Tsotsukot-o ta mantal kʼalal cha chabi li buchʼu ip avuʼune

JUN yajrextiko Jeova ti Kim sbie, la stabeik jun tumor nopol ta sbakil spat, ti jaʼ to te laj yilik ti tsakbil ta kansere. * Xi tsvules ta sjol li smalal ti Steve sbie: «Baʼyel la sjosbeik lokʼel li tumore, vaʼun laj yakʼbeik radioterapia xchiʼuk quimioterapia. Ta skoj ti kʼunib tajek yuʼun li poxtaele, mu xbakʼ lek kom».

¿Mi xnop avuʼun yaʼeluk kʼu to yepal laj yat yoʼonton Steve kʼalal chil kʼuyelan chakʼbe yipal ta stsalel xchamel li yuni ajnil ti skʼanoj tajeke? Xuʼ van oy junuk avutsʼ avalal ti yakal chlubtsanat batel yuʼun jun chamel o ta skoj li malubele (Ecl. 12:1-7). Mi jaʼ jeche, jaʼ noʼox me lek cha chabivan mi lek cha kʼel aba atuke. Skʼan tsotsukot-o ta mantal, yuʼun mi moʼoje xuʼ xa ipaj ta avoʼonton xchiʼuk ta abekʼtal atakopal, ta skoj taje xuʼ van mu xa xuʼ avuʼun xa kolta ti kʼuyelan chtun yuʼunike. ¿Kʼuxi xuʼ oyuk noʼox smelolal chichʼ pasel li kʼusitik oy ta jbatik ta tsobobbail xchiʼuk li xchabiel junuk kutsʼ kalaltik ti ip chaʼi o ti malubem xae? ¿Kʼuxi xuʼ xkoltavanik li ermanoetik ta tsobobbaile?

Kʼuxi oyuk noʼox smelolal

Sventa mu xi j-ipaj ta sventa ti kʼuyelan oyutik ta mantal xchiʼuk ta jbekʼtal jtakopaltik kʼalal ta jchabi junuk kutsʼ kalaltik ti ipe, skʼan me oyuk noʼox smelolal kʼusi ta jpastik xchiʼuk jkʼeltik lek kʼuxi ta jtunestik li jkʼakʼaltik xchiʼuk kipaltike. Jech kʼuchaʼal chal Proverbios 11:2, «li bochʼo biqʼuit chacʼ sbae chlic bijubuc», jaʼ xkaltik, li buchʼutik snaʼojik ti oy kʼusitik mu spas yuʼunike. Jaʼ yuʼun mi mu jkʼantik lubem xi jkome, skʼan jkʼeltik lek ti kʼuyelan ta jtunes li jkʼakʼaltik xchiʼuk li kʼusitik oy ta jbatike.

 Jaʼ jech bikʼit laj yakʼ sba xchiʼuk oy spʼijil sventa spas yuʼun jech li Steve. Maʼuk noʼox ch-abtej ta skʼelel li snae, yuʼun jaʼ toʼox jbabe yuʼun moletik xchiʼuk jkʼelcholmantal ta jun tsobobbail ta Irlanda. Jech xtok stsakoj yabtel ta Komite ti Tsbeiltasvan batel ta Ospitaletik ti bu nakale. «Li Kime muʼyuk bu laj yal ti kiktaoj chaʼi sba ta skoj ti ep kʼusitik jbainoje —xi chal Steve—, pe jnaʼoj ti toj ep li kabtele. Kʼalal laj xaʼox jpas ep orasione, laj kikta li kabtel ta jbabe yuʼun moletike. Jaʼ xa noʼox kʼuchaʼal mol li kom, pe kʼalal laj kikta jlomuk li kabtel kichʼoje, mas xa xokolun ta skʼelel li kajnile xchiʼuk ti chkakʼbe li kʼusitik chtun yuʼune.»

Kʼalal kol xaʼox li Kime, li nupultsʼakal taje la skʼelik yan velta ti kʼuyelan oyike. Koliyal ti koltaat yuʼun yajnile, la stsak yan velta yabtel ta tsobobbail li Steve. «Jchaʼvoʼalkutik la jchankutik ti oy kʼusitik mu spas kuʼunkutik ta skoj li chamele —xi chal li malalile—. Ta jtojbe tajek ta vokol Jeova li koltael chakʼe xchiʼuk li kajnile, akʼo mi muʼyuk bu lek chaʼi sba, persa tskoltaun xchiʼuk muʼyuk kʼusi chal.»

Avie jkʼelbetik skʼoplal jun jkʼelvanej ta sirkuito ti Jerry sbie xchiʼuk yajnil ti Mary sbie, ti la sjelik kʼusi oy ta yoʼontonik stael ta skoj ti bat xchabiik stot smeʼ Jerry ti malubemik xae. «Li voʼon xchiʼuk jmalale ta jkʼan  chi tunkutik ta misioneroal ta yan balumil —xi chal Mary—, pe jaʼ noʼox stuk ol-nichʼonil li jmalale, xchiʼuk skʼanik koltael li stot smeʼe. Jaʼ yuʼun la jnop chi komkutik ta Irlanda sventa ta jchabikutik. Jaʼ jech xuʼ la jkʼelkutik stot Jerry ti kʼu sjalil tikʼil ta ospitale, jaʼ to ti kʼalal chame. Li avie skotol kʼakʼal ta jkʼoponkutik li jmeʼalibe xchiʼuk nopol oyunkutik mi oy kʼusi chtun yuʼune. Ep skoltaojunkutik li stsobobbaile, koliyal taje xuʼ xi tunkutik-o ta sirkuito.»

