Chchabiutik li steklumal Jeovae
Chchabiutik li steklumal Jeovae
«Ta stojol yepal avuʼuntac [o ta tsobobbail] ta jtojbot ta vocol.» (SAL. 35:18)
1-3. 1) ¿Kʼuxi van xuʼ stikʼ sba ta kʼusitik xibal sba li jun yajtsʼaklom Cristo ti xuʼ sok-o ta mantale? 2) ¿Bu xuʼ jtatik chabiel li yajtunelutik Diose?
KʼALAL jaʼo batemik ta vakasion li Joe xchiʼuk yajnile bat skʼelik li kʼusitik yan sba yutsil ta yut nab te ta kʼixin osile, ti noj ta choyetik ti jeltos smukʼtikil xchiʼuk skolorale. La slap smaskaraik xchiʼuk la xoj ta yeik li uni neneʼ tuvo sventa chichʼik-o ikʼe, vaʼun nuxinajik batel ti bu oy li kʼusitik kʼupilik sba tajeke. Xi laj yal li yajnil kʼalal laj yil ti te xa yakal chnuxinajik batel ti bu nat tajek li voʼe: «Chkile chi jnamaj xa batel tajek», vaʼun xi la stakʼ li Joe: «Mu xa xiʼ. Jnaʼoj li kʼusi ta jpase». Pe mu ta sjaliluke labal to laj yil ti chʼabal xa te li choyetike. Toj xiʼel to kʼot kʼalal laj yakʼ venta ti kʼu yuʼune, yuʼun jaʼ to laj yile te xtal jkot tivuron. Mu xa bu chkol. Nopaj tal tajek ta stojolal li mukʼta choy ti xibal sbae, pe te van kʼu yuʼun une sut batel.
2 Mi chakʼ sba ta loʼlael yuʼun sbalumil Satanás xchiʼuk li kʼusitik chkʼupij-o oʼontonal li jun yajtsʼaklom Cristoe —jech kʼuchaʼal li chʼayob oʼontonale, li ta sventa abtelale xchiʼuk li saʼel kʼulejale— yikʼaluk me mu xakʼ venta ti yakal xa tstikʼ sba ochel li ta voʼ xkaltik ti bu toj xibal sbae. Li Joe ti chtun ta mol ta tsobobbaile xi chale: «Jaʼ jech xuʼ xkaltik ta mantal ek li kʼusi la jnuptane, ti jaʼ lek te noʼox xi jnuxinaj li ta lekil voʼe, jaʼ xkaltik, li ta tsobobbaile xchiʼuk ti mu me xbat jchiʼintik li buchʼutik chopolike». Jaʼ jech, skʼan me mu yaleluk te xi jbat ti bu nat li voʼ xkaltike, yuʼun mi jeche jtuk me bu chi jkom xchiʼuk xiʼel me xchʼay li xchʼunel koʼontontike. Skʼan me xi jsut tal ta anil ta tsobobbail mi jech la jpastike. Yuʼun mi moʼoje, ta me stiʼutik li kajkontratike.
3 Toj xibal me sba ta sventa yajtsʼaklomtak Cristo li balumil liʼe (2 Tim. 3:1-5). Yuʼun snaʼoj ti chapbil xa noʼox skʼakʼalil li Satanase, jaʼ yuʼun tskʼan tstiʼ li buchʼu mu xchabi sbae (1 Ped. 5:8; Apo. 12:12, 17). Pe li kʼusi mas leke jaʼ ti mu jtuktikuke, xuʼ jtunestik li pojobbail yakʼoj Jeova ta mantale: li tsobobbaile.
4, 5. ¿Kʼu yelan chil ep krixchanoetik li kʼusi chtal ta jelavele, xchiʼuk kʼu yuʼun?
