Kʼuxi ta jta-o jkuxlejaltik yuʼun li pojelale
Kʼuxi ta jta-o jkuxlejaltik yuʼun li pojelale
«Li bochʼo chchʼun ti jaʼ Jcoltavanej li Nichʼonile jaʼ chcuxi sbatel osil. Yan li bochʼo mu scʼan xchʼune mu xbat yil lequilal sbatel osil. Jaʼ xa noʼox oy ta sventa li tsots stojol mulil chacʼ Diose [o ti ch-iline].» (JUAN 3:36)
1, 2. ¿Kʼu yuʼun lik lokʼuk li revista liʼe?
«LI BUCHʼUTIK chchanbeik lek skʼoplal Vivliae toj labal to van chilik ta melel ti toj tsots skʼoplal ti cham li Cristoe», jech laj yal jun mantal ta oktuvre kʼalal xchanlikal xaʼox slokʼel li revista liʼe, ti lokʼ ta 1879. Laje xi laj yal jun tsatsal mantal ta slajebale: «Mu me jpastik li kʼusi chchʼaybe sbalil o ti chal ti chʼabal sbalil ti cham Cristo kʼuchaʼal jun matanal sventa tstoj jmultike» (kʼelo 1 Juan 2:1, 2).
2 Jtos srasonal ti kʼu yuʼun jech lik yichʼ lokʼesel ta julio ta 1879 li revista liʼe jaʼ sventa tspakbe skʼoplal li chanubtasel ta Vivlia ti laj kichʼtik pojele. Li ta slajebaltik siglo 19, yantik x-epaj li buchʼutik tskuy sbaik ta yajtsʼaklom Cristo ti chalik ti muʼyuk la sbalil ti cham li Jesús sventa tspojutik ta mulile. Jaʼ yuʼun, kʼalal lokʼ li mantaletik ta revistae jaʼ me kʼot ta pasel li kʼusi cha chal liʼe: «Ta smacʼlin xchiʼiltac ta abtel ti cʼalal yorail ta xveʼique» (Mat. 24:45). Li vaʼ kʼakʼale ep krixchanoetik lik xchʼunik ti kʼunkʼun ikʼataj talel li kuxlejaletike, jaʼ yuʼun ep xa muʼyuk xchʼunojik ti chʼay stukʼilal li krixchanoe. Vaʼun li chanubtasel taje chakʼbe yil krixchanoetik ti kʼunkʼun chlekub batel li kuxlejale, jech oxal mu xa la persauk xkichʼtik pojel lokʼel li ta mulile. Ta skoj taje toj jtunel me li tojobtasel akʼbat yuʼun Pablo li Timoteoe: «Chabio me li cʼusitic laʼacʼbat aventaine. Mu me xatucʼulan li loʼiletic sventa noʼox banamil ti muʼyuc stue, xchiʼuc cʼu xʼelan tstsaquilanvanic ta cʼop li bochʼotic lec snaʼ scuyoj sbaique. Oy jayibuc jech laj yalic batel, jech te ichʼayic o ta be xchiʼuquic; jaʼ la scomtsanic o xchʼunel li cʼusi melele» (1 Tim. 6:20, 21).
3. ¿Kʼusitik laj yichʼ jakʼel ti ta jkʼelbetik skʼoplale?
3 Mu me jkʼan «[jkomtsantik] xchʼunel li cʼusi melele». Jaʼ yuʼun lek me ti xi jakʼbe jbatike: «¿Kʼu yuʼun chtun kuʼun li pojelale? ¿Kʼu to xkʼuxul laj yaʼi li Jeova xchiʼuk Jesuse? ¿Kʼusi stakʼ jpas sventa jtabe sbalil li kʼusi kʼupil sba akʼbilun sventa xi kol li ta skʼakʼal yoʼonton Diose?».
Kolemutik ta skʼakʼal yoʼonton Dios
4, 5. ¿Kʼusi svinajeb ti oy skʼakʼal yoʼonton Dios ta stojolal li chopol balumil liʼe?
4 Li Vivlia xchiʼuk li kʼusitik toj chopol kʼotemik tal ta pasele chakʼ ta ilel ti kapem sjol ta stojolal krixchanoetik li Jeova kʼalal la saʼ smul Adane (Juan 3:36). Jun svinajeb taje jaʼ ti mu junuk krixchano xuʼ spoj sba li ta lajelale. Li yajkontra Dios ti jaʼ li Satanase, muʼyuk bu skoltaoj lokʼel ta vokolil li krixchanoetike, xchiʼuk mu junuk ajvalil xuʼ yuʼun yakʼbel li kʼusitik mas tsots skʼoplal chtun yuʼun skotol jnaklejetike (1 Juan 5:19). Noj-o ta pas kʼop xkuxlejal li krixchanoetik avie, pʼaj mantal xchiʼuk povreal.
