Ta sjunuluk koʼonton abtejkutik li ta mukʼta kʼajoj ta mantale
Ta sjunuluk koʼonton abtejkutik li ta mukʼta kʼajoj ta mantale
«Scotoluc ora abtejanic o yuʼun li Cajvaltique.» (1 COR. 15:58)
1. ¿Kʼusi laj yalbe akʼo spas yajtsʼaklomtak li Jesuse?
KʼALAL jaʼo te chanavik batel ta yosilal Samaria ta slajebaltik xa sjabilal 30 ta jkʼakʼaliltike, li Jesuse la xkux yoʼonton jlikeluk ta stiʼ poso ta stsʼel jteklum Sicar, vaʼun xi laj yalbe li yajtsʼaklomtake: «Toyo avil asatic liʼ ta osilaltic xbate. Sacuben xa ta taquijel li trigoe; jaʼ xa yorail ta tuchʼel» (Juan 4:35). Maʼuk yakal chalbe skʼoplal li stsobel tsʼunobiletike, yuʼun jaʼ skʼoplal stsobel krixchanoetik ti lek yoʼontonik sventa chkʼotik ta yajtsʼaklomtake. Ta melel, yakal chalanbe ti akʼo xakʼbeik yipal ta abtele: ¡yuʼun toj ep yabtelik xchiʼuk jutuk yorail!
2, 3. 1) ¿Kʼusi chakʼ ta ilel ti kuxulutik ta skʼakʼalil kʼajoje? 2) ¿Kʼusi ta jchantik li ta xchanobil liʼe?
2 Li kʼusi laj yal Jesuse, mas to me tsots skʼoplal li ta jkʼakʼaliltike, yuʼun li osil ti jaʼ li krixchanoetik ta balumile solel yij xa, jech, «sacuben xa ta taquijel [...]; jaʼ xa yorail ta tuchʼel». Jujun jabile, ta smiyonal noʼox krixchanoetik chichʼik ikʼel sventa chchʼamik li kʼusitik melel ta Vivlia ti chakʼ kuxlejale, xchiʼuk ta smilal noʼox achʼ yajtsʼaklomtak Cristo ta xchʼamik xchiʼuk chichʼik voʼ. Li voʼotike jtaojtik jun matanal, jaʼ li stsobel krixchanoetik ti muʼyuk bu jech ilbil-oe, ti jaʼ tskʼel li Yajval kʼajoje, li Jeova Diose. Jaʼ yuʼun, xi jakʼbe jbatike: «¿Mi skotol ora chi abtej li ta kʼajoje?» (1 Cor. 15:58).
3 Li oxib jabil xchiʼuk oʼlol la xchol mantal Jesuse, la xchapan ta kʼajoj ta mantal li yajtsʼaklomtake. Li ta xchanobil liʼe ta jkʼeltik oxib kʼusitik tsots skʼoplal ti la xchanubtasane. Ta jujuntal taje chakʼ ta ilel jun talelal ti tsots skʼoplal ta sventa li buchʼutik chakʼbeik yipal ta stsobel yajtsʼaklomtak Cristoe. Jkʼeltik ta jujuntal li talelaletik taje.
Tsots skʼoplal bikʼit xkakʼ jbatik
4. ¿Kʼuxi laj yakʼ ta ilel Jesús ti tsots skʼoplal skʼan bikʼit xkakʼ jbatike?
4 Jnoptik avaʼi li kʼusi kʼot ta pasele: Li yajtsʼaklomtak Cristoe yakal svulilan sbaik ta sventa ti buchʼu mas ichʼbil ta mukʼe. Xuʼ van chvinaj to ta satik ti kapemik xchiʼuk ti mu junuk yoʼontonike. Vaʼun li Jesuse laj yikʼ tal jun olol xchiʼuk la svaʼan ta oʼlol. Xi laj yale: «Li bochʼo biqʼuit chacʼ sba jech chac cʼu chaʼal li olol liʼi, jaʼ ichʼbil ta mucʼ chcʼot te yoʼ bu chventainvan li Diose» (kʼelo Mateo 18:1-4). Skʼan maʼuk jech tsnopik jech kʼuchaʼal li balumile, ti jaʼ tskʼelbe kʼu to sbalil li krixchanoetik ta sventa li yabtel yichʼoje, li skʼulejale xchiʼuk ti kʼuyelan oye, moʼoj, li yajtsʼaklomtak Cristoe skʼan xaʼibeik smelolal ti mi tskʼanik mukʼ skʼoplalike skʼan «biqʼuit chacʼ sba[ik]» ta stojolal li yantike. Skʼan me bikʼit chakʼ sbaik mi tskʼanik akʼo x-akʼbatik sbendision xchiʼuk mi tskʼanik akʼo xtunesatik yuʼun li Jeovae.
