«Jech tscʼan ti lec, ti tucʼ chapas abaique»

«Ta sventa ti chlaj ta cʼocʼ scotol li cʼusitic oye, jech tscʼan ti lec, ti tucʼ chapas abaique. Tscʼan ti jʼechʼel chavichʼic o ta mucʼ li Diose.» (2 PED. 3:11)

1. ¿Kʼu yuʼun ta yorail noʼox kʼot li xchibal skarta Pedro sventa li yajtsʼaklomtak Cristo ta skʼakʼalile?

 KʼALAL la stsʼiba li xchibal skarta Pedro ti akʼbat snaʼ yuʼun Diose, te xaʼox kʼu sjalil yakal stsatsal kontrain yajtsʼaklomtak Cristo li Diabloe. Pe muʼyuk bu slajesojbe li stsatsal yoʼontonike mi jaʼuk pajem yuʼun ti chchʼi batel li tsobobbailetike. Jaʼ yuʼun li kʼakʼal taje, yakal tstunes yan kʼusi ti lek bat yuʼun ta voʼnee. Jech kʼuchaʼal laj yalbe smelolal li jtakbole, li Satanase yakal ox xakʼbe yipal ta sokesel ta jecheʼ jchanubtasvanejetik li steklumal Diose, viniketik ti «nojem ta scʼupinel mulivajel» li «satique» xchiʼuk ti «yoʼntonique nopen xa xaʼay scʼupinel li cʼusi tscʼanique» (2 Ped. 2:1-3, 14; Jud. 4). Ta skoj taje skʼan tukʼuk yoʼonton li ermanoetike. Xchiʼuk akʼbat stsatsal yoʼontonik sventa jech tspasik li ta xchibal skarta Pedroe.

2. ¿Kʼusi chalbe skʼoplal li kapitulo 3 ta xchibal skarta Pedroe, xchiʼuk kʼusi skʼan jakʼbe jbatik?

² Xi la stsʼiba li Pedroe: «Yuʼun ti cʼalal liʼ to cuxulune, jech coʼnton o chajtʼabilanboxuc ta avoʼntonic. Yuʼun [...] poʼot xa chcom li jbecʼtal liʼi. Pero chcacʼ persa ta jpas ti bu cʼalal xuʼ cuʼune, yuʼun jech xuʼ chavules ta avoʼntonic scotol cʼusitic laj calboxuc ti cʼalal chamenun xaʼoxe» (2 Ped. 1:13-15). Jech laj yal li jtakbole yuʼun snaʼoj ti poʼot xaʼox chchame. Pe li stuke oy ta yoʼonton ti teuk-o li kʼusitik laj yale. Jaʼ jech kʼot ta pasel: laj yichʼ tikʼel ta Vivlia, xchiʼuk xuʼ jkʼel jkotoltik li avie. Jaʼ mas oy ta koʼontontik skʼelel li kapitulo 3, yuʼun jaʼ  chalbe skʼoplal li «slajebtic xa batel [kʼakʼal]» yuʼun li kʼusitik liʼe xchiʼuk slajeb li balumile xchiʼuk li vinajel ta lokʼolkʼope (2 Ped. 3:3, 7, 10). ¿Kʼusitik tojobtasel laj yiktabutik ta skarta li Pedroe? ¿Kʼuxi xuʼ tskoltautik sventa lek chilutik li Jeovae?

3, 4. 1) ¿Kʼusi mantal laj yal li Pedroe, xchiʼuk kʼusi pʼijubtasel laj yakʼ? 2) ¿Kʼusi oxtos ta jchantik batel?

³ Kʼalal yalojbe xaʼox skʼoplal li slajel sbalumil Satanase, xi laj yal li Pedroe: «Jech tscʼan ti lec, ti tucʼ chapas abaique. Tscʼan ti jʼechʼel chavichʼic o ta mucʼ li Diose» (2 Ped. 3:11, 12). Li stuke lek snaʼoj ti kʼalal mi kʼot yorail «tspacbe sutel [yajkontratak]» li Jeovae jaʼ noʼox kuxul chkomik li buchʼutik tspasik kʼusi tskʼan yoʼontone xchiʼuk ti chakʼ ta ilel stalelalik kʼuchaʼal yajtsʼaklomtak Cristoe (Isa. 61:2). Jaʼ yuʼun xi to laj yale: «Voʼoxuc ti lec jcʼanojoxuque, baʼyuc xa laj avaʼyic scotol. Jaʼ yuʼun bijanic me, yuʼun jech mu xasloʼlaoxuc li chopol jloʼlavanejetique, jech mu xacomtsanic li cʼusi lec achʼunojic xae» (2 Ped. 3:17).