5 Jamal xvinaj ti muʼyuk ch-akʼbat bendision yuʼun Jeova li chopol balumil liʼe. Li Pabloe laj yal ti «lec xvinaj ti ch-ilin tal Dios ta vinajel ta scoj smulic, ta scoj xchopolilic li cristianoeti[ke]» (Rom. 1:18-20). Jech oxal chaʼa, ta me xil svokolik li buchʼutik mu skʼan xiktaik li choplejale, jaʼ xkaltik, li buchʼutik mu jechuk stalelalik kʼuchaʼal tskʼan yoʼonton Diose. Jaʼ yuʼun yakal chichʼ akʼel ta ojtikinel avi li skʼakʼal yoʼonton Diose, yuʼun yakal chichʼ alel li chapanel chakʼ ti jaʼ skʼoplal li vokoliletik ti tsʼanal ta tasaetik ti chichʼ malel ta sbalumil Satanase. Li mantaletik taje ep ta velta chlokʼ li ta vunetik kuʼuntik ti lokʼemik ta Vivliae (Apo. 16:1).
6, 7. ¿Kʼusi abtelal sbainoj li buchʼutik tʼujbil chbatik ta vinajele, xchiʼuk kʼusi xuʼ spasik li buchʼutik te to oyik ta sbalumil Satanase?
6 Vaʼun chaʼa, ¿mi chʼabal xa van yorail xi jkol li ta skʼob Satanase xchiʼuk ti lek xilutik Diose? Mu jechuk, yuʼun li Jeovae jamal to lek yuʼun li tiʼna xkaltik sventa lek xkil jbatik xchiʼuke. Li buchʼutik tʼujbil chbatik ta vinajel ti jaʼik «xqʼuexol Cristo[e]» jaʼ sbainojik skʼelel li chol mantal chichʼ pasel sventa stabeik sbalil skotol li lumetike. Jech, ta sventa li abtelal taje xi chichʼik albele: «Coʼoluc me avoʼntonic xchiʼuc li Diose» (2 Cor. 5:20, 21).
7 Li Pabloe laj yal ti «Jesuse [...] jaʼ li bochʼo la scoltautic ti cʼu chaʼal mu xijbat ta tojob mulil ti liʼ to jmacojtic batele» (1 Tes. 1:10). Kʼalal mi kʼot skʼakʼalil chakʼ ta ilel skʼakʼal yoʼonton li Jeovae ta me slajes sbatel osil li jpas mulil krixchanoetik ti mu skʼan sutes yoʼontonike (2 Tes. 1:6-9). ¿Buchʼu ti kuxul chkome? Xi tstakʼ li Vivliae: «Li bochʼo chchʼun ti jaʼ Jcoltavanej li Nichʼonile jaʼ chcuxi sbatel osil. Yan li bochʼo mu scʼan xchʼune mu xbat yil lequilal sbatel osil. Jaʼ xa noʼox oy ta sventa li tsots stojol mulil chacʼ Diose [o ti ch-iline]» (Juan 3:36). Kʼuchaʼal chkiltike, kʼalal mi lik li skʼakʼal yoʼonton Diose xchiʼuk mi laj li kʼusitik oy liʼe, jaʼ me chkol li buchʼutik oy xchʼunel yoʼontonik ta stojolal Jesuse xchiʼuk ti laj yakʼ sba ta matanal sventa tspojutike.
Kʼuxi ch-abtej li pojelale
8. 1) ¿Kʼusi alakʼ sba la staik jechuk li Adán xchiʼuk Evae? 2) ¿Kʼuxi vinaj ti tukʼ onoʼox kʼusi snaʼ spas li Jeovae?