5, 6. ¿Kʼuxi tskoltautik sventa ta sjunul koʼontontik chi j-abtej li ta stsobel krixchanoetik ti bikʼit chkakʼ jbatike? Albo junuk skʼelobil.
5 Li avie, ep krixchanoetik jaʼ batem ta yoʼontonik saʼel juʼelal, kʼulejal xchiʼuk ti lekuk yabtelike. Ta skoj taje muʼyuk xa xokolik li ta kʼusitik sventa mantale (Mat. 13:22). Pe li yajtunel Jeovae snaʼoj ti mi tskʼan ch-akʼbat bendision xchiʼuk ti lekuk x-ilat yuʼun li Yajval kʼajoje, tsots skʼoplal skʼan «biqʼuit chacʼ sba» ta stojolal li yantike. Ta melel, ta sjunul yoʼonton jech tspas stalelal (Mat. 6:24; 2 Cor. 11:7; Fili. 3:8).
6 Jkʼelbetik skʼoplal Francisco, jun mol ta tsobobbail ta Sudamérica. Ta skeremale laj yikta chanun ta universidad sventa x-och ta prekursor. «Ta tsʼakale —xi chale—, laj kakʼ ke sventa chi nupun. Xuʼ van la jsaʼ kabtel ti chakʼ mas takʼine. Pe la jnopkutik ti jaʼ lek oyuk noʼox smelolal chi kuxikutike xchiʼuk ti koʼol chi tunkutik batel ta tsʼakal orae. Ta tsʼakale ayan kalab jnichʼnabkutik, mas to tsots laj kaʼikutik. Pe li Jeovae la skoltaunkutik sventa spas kuʼunkutik li kʼusi jnopojkutike. Mas xa ta 30 jabil tunemun tal ta mol ta tsobobbail xchiʼuk ta yan abtelaletik ti toj tsotsik skʼoplale. Muʼyuk bu chopol chkaʼikutik ti lek noʼox sba jkuxlejalkutike.»
7. ¿Kʼuxi avakʼojbe yipal ta yakʼel ta akuxlejal li Romanos 12:16?
7 Mi muʼyuk mukʼ ta jpas jbatik jech kʼuchaʼal li balumile xchiʼuk mi bikʼit chkakʼ jbatike, ta me jkʼupintik epal bendisionetik xchiʼuk matanaletik li ta kʼajoje (Rom. 12:16; Mat. 4:19, 20; Luc. 18:28-30).
Mi baxbolutike lek kʼusitik ta jtatik
8, 9. 1) Alo ta jaypʼeluk noʼox kʼop li lokʼolkʼop sventa talentoe. 2) ¿Buchʼu tspatbe yoʼonton li lokʼolkʼop liʼe?
8 Yan talelal ti tsots skʼoplal sventa ta sjunul koʼontontik xi j-abtej ta kʼajoje jaʼ ti baxbolutike. Jaʼ jech laj yakʼ ta ilel Jesús li ta lokʼolkʼop ta sventa li talentoe. * Te chalbe skʼoplal jun yajval abtel ti chbat ta namal balumile, kʼalal muʼyuk to bateme chakʼbe komel ta skʼob kʼusitik oy yuʼun oxvoʼ smosotak, laj yakʼbe komel epal takʼin ti jaʼ sbi talentoe. Li baʼyele laj yakʼbe voʼob talento, li xchibale laj yakʼbe chib talento xchiʼuk li slajebe jun talento. Kʼalal bat li yajvalike, li baʼyel xchiʼuk li xchibal mosoetike baxbol abtejik. Lik noʼox yabtelanik li takʼin akʼbatik komele. Pe li buchʼu laj yichʼ komel jun talentoe la smuk ta lum, yuʼun jchʼajil abtel. Kʼalal sut tal li yajval yabtelike, li chaʼvoʼ smosotake xi laj yalanbee: «Jaʼ yuʼun chacacʼbot aventain li yepale». Pe li yoxibale la spojbe li talentoe xchiʼuk la snuts lokʼel ta sna (Mat. 25:14-30).
