Kʼuxi xuʼ stsal avuʼun ti la smukul satiot anup achiʼile

LI Margarita xchiʼuk smalal ti Raúl sbie oy xa ta sjayibal jabil chtunik ta spasbel yabtel Jeova ta tsʼakal ora. * Pe kʼalal mu toʼox jaluk svokʼel li sbaʼyel neneʼike, namaj ta stojolal Jeova li Raule, lik mulivajuk, vaʼun laj yichʼ lokʼesel ta tsobobbail. Xi chal li Margaritae: «Chi cham xa laj kaʼi kʼalal jech kʼot ta pasele. Kʼux tajek laj kaʼi xchiʼuk mu xa jnaʼ kʼusi ta jpas».

Jaʼ jech li Jane eke manchuk mi spatoj yoʼonton ta stojolal smalal xchiʼuk ti chichʼ ta mukʼe, laj yakʼ venta ti muʼyuk xa ichʼbil ta mukʼe. Chopol kʼusi lik pasbatuk kʼalal mu toʼox jaluk snupunelike. Xi chal kaʼitike: «Labal to laj kil ti kʼalal la smajun ta sba veltae, solel toj chopol laj kaʼi xchiʼuk toj kʼexlal sba laj kaʼi. La skʼanbun perton, vaʼun la jpas ta perton ek. Jaʼ jech ep ta velta la jpas ta perton, yuʼun laj kakʼ venta ti jaʼ jech skʼan jpas kʼuchaʼal yajtsʼaklomun Cristoe xchiʼuk ti jchʼay ta jol skotole. Jech xtok, la jnop ti muʼyuk tukʼ koʼonton ta stojolal jmalal mi oy buchʼu laj kalbe li kʼusi ta jnuptane, manchuk mi jaʼ li moletik ta jtsobobbailkutike. Jaʼ yuʼun oy jayib jabil ti jech kʼot ta pasele, ti tsmajun xchiʼuk ti chkakʼ ta pertone. Xchiʼuk la jnop ti oy kʼusi skʼan jpas sventa xi skʼane. Vaʼun kʼalal kʼot skʼakʼalil ti la stenun komel xchiʼuk li jtsebe, la jnop ti muʼyuk kʼusi lek kʼot ta pasel kuʼune, ti oy kʼusi la jpas jechuke o ti oy kʼusi laj kal jechuk sventa mu xtuchʼ li jnupunele».

 Yikʼaluk van jaʼ jech anuptanoj kʼuchaʼal li Margarita xchiʼuk Jane, laj van smukul satiot amalal, vaʼun toj ep chavat avoʼonton, chavil avokol ta mantal xchiʼuk ta takʼin. O mi moʼoje, yikʼaluk van laj yiktaot avajnil, jaʼ yuʼun solel lajem tajek avoʼonton chavaʼi xchiʼuk ti muʼyuk alekil chavaʼi aba ta skoj ti vaʼ yelan la smukul satiot avajnile. Ta melel, oy «tsots vocol» kʼuchaʼal chal jun albil kʼop ta Vivliae. Li albil kʼop taje chal ti kuxulutik ta «slajebal cʼacʼale», jaʼ yuʼun toj echʼem chil svokol li utsʼ-alaliletike, muʼyuk xa kʼanbail yuʼunik ep utsʼ-alaliletik xchiʼuk toj ep maʼ krixchanoetik ti chakʼik ta ilel ta stalelik ti muʼyuk chtunik ta stojolal Diose (2 Tim. 3:1-5). Jaʼ jech li yajtsʼaklomutik Cristo eke, muʼyuk bu kolemutik li ta vokoliletik taje. Jaʼ yuʼun, ¿kʼusi van skʼan jpastik sventa stsal kuʼuntik mi smukul satiojutik jnup jchiʼiltike?

Jech me xkil jbatik kʼuchaʼal chilutik Jeovae

Yikʼaluk van vokol chavaʼi cha chʼun ti ep la syayijes avoʼonton li buchʼu akʼanoj tajeke. Yikʼaluk van xavakʼ ta amul ti jech chopol kʼusi la spas li anup achiʼile.

Li Jesuse jaʼ jun tukʼil krixchano echʼ, pe mu me xchʼay ta ajol ti mukul satiat yuʼun jun yamigo ek ti spatoj-o lek yoʼontone. Jech, li stuke lek tajek la skʼelbe smelolal sventa la stʼuj li yamigotake xchiʼuk ep la spas orasion ta sventaik, ti jaʼik li lajcheb yajtakboltak ti jaʼik tukʼil yajtuneltak Jeovae. Jaʼ yuʼun laj van yat tajek yoʼonton kʼalal «[akʼat] ta cʼabal» yuʼun li Judase (Luc. 6:12-16). Jech xtok, maʼuk laj yakʼbe ta smul xNichʼon Jeova ta skoj li kʼusi la spas Judase.

