼel jun tukʼil balumile». Vaʼun xi chalbe kaʼitik smelolale: «Maʼuk noʼox ti vokol ta taele, moʼoj, yuʼun kʼalal chichʼ saʼel ta alele chakʼ tal vokolil, li kʼusi mas chopole jaʼ ti jaʼ xa noʼox chal stuk ajvalil skotol li kʼusi skʼan pasele xchiʼuk ti chlik pas kʼopetike». ¡Melel li kʼusi laj yichʼ alel ta sventa li vokolil chil krixchanoetike!
3. ¿Kʼuxi la sventain balumil Dios ti manchukuk la spas smulik li Adán xchiʼuk Evae?
3 Toj chopol xa noʼox ta jyalel ti jaʼ la spʼajik li tukʼil ajvalilal tspas Jeova li Adán xchiʼuk Evae. Veno, mu onoʼox jnaʼtik lek ta melel kʼuxi la sventain Balumil Dios ti muʼyukuk la stoy sbaike. Pe ti kʼusi xuʼ jpat lek koʼontontik yuʼune, jaʼ ti ta xkʼuxul yoʼonton xchiʼuk ti parejo la sbeiltas li jchʼunej mantal krixchanoetik ti muʼyukuk la stoy sbaike (Hech. 10:34; 1 Juan 4:8). Ta skoj ti muʼyuk spajeb li spʼijile muʼyuk kʼusi chopol la spas kʼuchaʼal li politikoetike. Li ajvalilal ti jaʼ sventainoj li Diose kʼot me ta pasel yuʼun jechuk liʼe: «Chabusanbe yalel tal abendición scotol li cʼusitic cuxajtique» (Sal. 145:16). Xuʼ xkaltik ta melel ti jaʼ tukʼil ajvalilale (Deu. 32:4). ¡Toj mukʼ ti kʼusi chʼay kuʼuntike!
4. ¿Bu to kʼalal xuʼ yuʼun ch-ajvalilaj li Satanase?
4 Pe xuʼ jvules ta joltik jtos ti kʼusi melel liʼe: akʼo mi laj yakʼ Jeova ti akʼo spas sba ta mantal stukik li krixchanoetike, muʼyuk bu xikta li sderecho ti ch-ajvalilaj ta stojolalike. Yuʼun kʼalal ta tsatsal ajvalil ta Babilonia xi laj yale: «Jaʼ sventainojbe yabtel scotol ajvaliletic li Bochʼo te oy ta vinajele» (Dan. 4:17). Mi kʼot yoraile chkʼot ta pasel yuʼun Ajvalilal yuʼun Dios li kʼusi tskʼan yoʼonton Jeovae (Mat. 6:10). Melel onoʼox ti yakʼoj to Jeova ti jaʼuk x-abtej ta «yajval [balumil]» li Satanase, yuʼun jaʼ to jech xuʼ xchapaj ti kʼusitik la xchibal kʼopta ta skoj stoybaile (2 Cor. 4:4; 1 Juan 5:19). Pe oy noʼox spajeb li kʼusi akʼbil spas yuʼun Jeovae, jech oxal mi jaʼuk onoʼox xuʼ yuʼun x-echʼ ta mas (2 Cró. 20:6; koʼoltaso xchiʼuk Job 1:11, 12 xchiʼuk 2:3-6). Jech xtok, oy onoʼox krixchanoetik ti tskʼan chchʼunbeik smantal li Jpasvaneje akʼo mi liʼ nakalik li ta balumil ti ventainbil yuʼun li Bankilal kajKontratike.
Ch-ajvalilaj ta stojolal Israel li Diose
5. ¿Kʼusi laj yalbeik ta melel Dios li j-israeletike?