9 Ta melel, jkotoltik ta jkʼan ta jchanbetik li chaʼvoʼ baxbol mosoetik ti la sloʼilta Jesús xchiʼuk ti chkakʼbetik yipal li ta abtelal ta xchanubtasel krixchanoetike. Pe ¿ati mi mu xuʼ kuʼuntik spasel jeche? Xuʼ van skʼan ep ora xi j-abtej sventa xichʼ makʼlinel li utsʼ-alalil ta skoj li vokolil ta takʼine. O xuʼ van muʼyuk xa kiptik o ip noʼox chkaʼitik ti mu xa jechuk kʼuchaʼal ta jkeremaltik o ta jtsebaltike. Mi jaʼ jeche, ta jta spatobil koʼontontik li ta lokʼolkʼop ta sventa talentoe.
10. ¿Kʼuxi laj yakʼ ta ilel yajval abtelal ta lokʼolkʼop ti jaʼ jun krixchano ti lek xrasonaje, xchiʼuk kʼu yuʼun tspat koʼontontik taje?
10 Kakʼtik venta ti yajval abtelal ta lokʼolkʼope snaʼoj lek ti mu koʼoluk spʼijilik li oxib smosotake, yuʼun la xchʼakbe li takʼin «jaʼ ti cʼu yepal xuʼ yuʼun jujunique» (Mat. 25:15). Jech kʼuchaʼal chkiltike jaʼ mas la stabe skanalil li baʼyele, jaʼ jutuk li xchibale. Akʼo mi jech, li yajval abtelale laj yakʼ venta ti ep abtej xchaʼvoʼalike, jaʼ yuʼun xi laj yalbe ta jujuntale: «Lequil jʼabtelot cuʼun; lec jun avoʼnton laʼabtej», xut, xchiʼuk koʼol laj yakʼbe smoton (Mat. 25:21, 23). Jaʼ jech li Jeova eke, li Yajval kʼajoje, snaʼoj lek kʼukelantik ta jujuntal ti kʼuyepal xuʼ kuʼuntik li ta yabtele. Yiloj lek ti kʼuyelan chkakʼbetik yipal yoʼ ta sjunul koʼonton xi jtun ta stojolale, xchiʼuk ta onoʼox xakʼ jmotontik (Mar. 14:3-9; kʼelo Lucas 21:1-4).
11. Alo junuk skʼelobil ti chakʼ ta ilel ti xuʼ tstaik epal bendision akʼo mi oy tsots svokolik li buchʼutik tsots ch-abtejike.
11 Jkʼelbetik skʼoplal Selmira, jun ermana ti nakal ta Brasile. Li kʼusi kʼot ta stojolale chakʼ kiltik ti mu persauk lek tajek jkuxlejaltik mi ta jkʼan baxbolutik li ta yabtel Jeovae. Leʼ xa ta jtob jabile, laj ta milel smalal kʼalal jaʼo yakal ta x-elkʼajik jlom krixchanoetike xchiʼuk stuk xa kom xchiʼuk oxib stsebetak ti skʼan stsʼitese. Ch-abtej ta kiara, ta skoj taje ep ora skʼan x-abtej xchiʼuk ta makbil karo chanav ti pitsʼil tajek chbat xchiʼuk ti chakʼ tajek lubele. Akʼo mi jech, la xchapan sba lek sventa ch-och ta prekursora regular, ta mas tsʼakale och chaʼvoʼ stsebetak ek. «Ti vaʼ jabiletik echʼe —xi chale—, mas ta jtob krixchanoetik la jchanubtas ta Vivlia xchiʼuk kʼotemik ta kutsʼ kalal chkaʼi. Kʼalal to avi oy sbalil chkil li xkʼuxul yoʼontonike xchiʼuk ti lek chkil jbakutik xchiʼukike. Jaʼ jun kʼulejal ti mu xuʼ jmantik ta takʼine.» Ta melel, li Yajval kʼajoje yakʼojbe bendision li Selmira ta skoj li tsatsal abtel tspase.