4 Li chabiel chakʼ balumil avie oy noʼox spajeb. Ep krixchanoetik ti muʼyuk bu jun yoʼontonik ta skoj ti toj echʼem krixchanoetik ti chmilvanike, ti chmajvanike, ti yantik xtoy stojol li kʼusitik chtun kuʼuntike xchiʼuk ti jelel xa tajek li balumile, ti toj kʼixin tajek bakʼintike o ti chakʼ tajek voʼe. Jech xtok skʼan xkuch batel kuʼuntik li chameletik xchiʼuk li malubele. Li buchʼutik oy yabtelik, snaik, stakʼinik xchiʼuk ti mu noʼox snaʼ mas x-ipajike tsnopik mi jech-o jun yoʼontonik taje.
5 Kʼux ta alel, pe ep krixchanoetik muʼyuk bu jun yoʼontonik xchiʼuk muʼyuk bu staoj chaʼiik li kʼusi ox tskʼanik ta nupunele xchiʼuk li ta yutsʼ yalalike. Li ta sventa mantal xtoke ep krixchanoetik ti chʼayem noʼox chaʼiike, akʼo mi oy srelijionik. Ep ti buchʼutik chchibal kʼoptaik li beiltasel chakʼ spastorike, mas to ti kʼalal chilik ti chmulivajike xchiʼuk ti mu jechuk chchanubtasvanik kʼuchaʼal chal Vivliae. Jaʼ yuʼun jaʼ lek chilik ti tspat-o yoʼontonik li siensiae, li kʼusi chal krixchanoetik ta slekil yoʼontonike xchiʼuk li kʼusi lek chaʼi tsnop krixchanoetike. Jaʼ yuʼun toj ep ti muʼyuk jun yoʼontonike chaʼa o ti mu skʼan snopbeik skʼoplal li kʼusi chtal ta jelavele.
6, 7. 1) ¿Kʼu yuʼun jelel chkiltik kuxlejal li yajtunelutik Diose? 2) ¿Kʼusi ta jkʼelbetik batel skʼoplal?
6 Pe jelel me tajek kʼuyelan chilik kuxlejal li yajtsʼaklomtak Cristoe. Akʼo mi jechtik onoʼox jvokoltik kʼuchaʼal yantike, mu parejouk ti kʼuyelan ta jtsaltike (kʼelo Isaías 65:13, 14 xchiʼuk Malaquías 3:18). ¿Kʼu yuʼun? Yuʼun jun koʼontontik yuʼun ti kʼuyelan xchapojbutik Vivlia ta sventa ti kʼuyelan oy li krixchanoetike xchiʼuk xchapanojutik lek sventa stsal kuʼuntik li vokoliletik ta jnuptan ta jkuxlejaltike. Jech oxal muʼyuk chkat-o koʼontontik li kʼusi chtal ta jelavele. Ta sventa ti yajtunelutik Jeovae, jaʼ jech muʼyuk chi jlaj ta loʼlael li ta jecheʼ chanubtaseletike xchiʼuk li ta chanubtaseletik ti mu jechuk chal Vivliae, xchiʼuk muʼyuk bu chkil jvokoltik ta skoj li mulivajel xtoke. Jech oxal jun koʼontontik li voʼotike, ti jaʼ muʼyuk jechik li krixchanoetik ta balumile (Isa. 48:17, 18; Fili. 4:6, 7).
7 Li Vivliae chalbe skʼoplal ti oy kʼusi kʼotem ta pasel ti jaʼ tskoltautik sventa oyuk sbalil xkiltik li jun chabiel ta jtatik li voʼotik ti chkichʼtik ta mukʼ Jeovae. Jkʼeltik batel taje, sventa jkʼel lek kʼuyelan li jtalelaltike. Jaʼ me jech xuʼ xkakʼ lek ta jkuxlejaltik li tojobtaseletik yakʼoj Dios sventa chchabiutike (Isa. 30:21).
«Jutuc xa mu liyal ta lum»
8. ¿Kʼusi muʼyuk spasojik tal li yajtuneltak Jeovae?
