Li kʼusitik tsjakʼ jkʼel vunetike

¿Kʼu yuʼun laj yal Jesús «pasbilot xa perdón scotol li amule» xut jun jmulavil ants? (Luc. 7:37, 48.)

Kʼalal jaʼo te oy li Jesús ta sna jun fariseo vinik ti Simón sbie, te tal jun ants, la skejan sba ta yok li Jesuse, lik spokbe yok ta yaʼlel sat, laje la stakijesbe ta stsotsil sjol. Vaʼun lik stsʼutsʼbe li yoke, laje la xjaxbe jun muil aseite. Li loʼil ta Vivliae chal ti jaʼ skʼoplal «jun jmulavil ants te ta lum[e]». Jech onoʼox ta melel, jkotoltik muʼyuk jtukʼiltik, pe kʼalal chal Vivlia ti jmulavil ants xie jaʼ chalbe skʼoplal li buchʼutik jaʼ xa ojtikinbil-o ti muʼyuk chchʼunbeik smantal Diose o ti nabil xa lek li muliletik tspase. Taje jaʼ van skʼoplal jun ants ti chchon sbae. Jaʼ li ants ti xi albat yuʼun Jesuse: «Pasbilot xa perdón scotol li amule» (Luc. 7:36-38, 48). ¿Kʼusi smelolal li kʼusi laj yale? Ta skoj ti muʼyuk toʼox bu akʼbil li matanal sventa jpojeltike, ¿kʼuxi xa noʼox ti laj yichʼ akʼel ta perton li antse?

Jnopbetik smelolal ti kʼusi toj tsots skʼoplal laj yalbe Simón li Jesuse, ti jaʼo kʼot ta pasel kʼalal laj xaʼox spokbe yok Jesús li antse xchiʼuk ti mu toʼox bu pasbil pertone. Li Jesuse laj yal ti xkoʼolaj kʼuchaʼal epal ilil li mulile, ti mu sut yuʼunik li buchʼutik oy yile: «Oy jun vinic qʼuexbil staqʼuin yuʼun chib viniquetic. Li june voʼob ciento (500) denario taqʼuin xqʼuexoj. Li yane lajuneb yoxvinic (50) noʼox xqʼuexoj. Pero li chib jʼiluviletique mu sut yuʼunic li yilique, jech te ichʼaybatic o. Alo caʼtic bochʼo junucal ep cʼuxubinbil icʼot –xut». Xi takʼav li Simone: «Ta jnop ti jaʼ li bochʼo ep yil ichʼaybate». Vaʼun xi laj yal li Cristoe: «Jaʼ melel li cʼusi chavale» (Luc. 7:41-43). Jtekeltik oy kiltik ta stojolal Dios, jaʼ xkaltik, skʼan jchʼunbetik smantal. Jaʼ yuʼun kʼalal muʼyuk ta jchʼunbetik smantal xchiʼuk ti kʼalal ta jpas jmultike, muʼyuk me yakalutik ta stojbel li kʼusi skʼan jtojbetike. Kʼalal jech ta jpastik une xkoʼolaj kʼuchaʼal tstsob sba kiltik ta stojolal. Pe li jTotike xkoʼolaj kʼuchaʼal jun vinik ti chakʼ ta chʼamunel stakʼin ti muʼyuk tskʼanbutik sutel xkʼexole. Li Jesuse jaʼ laj yalbe skʼoplal kiltik ta stojolal Dios kʼalal xi laj yalbe yajtsʼaklomtak ti akʼo skʼanbeik Dios ta orasione: «Pasbuncutic perdón yuʼun jmulcutic jech chac cʼu chaʼal jpasojbecutic perdón li bochʼotic oy smul cuʼuncutique» (Mat. 6:12).

¿Kʼusi la stsak ta mukʼ Dios sventa spas ta perton li muliletik ta voʼnee? Jvules ta joltik ti toj tukʼ li Jeovae, yuʼun li buchʼu tsaʼ smule skʼan xcham. Jaʼ yuʼun cham li Adán ta skoj ti muʼyuk la xchʼun mantale. Pe kʼalal laj yakʼbe Mantal j-israeletik ta stojolal Moisés li Jeovae te jamal laj yal ti chakʼ ta perton mulil mi chichʼ akʼel ta milbil matanal jkotuk chonbolome. Jech kʼuchaʼal xi chal li Pabloe: «Jutuc mu scotoluc chlecub ta sventa [li] chʼichʼe. Ta xal noxtoc ti manchuc persa chichʼ malel chʼichʼe, muʼyuc perdón yuʼun mulil ti jechuque» (Heb. 9:22). Taje jaʼ noʼox jech snaʼoj judioetik ti kʼuyelan tspas perton Diose. Jaʼ yuʼun muʼyuk lek laj yaʼiik li buchʼutik te chveʼik ta sna Simón li kʼusi laj yalbe jun ants li Jesuse. Jech oxal stekel li buchʼutik te chveʼik ta mexa ta xokon Jesuse xi la snopike: «¿Cʼusi xa svuʼel li vinic liʼi, ti cʼalal ta smul cristianoetic xuʼ yuʼun tspasbe perdone?» (Luc. 7:49). Vaʼun chaʼa, ¿kʼusi la stsak ta mukʼ sventa la spasbe perton li stsatsal multak antse?

