¿Kʼu yuʼun skʼan xkakʼ jbatik ta stojolal li Jeovae?

«Ta acʼubaltic naxe, iʼay scʼopanun jun yajʼalmantal li Dios ti quichʼoj ta muqʼue [«ti jaʼ yuʼunune», NM].» (HECH. 27:23)

1. 1) ¿Kʼusi skʼan spas li krixchano sventa xuʼ xichʼ voʼe? 2) ¿Kʼusitik ta jtakʼtik echʼel?

 «TA SVENTA li sbalil matanal laj yakʼ li Jesucristoe, ¿mi asutesoj xa avoʼonton ta skoj li amule xchiʼuk mi avakʼoj xa aba ta stojolal Jeova sventa cha pasbe li kʼusi tskʼan yoʼontone?» Taje jaʼ jun li ta xchibal kʼusi chjakʼbatik li buchʼutik chichʼik voʼ kʼalal tstsuts xa batel li mantal ta sventaike. Veno, pe ¿kʼu yuʼun skʼan xakʼ sbaik ta stojolal Jeova li yajtsʼaklomtak Cristoe? ¿Kʼusi sbalil tstabeik? ¿Kʼu yuʼun toj tsots skʼoplal skʼan jech spasik sventa stsakbatik ta venta yuʼun Dios li yabtel tspasik ta stojolale? Skʼan xkaʼibetik smelolal baʼyuk kʼusi smelolal ti chkakʼ jbatik ta stojolal Dios sventa jtakʼtik taje.

2. ¿Kʼusi smakoj batel ti chkakʼ jbatik ta stojolal Diose?

² ¿Kʼusi smakoj batel ti chkakʼ jbatik ta stojolal Diose? Li kʼusi tskoltautik ta yaʼibel smelolale jaʼ ti jkʼeltik li kʼusi laj yal Pablo kʼalal jaʼo te oy ta varko ti ta xa xmutʼij ta voʼe. Xi laj yale: «Li Dios ti quichʼoj ta muqʼue [«ti jaʼ yuʼunune», NM]», taje jaʼ jech laj yakʼ ta ilel ti uʼuninbil yuʼun Dios laj yaʼie (kʼelo Hechos 27:22-24). Jech ta melel, «oyic ta scʼob pucuj scotol li yan cristianoetic liʼ ta banamile», yan li yajtsʼaklomutik Cristoe jaʼ xa yuʼunutik li Jeovae (1 Juan 5:19). ¿Kʼuxi pas kuʼuntik taje? Jaʼ ti laj kakʼ jbatik ta stojolal Jeovae —jaʼ xkaltik, laj kakʼ ketik o laj kalbetik ta melel ta orasion ti chi jtun ta stojolale— vaʼun laj kichʼtik voʼ.

3. ¿Kʼusi laj yakʼ ta ilel Jesús kʼalal laj yichʼ voʼe, xchiʼuk kʼuxi chchanbeik stalelal li yajtsʼaklomtak Cristoe?

³ Laj yakʼ ta ilel Jesús kʼusi skʼan pasel kʼalal laj yichʼ voʼe, jaʼ ti laj yakʼ ta ilel ta stojolal krixchanoetik ti tskʼan tspas li kʼusi tskʼan yoʼonton sTote. Veno, pe ta skoj ti te vokʼ Jesús ta yutsʼ yalal Israel ti yakʼoj xa onoʼox sba ta stojolal Diose, mu xa persauk chakʼ sba ta stojolal yan velta. Jech xtok, maʼuk ta skoj junuk Mantal ti jech la spase. Moʼoj, yuʼun xi laj yalbe Jeova kʼuchaʼal chalbutik Vivliae: «Liʼ oyune, Dios cuʼun, yuʼun [...] ta jpas [li] cʼusi tscʼan avoʼntone» (Heb. 10:7; Luc. 3:21). Jech ta melel, kʼalal laj yichʼ voʼe laj yakʼ ta ilel ti jaʼ tskʼan tspas li kʼusi  tskʼan sTote. Jaʼ jech chkichʼtik voʼ li avi eke, pe kʼalal jech ta jpastike, yakal me chkakʼtik ta ilel ta stojolal krixchanoetik ti laj xa kakʼ jbatik ta stojolal Dios ta orasione.

