¡Takbilutik ta ikʼel jkotoltik!

¿BU TAKBILUTIK ta ikʼel? Ta Betel, jaʼ xkaltik, ta junuk li Betel yuʼun yajrextikotak Jeova ti oy 118 ta spʼejel Balumile. Ep ti buchʼutik ayemik xa ta Betele yalojik ti toj labal sba laj yilike.

Jun kerem ti yakal chchan Vivliae ay svulaʼan Betel ta slumal, ta México, toj labal laj yil ti xmuyubaj noʼox chtunik ta stojolal Jeova ep viniketik xchiʼuk antsetike. Jaʼ yuʼun xi la sjakʼe: «¿Kʼusi skʼan jpas sventa xtal abtejkun liʼe?». Xi takʼbate: «Skʼan baʼyuk xavichʼ voʼ. Lek xtok ti xa och ta prekursore, jaʼ xkaltik, spasbel yabtel Dios ta tsʼakal ora». Jaʼ jech la spas li kereme, vaʼun kʼalal lokʼ chib jabile albat ti xuʼ xtal ta Betele, leʼ une oy xa jtob jabil te chtun.

¿Kʼusi jaʼ li Betele?

Li «Betel» ta hebreo kʼope jaʼ smelolal «sna Dios» (Gén. 28:19, tsʼib ta yok vun). Li Betele tskolta ta mantal li stsobobbail yajrextikotak Jeova ti oy mas ta 100,000 ta spʼejel Balumile. Jlom Beteletike tspasik xchiʼuk tspukik vivliaetik xchiʼuk vunetik sventa yajtsʼaklomtak Cristo. Te van jtobuk ta mil viniketik xchiʼuk antsetik ch-abtejik ta Betel ta tsʼakal ora ti jelel bu likemike xchiʼuk li xkuxlejalike. Jech xtok, jmoj chtunik ta stojolal Jeova xchiʼuk ta stojolal yermanotakik, pe muʼyuk me kʼusi smalaoj ch-akʼbatik. Ep ermanoetik ta Betele jal xa chtunik ta stojolal Jeova, jmoj ch-abtejik xchiʼuk kerem-tsebetik ti lek tsots yipalike. Mi xokob ta yabtelike xchiʼuk li ta sabado xchiʼuk ta domingoe chbatik ta chol mantal xchiʼuk chbatik ta tsobajel ti te noʼox nopole. Jech xtok, kʼalal chokobike chchan sVivliaik, chchʼay yoʼontonik o mi moʼoje jaʼ tspasik li kʼusitik skʼan pasel yuʼun stukike.

Li buchʼutik chtun ta Betele chichʼ jutuk xkʼexol stakʼinik jujun u sventa li kʼusitik tun yuʼunike. Jech xtok, toj mu li kʼusitik tslajesike, lek chakʼ yip jbekʼtaltik xchiʼuk xtok lek chʼubabil li skuartoike xchiʼuk lekik ta naklebinel. Kʼalal laj yichʼ vaʼanel li Betele maʼuk sventa toj kʼupiluk sba xvinaj, yuʼun jaʼ ti jtuneluk sventa xichʼ pasel abtel tee. Li jvulaʼaletike maʼuk noʼox labal chilik ti toj chapal snaʼ x-abtejike, ti xchʼubet noʼox xvinaj li naetike xchiʼuk nichimaltike, yuʼun labal sba chilik xtok ti toj lek yoʼontonik li j-abteletike xchiʼuk ti jmoj ch-abtejike. Akʼo mi ep yabtelik lek yoʼonton snaʼ skʼoponik skotol krixchanoetik. Li ta Betele muʼyuk bu jelel chil sbaik, mi jaʼuk ti mukʼ xa chakʼ sbaik ta skoj yabtelike. Tsots skʼoplal skotol li  abtelale: skusel o smesel kʼusitik, spasel veʼlil, skʼelel nichimaltik, spasel vunetik o abtelaletik ta ofisina. Li buchʼutik te chtunik ta Betel ti ojtikinbilik kʼuchaʼal betelitaetike, jmoj ch-abtejik ta sventa li abtelal yuʼun yajrextikotak Jeovae (Col. 3:23).

Kojtikintik jayvoʼuk betelitaetik

Kojtikintik jayvoʼuk ermanoetik ti chtunik ta Betel ti xkoʼolajik kʼuchaʼal jun utsʼ-alalil ta spʼejel Balumile. ¿Kʼusi tijbat-o yoʼontonik sventa xtunik ta Betel? Kalbetik skʼoplal li Marioe. Kʼalal laj yichʼ voʼe staoj lek yabtel ti bu lek chtoje ta jun ojtikinbil empresa ta sventa karoetik ta Alemania, xchiʼuk xuʼ x-akʼbat mas mukʼ yabtel. Ta tsʼakale, bat abtejuk jun xemana ta Betel ti te noʼox ta slumale, te take batel yoʼ bu tspasik vunetike. Ta ora laj yil ti mu xkoʼolaj xchiʼuk xchiʼiltak ta abtel li betelitaetike, jaʼ yuʼun la snojes jun solisitud sventa x-och ta Betel. Akʼo mi muʼyuk xaʼibeik smelolal yutsʼ yalal xchiʼuk yamigotak ti kʼu yuʼun jech la spas li Marioe, jun yoʼonton te ch-abtej ta Betel ta Alemania.