8 Tukʼ pasatik yuʼun Dios li Adán xchiʼuk Evae. Ti manchukuk la stoy sbaike jaʼ jun paraiso spʼejel li Balumil jechuke, ti xmuyubajik noʼox li krixchanoetik liʼ nakalike xchiʼuk ti jmoj tsobolike. Kʼux ta alel, pe li baʼyel jtot jmeʼtike muʼyuk la xchʼunbeik smantal li Diose, jaʼ yuʼun albatik ti chchamik-oe xchiʼuk ti nutsatik lokʼel ta nichimaltik Edene. Ta skoj ti maʼukik xa tukʼil krixchanoetike, jpas mulil xa vokʼ li yalab xnichʼnabike. Laj une malubik xchiʼuk chamik, vaʼun jaʼ te vinaj ti chkʼot ta pasel li kʼusi chal Jeovae xchiʼuk ti naka tukʼ li kʼusi tspase. Laj onoʼox yalbe Adán ti chchamik mi la sloʼik li sat teʼ ti mu stakʼ loʼele, ta skoj ti la sloʼike chamik.
9, 10. 1) ¿Kʼu yuʼun chi jchamutik li snitilulutik Adane? 2) ¿Kʼuxi xuʼ xi jkol li ta lajelal sbatel osile?
9 Li snitilulutik Adane muʼyuk xa stukʼil li jbekʼtaltike, jaʼ oy ta koʼontontik li pas mulile xchiʼuk ta onoʼox xi jcham. Yuʼun xkoʼolaj kʼuchaʼal te tikʼilutik ta xchʼut Adán xkaltik kʼalal la spas smule. Jaʼ yuʼun kʼalal albat chchame te jkʼoplaltik ek. Jech oxal persa skʼan xkichʼtik pojel lokʼel, yuʼun mi ta jech noʼox la xchʼaybe skʼoplal li malubel xchiʼuk lajelal li Jeovae mu me meleluk unbi li kʼusi laj yale. Jaʼ yuʼun jaʼ jkʼoplal jtekeltik li kʼusi laj yal Pablo liʼe: «Ta jnaʼtic ti jaʼ yuʼun Dios li mantaletique; yan li vuʼune beqʼuet noʼox quichʼoj. Jaʼ yuʼun mozoinbilun o yuʼun li mulile. ¡Toj abul jba! ¿Bochʼo chiscoltaun ta sventa li jbecʼtal sventa lajele?» (Rom. 7:14, 24).
10 Jaʼ noʼox stuk Jeova oy kʼusi xuʼ spas sventa spas perton li jmultike xchiʼuk ti skoltautik lokʼel li ta lajelal sbatel osil ti jaʼ stojol li mulile, vaʼun jaʼ jech chichʼ ta mukʼ li stukʼilale. ¿Kʼuxi la spas? Jaʼ ti la stak tal li skʼanbil Nichʼon ti te oy ta vinajel sventa xvokʼ kʼuchaʼal jun tukʼil krixchanoe, vaʼun chakʼ xkuxlejal ta jelavel sventa tspojutik. Mu jechuk stalelal kʼuchaʼal Adán li Jesuse, li stuke tukʼ-o laj yakʼ sba. «Li Cristoe me jutuc muʼyuc smul.» (1 Ped. 2:22.) Jech oxal xuʼ ox xil xnichʼnabtak ti naka tukʼike. Pe mu jechuk la spas, yuʼun laj yakʼ akʼo xmile yuʼun li yajkontratak Diose, vaʼun jaʼ jech la xchʼamalin li snitilultak Adane xchiʼuk ti sta xkuxlejalik sbatel osil li buchʼutik chakʼ xchʼunel yoʼonton ta stojolale. Xi chal li Vivliae: «Jun noʼox Dios oy, xchiʼuc jun noʼox bochʼo chcʼopoj cuʼuntic ta stojol Dios, vuʼutic li cristianoutique. Jaʼ li Jesucristo ti cristiano icʼote. Yuʼun jaʼ laj yacʼ sba ta milel cuʼuntic, jaʼ la smanutic jcotoltic» (1 Tim. 2:5, 6).
11. 1) ¿Kʼuxi xuʼ jkoʼoltastik ti kʼuyelan ch-abtej li pojelale? 2) ¿Buchʼutik tstabeik sbalil li pojelale?