5 Ti lik tal ta skʼakʼalil Abel kʼalal to ta skʼakʼalil jmoltotaktike, oy tukʼil viniketik xchiʼuk antsetik ti laj yichʼik ta mukʼ Jeovae xchiʼuk ti la xchʼunbeik smantaltake (Heb. 11:4-22). Ta mas tsʼakal ti jaʼo li ta skʼakʼalil Moisese, li Diose la spas jun trato xchiʼuk li snitilulaltak moltotil Jacob ti kʼotik ta steklumal Israele. Li ta sjabilal 1513 kʼalal maʼuk toʼox jkʼakʼaliltike, li j-israeletike laj yalik ta melel xchiʼuk snitilultakik ti chchʼamik kʼuchaʼal Mukʼul Jpas mantal yuʼunik li Jpasvaneje, xi laj yalike: «Scotol li cʼusi laj yal Mucʼul Diose ta jpascutic» (Éxo. 19:8).
6, 7. ¿Kʼu yelan ajvalilaj ta Israel li Diose?
6 Li Jeovae la stʼuj ta steklumal li Israel ta skoj ti oy kʼusi oy ta yoʼonton tspase (kʼelo Deuteronomio 7:7, 8). Maʼuk noʼox ta sventa slekilal stukik ti jech la spase. Oy to kʼusi te tsakal skʼoplal ti mas to toj tsots skʼoplale: jaʼ li ta sventa sbi xchiʼuk ta sventa mukʼul pas mantal yuʼune. Li j-israeletike skʼan xkʼotik ta rextikoetik ti jaʼ noʼox stuk melel Dios li Jeovae (Isa. 43:10; 44:6-8). Jaʼ yuʼun xi laj yalbe li jteklume: «Li voʼoxuque steclumaloxuc o li Mucʼul Dios cuʼuntique. Vocʼbiloxuc yuʼun. Jaʼ la stʼujoxuc loqʼuel ta scotol li lumetic liʼ ta banamile yuʼun acʼo yuʼuninoxuc o» (Deu. 14:2).
7 La stsak ta venta Dios ti muʼyuk stukʼil li j-israeletik kʼalal la sventaine. Pe jech xtok un, laj yakʼbe tukʼil mantaletik ta stojolal Moisés ti te vinaj ti chʼule, ti skʼanoj li tukʼilale, ti chkʼuxubinvane xchiʼuk ti oy smalael yuʼune. Ta mas tsʼakal une —ta skʼakʼalil Josué—, jun noʼox yoʼonton li jteklume xchiʼuk la skʼupin bendisionetik ta mantal ta skoj ti la xchʼunbeik smantal li Diose (Jos. 24:21, 22, 31). Li vaʼ kʼakʼal taje te vinaj ti jaʼ noʼox jaʼ lek li ajvalilal yuʼun Jeovae.
¡La sta ep svokolik ta skoj ti la stʼujik ta ajvalil jun krixchanoe!
8, 9. ¿Kʼusi la sbol kʼan li Israele, xchiʼuk kʼusi kʼot ta pasel ta skoj?
8 Ep ta velta la xchʼak sbaik ta stojolal Dios li j-israeletike, jech oxal muʼyuk xa xchabiatik. Ta stojolal Samuel la skʼanik jun jbeiltasvanej ti xil ta sat stukike, jun ajvalil krixchano. Vaʼun laj yal Jeova ti akʼo spas Samuel li kʼusi tskʼan jteklume xchiʼuk xi albate: «Muc voʼcot ti chasbajicote; jaʼ vuʼun chisbajicun, yuʼun jech mu xa teuc ta jpas mantal ta stojolic» (1 Sam. 8:7). Albatik ti xuʼ spasik li kʼusi la skʼanike, pe albatik ti ep tsta svokolike (kʼelo 1 Samuel 8:9-18).
9 Ti kʼu xa sjalil tal li kuxlejale vinajem lek ti melel li kʼusi laj yal Jeovae. Toj ep laj yil svokol Israel ta skoj li ajvalilal taje, mas to ti kʼalal muʼyuk tukʼ laj yakʼ sbaik li ajvaliletike. Jaʼ jech kʼotem tal ta pasel ta lumetik ek ti jayib xa siglo echʼem tale: mi muʼyuk tstsak ta mukʼ Dios li ajvalil krixchanoe muʼyuk kʼusi lek chkʼot ta pasel yuʼun. Pe ¿kʼusi xuʼ xkaltik ta stojolal li politikoetik ti chalik ti chakʼbe sbendision Dios li kʼusitik tspasik sventa tsaʼik lekilal xchiʼuk chabiele? Muʼyuk bu koltabilik yuʼun Jeova ta melel, yuʼun muʼyuk bu chchʼunbeik smantal (Sal. 2:10-12).