⁴ Ta skoj ti te oy Pedro ta stojolal li buchʼutik «baʼyuc xa laj [yaʼyik] scotol[e]», snaʼoj ti mas to skʼan xchabi sbaik li yajtsʼaklomtak Cristo li ta slajebal kʼakʼale, o ti vikʼiluk satik yoʼ tukʼ-o yoʼontonike. Ta tsʼakale, li jtakbol Juane laj yalbe lek smelolal ti kʼu yuʼune. Li stuke akʼbat onoʼox yil ti kʼalal lokʼesbil xaʼox ta vinajel li Satanase «ilinem» ta stojolal li «bochʼotic xchʼunojbeic smantaltac Diose xchiʼuc ti jamal chalic ti xchʼunojic li Jesucristoe» (Apo. 12:9, 12, 17). Melel onoʼox ti tspasik kanal li stukʼil teklumal Dios ti jaʼik li buchʼutik tʼujbil chbatik ta vinajel xchiʼuk li yan chijetike (Juan 10:16). Akʼo mi jech, skʼan xi jakʼbe jbatik ta jujuntale: «¿Mi tukʼ-o van koʼonton kʼalal ta slajeb?». Sventa ta jtakʼtik ti jaʼ jeche, oy kʼusi oxtos skʼan jpastik: 1) skʼan jchʼies jtalelaltik kʼuchaʼal yajtsʼaklom Cristo, 2) skʼan muʼyuk kikʼobaltik xchiʼuk jchopolaltik ta jtalelaltik xchiʼuk ta mantal, xchiʼuk 3) skʼan lekuk noʼox smelolal jkʼeltik li prevaetik xchiʼuk vokoliletik ta jnuptantike. Jchantik batel li oxtos taje.

Jchʼies jtalelaltik kʼuchaʼal yajtsʼaklom Cristo

5, 6. ¿Kʼusi talelaletik skʼan jchʼiestik, xchiʼuk kʼu yuʼun skʼan ta skotol koʼontontik chkakʼtik persa?

⁵ Xi la stsʼiba Pedro li ta slikebal xchibal skartae: «Maʼuc noʼox tscʼan ti oy xchʼunojel avoʼntonique; tscʼan noxtoc ti scotol avoʼntonic chavaqʼuic persa spasel li cʼusi leque. Me chavaqʼuic persa spasel li cʼusi leque, chlic jamuc lec asatic. Me labijubique, xuʼ avuʼun chapajes aba atuquic. Me xuʼ avuʼun chapajes aba atuquique, ch-ayin smucʼul avoʼntonic. Me iʼayin smucʼul avoʼntonique, jun avoʼnton chavichʼic ta mucʼ Dios. Me jun avoʼnton chavichʼic ta mucʼ Diose, chacʼan li achiʼiltaquique. Me acʼanoj li achiʼiltaquique, oy xa cʼanvanej ta avoʼntonic. Me laj xa ataic scotol jech chac leʼe, me ch-epaj batel avuʼunique, oy atuic, jech chvinaj ta avabtelic ti ta melel mu alticuc laj avotquinic li Cajvaltic Jesucristoe» (2 Ped. 1:5-8).

⁶ Melel onoʼox ti skʼan ta skotol koʼontontik chkakʼtik persa sventa spas kuʼuntik li kʼusitik tskoltautik ta xchʼiesel talelaletik kʼuchaʼal yajtsʼaklom Cristoe. Skʼan xkakʼ kiptik sventa xi jbat ta skotol tsobajeletik, jkʼeltik Vivlia jujun kʼakʼal xchiʼuk ti oyuk lek skʼakʼalil kuʼuntik sventa jchan jVivlia jtuktike. Xchiʼuk xtok, skʼan xkakʼbetik yipal xchiʼuk ti jchʼakbetik lek yorail sventa lekuk xchiʼuk jtabetik sbalil li Akʼobal sventa Yichʼel ta Mukʼ Jeova ta Kutsʼ Kalaltik kʼalal ta jpastik skotol xemanae. Pe mi nop xaʼox xkaʼitike, mas xa kʼun chkaʼitik spasel taje, mas to kʼalal chkilbetik sbaliltake.