Melel onoʼox ti chʼabal junuk ajnilal o malalil ti tukʼ xa tajeke, yuʼun oy spaltailik. Jaʼ jech ta melel li kʼusi akʼbat snaʼ yuʼun Dios li jtsʼibajom yuʼun salmo liʼe: «Mucʼul Dios, ti tauc xavacʼ ta aventa li jmulcutique, ¿bochʼo xuʼ lec vaʼal chcom ta atojol ti jechuque?» (Sal. 130:3). Jaʼ yuʼun chaʼa, li malalil xchiʼuk ajnilale skʼan me oyuk ta yoʼontonik xchanbeik stalelal Jeova, skʼan spasbe sbaik perton (1 Ped. 4:8).

Ta «jujunutic chcʼot caltic ta stojol Dios ti cʼu xʼelan la jpastique» (Rom. 14:12). Ta me xal ta stojolal Jeova li jun vinik o ants mi nop xaʼi ch-ilin xchiʼuk chmajvane. Yuʼun muʼyuk lek chil li majbaile xchiʼuk ti chyayijesvan ti kʼuyelan chkʼopoj li jun vinik xchiʼuk antse, muʼyuk me junuk srasonal ti muʼyuk ch-ichʼvan ta mukʼ ta jyalel kʼalal tskʼopon li snup xchiʼile xchiʼuk ti mu ta kʼaneluke (Sal. 11:5; Efe. 5:33; Col. 3:6-8). Yuʼun ti buchʼu jech xnop xaʼi spasele —mi ermano o mi ermana— ti xtiʼtun tajek sjole o ti xvochʼvun tajek ta utvaneje xchiʼuk ti muʼyuk tsutes yoʼontone ta me xichʼ lokʼesel ta tsobobbail (Gál. 5:19-21; 2 Juan 9, 10). Mu me chopoluk xaʼi sba li buchʼu jech chil svokol kʼalal chalbe moletik ti toj chopol stalelal li snup xchiʼile. Ta batsʼi melel, kʼux me ta yoʼonton Jeova li buchʼutik chil svokol ta ilbajinele.

Maʼuk noʼox tsaʼ smul ta stojolal snup xchiʼil li buchʼu chmukul sativane, yuʼun tsaʼ smul ta stojolal Jeova xtok (Mat. 19:4-9; Heb. 13:4). Mi tukʼ chakʼ ta xkuxlejal beiltaseletik ta Vivlia li buchʼu mukul satiate, mu me snop ti jaʼ ta smul ti jech pasbate.

Vuleso me ta ajol ti snaʼoj Jeova ti kʼuyelan chavaʼi abae. Chakʼ sba ta ojtikinel ta sKʼop ti jaʼ yajnil li steklumal Israele xchiʼuk ti ep tekstoetik chakʼ ta ilel ti chkʼot ta oʼontonal ti ep laj yil svokol ta skoj ti mukul sativan ta mantal li Israele (Isa. 54:5, 6; Jer. 3:1, 6-10). Vuleso me ta ajol ti snaʼoj lek Jeova ti kʼu to yepal amaloj yaʼlel asat ta skoj ti la smukul satiot anup achiʼile (Mal. 2:13, 14). Snaʼoj xtok ti skʼan xichʼ patel avoʼontone xchiʼuk ti skʼan xavichʼ tsatsubtasele.

Chakʼ spatobil koʼontontik li Jeovae

Jtos ti kʼuxi tspat oʼontonal li Jeovae jaʼ li ta stsobobbail yajtsʼaklom Cristoe. Xi chal kaʼitik Jane kʼuxi la sta koltael: «Ay skʼelun li jkʼelvanej  ta sirkuito kʼalal jaʼo chkat ta bu kʼalal koʼontone. Snaʼoj ti ipun xa ta at-oʼonton ta skoj ti laj xa skʼelbe skʼoplal xtuchʼel jnupunelkutik ta registro civil li jmalale. Jaʼ yuʼun la xchʼak skʼakʼal sventa xchapbun smelolal tekstoetik kʼuchaʼal 1 Corintios 7:15. Mu xa bu la jnop ti voʼon ta jmule xchiʼuk xkuxet tajek kom koʼonton yuʼun li tekstoetik ta Vivliae xchiʼuk li kʼusitik laj yalbune». *

