¿Mi xvul ta ajol?

¿Mi akʼupinoj skʼelel Li Jkʼel osil ta toyole, ti achʼik to lokʼem tale? Mi jeche, paso preva mi xtakʼ avuʼun li kʼusitik liʼe:

• ¿Kʼu yuʼun «Cristo» laj yichʼ akʼbel sbi li Jesuse?

Li jpʼel kʼop cristo xie, likem tal ta griego kʼop kjristós, ti ta hebreo kʼope maschíaj (mesías). Li chaʼpʼel kʼope jaʼ skʼan xal «buchʼu tʼujbil». Ta skoj ti jaʼ Mesías ti albil onoʼox skʼoplal li Jesuse, ti jaʼ li yajkʼopojel Jeova ti mas tsots skʼoplale, sta-o ti Cristo, xNichʼonot kuxul Dios laj yichʼ akʼbel sbie (Mat. 16:16; 1/4, pajina 15).

• ¿Mi jaʼ skʼoplal Jesús li bankilal anjel Miguele?

Li biil Miguele voʼob velta ta jtatik ta Vivlia ti jaʼ skʼoplal jun tsatsal kuxlejal ti mu xvinaj ta kʼelele. Li ta 1 Tesalonicenses 4:16 chakʼ ta ojtikinel ti jaʼ bankilal anjel li Jesucristoe o jaʼ jpas mantal yuʼun li anjeletike. Li biil Miguele jaʼ skʼan xal «¿Buchʼu Jech Kʼuchaʼal li Diose?», xchiʼuk Jesús, ti jaʼ skʼan xal «Jaʼ Chpojvan li Jeovae» (1/4, pajina 19).

• ¿Kʼu yuʼun muʼyuk akʼbat kastigo yuʼun Dios li Aarón ta skoj ti la spas jkot chʼiom tot vakax ta kʼanal takʼine?

Li Aarone muʼyuk la xchʼun li mantal ti mu stakʼ xichʼik ta mukʼ yan diosetike (Éxo. 20:3-5). Pe li Moisese kʼopoj ta stojolal li sbankile xchiʼuk «oy lec stsatsal li [skʼop]» kʼalal la skʼan vokole (Sant. 5:16). Li Aarone ep xa onoʼox jabil tukʼ yakʼoj sba. Akʼo mi laj ta sujel yuʼun jteklum sventa spas jkot chʼiom tok vakax, ta tsʼakale laj yakʼ ta ilel ti tspʼaj li kʼusitik la spasike, yuʼun bat xchiʼuk xnichʼnabtak Leví kʼalal laj yakʼ sbaik ta stojolal Jeovae (Éxo. 32:25-29; 15/5, pajina 21).

• ¿Kʼuxi xuʼ stsal yuʼun li yajtsʼaklom Cristo ti mukul satiat yuʼun snup xchiʼile?

Mi tukʼ chakʼ ta xkuxlejal beiltaseletik ta Vivlia li buchʼu mukul satiate, mu me snop ti jaʼ ta smul ti jech pasbate. Li Jeovae snaʼoj ti skʼan patbel yoʼonton li yajtsʼaklom Cristoe xchiʼuk ti skʼan tsatsubtasele. Jtos ti kʼusi tstunes sventa tspat koʼontontike jaʼ li ermanoetike (15/6, pajina 30, 31).

• Li buchʼutik ep chuchʼik poxe, ¿kʼusi xuʼ spasik sventa oyuk xa noʼox spʼisol xuchʼik?

Mi oy buchʼu yalojbot ti chat yoʼonton ta skoj ti ep chavuchʼ poxe, jaʼ mas lek ti xa jutukajese. Chtun me avuʼun li mantaletik liʼe: Nopolik noʼox xa pas orasion, tao avipal ta Vivlia, chano spajtsanel aba, kʼelo buchʼutik cha chiʼin, nopo kʼu noʼox yepal chavuchʼ, chano yalel ti moʼoje, saʼo koltael xchiʼuk jpʼeluk-o avoʼonton. Li buchʼutik tspasik persa ta xchʼunel li lekil tojobtasel chakʼ melel Diose yakal xa tskʼupinik epal bendision (1/7, pajina 6-10).