7, 8. 1) ¿Kʼusi yalojik junantik ermanoetik ta sventa li Akʼobal sventa Yichʼel ta Mukʼ Jeova ta Kutsʼ Kalaltike? 2) ¿Kʼusi sbalil ataojbe li achʼ tsobajel liʼe?

⁷ Ta sventa li Akʼobal sventa Yichʼel ta Mukʼ Jeova ta Kutsʼ Kalaltike, xi la stsʼiba jun ermanae: «Ep kʼusitik yakal ta jchankutik». Yan ermanae xi chal eke: «Melel xkal, mu toʼox jkʼan xchʼay li xchanel livro yuʼun tsobobbaile, yuʼun jaʼ toʼox li tsobajel ti mas ta jkʼupine. Pe avi ti ta jpastik li yichʼel ta mukʼ Jeova ta kutsʼ kalaltike, chkakʼ venta ti xojtikin Jeova li kʼusi chtun kuʼunkutike xchiʼuk snaʼoj kʼusi ora chakʼbutik». Xi  chal jun ermanoe: «Li voʼon xchiʼuk kajnile jtaojbekutik tajek sbalil. Toj echʼ xa noʼox lek li tsobajel taje, yuʼun xuʼ jchankutik li kʼusitik mas chtun kuʼunkutike. Chkaʼikutike, jchaʼvoʼalkutik mas lek yakal chkakʼkutik ta ilel li yabtel chʼul espiritue xchiʼuk xi muyubajkutik mas li ta chol mantale». Jun totil xi chale: «Li jnichʼnabe yakal tsabeik smelolal stukik xchiʼuk tskʼupinik xchanel. Li avie mas jpatoj koʼontonkutik ti oyutik ta yoʼonton li Jeovae xchiʼuk ti tstakʼ li j-orasiontike». Li voʼote, ¿mi jaʼ jech chavil ek li kʼupil sba matanal chakʼ Jeovae?

⁸ Mu xavakʼ akʼo smakot kʼusitik ti muʼyuk tsots skʼoplale. Xi chal jun nupultsʼakale: «Li ta jujun jueves ta akʼobaltik li chanib xemana echʼe, oy kʼusitik kʼot ta pasel ti muʼyuk toʼox jmalaojkutike, ta skoj taje kechi xaʼox kuʼunkutik li chanune, pe muʼyuk xkakʼ spajesunkutik». Melel onoʼox, bakʼintike persa onoʼox ta jelbetik yorail. Pe mu xavikta ta spasel mi junuk xemana li Akʼobal sventa Yichʼel ta Mukʼ Jeova ta Kutsʼ Kalaltike.

9. ¿Kʼusi tsatsub-o yoʼonton li Jeremiase, xchiʼuk kʼusi ta jchantik ta sventa taje?

⁹ Li j-alkʼop Jeremiase toj lek ta chanbel stalelal. La stoj ta vokol li veʼlil ta mantal ch-akʼbat yuʼun Diose, yuʼun jaʼ ch-akʼbat yip ti chtun yuʼun sventa chcholbe-o mantal li jteklum ti mu kʼusi skʼanike. Xi laj yal stuke: «Li acʼope chlic tsanuc ta coʼnton jech chac cʼu chaʼal cʼocʼ; ta xcʼacʼub cʼalal ta jbaquiltac» (Jer. 20:8, 9). Taje jaʼ koltaat ek sventa chkuch yuʼun li vokolil jaʼ to ti kʼalal laj li Jerusalene. Li avie oy kuʼuntik sliklej li sKʼop Diose. Mi chkakʼbetik yipal xchanel xchiʼuk mi chkakʼ ta jnopbentik li kʼusitik tsnop Diose, jechutik me kʼuchaʼal Jeremías: xi jmuyubaj ta jcholtik-o mantal, tukʼ oyutik-o akʼo mi oy prevaetik xchiʼuk sakutik-o ta jtalelaltik xchiʼuk ta mantal (Sant. 5:10).

«Muʼyucuc avicʼubalic, [...] muʼyuc amulic»

10, 11. ¿Kʼu yuʼun skʼan xkakʼbetik yipal sventa muʼyukuk kikʼobaltik, ti muʼyukuk jmultike, xchiʼuk kʼusi skʼan jpastik sventa jechukutik?