8 Li buchʼu onoʼox tskʼan chchʼunbe smantal Dios ta voʼnee muʼyuk me chchiʼin li buchʼutik muʼyuk chtunik ta stojolal Diose. Jech, li Jeovae laj onoʼox yal ti jaʼik yajkontratak steklumal li buchʼutik tstsʼakliik Satanase (Gén. 3:15). Mu skʼan xchanbeik stalelal krixchanoetik ta balumil li yajtuneltak Diose, yuʼun tskʼan chchʼun ta sjunul yoʼontonik li beiltaseletik ta Vivliae (Juan 17:15, 16; 1 Juan 2:15-17). Pe mu me kʼunuk ta pasel chaʼiik bakʼintik taje. Jaʼ yuʼun oy junantike tsjakʼbe sbaik mi lek ti jech ep kʼusitik chikta ta xkuxlejalike.
9. ¿Kʼusi la svul-o yoʼonton li buchʼu la stsʼiba Salmo 73?
9 Jun yajtunel Jeova ti la sjakʼbe sba mi lek li kʼusi la snop tspas ta xkuxlejale jaʼ li buchʼu la stsʼiba li Salmo 73, ti jaʼ snitilul Asaf yaʼele. Mu snaʼ kʼu yuʼun lek noʼox xkuxlejalik li buchʼutik chopolike xchiʼuk ti xmuyubajik noʼoxe, ti oy ep tukʼil krixchanoetik ti jaʼ chil svokolike (kʼelo Salmo 73:1-13).
10. ¿Kʼu yuʼun tsots skʼoplal ti jkʼeltik lek li kʼusi la svul-o yoʼonton li jtsʼibajom yuʼun salmoe?
10 ¿Mi oy jech avuloj avoʼonton kʼuchaʼal li jtsʼibajom yuʼun salmoe? Mi jeche, mu me xavakʼ xa yilbajin ti oy amul chavaʼie o ti cha nop ti yantik xa xkʼunib li xchʼunel avoʼontone. Oy ep yajtuneltak Jeovae jaʼ jech svuloj yoʼontonik, jlome jaʼik li buchʼutik la stsʼibaik Vivliae (Job 21:7-13; Sal. 37:1; Jer. 12:1; Hab. 1:1-4, 13). Ta melel, xi onoʼox me tsjakʼbe sbaik skotol li buchʼutik tskʼan tslekubtasbeik yoʼonton Diose: ¿Mi jaʼ lek ti ta jchʼunbe smantal Jeovae? Ti vaʼ yelan chichʼ jakʼele te me tsakal skʼoplal xchiʼuk li kʼusi la slikesbe skʼoplal Satanás ta nichimaltik Edene: jaʼ li kʼusi laj yichʼ chibal kʼoptael ta sventa li mukʼul pas mantal ta vinajel-balumile (Gén. 3:4, 5). Jaʼ yuʼun tsots me skʼoplal ti jkʼeltik lek li kʼusi la sjakʼ jtsʼibajom yuʼun salmoe. ¿Mi lek van ti x-itʼixaj koʼontontik ta stojolal li chopol krixchanoetik ti tstoy sbaik ta skoj ti lek chbat xkuxlejalike? ¿Mi jaʼ van lek ti mu xa jchʼunbetik smantal li Jeovae xchiʼuk ti jech xlik jpastik kʼuchaʼal stukike? Jaʼ xa lek chil Satanás maʼ taje.
11, 12. 1) ¿Kʼusi koltaat li jtsʼibajom yuʼun salmo sventa stsal yuʼun taje, xchiʼuk kʼusi xuʼ jchantik ta stojolal? 2) ¿Kʼusi la skoltaot sventa jechuk xkʼot ta nopel avuʼun kʼuchaʼal li jtsʼibajom yuʼun salmoe?