12. ¿Kʼuxi xuʼ xkakʼtik ta ilel ti baxbolutik li ta chol mantale?
12 Mu jkotoltikuk xuʼ jchʼakbetik ep yorail li abtelal ta kʼajoje. Pe xuʼ onoʼox xkakʼbetik yipal ta spasel mas lek li kabteltike. Mi ta jpastik li kʼusitik chkichʼtik albel jujun xemana li ta Tsobajel sventa Tunelale, mas me lek xi jtojob xchiʼuk xuʼ buyuk noʼox jcholtik mantal (2 Tim. 2:15). Jech xtok, xuʼ van jaʼ xkiktatik spasel li kʼusitik muʼyuk mas tsotsik skʼoplale sventa jkolta jbatik mas li ta chol mantal ti xchapanoj li jtsobobbailtike (Col. 4:5).
13. ¿Kʼusi tskoltautik sventa baxbolutik?
13 Teuk me ta joltik ti mi jkʼanojtik xchiʼuk ta jtojbetik ta vokol li Diose jaʼ tstij koʼontontik sventa baxbolutik (Sal. 40:8). Li yoxibal mosoil ta slokʼolkʼop Jesuse, xiʼ ta stojolal li yajvale, chil ti tsots yoʼontone xchiʼuk ti mu x-och lek ta rasone. Jaʼ yuʼun, la snakʼ li takʼine, muʼyuk laj yabtelan sventa chepajesbe stakʼin li yajvale. Jtos kʼusi tskoltautik sventa mu xi jchʼajube, jaʼ ti mas lekuk xkil jbatik xchiʼuk Jeova jujun kʼakʼale, li Yajval kʼajoje. Mi ta jchʼakbetik yorail xchanel jVivliatik xchiʼuk ti ta jnopbetik skʼoplal ti chkʼanvan li Diose, ti oy smukʼul yoʼontone, ti oy xkʼuxul yoʼontone xchiʼuk yantik stalelaltak ti labalik sbae, ta me stij koʼontontik xi j-abtej bu kʼalal xuʼ kuʼuntik li ta chol mantale (Luc. 6:45; Fili. 1:9-11).
«Mu xaticʼ abaic ta spasel ti cʼusi chopole»
14. ¿Kʼusi tsots skʼoplal skʼan spasik li buchʼutik tskʼan ch-abtejik ta kʼajoje?
14 Li jtakbol Pedroe laj yalbe skʼoplal li kʼusi tsʼibabil ta Tsʼibetik ta Hebreo Kʼop sventa chalbe skʼoplal li kʼusi tskʼan yoʼonton Dios ta stojolal li buchʼutik chtunik ta stojolale: «Aqʼuic ta qʼuelel ti lecuc ti acuxlejalique, yuʼun ti Buchʼu laj yicʼoxuc ta stojole, jaʼ Chʼul Dios. Yuʼun xi ta xal ti chʼul cʼope: “Mu xaticʼ abaic ta spasel ti cʼusi chopole, yuʼun ti vuʼune jaʼ Chʼul Diosun”» (1 Ped. 1:15, 16, Ch; Lev. 19:2; Deu. 18:13). Li teksto taje chakʼ kiltik ti jkʼajojetike skʼan me sakukutik ta jtalelaltik xchiʼuk ta mantal. Xuʼ me spas kuʼuntik li kʼusi tsots skʼoplal taje mi ta jpastik li kʼusitik skʼan pasel sventa ta jpok jbatik ta lokʼolkʼop chkaltike. ¿Kʼusi ti tsakubtasutike? Jaʼ li skʼop Dios ti melele.
15. ¿Kʼusi xuʼ spas ta jtojolaltik li skʼop Dios ti melele?