¹⁰ Li yajtsʼaklomutik Cristoe jnaʼojtik ti kuxulutik ta slajebal kʼakʼale. Jaʼ yuʼun muʼyuk bu labal sba chkiltik ti jaʼ batem ta yoʼonton krixchanoetik li kʼusitik spʼajoj Jeovae, jech kʼuchaʼal li pichʼ-oʼontonal, mulivajel ti muʼyuk xa noʼox smelolale xchiʼuk li majbaile. Li kʼusi snopoj tspas Satanase xuʼ xi ta jaypʼeluk noʼox kʼop chichʼ alele: «Mi mu xiʼ kuʼun li yajtuneltak Diose, xuʼ van ta jsokesan» (Apo. 2:13, 14). Jaʼ yuʼun, skʼan xkakʼ ta koʼontontik li tojobtasel laj yakʼ Pedroe: «Aqʼuic persa ti junuc avoʼntonic, ti muʼyucuc avicʼubalic, ti muʼyuc amulic chvul staoxuc li Diose» (2 Ped. 3:14).

¹¹ Li jpʼel kʼop «aqʼuic persa» xie, tsakal skʼoplal xchiʼuk li jpʼel kʼop la stunes li jtakbol ta yan versikuloetik echʼe: «Scotol avoʼntonic chavaqʼuic persa». Jamal chkiltik ti Jeovae —ti jaʼ laj yakʼbe snaʼ Pedro li kʼusi la stsʼibae— snaʼoj ti skʼan chkakʼbetik tajek yipal sventa muʼyukuk kikʼobaltik, ti muʼyukuk jmultike, jaʼ xkaltik, ti mu xikʼubtasutik li sbalumil Satanase. Jech kʼuchaʼal liʼe, skʼan jtsaltik li kʼusitik chopol ta jkʼantike sventa mu xuʼunin li koʼontontike (kʼelo Proverbios 4:23 xchiʼuk Santiago 1:14, 15). Xchiʼuk skʼan xkuch kuʼuntik li kontrainel chakʼ li buchʼutik yan-o sba chilik kʼuyelan kuxulutike xchiʼuk ti «chopol xa chal [jkʼoplaltike]» (1 Ped. 4:4).

12. ¿Kʼusi spatobil koʼontontik ta jtatik ta Lucas 11:13?

 ¹² Ta skoj ti jpas mulilutike, toj vokol chkaʼitik spasel li kʼusi leke (Rom. 7:21-25). Ti kʼuxi noʼox xuʼ spas kuʼuntike jaʼ mi la jkʼanbetik koltael Jeova, ti ta slekil yoʼonton chakʼbe xchʼul espiritu li buchʼu ta sjunul yoʼonton tskʼanbee (Luc. 11:13). Li espiritu taje chakʼ chʼiuk talelaletik ta jtojolaltik ti jaʼ lek chilutik-o Diose xchiʼuk tskoltautik ta stsalel li prevaetik xchiʼuk kʼopetik ta jkuxlejaltike, ti mas tstsatsaj kʼalal yantik chnopaj li skʼakʼalil Jeovae.

Mas tstsatsubtasutik li prevaetike

13. ¿Kʼusi tskoltautik sventa chkuch kuʼuntik li vokoliletike?

¹³ Ta skoj ti liʼ to nakalutik ta mol balumile, ta onoʼox xkil jvokoltik. Pe mu xkakʼtik xchibajesutik, ¿kʼu yuʼun mu jtunestik sventa chkakʼbetik ta ilel kʼu to yepal jkʼanojtik li Diose xchiʼuk ti jtsatsubtas xchʼunel koʼontontik ta stojolal xchiʼuk li ta sKʼope? Xi la stsʼiba li Santiagoe: «Quermanotac, cuxetuc noʼox avoʼntonic cʼalal me chtal ep ta chop preva ta atojolique, yuʼun xanaʼic me ta xichʼ qʼuelel xchʼunojel avoʼntonic ta sventa li prevae, ta xʼayin lec smucʼul avoʼntonic ta stsʼiquel li vocoletique» (Sant. 1:2-4). Mu me xchʼay ta joltik ti «Cajvaltique [li Jeovae] snaʼ cʼuxi chut tscolta ta svocol li bochʼo ta xʼichʼat ta mucʼ yuʼune» (2 Ped. 2:9).

14. ¿Kʼuxi tspat avoʼonton li stalelal Josee?