Kʼuxi ta jtabetik sbalil ti chkakʼ jbatik ta stojolal Diose

4. ¿Kʼusi chakʼ jchantik ti kʼuyelan laj yamigoin sbaik li David xchiʼuk Jonatán ta sventa ti oy kʼusi ta jbain chkaʼitike?

⁴ Toj tsots me skʼoplal ti chkakʼ jbatik ta stojolal Diose. Maʼuk noʼox me ti chkaltik oy kʼusi ta jpastike. Veno, pe ¿kʼusi sbalil ta jtatik? Jtos ti kʼusi tskoltautik ta yaʼibel smelolale jaʼ ti jkʼelbetik skʼoplal ti toj ep sbalil kʼalal oy kʼusi sbainoj chaʼiik ta jujuntal li krixchanoetike. Kalbetik skʼoplal li buchʼutik chamigoin sbaike. Sventa oyuk kamigotike skʼan me xkakʼ ta koʼontontik saʼel. Oy me kʼusi sbainoj chaʼiik kʼalal chamigoin sbaik li krixchanoetike, jaʼ ti skʼan xchabi sbaik ta jujuntale. Li Vivliae chalbe skʼoplal David xchiʼuk Jonatán ti toj lek laj yamigoin sbaike, ti jmoj tajek yoʼontonike xchiʼuk ti la spasik jun tratoe (kʼelo 1 Samuel 17:57 xchiʼuk 18:1, 3). Muʼyuk xa mas jech tukʼ yoʼonton chamigoin sbaik li krixchanoetik avie. Pe jech kʼuchaʼal ta voʼnee, li avi eke toj tsots skʼoplal ti oyuk stukʼil koʼontontik xchiʼuk ti oy kʼusi ta jbainoj chkaʼitik ta jujuntal xchiʼuk li kamigotike (Pro. 17:17; 18:24).

5. ¿Kʼusi skʼan spas jun moso sventa te xtun-o ta stojolal li yajval ti lek yoʼontone?

⁵ Li ta steklumal Israele oy to yan ti bu oy kʼusi sbainoj chaʼi li krixchanoetike: jaʼ ti chkʼot ta nopel yuʼun ti te chtun-o ta stojolal yajval li jun mosoe. Xi chal li Mantale: «Me mu scʼan xlocʼ batel [li mosoil] ta sventa ti lec scʼanoj li yajnil xnichʼnab xchiʼuc yajvale, li yajvale acʼo yicʼ batel ta stojol Dios; te acʼo cʼot svaʼan ta stsʼel smac tiʼna, o ta smarcoal tiʼna, acʼo svombe [o tsjombe] xchiquin ta jichʼil taqʼuin. Jech xuʼ chcom o ta smozo scotol cʼacʼal» (Éxo. 21:5, 6). Kʼuchaʼal chkiltike, xuʼ me jun yoʼonton te-o li moso ta sna li yajval ti lek yoʼonton kʼalal tspasik jun trato sventa te chtun-o ta mosoe.

6, 7. 1) ¿Kʼuxi tstabeik sbalil ti oy kʼusi sbainoj chaʼiik li krixchanoetike? 2) ¿Kʼusi xuʼ xkaltik ta sventa ti kʼuyelan xkil jbatik xchiʼuk Jeovae xchiʼuk ti oy kʼusi ta jbain chkaʼitike?

⁶ Oy to yan xtok ti bu toj tsots skʼoplal oy kʼusi sbainoj chaʼi li krixchanoetike: jaʼ li ta nupunele. Ta melel, oy kʼusi jbainoj chkaʼitik ta stojolal jun krixchano, maʼuk ta sventa jlik vun. Ti jmoj nakalik li jun vinik xchiʼuk jun ants ti muʼyuk bu nupunemike, muʼyuk me bu lek xa chchabi sbaik xchiʼuk muʼyuk me lek chchabi li yalab xnichʼnabik kʼuchaʼal tstaik chabiel li buchʼutik lek nupunemik kʼuchaʼal yajtsʼaklomtak Cristoe. Jech xtok, muʼyuk me bu persa skʼan spas chaʼiik li kʼusi sbainojike xchiʼuk muʼyuk me bu chakʼbeik yipal ti ta slekiluk yoʼonton xchap li skʼopike (Mat. 19:5, 6; 1 Cor. 13:7, 8; Heb. 13:4).