11 Xi jkoʼoltastik sventa xkaʼibetik smelolal kʼuxi ch-abtej li pojelale. Oy jun chopol vanko ti chelkʼanbe li stakʼin krixchanoetik te stikʼojike, ti abol sba chkom yuʼune xchiʼuk ti ep yilike. Li yajval vanko une tstoj smulik xchiʼuk ep jabil ch-ochik ta chukel. Pe ¿kʼusi xuʼ xkaltik ta sventa li buchʼutik chʼay stakʼinike? Li kʼusi xa noʼox spatobil yoʼontonike jaʼ mi oy jun jkʼulej vinik ti tsman li vankoe, vaʼun chkʼextabat li stakʼinik sventa sutes li yilike. Jaʼ jech li Jeova xchiʼuk li skʼanbil Nichʼon eke, la sman li snitilultak Adane, vaʼun chʼaybat xa smulik ta skoj ti la smal xchʼichʼel li Cristoe. Jaʼ yuʼun xi laj yalbe skʼoplal Jesús li Juan J-akʼvanej ta voʼe: «Qʼuelavilic, leʼ xa xtal li chʼium chij yuʼun Dios ti chchʼaybe smul scotol cristianoetic ta banamile» (Juan 1:29). Li «cristianoetic» chʼaybil xa smulike jaʼ li buchʼutik kuxulik xchiʼuk li buchʼutik chamemike.
Ti kʼu to xkʼuxul laj yaʼiike
12, 13. ¿Kʼusi ta jchantik kʼalal toj kʼux laj yaʼi Abraham ti chakʼ ox ta matanal li Isaaque?
12 Akʼo mi mu jnaʼtik kʼu to xkʼuxul laj yaʼi li jTotik ta vinajel xchiʼuk li skʼanbil Nichʼon kʼalal la spojutike, li Vivliae chalbe skʼoplal aʼyejetik ti chakʼ kaʼitik ti kʼu to xkʼuxul laj yaʼiike. Jvules ta joltik li kʼusi kʼot ta stojolal Abrahame. Jnoptik avaʼi ti kʼuyelan laj yaʼi sba kʼalal albat ti akʼo xbat li ta Moria balumil sventa chchʼunbe li smantal Dios liʼe: «Icʼo batel li Isaac ti cʼajumal jun anichʼone, ti lec cʼux ta avoʼntone. Batan achiʼuc ta yosilal Moria. Cʼalal te xa oyote, te xamilbun jmotonin ta jolvits ti bu ta xcacʼbot avile» (Gén. 22:2-4).
13 Jnoptik avaʼi kʼu to yelan laj yaʼi sba ti kʼalal te xa oy ti bu albat yuʼun Jeovae, ti tspas jun skajleb matanale xchiʼuk ti chalbe akʼo te smetsan sba li xnichʼon kʼalal xchukoj be xaʼox yok-skʼobe. Xchiʼuk jnoptik avaʼi kʼu to xkʼuxul laj yaʼi ti kʼalal la stam li xkuchilu sventa tsmil li xnichʼon yoʼ chakʼ ta matanale. Tana un jkʼelbetik skʼoplal li Isaaque. ¿Kʼu van yelan laj yaʼi sba kʼalal te xa oy ta skajleb matanal, ti jaʼ xa noʼox smalaoj bu ch-och li kuchilu sventa xmilate? Li yaj-anjel Jeovae jaʼo xa tal spajes li kʼusi tspas Abrahame, akʼo mi jech, li kʼusi la spas li moltotil xchiʼuk xnichʼon li vaʼ kʼakʼale jaʼ tskoltautik ta yaʼibel smelolal ti toj tsots laj yaʼi Jeova kʼalal laj yakʼ akʼo xmilbat xNichʼon yuʼun li sviniktak Satanase. Ti mu kʼusi xal li Isaac kʼalal chmilat xaʼoxe jaʼ svinajeb ti oy ta yoʼonton Jesús ti chil svokol xchiʼuk ti chcham ta jtojolaltike (Heb. 11:17-19).
14. ¿Kʼusi kʼot ta xkuxlejal Jacob ti jaʼ tskoltautik ta yaʼibel smelolal ti kʼu to xkʼuxul laj yaʼi Jeova kʼalal la spojutike?