¹⁴ Jkʼelbetik skʼoplal li xnichʼon Jacob ti José sbie. Laj yichʼ chonel ta mosoil yuʼun li sbankiltake (Gén. 37:23-28; 42:21). Li Vivliae lek chakʼ ta ilel ti muʼyuk chʼay li xchʼunel yoʼontone mi jaʼuk laj yakʼbe smulin Jeova ta skoj ti laj yakʼ akʼo kʼotuk ta stojolal li vokolil taje. Pe la to snuptan yan vokoliletik. Ta mas tsʼakale, jecheʼ laj yakʼbeik smulin ti ta ox la stsatsal tsak jun antse, vaʼun la stikʼik ta chukel. Pe li stuke tukʼ-o laj yakʼ sba ta stojolal Jeova (Gén. 39:9-21). Mas tsatsub-o ta skoj li prevaetike, vaʼun ta tsʼakale la sta epal bendisionetik.

15. ¿Kʼusi xuʼ jchantik ta stojolal li Noemie?

¹⁵ Melel onoʼox ti chkat koʼontontik ta skoj li vokoliletike. Xuʼ van jaʼ jech ikʼot ta stojolal li Josee. Jech van laj yaʼi sbaik ta melel yan tukʼil yajtuneltak Dios. Jech kʼuchaʼal liʼe, li Noemí ti cham smalal xchiʼuk chaʼvoʼ skeremtake, xi laj yale: «Mu xa xavalbicun Noemí. Mara [ti jaʼ smelolal «chʼa, o at-oʼnton»] xavalbicun, yuʼun li Dios ti echʼem svuʼele tsots laj yacʼbun jvocol» (Rut 1:20, 21, tsʼib ta yok vun). Stalel onoʼox ti jech laj yaʼi sbae. Pe jech kʼuchaʼal li Josee, muʼyuk xkʼunib ta mantal xchiʼuk tukʼ-o yoʼonton. Ta skoj taje laj yakʼbe bendision li Jeovae (Rut 4:13-17, 22). Xchiʼuk xtok, li ta Paraisoe chakʼbe slajeb skotol li kʼusitik chopol la snuptanik ta skoj Satanás xchiʼuk sbalumil li Noemí xchiʼuk li yan yajtuneltak ti skʼanojane. Maʼuk noʼox  taje yuʼun «li pocoʼe muʼyuc xa bochʼo ta snaʼ o; muʼyuc xa bochʼo ta snopilan o» (Isa. 65:17).

16. ¿Kʼu to yepal sbalil skʼan chkiltik li orasione, xchiʼuk kʼu yuʼun?

¹⁶ Kʼusuk prevail ta jnuptantik, ta onoʼox me stsal kuʼuntik mi ta jvules ta joltik kʼu to yepal skʼanojutik li Jeovae (kʼelo Romanos 8:35-39). Akʼo mi chakʼbe yipal sventa chchibajes koʼontontik li Satanase, muʼyuk me bu chjuʼ yuʼun mi «[pʼijutik] ta sventa li cʼusi [ta jpastike]» xchiʼuk mi te-o ta koʼontontik «ta scʼopanel li Diose» (1 Ped. 4:7). Xi laj yal li Jesuse: «Viqʼuiluc me asatic chaʼe; cʼanbeic vocol Dios scotol cʼacʼal ti acʼo cuchuc avuʼunic scotol cʼalal chcʼot ta pasel jech chac leʼe. Jech lec vaʼal chacomic ta jtojol vuʼun ti Xnichʼon cristiano licʼote» (Luc. 21:36). Kakʼtik venta ti Jesuse laj yalbutik ti akʼo jpastik jtos orasion ti tsots tajek skʼoplale: jaʼ ti jkʼantik vokole. ¿Kʼu yuʼun? Sventa chakʼ kiltik ti jaʼ xa skʼakʼalil jtsaktik lek ta venta ti kʼuyelan oyutik ta stojolal xchiʼuk li sTote. Ta melel, jaʼ noʼox me xuʼ kuxul chi jkom li ta skʼakʼalil Jeova mi vaʼalutik ta stojolalike, jaʼ xkaltik, mi lek chilutike.

Abtejkutik-o li ta yabtel Jeovae

17. ¿Kʼuxi tskoltautik li kʼusi la snuptanik j-alkʼopetik ta voʼne sventa ta jcholtik mantal ti bu tsotse?

