Kichʼtik ta mukʼ li buchʼutik malubemik xae

LI TA tiʼnab yuʼun Californiae te oy jtekʼ teʼ ti jaʼ jun ti bu mas lokʼtabil ta spʼejel Balumile: jaʼ sbi Sipres ti Stuk bu tekʼele. Oy xa la mas ta 250 jabil te oy. Li jtekʼ teʼ taje, ti lek kuchem yuʼun xchiʼuk ti toj alakʼ sbae ep ta tos kʼuyelan xkʼuxubinojik. Jtose jaʼ ti stimanojbeik skavleal xchiʼuk spasojbeik smuroal ta yok sventa mu xlome.

Li Sipres ti Stuk bu tekʼele xuʼ van tsvules ta joltik li yajtsʼaklomtak Cristo ta steklumal Dios ti malubemik xae, ti ojtikinbil ti labal sba kuchem yuʼunike, mas to li ta chol mantale. Li j-alkʼop Joele laj onoʼox yal ti oy «moletic» ti chcholik li aʼyej chal Vivliae (Joel 2:28-32; Hech. 2:16-21). Jech kʼotem ta pasel, yuʼun te chvinaj ti jayib ora chcholik ta sjunul yoʼontonik li «Lequil Aʼyej» sventa Ajvalilal yuʼun Diose (Mat. 24:14). Jlome ep jabil kuchem yuʼunik nutsel xchiʼuk yan vokoliletik. Mi sta-o chichʼ kʼupil kʼoptael xchiʼuk ti chichʼ kʼuxubinel kʼalal tstimanbeik skavleal xchiʼuk chakʼbeik smuroal li jpets teʼe, ¡mas to me oy srasonal ti jkʼuxubintik xchiʼuk jtsaktik ta venta ta skoj stukʼil yoʼonton li kermanotaktik ti malubemik xae!

Xi laj yalbe mantal steklumal ta voʼne li Jeovae: «Vaʼano me abaic; ichʼic me ta mucʼ li moletique» (Lev. 19:32). Li ta yajtuneltak Dios avie ta jtatik ep buchʼutik malubemik xa ti lek ta chanbel stalelalik ti ep xa tajek jabil tukʼ yoʼontonik «ta stojol Dios [...] ta sventa li cʼusitic [tspasike]» (Miq. 6:8). Ta skoj ti mu xikta sbaik ta xchʼunel li beiltaseletik ta Vivliae, xuʼ xkaltik  ti sakil sjolike «jaʼ scorona cʼotem» yuʼunik (Pro. 16:31).

Xi laj yalbe kerem Timoteo li Pabloe: «Mu me xavut li bochʼo mol xae. Taqʼuio ta lequil cʼop, cuyo jech chac cʼu chaʼal atot». Xchiʼuk xi to laj stijbe yoʼontone: «Li meʼeletique cuyo jech chac cʼu chaʼal ameʼ» (1 Tim. 5:1, 2). Kʼalal jech tspas li Timoteoe, yakal tsvaʼan sba xkaltik ta stojolal li buchʼutik sak xa sjolike. Lek jamal xkiltik ti Jeovae tskʼan ti akʼo vinajuk ti chkichʼtik ta mukʼ kʼalal ta jkʼopontik li buchʼutik malubemik xae.

«Talbat chavichʼ abaic ta mucʼ», xi chal Romanos 12:10. Ta melel, li moletik ta tsobobbailetike jaʼ baʼyel skʼan xakʼik ta ilel ti chichʼik ta mukʼ li buchʼutik malubemik xae. Pe jkotoltik skʼan jchʼuntik li beiltasel taje.

Mas to me oy ta sbaik xchʼunel li buchʼutik malubem xa stot smeʼik, syayaik o smukʼtotike. Mi tsabeik smelolal kʼuxi lek oy-o li Sipres ti Stuk bu tekʼel li krixchanoetike, ¿mi mu skʼanuk jsabetik smelolal kʼuxi xuʼ oyuk-o sbalil chkiltik li jtot jmeʼtik, li jyayatik o li jmukʼtotike? Xuʼ jpastik jech kʼalal chkaʼitik li kʼusi tsnopike xchiʼuk ti mu jsujtik ta persa ti akʼo xichʼ pasel li kʼusi ta jkʼantike, ti muʼyuk xa ta jtsaktik ta venta li kʼusi tskʼanike (Pro. 23:22; 1 Tim. 5:4).

Li melel Dios Jeovae, toj ep sbalil chil li yajtuneltak ti malubemik xae. Muʼyuk bu chikta-o (Sal. 71:18). Ta melel, chakʼbe yipalik sventa tukʼ chtunik-o ta stojolal. Li voʼotik eke skʼan jkoltatik xchiʼuk xkichʼtik ta mukʼ.

[Lokʼol ta pajina 7]

Jech kʼuchaʼal skʼan kʼuxubinel li Sipres ti Stuk bu tekʼele, jaʼ jech skʼan chkichʼtik ta mukʼ xchiʼuk oyuk sbalil chkiltik li mol-meʼeletike

[Lokʼol ta pajina 7]

American Spirit Images/age fotostock