11 ¿Kʼusi koltaat li jtsʼibajom yuʼun salmo sventa stsal yuʼun taje? Laj yakʼ venta ti jutuk xa mu yal ta lum ta mantale, akʼo mi jech, jaʼ to te la sjel stalelal kʼalal «[och] ta chʼulna» yuʼun Diose xchiʼuk kʼalal la xchiʼin ta loʼil krixchanoetik ti chʼiemik ta mantal tee, vaʼun jaʼ te la snopbe lek skʼoplal li kʼusi tskʼan tspas Diose. Jaʼ to te laj yaʼibe smelolal kʼusi tsnuptan li jpas muliletike, vaʼun mu skʼan ti jech snuptan eke. Laj yaʼibe smelolal ti xkoʼolaj kʼuchaʼal bilil be ti kʼuyelan xkuxlejalike xchiʼuk li kʼusitik snopoj tspasike. Skotol li buchʼutik chiktaik Jeovae «ta xiʼel noʼox xuʼ chlajic». Yan li buchʼutik chtunik ta stojolale ta me xichʼik chabiel (kʼelo Salmo 73:16-19, 27, 28). Ta melel, kilojtik xa me ti melel taje. Yikʼaluk van ep buchʼutik toj lek chaʼiik ti jech xkuxiik ti kʼuyelan tskʼan yoʼontonike, ti muʼyuk bu tstaik ta naʼel Diose, pe bu cha ta un ta onoʼox me xil-o svokolik li kʼusi tspasike (Gál. 6:7-9).
12 ¿Kʼusi chakʼ jchantik mas taje? Jaʼ ti jaʼ noʼox xuʼ te jtatik chabiel xchiʼuk pʼijilal li ta steklumal Diose. Kʼalal bat ti bu mero yichʼobil ta mukʼ Dios li jtsʼibajom yuʼun salmoe lik tukʼibuk li snopbene xchiʼuk ta smelol xa li kʼusi la snope. Li avi eke, te me ta jtatik pʼijil tojobtasel li ta tsobobbaile xchiʼuk te me ta jtatik li veʼlil ti lek tsotsutik-o ta mantale. ¡Jaʼ yuʼun chalbutik Jeova ti mu xi jpaj li ta tsobajele chaʼa! Jaʼ te ta jta spatobil koʼontontik xchiʼuk tstij koʼontontik ta spasel li kʼusi leke (Isa. 32:1, 2; Heb. 10:24, 25).
Jtʼujtik lek li buchʼutik ta jchiʼintike
13-15. 1) ¿Kʼusi la snuptan li Dinae, xchiʼuk kʼusi chakʼ jchantik li kʼusi la snuptane? 2) ¿Kʼu yuʼun tskoltautik ti jaʼ ta jchiʼintik li yajtsʼaklomtak Cristoe?
13 Li kʼusi la snuptan Dinae, li stseb Jacobe, chakʼ kiltik ti toj xibal kʼusi xuʼ jnuptantik mi jaʼ ta jchiʼintik li buchʼutik chopolike. Li loʼil te ta jtatik ta Genesise chal kaʼitik ti nopem xaʼi chkʼot xchiʼin Dina li tsebetik ta Canaán ti nopol xil yutsʼ yalale. Pe li jnaklejetik ta Canaane muʼyuk bu chchʼunik li tsatsal beiltaseletik chakʼ Jeova ta sventa li yajtuneltake. Moʼoj, yuʼun kʼuchaʼal chal li buchʼutik chchanbe skʼoplal li kʼusitik voʼne mukajtike, laj la snojesik ta yichʼel ta mukʼ yan diosetik li slumalike, ta mulivajel, ta majbail xchiʼuk ti toj ibal xa noʼox sba ti kʼuyelan chichʼik ta mukʼ ti bu tslutsʼ sbaik ta vayel viniketik xchiʼuk antsetike (Éxo. 23:23; Lev. 18:2-25; Deu. 18:9-12). Mu me jchʼay ta joltik li kʼusi kʼot ta pasel ta skoj li buchʼutik la xchiʼin Dinae.
14 Li Vivliae chal kaʼitik ti «jaʼ noʼox [la] stuc lec ichʼbil ta mucʼ te ta sna [stot]» li Siquem ta Canaane, «la stsatsal-tsac; laj yutsʼinta» li Dinae (Gén. 34:1, 2, 19). ¡Toj chopol xa noʼox ti kʼusi kʼot ta pasele! ¿Mi laj van snop Dina xa naʼ ti jech onoʼox tsnuptane? Yikʼaluk muʼyuk, ti kʼusi noʼox tskʼane jaʼ ti chamigoin li kerem-tsebetik tee xchiʼuk ti lek yoʼontonik laj yile. Pe bu cha ta, laj ta loʼlael ta bu kʼalal li Dinae.