Jun achʼ jteklum ti beiltasbil yuʼun Diose
10. ¿Kʼu yuʼun sabat xkʼexol yuʼun Jeova li Israele?
10 Kʼot skʼakʼalil ti vinaj lek ti mu skʼan tukʼ xtunik ta stojolal Dios li j-israeletike. Pʼajatik yuʼun Jeova xchiʼuk kʼextaatik ta jun achʼ jteklum ta skoj ti la spʼajik li Mesiase. Jech, li ta sjabilal 33 ta jkʼakʼaliltike jaʼ te lik talel li stsobobbail yajtsʼaklomtak Cristoe, jun jteklum ti jaʼik li yajtsʼaklomtak Cristo tʼujbil chbatik ta vinajele. «Mero Israel [...] ta sventa [Dios]» la sbiin li jun lum ti beiltasbil yuʼun Jeova taje (Gál. 6:16).
11, 12. ¿Kʼuxi xkoʼolaj li steklumal Israel xchiʼuk li «mero Israel [...] ta sventa Diose»?
11 Li voʼneal jteklum xchiʼuk li «mero Israel [...] ta sventa Diose» oy kʼusi xkoʼolajik-o, pe oy kʼusi jelelik-o xtok un. Jech kʼuchaʼal liʼe, muʼyuk ajvalil krixchanoetik yuʼunik li stsobobbail yajtsʼaklomtak Cristoe xchiʼuk muʼyuk chakʼik ta matanal chonbolometik ta sventa li smulike. Pe jech kʼuchaʼal li j-israeletike oy kʼusi chapanbil lek yuʼunik, jaʼ ti oy moletik ch-abtejike (Éxo. 19:3-8). Li moletik taje muʼyuk toj tsots xa stalelal chakʼ sbaik ta stojolal li chijetik ta tsobobbaile. Moʼoj, chchabiik xchiʼuk chakʼ ta ilel ta stalelalik kʼuxi skʼan spasbeik li yabtel Diose. Chichʼik ta mukʼ, chkʼuxubinik xchiʼuk oy sbalil chilik (2 Cor. 1:24; 1 Ped. 5:2, 3).
12 Li yajtsʼaklomtak Cristo ti «mero Israel [...] ta sventa Diose» xchiʼuk li yan chijetike skʼan me jnoptik lek ta sventa ti kʼuyelan laj yil sbaik Jeova xchiʼuk j-israeletike. Yuʼun me jaʼ jech mas ta jkʼantik-o li Diose xchiʼuk ti kʼuyelan tsbeiltas li steklumale (Juan 10:16). ¿Kʼusi kʼot ta pasel yuʼunik li ajvaliletik ta stojolal Israele? Toj ep kʼusitik, oy kʼusitik lek xchiʼuk oy kʼusitik chopol. ¿Kʼusi xuʼ xchanik li moletik ta tsobobbailetik ta sventa taje? Yuʼun manchuk mi maʼuk ajvaliletik ta melel skʼan lekuk ta chanel li xchʼunel yoʼontonike (Heb. 13:7).
Li ajvalilal tspas Jeova avie
13. ¿Kʼusi kʼot ta pasel ta 1914?
13 Ta spʼejel Balumil yakal chalik batel yajtsʼaklomtak Cristo ti poʼot xa xlaj li ajvalilal yuʼun krixchanoetike. Li Jeovae la svaʼan Ajvalilal yuʼun ta vinajel ta 1914 kʼalal laj yakʼbe yabtel ta ajvalil li Jesucristoe. Te akʼbat yabtel sventa «[tstsalvan], yuʼun bat stsal scotol» xchiʼuk sventa ch-ajvalilaj «ta stojol li [y]ajcontrataque» (Apo. 6:2; Sal. 110:2). Kʼux ta alel, pe li lumetike nopajtik noʼox tstoy sbaik ta stojolal li mukʼul pas mantal yuʼun Diose. Ti kʼuyelan tspasike chakʼik ta ilel ti yuʼun «muʼyuc Dios» yalojike (Sal. 14:1).