14 Li kʼusi tskoltautik xtok sventa xkaʼibetik smelolal ti kʼu to xkʼuxul laj yaʼi Jeovae jaʼ li kʼusi kʼot ta stojolal Jacobe. Jaʼ skʼanbil nichʼon li Josee, pe li yan xnichʼnabtake itʼix chaʼiik xchiʼuk spʼajojik. Oy jun kʼakʼale laj yalbe José ti akʼo xbat skʼel kʼuyelan li sbankiltak ti batemik ta chabichij ta nortee, ti te van 100 kilometrouk snamal xil snaik te ta Hebrone. La xchʼun ta sjunul yoʼonton li kʼusi albat yuʼun stot li Josee, akʼo mi muʼyuk bu lek ch-ilat yuʼun li sbankiltake. ¡Nopo xa noʼox avaʼi kʼuyelan laj yaʼi sba Jacob kʼalal sut tal li yan xnichʼnab ti balchʼichʼ tajek li skʼuʼ José sjopojbeik tale! Xi laj yal kʼalal laj yile: «¡Jaʼ scʼuʼ li jnichʼone! Te cʼusi chonbolomal la stiʼ». Lilijem kom yoʼonton ta skoj xchiʼuk jal meʼonaj (Gén. 37:33, 34). Melel onoʼox ti mu jechuk tspas Jeova kʼuchaʼal jpas mulil krixchanoetike. Pe li kʼusi kʼot ta pasele jaʼ chakʼ kaʼitik ti kʼuyelan laj yaʼi sba kʼalal laj yil ti chakʼbeik svokol xchiʼuk ti toj chopol kʼuyelan la smilik liʼ ta Balumil li skʼanbil Nichʼone.
Kʼuxi ta jtabetik sbalil li pojelale
15, 16. 1) ¿Kʼuxi laj yakʼ ta ilel Jeova ti la xchʼam li pojelale? 2) ¿Kʼuxi ataojbe sbalil li pojelale?
15 Li Jeovae la xchaʼkuxes li stukʼil Nichʼone, laj yakʼbe jun yan sba yutsil sbekʼtal ti mu xvinaj ta kʼelele (1 Ped. 3:18). Kʼalal chaʼkuxiem xaʼoxe laj yakʼ sba ta ilel 40 kʼakʼal ta stojolal li yajtsʼaklomtake, la stsatsubtasbe xchʼunel yoʼonton xchiʼuk la xchapan sventa spasik li mukʼta abtelal sventa chol mantale. Laje bat ta vinajel, te laj yakʼ ta stojolal Dios li sbalil ti la smal xchʼichʼel ta stojolal li melel yajtsʼaklomtake, ti jaʼik li buchʼutik oy xchʼunel yoʼontonik ta sventa li matanal sventa tspojutike. La xchʼam Jeova li pojelale, vaʼun laj yakʼ ta ilel ti kʼalal laj yakʼbe sbain Cristo sventa xakʼbe chʼul espiritu li yajtsʼaklomtak ti te tsobolik ta Jerusalén ta Pentecostés ta sjabilal 33 (Hech. 2:33).
16 Li yajtsʼaklomtak Cristo ti tʼujbil chbatik ta vinajele ta anil noʼox laj yalbeik mantal li krixchanoetik ti akʼo xjatavik ta stojolal li skʼakʼal yoʼonton Diose, jaʼ yuʼun skʼan xichʼik voʼ ta sbi Jesucristo sventa spasbat perton li smulike (kʼelo Hechos 2:38-40). Jaʼ te lik tal ti ta smiyonal xa noʼox krixchanoetik ta skotol lumetik tstak ta ikʼel Dios yoʼ lek xil sba xchiʼuke, taj une jaʼ koliyal ti chakʼ xchʼunel yoʼontonik ta sventa ti laj yakʼ sba ta matanal li Cristoe (Juan 6:44). Ta sventa ti laj xa kaʼibetik smelolale, skʼan me jkʼelbetik skʼoplal liʼe: ¿Mi oy van buchʼu ta yabtel noʼox stuk la sta li kʼupil sba yutsil spatobil oʼontonal ta sventa li kuxlejal sbatel osile? ¿Mi xuʼ van xchʼay kuʼuntik kʼalal jtaojtik xaʼox li spatobil oʼontonal taje?
17. ¿Kʼu yelan skʼan xkiltik ti jtaoj jun jmotontik ti jaʼ ti chi jkʼot ta yamigo Jeovae?
17 Muʼyuk buchʼu ti sta-o xichʼ pojele. Pe ta sventa ti chakʼ xchʼunel yoʼontonik ta sventa li pojelale, ta smiyonal noʼox me viniketik xchiʼuk antsetik ti xmuyubaj noʼox lek chil sbaik xchiʼuk Diose xchiʼuk ti smalaoj chkuxiik sbatel osil ta paraiso Balumile. Veno, pe skʼan me jamal xkaltik un ti xuʼ mu xa lekuk xkil jbatik xchiʼuk li Jeovae. Mi ta jkʼan kuxul xi jkom yuʼun kʼalal mi kʼot yorail li skʼakʼal yoʼontone, skʼan me xkakʼtik-o ta ilel ti ep sbalil chkiltik «ti la stojbutic jmultic li Jesucristoe» (Rom. 3:24; kʼelo Filipenses 2:12).