⁷ Tana une jkʼelbetik skʼoplal li abtelale. Leʼ xa onoʼox tal ta skʼakʼalil Vivlia ti toj jtunel li trato tspasike (Mat. 20:1, 2, 8). Vaʼun chaʼa, kʼalal tspasik junuk abtelal, chchonolajik o ti chmanolajike, ti tspasik firmar li buchʼutik te tsakal skʼoplalike jaʼ me sventa slekilalik ta jujuntal. Kʼuchaʼal laj xa kaltike, mas me lek chkʼot ta pasel kʼalal oy kʼusi sbainoj chaʼi li krixchanoetike: mi jaʼ li buchʼutik chamigoin sbaike, li nupultsʼakaletike o li kʼusitik sventa pʼolmajele. Pe mas to tsots skʼoplal ti kʼuyelan xkil jbatik xchiʼuk Jeovae: jaʼ ti chkakʼ jbatik ta stojolale xchiʼuk ti ta sjunul koʼonton chkakʼ jkuxlejaltike. Li avi une chkalbetik skʼoplal kʼusi sbalil la stabeik ta skʼakʼalil Vivlia ti laj yakʼ sbaik ta stojolal Diose xchiʼuk ta jkʼeltik kʼu yuʼun ti maʼuk noʼox ti oy kʼusi jbainoj chkaʼitike.

La stabe sbalil Israel ti laj yakʼ sba ta stojolal Diose

8. ¿Kʼusi smakoj ti laj yakʼ sbaik ta stojolal Jeova li j-israeletike?

⁸ Li j-israeletike laj yakʼ sbaik ta stojolal Jeova ta komon kʼalal laj yakʼ yeik ta stojolale. Te tsobatik yuʼun Jeova ta yeloval vits Sinaí xchiʼuk xi albatike: «Me chachʼunic scotol li cʼusi caloje, xchiʼuc me chavichʼic ta mucʼ li cʼusi chapanbil cuʼune, voʼoxuc noʼox atuquic lec chaquiloxuc  ta scotol li yantic lumetique». Vaʼun xi laj yal li jteklume: «Scotol li cʼusi laj yal Mucʼul Diose ta jpascutic» (Éxo. 19:4-8). Ti laj yakʼ sbaik ta stojolal Diose maʼuk noʼox me ti oy kʼusi la sbain laj yaʼiike. Jaʼ svinajeb ti uʼuninbilik xa yuʼun Jeovae xchiʼuk xi albatik ta melele: «Voʼoxuc noʼox atuquic lec chaquiloxuc».

9. ¿Kʼusi sbalil la stabeik j-israeletik ti laj yakʼ sbaik ta stojolal Diose?

⁹ Ep tajek la stabeik sbalil j-israeletik ti uʼuninbilik xa yuʼun Jeovae. Li Jeovae tukʼ yoʼonton laj yakʼ sba ta stojolalik, kʼuxubinatik xchiʼuk lek kʼusi pasbatik kʼuchaʼal nichʼnabiletik. Xi onoʼox albatike: «Li jun antse ¿me xuʼ chicta comel li mero yole? ¿Me xuʼ chchʼay o ta yoʼnton ti cʼalal jaʼ mero xchʼichʼal sbecʼtale? Acʼo me oy jech chcʼot ta pasel, pero li vuʼune muʼyuc bu jchʼayojot o ta coʼnton» (Isa. 49:15). La sbeiltas ta Mantal steklumal li Jeovae, la stak echʼel j-alkʼopetik sventa stsatsubtasbe yoʼonton xchiʼuk la xchabi ta stojolal yaj-anjeltak. Xi laj yal li jtsʼibajom yuʼun salmoe: «[Li Jeovae] laj yal lec scʼop smantal ta stojol li Jacobe; laj yacʼ lec chanubtaseletic ta stojol li lsraele. Muʼyuc bu jech spasoj ta yan banamiletic» (Sal. 147:19, 20; kʼelo Salmo 34:7, 19 xchiʼuk 48:14). Jech kʼuchaʼal la xchabi steklumal Israel li Jeovae, ti jaʼ yuʼune, jaʼ jech chchabi stekel li yajtsʼaklomtak Cristo avi ti yakʼoj sbaik ta stojolale.

¿Kʼu yuʼun skʼan xkakʼ jbatik ta stojolal Dios?

