Chapalukot me, vaʼun lek kʼusi cha ta

¿MI CHAPALOT onoʼox sventa cha chol mantal ti bu chchol mantal atsobobbail ti muʼyuk bu amalaoj jech chkʼot ta pasele? Li ermanoetik ta Turku, jun voʼneal jteklum ti bu chkoti varkoetik ta Finlandiae, lek onoʼox chapalik, vaʼun lek kʼusitik la staik.

Leʼ xa kʼu sjaliluke, li ermanoetik ta Turkue laj yakʼik venta ti kʼot jtsop krixchanoetik ti likemik ta Asia sventa tstsutsesik jkot varko ti laj yichʼ pasel li ta spasobil varkoetik li ta jteklum taje. Jun jcholmantale laj yaʼi ti te oyik ta jun otel ta yutil jteklume xchiʼuk ti te chkʼot ikʼatikuk ta autovusetik ta jujun sob sventa chbat ta yabtelike. Muʼyuk bu la xchʼay kʼakʼal, ta anil noʼox bat yalbe li ermanoetik ta tsobobbail ta Turku ti ta inglés chkʼopojike.

Li moletik ta tsobobbaile laj yakʼik venta ti jaʼ yorail sventa xcholbeik lekil aʼyej sventa Ajvalilal yuʼun Dios li jyanlum krixchanoetike, jech oxal la xchapan sbaik. Ta domingo li ta xemana taje, la stsob sbaik lajunvoʼ jcholmantaletik ta vukub ora ta sob ti bu nopol chkoti autovusetike. Ta skoj ti muʼyuk bu laj yilik mi junuk j-abtele, xi la sjakʼbe sbaike: «¿Mi yuʼun van bat xa ora li jvul? ¿Mi lokʼik xa van batel li ta Turkue?». Jaʼ to laj yilike, te xtal ta eskina jun j-abtel. Vaʼun ikʼot yan, te une xcholet noʼox kʼotel yantik. Li ermanoetike lik xcholbeik mantal xchiʼuk la sjakʼbeik mi tskʼanik vunetik ta inglés. Bal to ti jun ora to jalij li autovusetike, ti muʼyuk xlokʼik ta orae, yuʼun lek laj yakʼ yorail sventa xloʼilajik xchiʼuk li krixchanoetike. Kʼalal lokʼ batel li karoetike, laj yichʼik batel 126 foyeto xchiʼuk 329 revista.

Ta skoj ti lek kʼusitik kʼot ta pasele, li ermanoetike la snopik ti jech tspasik yan velta li ta xemana chtale, kʼalal jaʼo chvulaʼanatik yuʼun jkʼelvanej ta sirkuitoe. Ta vakib ora xchiʼuk oʼlol ta sob, ti jaʼo oy kʼinobale, laj yetʼes tsobajel sventa chol mantal li jkʼelvanej ta sirkuitoe, xchiʼuk 24 jcholmantaletik batik li ta skotleb autovusetike. Yichʼojik batel ep vunetik ta tagalo kʼop, yuʼun li ta sba veltae la staik ep krixchanoetik ti likemik ta Filipinase. Li ta sob taje, kʼalal lokʼik batel sventa chbatik ta skotleb varkoetik li autovusetike, li j-abteletike la xchʼamik xaʼox 7 livro, 69 foyeto xchiʼuk 479 revista. ¡Nopo noʼox avaʼi kʼu to yepal xmuyubajik li ermanoetik xchiʼuk ermanaetik ti la xcholik mantale!

Kʼalal muʼyuk toʼox sutemik batel ta slumalik li j-abteletike, li jcholmantaletike la xchaʼvulaʼanik jayvoʼuk li ta oteletike xchiʼuk laj yalbeik mas smelolal li Ajvalilal yuʼun Diose. Ep j-abteletik laj yalik ti xchiʼinojik xa onoʼox ta loʼil yajrextikotak Jeova ta yantik lumetike, xchiʼuk tojbatik ta vokol ti bat chiʼinatikuk ta loʼil kʼalal te oyik ta Finlandiae.

¿Kʼusi xuʼ xkaltik li ta atojolale? ¿Mi chapalot onoʼox sventa cha chol mantal ti bu chchol mantal atsobobbail ti muʼyuk bu amalaoj jech chkʼot ta pasele? ¿Mi chlokʼ ta avoʼonton atuk xchiʼuk mi cha saʼ krixchanoetik ti yan-o slumalike? Mi jeche, xuʼ van jech chkʼot ta atojolal kʼuchaʼal li ermanoetik ta Turkue.

[Lokʼol ta pajina 32]

FINLANDIA

[Lokʼol ta pajina 32]

Turku

[Lokʼol ta pajina 32]

HELSINKI

[Lokʼol ta pajina 32]

STX Europe