14, 15. 1) ¿Kʼuxi ch-ajvalilaj ta jtojolaltik avi li Ajvalilal yuʼun Diose, xchiʼuk kʼusi skʼan jakʼbe jbatik ta skoj taje? 2) ¿Kʼusi chakʼ ta ilel ti mu kʼusi xkoʼolaj-o li Ajvalilal yuʼun Diose?
14 Oy to yajvoʼuk ta Balumil li buchʼutik tʼujbil chbatik ta vinajel ti jaʼik yermanotak li Jesuse. Li buchʼutik te skʼoplalik ta «mero Israel [...] ta sventa Diose» jaʼik «xqʼuexol Cristo cʼotem[ik]» (2 Cor. 5:20). Ta skotolike jaʼik li j-abtel ti tukʼ yoʼonton xchiʼuk ti lek pʼije. Taje yichʼoj biiltasel ta skʼelel xchiʼuk ta smakʼlinel ta mantal li buchʼutik tʼujbil chbatik ta vinajele xchiʼuk li epal krixchanoetik ti jaʼik li yajtsʼaklomtak Cristo ti ta smiyonal xa noʼox smalaoj chkuxiik sbatel osil ta Paraisoe (Mat. 24:45-47; Apo. 7:9-15). Ti ta jkʼupintik lekilal ta mantal avie jaʼ svinajeb ti ch-akʼbat bendision yuʼun Jeova li j-abtel taje.
15 Lek me ti xi jakʼbe jbatik ta jujuntale: «¿Mi ta jpas stekel li kabtel jbainoj ta tsobobbaile? ¿Mi xi muyubaj noʼox ti jaʼ tsventainun li Ajvalilal yuʼun Diose xchiʼuk mi ta sjunul koʼonton ta jkolta jba? ¿Mi oy ta koʼonton chkalbe batel skʼoplal ti yoʼ to xuʼ kuʼune?». Jtekeltik li yajtsʼaklomutik Cristoe skʼan me jchʼuntik li mantal chal Jtsop Jbeiltasvaneje xchiʼuk ti jkoltatik li moletik ta jtsobobbailtike. Mi jech ta jpastike jaʼ me jech chkakʼtik ta ilel ti lek chkaʼitik ti jaʼ ch-ajvalilaj ta jtojolaltik li Jeovae (kʼelo Hebreos 13:17). Mi ta sjunul koʼontontik ta jchʼamtik li beiltasel taje ta me jkʼupintik ti jmoj oyutike, lekilal xchiʼuk tukʼilal ti mu kʼusi xkoʼolaj-o li ta jun balumil avi ti muʼyuk kʼanbaile. Taje jaʼ tskʼupil kʼopta Jeova xchiʼuk jaʼ jech chvinaj ti jaʼ noʼox stuk lekil Ajvalile.
Tspas kanal li ajvalilal tspas Jeovae
16. ¿Kʼusi skʼan snop avi ta jujuntal li krixchanoe?
16 Poʼot xa tajek xkʼot yorail xchapaj skotol li kʼusitik laj yichʼ chibal kʼoptael ta nichimaltik Edene. Jaʼ xa me yorail skʼan snop jujun krixchano liʼe: «¿Mi chkakʼ sventain jkuxlejal li Jeovae o mi jaʼ chkakʼ jba ta stojolal li ajvalil yuʼun krixchanoetike?». Li yajtsʼaklomutik Cristoe jtaoj jun jmotontik: jaʼ ti ta jkoltatik li manxo krixchanoetik ti akʼo lekuk li kʼusi xkʼot ta nopel yuʼunike. Poʼot xa me tajek li pas kʼop ta Armagedón ti jaʼo te tslajesbe skʼoplal skotol ajvaliletik li Ajvalilal yuʼun Diose (Dan. 2:44; Apo. 16:16). Vaʼun laj-o me skʼoplal li ajvalilal tspas krixchanoetik ti jaʼ sventainoj Satanase, jaʼ xa me tsventain spʼejel Balumil li Diose. Jaʼ me te chvinaj ta batsʼi melel ti stuk noʼox jaʼ lek li ajvalilal tspase (kʼelo Apocalipsis 21:3-5).