10, 11. ¿Kʼu yuʼun maʼukutik xa ta yutsʼ yalal Jeova ta sjunul vinajel-balumil kʼalal li jvokʼe?

¹⁰ Oy buchʼutik xi tsnopike: «¿Kʼu yuʼun skʼan xkakʼ jba ta stojolal Jeova xchiʼuk ti xkichʼ voʼ sventa xi tun ta stojolale?». Ta me jnaʼtik kʼu yuʼun mi ta jvules ta joltik ti kʼuyelan oyutik ta stojolale. Ta skoj ti la spas smul Adane maʼukutik xa li ta yutsʼ yalal Jeova ta sjunul vinajel-balumil ti kʼalal li jvokʼe (Rom. 3:23; 5:12). Jech oxal chaʼa, skʼan xkakʼ jbatik ta stojolal sventa xchʼamutik li ta yutsʼ yalale. Jkʼeltikik kʼu yuʼun.

¹¹ Mi junuk totil-meʼil yakʼojbe xkuxlejal sbatel osil yalab xnichʼnab jech kʼuchaʼal oy ta yoʼonton Diose (1 Tim. 6:19). Kʼalal li jvokʼe nom oyutik ta stojolal li jkʼanvanej Totil xchiʼuk Jpasvanej kuʼuntik ta skoj ti la spas smul li baʼyel nupultsʼakale, jech oxal mu xi jkʼot-o ta xnichʼnab Dios (koʼoltaso xchiʼuk Deuteronomio 32:5). Ti kʼalal lik tal li mulile, skotol li krixchanoetike maʼukik xa li ta yutsʼ yalal Jeova ta sjunul vinajel-balumile.

12. 1) ¿Kʼuxi xuʼ xchʼamutik ta yutsʼ yalal Dios li jpas mulil krixchanoutike? 2) ¿Kʼusi skʼan jpastik kʼalal mu to chkichʼtik voʼe?

¹² Akʼo mi jech, xuʼ me jkʼanbetik ta jujuntal Jeova ti akʼo xchʼamutik li ta yutsʼ yalal ti jaʼik li yajtuneltake. * Pe ¿kʼuxi xuʼ lek xilutik ta skoj ti jpas mulilutike? Xi laj yal li Pabloe: «Ti contra onoʼox chquil jba jchiʼuctic li Diose, lec xa jcʼopan jba jchiʼuctic ta sventa ti icham ta jcojtic li Xnichʼone» (Rom. 5:10). Pe sventa xchʼamutike skʼan me jkʼanbetik ti akʼo xakʼ lek jol koʼontontike, xchiʼuk ti kʼuyelan xuʼ jpastike jaʼ ti xkichʼtik voʼe (1 Ped. 3:21). Pe oy me kʼusi skʼan jpastik baʼyel. Baʼyel skʼan xkojtikintik lek li Jeovae, jpat koʼontontik ta stojolal, jsutes koʼontontik xchiʼuk jel jkuxlejaltik (Juan 17:3; Hech. 3:19; Heb. 11:6). ¿Kʼusi skʼan mi laj xaʼox jpastik skotol taje?

13. ¿Kʼu yuʼun sta-o ti skʼan xkakʼ ketik ti chkakʼ jbatik ta stojolal Dios sventa xchʼamutik li ta yutsʼ yalal ti ch-ichʼat ta mukʼe?

¹³ Sventa teuk jkʼoplaltik li ta utsʼ-alalil ti chichʼik ta mukʼ Diose skʼan me oy kʼusi xkalbetik ti oy kʼusi ta jpastik ta melele. ¿Kʼu yuʼun? Xi jkoʼoltastike. Jun totil ti lek ichʼbil ta mukʼ ta slumale laj yojtikin jun kerem ti chʼabal stot smeʼe, lik skʼan, vaʼun la snop chchʼamalin. Pe xi laj yalbee: «Ta jkʼan chavalbun ta melel ti cha pʼisun ta atote, ti cha kʼanune xchiʼuk ti chavichʼun-o ta mukʼe». Muʼyuk me chchʼamalinat mi muʼyuk bu chakʼ ye li kereme. Ta melel, taje maʼuk ti muʼyuk xa srasonal ti jech chkʼanbate. Jaʼ me jech ek li Jeovae: jaʼ to chchʼam ta yutsʼ yalal li buchʼu chakʼ ye ti  chakʼ sba ta stojolale. Jaʼ jech chal li Vivliae: «Ta sventa ti ep la xcʼuxubinoxuc li Diose, ta jcʼanboxuc vocol ta atojolic ti acʼo avacʼbeic sventain o abecʼtalique, yuʼun jech jaʼ cuxul matanal chcʼot, jaʼ chʼul matanal; toj lec xcuxet yoʼnton yuʼun li Diose. Jaʼ jech li mero yichʼel ta mucʼ Dios tscʼan chapasique» (Rom. 12:1).