Kʼusi xuʼ spas li yantike

Kʼalal laj yalbe skʼoplal kʼuxi xuʼ skolta meʼon antsetik ti malubemik xa li tsobobbaile, xi la stsʼiba li Pabloe: «Li bochʼo muʼyuc ta yoʼnton yutsʼ yalaltaque, me jaʼuc li stot smeʼe xchiʼuc li yajnil xnichʼnabe, altic chal ti xchʼunoj Cajvaltique. Jaʼ xjelov xchopolil jech chac cʼu chaʼal li bochʼo muʼyuc xchʼunojique». Li jtakbole lek laj yalbe skʼoplal ti oy ta sba yajtsʼaklom Cristo yakʼbel kʼusitik chtun yuʼun li stot meʼ, syaya xchiʼuk smukʼtot ti malubemik xae, yuʼun «toj lec chil li Diose» (1 Tim. 5:4, 8). Manchuk mi jech, li yan ermanoetik ta tsobobbaile xuʼ xchiʼuk skʼan skolta sbaik ek.

Kalbetik skʼoplal Hakan xchiʼuk Inger, jun nupultsʼakal ti malubemik xa ti nakalik ta Sueciae. «Kʼalal la stabeik kanser li kajnile —xi chal Hakan— toj j-echʼ noʼox chopol laj kaʼikutik. Li Ingere mu toʼox snaʼ x-ipaj xchiʼuk lek tsots, pe li avi une skʼan chi batkutik skotol kʼalal ta ospital sventa chichʼ poxtael. Xchiʼuk xtok, chlubtsanat tajek li poxiletik chichʼe. Ti vaʼ sjalil taje muʼyuk bu xlokʼ li ta jnakutike, xchiʼuk skʼan te chi kom sventa ta jchabi.» ¿Kʼuxi koltaatik yuʼun stsobobbailik li Hakan xchiʼuk Ingere?

Li moletike la xchapanik sventa chaʼiik ta telefono li tsobajeletike. Xchiʼuk xtok, chvulaʼanatik yuʼun li ermanoetike, chkʼoponatik ta telefono xchiʼuk chtakbatik batel karta xchiʼuk bikʼtal vunetik. Xi chal li Hakane: «Laj kaʼikutik ti tskoltaunkutik li Jeovae xchiʼuk skotol li ermanoetike. Ti muʼyukuk la skoltaunkutike kʼunib jechuk li xchʼunel koʼontonkutike. Koliyal ti kol li Ingere, yakal xa chi kʼotkutik yan velta ta Salon sventa Tsobobbail». Ta melel, li yajtsʼaklom Cristo ti tskolta ti bu kʼalal xuʼ yuʼun li buchʼutik ipik xchiʼuk buchʼutik malubemik xa ta tsobobbaile, jaʼ li «bochʼo lec jcʼopan jba jchiʼuctique lec onoʼox scʼanojutic; jaʼ jchiʼiltic ta voqʼuel chcʼot ti cʼalal oy jvocoltique» (Pro. 17:17).

Ep sbalil chil avabtel li Jeovae

Akʼo mi ep chi jlub kʼalal ta jchabitik junuk kutsʼ kalaltik ti ipe, ta jtabetik sbalil. Li ajvalil Davide laj yal ti «xcuxet noʼox yoʼnton li bochʼo oy ta yoʼnton» tskolta li buchʼutik abol sbaike, ti te tsakal skʼoplal li buchʼutik tsots ipike (Sal. 41:1).

¿Mi xuʼ van xmuyubajik ta melel li buchʼutik chchabiik junuk yutsʼ yalalik ti ip chaʼie? Xuʼ, yuʼun li Proverbios 19:17 xi chal ta melele: «Li bochʼo chacʼbe xqʼuex meʼon cʼusi oy yuʼune jaʼ laj yacʼbe o chcʼot li Diose; jech noxtoc jaʼ stuc Mucʼul Dios chacʼbe [sutel] stojol li cʼusi lec tspase». Li melel Diose mas to oy ta yoʼonton li tukʼil yajtuneltak ti chil svokolik ta skoj chamele xchiʼuk chakʼbe bendision li buchʼutik chchabiike. Xi la skʼejinta li Davide: «Jaʼ ta xcoltaat yuʼun Mucʼul Dios [li buchʼu ip] ti cʼalal mochol ta svayab oy cʼusi cʼux chaʼye; li xchamele ta xcʼataj ta stsatsal sbecʼtal» (Sal. 41:3). Jech noxtok, xuʼ jchʼuntik ta melel ti mi la sta svokol li buchʼu chchabivane, chkoltaat yuʼun Jeova ek.

¡Toj lek xa noʼox ti jnaʼojtik ti ep sbalil chil Jeova ti ta jchabitik li kutsʼ kalaltik ti ip chaʼiike! Akʼo mi tsots skʼan chkakʼ kiptik sventa spasel jech, li Vivliae chalbutik ta melel ti «jaʼ li matanal toj lec chil Diose» (Heb. 13:16).

[Tsʼib ta yok vun]

[Lokʼol ta pajina 18]

Oyuk noʼox smelolal li kʼusitik cha pas sventa mantale xchiʼuk chʼamo li koltaele