15 Oy kʼusi tsots skʼoplal chakʼ jchantik taje: jecheʼ me ta jloʼla jbatik mi ta jnoptik ti muʼyuk kʼusi ta jnuptantik kʼalal chkamigointik li buchʼutik maʼuk yajtuneltak Jeovae. Jech kʼuchaʼal tspʼijubtasutik li Vivliae «me ta jchiʼintic li bochʼotic chopolique, chisoquesbutic li jlequil taleltique» (1 Cor. 15:33). Pe kʼalal jaʼ ta jchiʼintik li buchʼutik koʼol kʼusi jchʼunojtik xchiʼuke xchiʼuk ti jmoj jkʼanojtik Jeovae ta me skoltautik, yuʼun jmoj li mantaletik sventa jtalelaltik ta jchʼuntike. Ta onoʼox me stijik koʼontontik sventa jaʼuk jpastik li kʼusi leke (Pro. 13:20).
«Ta orae pocbiloxuc xa»
16. ¿Kʼusi laj yal Pablo ta sventa jlom yajtsʼaklomtak Cristo ta Corinto?
16 Li tsobobbaile skoltaoj ep krixchanoetik sventa xiktaik li kʼusitik ibal sba nopem xaʼiik spasele. Li baʼyel skarta Pablo ti la stakbe echʼel li yajtsʼaklomtak Cristo ta Corintoe te chalbe skʼoplal li kʼusitik la sjel ta xkuxlejalik sventa xchʼunbeik smantaltak li Diose. Jlome ep kʼusitik chopol spasojik, jech kʼuchaʼal mulivajel, yichʼel ta mukʼ yan diosetik, tsloʼla xchiʼilik ta nupunel, skʼupinel xchiʼilik ta vinikal o ta antsil, elekʼ xchiʼuk yakubel. Pe xi albatik yuʼun li Pabloe: «Ta orae pocbiloxuc xa» (kʼelo 1 Corintios 6:9-11).
17. ¿Kʼuxi sjelojbe xkuxlejal epal krixchanoetik li beiltaseletik ta Vivliae?
17 Li krixchanoetik ti chʼabal xchʼunel yoʼontonike muʼyuk kʼusi lek tsbeiltas-o li xkuxlejalike. Bakʼintike tskʼel stukik bu junukal be tstamik batel, moʼoj xtoke chakʼ ti akʼo xbeiltasbat xkuxlejalik yuʼun li chopol talelal ta spat xokonike, jech kʼuchaʼal la spasik li buchʼutik ta Corinto ta baʼyel siglo ti kʼalal mu toʼox chkʼotik ta yajtsʼaklom Cristoe (Efe. 4:14). Pe toj echʼem me sjuʼel li yojtikinel lek sKʼop Diose xchiʼuk li kʼusitik tskʼan Diose. Li buchʼutik chakʼ ta xkuxlejalik li kʼusi chale ta me xlekubtasbat xkuxlejalik (Col. 3:5-10; Heb. 4:12). Kʼalal mu toʼox bu tspasik li kʼusi chal stukʼil mantaltak Jeova ep ermanoetike, jaʼ toʼox tspasik li kʼusi tskʼan yoʼontonike. Pe yakʼojik venta ti muʼyuk bu jun yoʼontonike xchiʼuk ti muʼyuk bu xmuyubajike, ti jaʼ to te la sta spatobil yoʼontonik kʼalal ochik li ta steklumal Diose xchiʼuk kʼalal lik yakʼ ta xkuxlejalik li beiltaseletik ta Vivliae.
18. ¿Kʼusi laj yil ta xkuxlejal jun tseb, xchiʼuk kʼusi chchanubtasutik taje?