Kakʼtik-o ta ilel xchʼunel koʼontontik ta sventa li pojelale
18. ¿Kʼusi xuʼ jpastik sventa xkakʼtik ta ilel xchʼunel koʼontontik ta sventa li pojelale?
18 Li Juan 3:36 ti jaʼ li teksto ta slikebal li xchanobil liʼe, chakʼ kiltik jtos ti kʼusi skʼan jpastik sventa xkakʼtik ta ilel li xchʼunel koʼontontik ta stojolal li Jesuse, jaʼ ti jchʼunbetik smantale. Kʼalal ep sbalil chkiltik ti la spojutik li Cristoe jaʼ me tstij koʼontontik ta yakʼel ta jkuxlejaltik li kʼusi laj yakʼ ta chanele, jtose jaʼ li mantaletik sventa talelale (Mar. 7:21-23). Jaʼ xa noʼox me smalaojik li skʼakʼal yoʼonton Dios li buchʼutik mu skʼan xiktaik «li mulivajele», li chopol «ixtol loʼil[e]» xchiʼuk «li cʼusitic yan chopole», jtos taje jaʼ li buchʼutik nopem xaʼiik skʼelel pornografiae (Efe. 5:3-6).
19. ¿Kʼusitik skʼan jpastik sventa xkakʼ ta ilel xchʼunel koʼontontik ta sventa li pojelale?
19 Sventa xkakʼtik ta ilel ti ta jtojtik ta vokol li pojelale skʼan me tsots xi j-abtej sventa «[xkichʼtik] ta mucʼ li Diose» (2 Ped. 3:11). Skʼan me ep jchʼakbetik yorail li kʼusitik sventa mantale, jech kʼuchaʼal li spasel orasione, li xchanel jVivlia jtuktike, li tsobajeletike, li yichʼel ta mukʼ Jeova ta kutsʼ kalaltike xchiʼuk li xcholbel skʼoplal Ajvalilal yuʼun Diose. Jech xtok, skʼan me jpastik liʼe: «Mu me xchʼay ta avoʼntonic spasel li cʼusitic leque, xchiʼuc ti tscʼan chacoltavanique. Yuʼun jaʼ li matanal toj lec chil Diose» (Heb. 13:15, 16).
20. ¿Kʼusi bendisional tstaik li buchʼutik chakʼ ta ilel ti oy-o lek xchʼunel yoʼontonik kʼalal to ta slajebal ta sventa li pojelale?
20 Kʼalal mi kʼot yorail chakʼ ta ilel skʼakʼal yoʼonton Jeova ta stojolal li chopol balumil liʼe, ¡xi jmuyubaj me tajek ti oy-o lek xchʼunel koʼontontik kʼalal to ta slajebale xchiʼuk ti toj ep sbalil laj kiltik li pojelale! Kʼalal te xaʼox nakalutik li ta achʼ balumil yalojbe skʼoplal Diose, sbatel me osil ta jtojbetik ta vokol Jeova li kʼusi laj yakʼ sventa xi jkol li ta skʼakʼal yoʼontone (kʼelo Juan 3:16, Apocalipsis 7:9, 10, 13 xchiʼuk 7:14, Ch).
¿Kʼuxi ta jtakʼtik?
• ¿Kʼu yuʼun skʼan xkichʼtik pojel?
• ¿Kʼu to xkʼuxul laj yaʼi Jeova xchiʼuk Jesús kʼalal la spojutike?
• ¿Kʼuxi xuʼ jbalintik li pojelale?
• ¿Kʼuxi chkakʼtik ta ilel xchʼunel koʼontontik ta sventa ti la spojutik li Jesuse?
[Sjakʼobiltak sventa xchanobil]
[Lokʼol ta pajina 13]
Li Jeovae jamal to lek yuʼun li tiʼna xkaltik sventa lek xkil jbatik xchiʼuke
[Lokʼol ta pajina 15]
Chkaʼibetik lek smelolal kʼu to xkʼuxul laj yaʼi Jeova xchiʼuk Jesús li pojelal kʼalal ta jnoptik ti kʼu to xkʼuxul laj yaʼi Abraham, Isaac xchiʼuk Jacob li kʼusi la snuptanike