Li kʼusitik tsjakʼ jkʼel vunetike

Mi chal Jeova ti mu stakʼ ichʼel ta mukʼ jecheʼ diosetike, ¿kʼu yuʼun muʼyuk laj yakʼbe kastigo li Aarón ta skoj ti la spas chʼiom tot vakax ta kʼanal takʼine?

Jech kʼuchaʼal chal ta kapitulo 32 yuʼun Exodoe, li Aarone la spas jun chʼiom tot vakax ta kʼanal takʼin, ti jaʼ jech muʼyuk la xchʼun li mantal ti mu stakʼ xichʼik ta mukʼ yan diosetike (Éxo. 20:3-5). Ta skoj taje, li Jeovae «batsʼi tsots iʼilin ta stojol li Aarone; jutuc xa mu la smil o». Pe li Moisese kʼopoj ta stojolal li sbankile (Deu. 9:19, 20). Ta sventa taje, ¿mi kʼot ta pasel li beiltasel ti «cʼalal tscʼopan Dios bochʼo tucʼ yoʼntone, oy lec stsatsal li scʼope»? (Sant. 5:16). Kʼot. Ta skoj ti xvokolet ta skoj Aarón li Moisese, li Jeovae muʼyuk laj yakʼbe kastigo. Pe yaʼeluke oy yan chib srasonal ti kʼu yuʼun muʼyuk jech la spase.

Li baʼyele jaʼ ta skoj li labal sba stukʼil yoʼonton yakʼoj ta ilel li Aarone. Kʼalal laj yalbe mantal Moisés ti akʼo xbat skʼel faraón xchiʼuk ti akʼo xbat slokʼes ta Egipto li steklumal Jeovae, la stak batel Aarón sventa chbat xchiʼin xchiʼuk xkʼot ta yajkʼopojel (Éxo. 4:10-16). Xchaʼvoʼalik la xchʼunik li mantal laj yal Jeovae xchiʼuk ep ta velta batik ta stojolal li ajvalile, toj chopol chʼamatik ta skoj ti toj tsots yoʼontone. Jaʼ yuʼun, kʼalal lokʼik ta Egiptoe, li Aarone yakʼoj xaʼox ta ilel ti tukʼ yoʼonton ta stojolal Diose (Éxo. 4:21).

Li xchibal srasonale jaʼ ti skʼan jtsaktik ta venta li kʼusitik kʼot ta pasel ti jaʼ ta skoj la spas-o li chʼiom tot vakax ta kʼanal takʼine. Jvules ta joltik ti oy xa 40 kʼakʼal ti te oy ta vits Sinaí li Moisese. «Cʼalal laj yil israeletic ti ijalij ta vits li Moisese», la sujik li sbankil sventa akʼo spas junuk sdiosike, li Aarone la spas li kʼusi tskʼanike (Éxo. 32:1-6). Akʼo mi jech, li kʼusi la spas ta tsʼakale chakʼ ta ilel ti tspʼaj li kʼusitik la spasik li buchʼutik chichʼik ta mukʼ jecheʼ diosetike xchiʼuk ti jaʼ jech la spas ta skoj ti laj yichʼ sujele. Kʼalal kʼopoj li Moisés sventa chichʼ lajesel li jtoybaetike, skotol li xnichʼnab Levie —ti te tsakal skʼoplal li Aarone— laj yakʼ sbaik ta stojolal Jeova. Vaʼun laj yichʼ milel li buchʼutik la slikesik li toybaile: te van oxmiluk j-israeletik (Éxo. 32:25-29).

Ta mas tsʼakale, xi laj yalbe j-israeletik li Moisese: «Li voʼoxuque ataoj xa tsots amulic» (Éxo. 32:30). Jaʼ yuʼun chaʼa, li Aarone maʼuk noʼox stuk li kʼusi chopol la spase. Li stuke xchiʼuk li jteklume la stabeik sbalil li smukʼul xkʼuxul yoʼonton Jeovae.

Kʼalal echʼ xaʼox taje, li Jeovae laj yalbe mantal Moisés ti akʼo svaʼan kʼuchaʼal mero bankilal pale li Aarone: «Acʼbo slap li chʼul cʼuʼile. Jaʼo xajaxbe aceite ta sjol sventa vocʼbil chcom o ta paleal cuʼun» (Éxo. 40:12, 13). Jamal ta ilel ti laj xa yakʼbe perton li smule, yuʼun li ta yut yoʼontone, li Aarone ta sjunul yoʼonton tspakbe skʼoplal li melel yichʼel ta mukʼ Diose, xchiʼuk maʼuk jun jtoyba ti chichʼ ta mukʼ jecheʼ diosetike.