• ¿Mi chakʼ ta aʼyel ti stakʼ xi j-elkʼaj li Proverbios 6:30?

Ta melel moʼoj. Li versikulo chtale chakʼ ta ilel ti oy smul ch-ilat yuʼun Dios li j-elekʼe, yuʼun xi chale: «Manchuc mi yacal ta xʼelcʼaj ta staic, snaʼojic ti ta sutes vucub velta ti cʼu yepal laj yelcʼane, manchuc mi ta stsob scotol ti cʼu yepal oy ta sna une» (Pro. 6:31, Ch). Jaʼ yuʼun, mi oy buchʼu tskʼan lek ch-ilat yuʼun Diose, mu stakʼ x-elkʼaj jutebuk akʼo mi oy svokol o chviʼnaj (1/7, pajina 14).

• ¿Mi xuʼ van skoltautik li buchʼutik chamemike?

Li Vivliae jamal chal ti «bochʼotic chamenic xae mu xa cʼusi snaʼic o» xchiʼuk «jech te laj scʼoplal o li xcʼuxul yoʼntone, li yitʼixal yoʼntone, xchiʼuc li stiʼetel yoʼntone» (Ecl. 9:5, 6). Li Jesuse la skoʼoltas li lajel kʼuchaʼal buchʼu batem xchʼulel ta vayele. Kʼalal chvay jun krixchanoe, mu kʼusi stakʼ spas ta stojolal yantik, yuʼun muʼyuk kʼusi snaʼ (1/7, pajina 21).

• ¿Kʼuxi xuʼ xa tikʼbe ta yoʼonton avalab anichʼnab ta skʼanel skʼelel li vune?

Ti chichʼ sabel yavil xchiʼuk ti lek chakʼ ta ilel stalelalik li totil-meʼiletike jaʼ me te chlik skʼanik-o li skʼelel vune. Akʼbo svun li avalab anichʼnabike. Lek tsots xavaptabe. Tijbo yoʼonton sventa xal sloʼilik xchiʼuk jmoj xavalik li kʼusi la akʼelbee. Akʼo skʼelboxuk xchiʼuk tijbo yoʼonton ti akʼo sjakʼik li kʼusi la skʼelike (15/7, pajina 26).

• ¿Kʼu yuʼun maʼuk ta jpastik li kʼusi tsnop krixchanoetike?

Li kʼusi tsnop krixchanoetike muʼyuk tstsak ta venta li kʼusi lek xchiʼuk kʼusi chopol chil Jeovae. Li yajtsʼaklomutik Cristoe jaʼ ta jchanbetik stalelal Jesucristo, li jbeiltasvanej kuʼuntike, yuʼun jaʼ la stsak ta mukʼ li sTot ta vinajele, «ti muʼyuc scʼoplal laj yaʼay [kʼexlal]» ti jokʼol chcham ta jtel teʼe (Heb. 12:2; 15/8, pajina 3).

• ¿Kʼusi la stsak ta mukʼ Jesús sventa spasbe ta perton smul li ants ti ojtikinbil ta jteklum kʼuchaʼal jmulavile?

Li baʼyel albil kʼop ti laj yichʼ alel kʼalal la spas smul li baʼyel jtot jmeʼtike, te chal ti chakʼ ayanuk jun nitilulal li Jeovae. Ta skoj ti persa chkʼot ta pasel li kʼusi tskʼan yoʼonton Jeovae, xkoʼolaj kʼuchaʼal pojbilutik xa laj yil kʼalal laj yichʼ alel li kʼusi chal Génesis 3:15, ta Xchʼul Cʼop ti Jtotic Diose, ta skʼop Chamula. Akʼo mi muʼyuk toʼox chamem ta jtojolaltik li Cristoe ta onoʼox me xkʼot ta pasel, jaʼ yuʼun xuʼ xa xichʼ tsakel ta mukʼ sventa xichʼ pasel ta perton li krixchanoetik ti sutesoj yoʼontonik kʼuchaʼal li jmulavil antse (15/8, pajina 6).