¹⁷ Jtos ti kʼusi tstsatsubtas koʼontontik xchiʼuk tspat koʼontontike jaʼ li kabteltik sventa Diose. Li Pedroe chakʼ kiltik ti tsots skʼoplal kʼalal xi chalbutike: «Jech tscʼan ti lec, ti tucʼ chapas abaique. Tscʼan ti jʼechʼel chavichʼic o ta mucʼ li Diose» (2 Ped. 3:11). Jech oxal chaʼa, chkaʼibetik smelolal ti tsots skʼoplal ta jkuxlejaltik li kabteltik sventa mantale. Li bu mas tsots skʼoplale jaʼ li xcholel lekil aʼyeje (Mat. 24:14). Melel onoʼox ti vokol ta cholel mantal li ta jlom lumetike, xuʼ van jaʼ ta skoj ti mu skʼanik mantal li krixchanoetike o ti tskontrainik li kabteltike, o xuʼ van jaʼ ta skoj ti batem yoʼontonik ta skoj svokolike. Jaʼ jech la snuptanik vokol ek li yajtuneltak Jeova ta voʼnee. Pe muʼyuk bu xakʼ sbaik ta tsalel, yuʼun «mu xnatilaj» bat yalik li aʼyej yuʼun Diose (kʼelo 2 Crónicas 36:15, 16; Jer. 7:24-26). ¿Kʼusi koltaatik yoʼ xkuch yuʼunik? Baʼyel, jaʼ jech laj yil yabtelik kʼuchaʼal chil Jeovae, maʼuk kʼuchaʼal li krixchanoetik ti muʼyuk lekik ta mantale. Xchibal, jaʼ jun mukʼta matanal laj yilik ti yichʼojbeik li sbi Diose (Jer. 15:16).

18. ¿Kʼuxi tskolta sba li chol mantal yoʼ chichʼ mukʼibtasbel sbi Dios ta tsʼakale?

¹⁸ Jech ek li voʼotike jtaojtik matanal ta yalbel skʼoplal li sbi xchiʼuk li kʼusi tskʼan tspas Jeovae. Koliyal li kabteltike, mu me xuʼ xalik ti muʼyuk laj yaʼiik li kʼusi chkʼot ta pasel li yajkontratak Jeova kʼalal mi laj yichʼik chapanele. Jech kʼuchaʼal li faraón ta Egiptoe, ta me snaʼik ti jaʼ Jeova li buchʼu jech yakal spase (Éxo. 8:1, 20; 14:25). Pe jech xtok, li Diose chakʼ ta ichʼel ta mukʼ li tukʼil yajtuneltak kʼalal jamal chakʼ ta ilel ta stojolal balumil ti jaʼik yajkʼopojele (kʼelo Ezequiel 2:5 xchiʼuk 33:33).

19. ¿Kʼuxi skʼan jbalintik li smukʼul yoʼonton Jeovae?

¹⁹ Li ta slajebal xa xchibal skarta Pedroe, xi la stsʼibabe li yermanotake: «Naʼic me ti ep smucʼul yoʼnton li Cajvaltique, yuʼun tscʼan chijcolutic» (2 Ped. 3:15). Kʼuchaʼal chkiltike, skʼan jtabetik lek sbalil li smukʼul yoʼonton Jeovae. ¿Kʼuxi? Jaʼo kʼalal ta jchʼies jtalelaltik kʼuchaʼal yajtsʼaklom Cristoe, kʼalal muʼyuk kikʼobaltik xchiʼuk jchopolaltike, kʼalal lek noʼox smelolal ta jkʼeltik li prevaetik xchiʼuk vokoliletik ta jnuptantike xchiʼuk kʼalal jaʼ batem ta koʼontontik xcholel mantale. Mi jech ta jpastike, xuʼ me chkichʼtik li bendisionetik ta sbatel osil ti chichʼ tal «li achʼ vinajel» xchiʼuk li «achʼ banamil[e]» (2 Ped. 3:13).

¿Mi xvul ta ajol?

• ¿Kʼuxi xuʼ jchʼiestik talelaletik kʼuchaʼal yajtsʼaklom Cristo?

• ¿Kʼusi tskoltautik sventa muʼyukuk kikʼobaltik xchiʼuk ti muʼyukuk jmultike?

• ¿Kʼusi chchanubtasutik li kʼusi la snuptanik José xchiʼuk Noemie?

• ¿Kʼu yuʼun jaʼ jun matanal ti stuk noʼox jech li xcholel lekil aʼyeje?

[Sjakʼobiltak sventa xchanobil]

[Lokʼol ta pajina 9]

¿Kʼusi xuʼ spas li malalil yoʼ xchʼiesik talelaletik kʼuchaʼal yajtsʼaklom Cristo li ta utsʼ-alalile?

[Lokʼol ta pajina 10]

¿Kʼusi ta jchantik ta sventa ti kʼuyelan la stsal prevaetik li Josee?