17. ¿Kʼusi xuʼ xkoltaatik li manxoetik sventa snaʼik bu junukal li lekil ajvalilale?
17 Li buchʼutik muʼyuk to snopoj lek ti chakʼ sbaik ta stojolal Jeovae skʼan me spasik orasion sventa snopik lek li bendisionetik chakʼ ajvalilal tspas Diose. Li politikoetike muʼyuk lajem skʼoplal yuʼunik li milbailetik xchiʼuk li terrorismoe. Yan li Ajvalilal yuʼun Diose tslajesbe skʼoplal skotol li buchʼutik tspas choplejale (Sal. 37:1, 2, 9). Li ajvaliletik avie nopajtik noʼox tstikʼ sbaik ta pas kʼopetik, jaʼuk li Diose «tspajes scotol li pleito cʼalal to ta jujujot stiʼ banamile» (Sal. 46:9). Xchiʼuk chchaʼta yav yuʼun ti jun xa yoʼonton chnaki li krixchanoetik xchiʼuk chonbolometike (Isa. 11:6-9). Jech xtok chakʼbe slajeb li povreale xchiʼuk li viʼnale, chaʼtos vokolil ti te noʼox xlik xkaj ta skoj ti mu xtojob li krixchanoe (Isa. 65:21). Xchiʼuk oy kʼusi tspas ti mu spas yuʼunik li ajvaliletik ti lek xtojobik ta alele: jaʼ ti muʼyuk xa ch-ipaj krixchanoetike, ti muʼyuk xa chmalubik xchiʼuk ti muʼyuk xa chchamike (Job 33:25; Isa. 35:5, 6). Pe li kʼusi mas to labal sbae, jaʼ ti chchaʼkuxi li animaetik ta jun paraiso Balumile (Luc. 23:43, NM; Hech. 24:15).
18. ¿Kʼuxi chkakʼtik ta ilel ti jpatoj lek koʼontontik ti jaʼ lek li ajvalilal tspas Diose?
18 Jech kʼuchaʼal laj xa kiltike, li Ajvalilal yuʼun Diose chakʼbe slajeb li kʼusitik chopol yakʼoj kʼotuk ta pasel Satanás ti jaʼ te lik talel ti kʼalal la stijbe yoʼonton li baʼyel jtoj jmeʼtik ti akʼo stoy sbaik ta stojolal Jpasvaneje. Oy xa ta vakmil jabil chakʼ tal choplejal li Diabloe, pe jaʼuk li Jeovae ta jmil noʼox jabil tslajesbe skʼoplal ta stojolal Jesús. ¡Taje jamal chakʼ ta ilel ti stuk noʼox lek li ajvalilal ta vinajele! Li biil kichʼojtike, yajrextikotak Jeova, jaʼ chakʼ ta ilel buchʼu jaʼ li Mukʼul Jpas mantal kuʼuntike. Jaʼ yuʼun skʼan xkakʼtik ta ilel ta jujun kʼakʼal xchiʼuk ta jujun ora ti ta sjunul koʼontontik kichʼojtik ta mukʼe, ti chkakʼ akʼo sventainutike xchiʼuk ti yajrextikoutike. ¡Stekeluk me ora xkalbetik li buchʼu tskʼan chaʼi ti mu kʼusi xkoʼolaj-o li ajvalilal tspas Diose!
¿Kʼusi chchanubtasutik ta sventa li ajvalilal tspas Dios li versikuloetik liʼe?
[Sjakʼobiltak sventa xchanobil]
[Lokʼol ta pajina 29]
Li Jeovae muʼyuk yiktaoj ta spasel mantal
[Lokʼol ta pajina 31]
Kʼalal ta jchʼamtik li ajvalilal tspas Jeovae jaʼ me jmoj tsobolutik-o ta spʼejel Balumil