15 Li ta Vivliae, li skʼop Dios ti melele chichʼ koʼoltasel ta voʼ ti tsakubtasvane. Jech kʼuchaʼal liʼe, li jtakbol Pabloe laj yal ti Cristoe la sakubtas li slekil lekome —li tsobobbail yuʼun yajtsʼaklomtak Cristo ti tʼujbil chbatik ta vinajele— «la slecubtas, la spoc ta sventa li scʼope» yuʼun «jech batsʼi lec, batsʼi jun yutsil chcʼot o», jaʼ yuʼun sak ch-ilatik yuʼun li Jeovae (Efe. 5:25-27). Li Jesuse yaloj xa onoʼox li yip skʼop Dios sventa tsakubtasvane, li kʼop ti la xcholbe skʼoplale. Xi laj yalbe ta melel li yajtsʼaklomtake: «Li voʼoxuque lecubtasbiloxuc xa ta sventa li jcʼop laj calboxuque» (Juan 15:3). Jech oxal chaʼa, li skʼop Dios ti melele xuʼ tsakubtasutik ta jtalelaltik xchiʼuk ta mantal. Mi ta jkʼantik akʼo xchʼam Dios li kabteltike, toj tsots skʼoplal ti xkakʼ jbatik ta sakubtasel li ta skʼop Dios ti melele.
16. ¿Kʼuxi xuʼ sakutik-o ta mantal xchiʼuk ta jtalelaltik?
16 Kʼuchaʼal chkiltike, li buchʼu tskʼan ch-abtej xchiʼuk Dios li ta kʼajoje, baʼyel skʼan xikta spasel li kʼusitik ibalik sba ta stalelale xchiʼuk ta mantale. Mi tskʼan ch-abtej-o li ta chʼul abtelal taje, skʼan me lek-o ta chanbel li stalelale, skʼan me tstsak lek ta venta li sakil mantaletik yuʼun Jeova ta sventa talelal xchiʼuk ta mantale (kʼelo 1 Pedro 1:14-16, Ch). Jech kʼuchaʼal skʼan jkʼelilan jbatik ti kʼuyelan jbekʼtal jtakopaltik sventa sakukutike, jaʼ me jech skʼan jsakubtas jbatik li ta skʼop Dios ta sventa mantale. Sventa spas kuʼuntik taje skʼan jkʼeltik li Vivliae, xi jbat li ta tsobajeletike xchiʼuk ti xkakʼbetik yipal ta yakʼel ta jkuxlejaltik li smantaltak Diose. Jaʼ jech chapalutik sventa tstsal kuʼuntik li mulile xchiʼuk li kʼusi ch-ikʼubtasvan ta balumile (Sal. 119:9; Sant. 1:21-25). ¡Toj ep tspat koʼontontik ti tskoltautik li skʼop Dios ti melele, xuʼ xkichʼtik pokel akʼo mi jpasoj tsots jmultik! (1 Cor. 6:9-11.)
17. ¿Kʼusitik tojobtasel ta Vivlia skʼan jchʼuntik sventa sakutik-o?
17 ¿Mi ta sjunul koʼontontik chkakʼ tsakubtas jkuxlejaltik li skʼop Dios ti melele? Jnopbetik skʼoplal jaytosuk. ¿Kʼusi ta jpastik kʼalal chkichʼtik albel ti skʼan jkʼel jbatik ta sventa li chopol chʼayob oʼontonale? (Sal. 101:3.) ¿Mi ta jchʼak jbatik ta stojolal li jchiʼiltaktik ta abtel o ta chanun ti muʼyuk xchʼunojik li kʼusitik jchʼunojtik mi mu persauk ta jchiʼintike? (1 Cor. 15:33.) ¿Mi chkakʼbetik yipal ta stsalel ta melel li kʼusi kʼunutik-o ti jaʼ ibal jbatik chilutik-o li Jeovae? (Col. 3:5.) ¿Mi jchʼakoj jbatik ta stojolal li politika xchiʼuk li skʼanel tajek jlumaltik ti te chvinaj li ta tsalbail ta tajimole? (Sant. 4:4.)
18. ¿Kʼuxi tskoltautik li sakilal ta talelal xchiʼuk ta mantal sventa mas lek chbat kabteltik li ta kʼajoje?