Jaʼ svinajeb ti jkʼanojtike xchiʼuk ti oy xchʼunel koʼontontike

14. ¿Kʼu yuʼun chichʼ alel ti jaʼ svinajeb ti chi jkʼanvan kʼalal chkakʼ jbatik ta stojolal Diose?

¹⁴ Ti chkakʼ jbatik ta stojolal Diose jaʼ svinajeb ti jkʼanojtike. Jaʼtik jech yelan kʼalal chakʼ yeik li buchʼutik chnupunike. Li ta skʼakʼalil nupunele, li vinike chakʼ ta ilel ti skʼanoj li tseb kʼalal chalbe ta melel ti te xchiʼuk-o kʼalal jun yoʼontonike xchiʼuk kʼalal oy svokolike. Maʼuk noʼox chakʼ ye ti chnupune; yuʼun yakal chalbe jun krixchano ti tukʼ yoʼonton chakʼ sba ta stojolale. Jech xtok, snaʼoj ti mu xuʼ jmoj xnakiik mi muʼyuk yakʼoj ye xchaʼvoʼalike. Jaʼ noʼox jech xtok, mu me xuʼ jtabetik sbalil li kʼusitik tskʼupin yutsʼ yalal Jeova mi muʼyuk to kakʼoj ketik ti chkakʼ jbatik ta stojolale. Kʼuchaʼal chkiltike, ti chkakʼ jbatik ta stojolal Diose jaʼ ti ta jkʼan chuʼuninutike xchiʼuk ti ta jkʼan tukʼ koʼontontik ta stojolal akʼo mi jpas mulilutik xchiʼuk akʼo mi oy kʼusitik jnuptantik (Mat. 22:37).

15. ¿Kʼu yuʼun chkaltik ti jaʼ svinajeb ti oy xchʼunel koʼontontik ti chkakʼ jbatik ta stojolal Diose?

¹⁵ Ti chkakʼ jbatik ta stojolal Diose jaʼ svinajeb ti oy xchʼunel koʼontontike. Jaʼ jech: chkakʼ jbatik ta stojolal Jeova jaʼ ti oy xchʼunel koʼontontik ta stojolale xchiʼuk jpatoj koʼontontik ti jaʼ ta jta-o jlekilaltik ti lek xkil jbatik xchiʼuke (Sal. 73:28). Jnaʼojtik ti mu kʼunuk ti chi jtun ta stojolale, yuʼun ta «stojol chopol cristianoetic» nakalutik. Akʼo mi jech, jnaʼojtik lek ti chkʼot ta pasel yuʼun Dios ti chakʼ kipaltike (Fili. 2:15; 4:13, NM). Ta melel, oy me xkʼuxul yoʼonton ta jtojolaltik mi oy bu la jpas jmultik ta skoj ti chʼabal jtukʼiltike (kʼelo Salmo 103:13, 14 xchiʼuk Romanos 7:21-25). Jnaʼojtik ta melel ti chakʼ jmotontik ta skoj ti chkakʼbetik yipal ti tukʼuk koʼontontik ta stojolale (Job 27:5).

Jaʼ me sbelel muyubajel ti chkakʼ jbatik ta stojolal Diose

16, 17. ¿Kʼu yuʼun chakʼ muyubajel ti chkakʼ jbatik ta stojolal Diose?