Li Margaritae xvul to lek ta sjol kʼuxi koltae yuʼun Jeova ta stojolal li tsobobbaile: «Kʼalal vinaj ti muʼyuk bu la sutes yoʼonton li jmalale, la jkikʼ echʼel li kalabe, li batkutik ta naklej ta yan lum. La jta ta chʼom chaʼkʼol kuarto. Ta yokʼomale lik jlokʼes li kʼusitik laj kichʼkutik batele, solel toj chopol tajek chkaʼi ti kʼusi la jnuptane. Vaʼun oy buchʼu te kʼot. Kaloje jaʼ li yajval na ti te noʼox nopol nakale. Pe maʼuk un. Labal to laj kaʼi, pe jaʼ li ermana ti la xchanubtas ta Vivlia kutsʼ kalalkutik xchiʼuk ti jaʼ akʼbat chanubtasel li jmeʼ eke. Mu snaʼ mi voʼon te tstaun, ti kʼu yuʼun te kʼote jaʼ ti la xchʼam chanubtasel ta Vivlia li yajval nae. ¡Xpatet to koʼonton kʼalal laj kile! Muʼyuk bu xmuk kuʼun li kʼusi oy ta koʼontone. La jchapbe li kʼusi la jnuptane, jaʼ yuʼun li ochkutik ta okʼel. Ta ora la skʼelbe skʼoplal sventa xi batkutik ta tsobajel li vaʼ kʼakʼal taje. Lek la xchʼamunkutik li tsobobbaile xchiʼuk la skʼelik kʼusi xuʼ spasik moletik sventa xakʼik li kʼusitik chtun kuʼunkutik ta mantale».

Kʼuxi xuʼ xkoltavan li ermanoetike

Jamal xvinaj ti ep kʼuyelan xuʼ xkoltavan li ermanoetik ta tsobobbaile. Jech kʼuchaʼal liʼe, kʼalal persa skʼan xbat abtejuk laj yil li Margaritae oy jun utsʼ-alalil laj yalik ti jaʼ la tskʼelik li ololetik mi lokʼik ta chanun mi jech skʼane.

Xi chal li Margaritae: «Jaʼ mas ta jtoj ta vokol ti chi yikʼunkutik batel ta chol mantal xchiʼuk kalab li ermanoetik xchiʼuk ermanaetike». Jech ta melel, li buchʼu jech chkoltavane jaʼ me tspas liʼe: «Talbat chacolta abaic ta xcuchel li avocolique, yuʼun jech chachʼunbeic o smantal li Cristoe» (Gál. 6:2).

Li buchʼutik chil svokolik ta skoj yantike toj lek me chaʼiik ti jech jkoltatike. Li Monique ti iktaat yuʼun smalale chanvoʼ to kom yalab xchiʼuk iktabat 15,000 dolar yilik ta starjetail takʼin, xi chal kaʼitike: «Toj lek yoʼontonik ta jtojolalkutik li ermanoetike. Mu jnaʼ kʼusi la jpas jechuk ti chʼabaluk bu xi skoltaike. Chkile toj kʼupil xa noʼox sba li jchiʼiltak yakʼojbun Jeovae, ti xchʼakojbeik lek yorail sventa tskoltaik li kalabe. Xi muyubaj tajek, yuʼun kiloj ti chʼiem tal ta mantal kalab koliyal ti jech tspasike. Tstojobtasikun onoʼox li moletik kʼalal ta  jkʼanbeike. Tstsʼetanbeik lek xchikinal xtok kʼalal oy kʼusi ta jkʼan chkale» (Mar. 10:29, 30).

Melel onoʼox chaʼa, li kamigotaktike snaʼojik lek ti oy bakʼintik ti mu stakʼ xkalbetik skʼoplal li vokolil jnuptanojtike (Ecl. 3:7). Xi chal li Margaritae: «Toj lek chkaʼi ti jaʼ mas chkalbekutik skʼoplal xchiʼuk ermanaetik ta j-achʼ tsobobbail li chol mantale, li buchʼutik chichʼ chanubtasel ta Vivliae, li alab-nichʼnabiletike..., ep kʼusi ta jloʼiltakutik, jaʼ xa noʼox muʼyuk chkalbekutik skʼoplal li vokolil jnuptanoje. Koliyal tajek chkalbeik ti muʼyuk la svulesik ta jol li jvokole, ti la skoltaikun sventa x-echʼ batel kuʼune».

Mu me xa pak akʼoplal

Bateltike, li buchʼu laj yichʼ mukul satiele snaʼoj ti maʼuk ta smul ti jech kʼot ta pasele. Pe li kʼusi mas chopol chaʼie jaʼ ti chil svokol ta skoj yantike. Pe mi laj yakʼ ayanuk mas ta yoʼonton taje, xiʼeluk me jaʼ xchʼay ta sat ti jaʼ tsots skʼoplal ti tukʼuk xakʼ sba ta stojolal Jeovae. Jech kʼuchaʼal liʼe, xuʼ van tskʼan tspak skʼoplal.