Li baʼyel albil kʼop ti laj yichʼ alel kʼalal la spas smul li baʼyel jtot jmeʼtike, te chal ti chakʼ ayanuk jun nitilulal li Jeovae. Pe li Satanás xchiʼuk snitilultake tstibeik xchak yakan li nitilulale (Gén. 3:15, Ch). Te yayij Jesús kʼalal cham ta skʼob yajkontratak Diose (Gál. 3:13, 16). Kʼalal la smal xchʼichʼel li Cristoe jaʼ te la spoj lokʼel ta mulil xchiʼuk ta lajel li krixchanoetike. Ta skoj ti persa onoʼox chkʼot ta pasel li kʼusi tskʼan yoʼonton Jeovae, xkoʼolaj kʼuchaʼal pojbilutik xa laj yil kʼalal laj yichʼ alel li kʼusi chal Génesis 3:15, ta Xchʼul Cʼop ti Jtotic Diose, ta skʼop Chamula, jaʼ yuʼun xuʼ xa xichʼ pasbel perton smulik li buchʼutik  chakʼ xchʼunel yoʼontonik ta stojolal li kʼusitik yaloj tspas Diose.

Kʼalal mu toʼox chtal ta Balumil li Cristoe oy xa onoʼox buchʼutik tukʼ stalelal laj yil li Jeovae. Taje te skʼoplal Enoc, Noé, Abraham, Rahab xchiʼuk Job ti xchʼunojik lek ti chkʼot ta pasel li kʼusitik yaloj Diose. Jaʼ yuʼun xi laj yal li Santiagoe: «Li Abrahame lec iʼilat yuʼun Dios ta sventa xchʼunojel yoʼnton». Xchiʼuk xi to laj yale: «Jech noxtoc li jmulavil ants Rahabe, lec iʼilat yuʼun Dios ta sventa ti laj yicʼ ochel ta sna li chib viniquetique» (Sant. 2:21-25).

Li ta Israel ta voʼnee toj tsots la spas smul li Davide, pe laj yakʼ ta ilel tsots xchʼunel yoʼonton ta stojolal li melel Diose xchiʼuk la sutes yoʼonton ta melel. Xi chal Vivlia ta sventa li pertone: «Li Diose jaʼ laj yacʼbe smal xchʼichʼal li Jesucristoe, jech icʼot ta jchʼaymulil ta sventa li bochʼotic ta xchʼunique. Jech ivinaj ti tucʼ yoʼnton [...], yuʼun te la stsʼicbe smul li cristianoetic ta pocoʼ voʼonee, yuʼun toj ep smucʼul yoʼnton. Ivinaj xa ti toj tucʼ yoʼntone, xchiʼuc ti jech tucʼ yoʼnton chil ec li bochʼotic ta xchʼunic li Jesuse» (Rom. 3:25, 26). Jaʼ yuʼun li Jeovae la spas ta perton David, pe muʼyuk me bu la xchʼay ta sjol junuk stukʼil mantal un, yuʼun jaʼ la stsak ta mukʼ li matanal chakʼ Jesús sventa tspojutik ta tsʼakale.

Jaʼ jech kʼot ta stojolal xkaltik ek li ants ti la spokbe yok li Jesuse. Akʼo mi tsots spasoj smul li antse la sutes yoʼonton. Snaʼoj lek ti skʼan pojel ta skoj li muliletik spasoje xchiʼuk laj yakʼ ta ilel ta stalelal ti toj ep sbalil laj yil li vinik ti laj yakʼ Jeova sventa smanutik li ta mulile. Akʼo mi muʼyuk toʼox chamem ta jtojolaltik li Cristoe ta onoʼox me xkʼot ta pasel ta melel, jaʼ yuʼun xuʼ xa xichʼ tsakel ta mukʼ sventa xichʼ pasel ta perton krixchanoetik kʼuchaʼal li ants taje. Jech oxal xi albat yuʼun li Jesuse: «Pasbilot xa perdón scotol li amule».

Kʼuchaʼal chakʼ kiltik li loʼil taje, li Jesuse muʼyuk bu la spʼaj li jpas muliletike, moʼoj, yuʼun laj yakʼ ta ilel slekil yoʼonton ta stojolal. Li kʼusi mas toj leke, jaʼ ti chakʼ ta perton krixchanoetik li Jeova ti chakʼ ta ilel ti sutesoj yoʼontonike. Taje ¡toj echʼem xa noʼox tspat koʼontontik ta skoj ti jpas mulilutike!

[Lokʼol ta pajina 7]

Tukʼ stalelal ilatik