¹⁶ Ta me xakʼ muyubajel ti chkakʼ jbatik ta stojolal Diose, yuʼun chkakʼbe jkuxlejaltik li Jeovae, jaʼ yuʼun jech chkaʼitik kʼuchaʼal xi laj yal Jesuse: «Jaʼ toj echʼem xcuxet yoʼnton li bochʼo ta xaqʼue; jaʼ mu sta jech li bochʼo ta xichʼe» (Hech. 20:35). Jaʼ jech la spas ti kʼu sjalil la xchol mantal ta Balumil li xNichʼon Diose, laj yaʼi lek li muyubajel chakʼ kalal oy ta koʼontontik yakʼel li kʼusitik x-ayan kuʼuntike. Kʼalal jech skʼan laj yile, muʼyuk bu la xkux, muʼyuk bu veʼ xchiʼuk muʼyuk bu la saʼ slekilal sventa xchanubtas krixchanoetik ta sventa li kuxlejale (Juan 4:34). Jaʼ noʼox stuk chakʼ muyubajel chaʼi ti tslekubtasbe yoʼonton sTote. Jaʼ yuʼun xi laj yale: «Jaʼ ta jpasbe scotol cʼacʼal li cʼusi lec chile» (Juan 8:29; Pro. 27:11).

¹⁷ Li Jesuse laj yakʼbe yil yajtsʼaklomtak kʼuyelan  li kuxlejal ti chakʼ muyubajele: «Li bochʼo tscʼan chistsʼaclinune tscʼan mu tsotsuc scʼoplal chaʼay sba stuc» (Mat. 16:24). Kʼalal mu tsotsuk jkʼoplal chkaʼi jba jtuktike —jaʼ xkaltik, ti maʼuk ta jpastik li kʼusi ta jkʼan ta jkuxlejaltike—, jaʼ chi jnopaj-o ta stojolal li jkʼanvanej Dios kuʼuntike. ¿Mi mu jechuk ti jaʼ toj lek ti oyutik ta skʼob Diose?

18. ¿Kʼu yuʼun jaʼ mas chakʼ muyubajel ti chkakʼ jbatik ta stojolal Diose, ti jaʼ muʼyuk li ta stojolal jun krixchano o ta sventa li kʼusi ta jkʼan jtuktike?

¹⁸ Jaʼ mas xmuyubajik li buchʼutik chakʼ sbaik ta stojolal Jeovae xchiʼuk ti jech chkuxiik kʼuchaʼal tskʼan yoʼontone, jaʼ mu jechuk li buchʼutik chakʼ ta yoʼonton chtunik ta stojolal jun krixchano o kʼalal oy kʼusi tskʼan tsta stukike, jech kʼuchaʼal ti tspas yaʼiik ta jkʼuleje. Pe jaʼuk li yajtsʼaklomtak Cristoe jun yoʼonton kuxulik (Mat. 6:24). Jtos ti kʼusi xmuyubajik-o li yajtsʼaklomtak Cristoe jaʼ ti chchiʼinik ta abtel Diose, pe muʼyuk chchʼay ta sjolik ti maʼuk ta skoj jun abtelal ti laj yakʼ sbaik ta stojolal Diose, moʼoj, jaʼ ta stojolal li jun Dios ti kʼanvaneme (1 Cor. 3:9). Jaʼ noʼox Dios ti oy sbalil chil ti tukʼ chakʼ sbaike xchiʼuk ti chil svokolike. Tspasatik ta kerem-tsebetik xtok sventa xchabiatik-o sbatel osil (Job 33:25; kʼelo Hebreos 6:10).

19. ¿Kʼusi smoton staojik li buchʼutik yakʼoj sbaik ta stojolal Jeovae?

¹⁹ Xi chalbutik li Vivliae: «Nopajanic ta stojol li Diose, jech chnopaj ta atojolic ec» (Sant. 4:8; Sal. 25:14). Jech, li buchʼutik chakʼ sbaik ta stojolal Jeovae ta me skʼupinik ti nopol oyik ta stojolale. Li ta yan xchanobile te ta jkʼeltik kʼu yuʼun xuʼ ta sjunuluk koʼonton xkakʼ jbatik ta stojolal Jeova sventa xuʼuninutike.

[Tsʼib ta yok vun]

¿Kʼusi cha takʼ?

• ¿Kʼusi skʼan xal ti chkakʼ jbatik ta stojolal Diose?

• ¿Kʼuxi ta jtabetik sbalil kʼalal chkakʼ jbatik ta stojolal Diose?

• ¿Kʼu yuʼun skʼan xakʼ sbaik ta stojolal Jeova li yajtsʼaklomtak Cristoe?

[Sjakʼobiltak sventa xchanobil]

[Lokʼol ta pajina 6]

Chakʼ tajek muyubajel kʼalal jech ta jpastik ti kʼuyelan kakʼoj jbatik ta stojolal Diose