Mi laj kakʼtik venta ti ta jkʼan ta jpak jkʼoplaltike, jaʼ me lek ti jvules ta joltik li kʼusi kʼot ta stojolal Josué xchiʼuk Calebe. Li chaʼvoʼ tukʼil viniketik taje laj yakʼ ta vokol xkuxlejalik kʼalal ay skʼelik li Albil Balumile. Pe li yan jpaʼivanejetike laj yakʼik ta ilel ti chʼabal xchʼunel yoʼontonike xchiʼuk muʼyuk xa la xchʼunbeik smantal Jeova yuʼunik li jteklume. Jech onoʼox, jlom j-israeletike chakʼbeik ox yaʼi ton li Josué xchiʼuk Caleb ta skoj ti chalbeik jteklum ti akʼo tukʼ xakʼ sbaike (Núm. 13:25–14:10). Akʼo mi chʼabal smulik li viniketik taje, te xyal xmuyik 40 jabil ta taki xokol balumil ta skoj li xchopol talelal xchiʼiltakike.

Ta melel, toj chopol van laj yaʼi li Josué xchiʼuk Calebe, pe maʼuk ti mu xa snaʼ kʼusi tspasik ta skoj li smul xchiʼiltakike. Moʼoj, jaʼ laj yakʼ ta yoʼontonik ti lekuk oyik ta mantale. Kʼalal tsuts li 40 jabil ti te oyik ta taki xokol balumile, la sta smotonik xchiʼuk jlevietik, jaʼ ti jaʼ xa noʼox kuxul komik li ta jvokʼ kuxlejal taje, ti laj yakʼ Jeova ti x-ochik li ta Albil Balumile (Núm. 14:28-30; Jos. 14:6-12).

Ti kʼusi la spasbot li anup achiʼile xuʼ van jal xavul-o avoʼonton. Xuʼ van xtuchʼ li anupunele, vaʼun xuʼ van xavil avokol ta takʼin xchiʼuk xuʼ xa ipaj ta at-oʼonton. Mu me stakʼ ti jaʼ xa nop li kʼusitik chakʼ mas at-oʼontone yuʼun me jaʼ tsmakbot anopben, naʼo me ti snaʼoj Jeova kʼuxi xuʼ xa skoltaot ta skoj li buchʼutik muʼyuk chchʼunbat smantale, jaʼ jech kʼuchaʼal laj yil li j-israeletik ti muʼyuk tukʼ stalel echʼik ta taki xokol balumile (Heb. 10:30, 31; 13:4).

¡Xuʼ me avuʼun!

Mu me xa stsalot li kʼusitik muʼyuk lek chtal ta anopbene. Jaʼ lek jaʼ akʼo ta anopben li snopbentak Jeovae. Xi chal li Jane: «Li kʼusi pasbil gravar ta revista ¡Despertad! xchiʼuk Li Jkʼel osil ta toyole jaʼ la skoltaun. Ep la skoltaun xtok li tsobajeletike. Oy noʼox kʼusitik ta jpas li ta tsobajeletik xtok sventa mu jaʼuk jnop li jvokoltake. Jaʼ jech chkaʼi xtok kʼalal chi lokʼ ta chol mantale. Kʼalal ta jkolta li krixchanoetik sventa x-ayan xchʼunel yoʼontonik ta stojolal Jeovae, tstsatsub xchʼunel koʼonton ek. Kʼalal ta jkolta li jchanolajeletik ta Vivliae jaʼ mas chkakʼ ta koʼonton li kʼusi mas tsotsik skʼoplale».

Xi chal li Monique: «Kʼalal chi kʼotilan ta tsobajeletik xchiʼuk ti ta jchol mantal bu kʼalal xuʼ kuʼune, jaʼ skoltaojun sventa xkuch kuʼun li vokoliletike. Mas xa jmoj oyunkutik chkaʼi xchiʼuk li kalabe xchiʼuk mas xa nopol oyunkutik ta stojolal li ermanoetike. Li vokolil la jnuptane jaʼ la skoltaun ta skʼelel ti bu skʼan to xi tsatsube. Toj echʼ noʼox tsots, pe ta skoj ti la skoltaun li Jeovae kuchem tal kuʼun».

Xuʼ me xkuch avuʼun prevaetik kʼuchaʼal taje. Akʼo mi ep chavil avokol ta skoj li mukul satiele, paso persa xavakʼ ta akuxlejal li kʼusi akʼbat snaʼ yuʼun Dios li Pablo liʼe: «Mu me xijlubtsajutic ta spasel li cʼusitic leque. Yuʼun tsta yorail chcʼot jcʼajbetic sat, me muc xchibaj coʼntontic ta spasele» (Gál. 6:9).

[Tsʼibetik ta yok vun]

[Lokʼol ta pajina 31]

Li buchʼutik tenbil komel yuʼun snup xchiʼilike, ta me stojik ta vokol ti chichʼik koltael ta chol mantale