18 Mi ta jchʼuntik taje, toj lek me kʼusi chkʼot ta pasel. Kʼalal la skoʼoltas ta skʼobkʼob tsʼusub li tʼujbil yajtsʼaklomtak Jesuse, xi laj yale: «Scotol li scʼobcʼob tsʼusub liʼ oy ta jtojol ti mu xacʼ sate, ta seʼp loqʼuel li [jTote]. Yan ti bu lec chacʼ sate, ta xichʼ meltsanel, ta xichʼ lecubtasel, yuʼun jech echʼem acʼo satinuc» (Juan 15:2). Jaʼ yuʼun mi chkakʼ jbatik ta sakubtasel li ta voʼ ta Vivlia ti melele, mas me chi jsatin.
Bendisionetik avi xchiʼuk ta tsʼakal
19. ¿Kʼusi bendision la staik li yajtsʼaklomtak Jesús ta skoj ti tsots abtejik li ta kʼajoje?
19 Li ta Pentecostés ta sjabilal 33, li tukʼil yajtsʼaklomtak Cristo ti laj yakʼ sbaik ta chanubtasel yuʼun Jesuse, laj yichʼik chʼul espiritu, ti jaʼ akʼbat-o yipik sventa xuʼ «[chalik] batel [...] ta sbejel banamil li cʼusi laj [y]ilic ta [s]ventae» (Hech. 1:8). Li viniketik taje tsots yabtel echʼik ta sventa xcholbel lekil aʼyej «scotol cristianoetic liʼ ta banamile», xchiʼuk kʼotik li ta Jtsop Jbeiltasvaneje, misioneroetik xchiʼuk ta jkʼelvanejetik ti chbatik ta jujujote (Col. 1:23). ¡Kʼu to noʼox yepal bendision la staik xchiʼuk kʼu to yepal laj yakʼ muyubajuk li krixchanoetike!
20. 1) ¿Kʼusi bendisionetik ataoj ta skoj ti avakʼojbe yipal li kʼajoj ta mantale? 2) ¿Kʼusi skʼan jpʼel koʼontontik spasel?
20 Mi bikʼit chkakʼ jbatik, mi baxbolutik xchiʼuk mi ta jtsaktik lek ta venta li slekil mantaltak Diose, lek me chi j-abtej-o li ta mukʼta kʼajoj ta mantale. Li balumile jaʼ batem ta yoʼonton li kʼusi tskʼan stuke xchiʼuk li saʼel kʼulejale, yan li voʼotike muʼyuk kʼusi kʼux chkaʼitik xchiʼuk muʼyuk chkat koʼontontik, yuʼun xi jmuyubaj ta melel xchiʼuk xpatet koʼontontik (Sal. 126:6). Li kʼusi mas tsots skʼoplale, jaʼ ti jnaʼojtik lek «ti mu alticuc [chij abtej] yuʼun li Cajvaltique» (1 Cor. 15:58). Li Jeova, ti jaʼ Yajval li kʼajoje, chakʼ jmotontik sbatel osil ta skoj ti lek kabteltik xchiʼuk ti ta jkʼuxubinbetik li sbie (Heb. 6:10-12).
[Tsʼib ta yok vun]
^ Akʼo mi jaʼ mas chalbe skʼoplal kʼuyelan chil sbaik Jesús xchiʼuk li buchʼutik chbatik ta vinajel li lokʼolkʼop sventa talentoe, yichʼoj beiltaseletik ti jtunel sventa skotol yajtsʼaklomtak Cristoe.
¿Mi laj xa kaʼibetik smelolal liʼe?
• ¿Kʼu yuʼun skʼan bikʼit xkakʼ jbatik sventa ta sjunul koʼonton xi abtej li ta kʼajoje?
• ¿Kʼuxi xuʼ jchʼiestik xchiʼuk ti baxbolutik-o li ta abtelal ta kʼajoje?
• ¿Kʼu yuʼun tsots skʼoplal ti sakukutik ta jtalelaltik xchiʼuk ta mantal li jkʼajojutike?
[Sjakʼobiltak sventa xchanobil]
[Lokʼol ta pajina 17]
Ti bikʼit chkakʼ jbatike tskoltautik yoʼ lek noʼox jkuxlejaltik sventa mas chbat ta koʼontontik li Ajvalilal yuʼun Diose