18 Pe jaʼuk li buchʼutik la skomtsanik li lekil voʼe —jaʼ xkaltik, li tsobobbaile— kʼux tajek chaʼiik. Jun ermana ti Tania chkakʼbetik sbiine chal kaʼitik ti ta sbikʼtal onoʼox lik xchan li mantale, pe kʼalal yichʼoj xaʼox vaklajuneb jabile laj yakʼ ti akʼo xnitbat yoʼonton yuʼun «li kʼusitik kʼupil sba ta balumile». Pe oy kʼusitik toj chopol la snuptan, june jaʼ ti la xchiʼin yole manchuk mi mu skʼan xchiʼuk la syales. Li avi une xi chakʼ ventae: «Ti oxib jabil li lokʼ ta s-organisasion Diose solel mu xa noʼox xchʼay xkʼuxul ta koʼonton li kʼusi la jnuptan ta skoje. Jtos ti kʼusi mu junuk-o koʼontone jaʼ ti la jmil li kole. [...] Jnaʼoj ti oy kerem-tsebetik ti tskʼan tspas yaʼiik preva jutukuk li kʼusi chakʼ balumil liʼe. Li kʼusi cha kalboxuke jaʼ liʼe: “¡Mu me xa pasik jech!”. Yikʼaluk van lek tajek chavaʼiik li ta slikebale, pe ta tsʼakal une toj chopol me li kʼusi cha nuptanik ta skoje. Naka vokolil noʼox chakʼ maʼ li balumil liʼe. Yuʼun kiloj jtuk ti jech chkale. Te me komanik-o li ta steklumal Jeovae. Yuʼun jaʼ noʼox xuʼ te xa taik li muyubajele».
19, 20. ¿Kʼuxi chchabiutik li tsobobbaile, xchiʼuk kʼusi skʼan jpastik sventa xchabiutik?
19 ¿Kʼusi van ta jnuptantik mi laj kiktatik li chabiel ta jtatik ta tsobobbaile? Ep buchʼutik ti mu jsetʼuk skʼan snopbeik skʼoplal taje, yuʼun xvul to ta stojolik ti chʼabal sbalil li xkuxlejalik kʼalal mu toʼox chchanik li mantale (Juan 6:68, 69). Sventa jech-o jkʼupintik li chabiele xchiʼuk ti mu jnuptantik li at-oʼontonetik ti stalel jech ta sbalumil Satanase skʼan nopol oyutik ta stojolal li ermanoetike. Kʼalal jaʼ ta jchiʼintik taje xchiʼuk ti chi jkʼotilan li ta tsobajele jaʼ me tskoltautik ta yakʼel ta koʼontontik ti jaʼ toj lek li smantaltak Diose xchiʼuk tstijik koʼontontik ta xchʼunel. ¡Toj ep me srasonal kuʼuntik sventa ta jkʼupil kʼoptatik Jeova «ta stojol yepal [y]uʼuntac [o ta tsobobbail]» kʼuchaʼal la spas li jtsʼibajom yuʼun salmoe! (Sal. 35:18.)
20 Veno, pe ta me snuptanik vokolil skotol li yajtsʼaklomtak Cristoe, ti jaʼ vokol-o chaʼiik sventa tukʼ yoʼonton xakʼ sbaik ta stojolal li Jeovae. Yikʼaluk van jaʼ noʼox skʼanik jutuk beiltasel kʼalal jech tsnuptanik taje. ¿Kʼusi xuʼ spasik li buchʼutik ta tsobobbail sventa skoltaike? Li ta yan xchanobil chtale chakʼ kiltik kʼuxi stakʼ jpatbetik yoʼontonik xchiʼuk ti jtsatsubtastik li kermanotaktike (1 Tes. 5:11).
¿Kʼusi cha takʼ?
• ¿Kʼusi ta jchantik ta sventa li kʼusi la snuptan li jtsʼibajom yuʼun Salmo 73?
• ¿Kʼusi ta jchantik ta sventa li kʼusi la snuptan Dinae?
• ¿Kʼuxi chchabiutik li stsobobbail yajtsʼaklom Cristoe?
[Sjakʼobiltak sventa xchanobil]
[Lokʼol ta pajina 7]
Te xa nuxinaj li ta lekil voʼe: mu me xavikta li tsobobbaile