Ep buchʼutik mu kʼusi mas snaʼik spasel kʼalal chkʼotik ta Betele. Jaʼ jech li Abel ti oy xa ta voʼlajuneb jabil chtun ta Betel ta Mexicoe. Xi chal kaʼitike: «Jaʼ xchanubtasojun li Betele. Jchanoj spikel mukʼta makinaetik spasobil vun ti tsotsik ta pikele. Jnaʼoj lek ti ep xuʼ jpas kanal ta yan ta skoj li kʼusitik jnaʼ spasele, pe jnaʼoj lek xtok un ti muʼyuk bu ta jta li bendisionetik kʼuchaʼal liʼe: jaʼ ti jun noʼox koʼonton ta jkuxlejale, ti muʼyuk noʼox kʼusi chkaʼie, ti muʼyuk chkat koʼontone xchiʼuk ti muʼyuk tsalbail ta abtel kʼuchaʼal tspasik li krixchanoetike. Chkaʼi voʼone la jta li chanubtasel ti mas toj leke, ti jaʼ la skoltaun sventa xi chʼi ta mantale xchiʼuk ti li pʼijub yuʼune. Muʼyuk onoʼox jech la jta jlekilal ti li ayuk ta universidadetik ti toj lekike».

Li vulaʼal ta Betele tstsatsubtasutik ta mantal

Kʼalal ta jvulaʼantik Betele xuʼ skoltautik ta mantal. Jaʼ jech kʼot ta stojolal Omar ti nakal ta Mexicoe. Chanubtase ta mantal yuʼun smeʼ, pe kʼalal la sta vuklajuneb sjabilale  laj yikta sba ta tsobajeletik xchiʼuk ta chol mantal. Lik spas choplejal xchiʼuk bat ta yoʼonton saʼel takʼin. Echʼ jayib jabile kʼalal ch-abtej li Omar ta jun empresa sventa telecomunicaciones te bat xchiʼuk jtsop krixchanoetik ta svulaʼanel Betel ta México sventa xakʼik ta ilel kʼuxi ch-abtej jlom makinaetik. Xi chale: «Kʼalal laj koʼontonkutike la yakʼ kilkutik li kʼusitik oy ta Betele. Li kʼusitik laj kile xchiʼuk ti toj lek yoʼontonik ta jtojolalkutike jaʼ lik jnop-o kʼuyelan jkuxlejal ti nom oyun ta stojolal Jeovae. Lik batkun ta tsobajeletik xchiʼuk lik jchan Vivlia. Ta svakibal ue laj kichʼ voʼ. Koliyal chkalbe Jeova ti la spatbikun koʼonton kʼalal li ay ta vulaʼale».

Li Masahiko ta Japone chʼi tal ta jun utsʼ-alalil ti jaʼik yajrextikotak Jeovae. Pe lik yikta li mantale, yuʼun chchuke laj yaʼi. Lik yakʼbe yipal chanun, vaʼun laj yikta li tsobajeletike xchiʼuk li chol mantale. Xi chvul ta sjole: «Jun kʼakʼale li kutsʼ kalal xchiʼuk jlom ermanoetike laj yalik ti chbat svulaʼanik Betele. Laj yikʼikun batel ta persa. Jun tajek koʼonton laj kaʼi jba kʼalal li xanavkutik ta yute. La jkʼupin tajek xchiʼinel ta xanbal li ermanoetik ti mu sta jech xchiʼuk li kamigotak ti maʼukik yajrextikotak Jeovae. Taje la stij koʼonton sventa jech xi kuxi kʼuchaʼal yajtsʼaklom Cristo, jaʼ yuʼun la jkʼan chanubtasel ta Vivlia». Avi une, li Masahikoe chchol xa mantal ta tsʼakal ora ta stsobobbail.

Jun ermana ta Franciae bat ta Moscú ta skoj yabtel. Muʼyuk xa bu xchiʼin ta loʼil li yajrextikotak Jeovae xchiʼuk sikub ta mantal. Lik spas choplejal, laje nupun xchiʼuk jun vinik ti maʼuk yajrextiko Jeovae. Ay vulaʼanatuk yuʼun jun ermana ti likem ta Franciae, jmoj ay svulaʼanik li Betel ta San Petersburgo ta Rusiae. Xi laj yal ta jlik karta li kʼusi kʼot ta pasele: «Kʼot kʼalal to koʼonton ti kʼuyelan toj lek la xchʼamunkutik li ermanoetik ta Betele. ¡Yan to sba lekilal! Laj kaʼi ti ch-abtej xchʼul espiritu Jeova tee. ¿Kʼu xa noʼox chaʼal ti laj kikta li s-organisasion Diose? Kʼalal li ay xaʼox li ta vulaʼale la jkʼanbe Jeova ti akʼo xi skoltae xchiʼuk ta sjunul xa koʼonton lik jchanubtas ta mantal li jtsebetake». Akʼo mi koltae onoʼox yuʼun yan ermanoetik chaʼa, jaʼ tsatsubtasat-o kʼalal ay ta vulaʼale. Jaʼ te lik chʼiuk-o ta mantal.

¿Kʼu yelan chilik Betel li buchʼutik mu xojtikinik lek li abtelaletik tspas yajrextikotak Jeovae? Li Alberto ti tikʼil ta politikae bat svulaʼan Betel ta Brasil ta 1988. Toj labal sba laj yil ti smeset yutsile, ti xchʼubete xchiʼuk ti muʼyuk bu ta mukul tspas yabtelike. Mu toʼox jaluk yechʼel ti ay svulaʼan jun seminario (tsobajel sventa chanubtasel) ti bu nakal li sbol ti jaʼ jun palee, pe toj jelel laj yil: «Naka ta mukul kʼusitik tspasik maʼ li ta seminarioe». Ta tsʼakal jutuke lik xchʼam jun chanubtasel ta Vivlia li Albertoe, laj yikta li politikae, li avi une jaʼ xa jun mol ta tsobobbail.

¡Laʼ vulaʼanik Betel!

Ep buchʼutik ti tsots chakʼ yipik ta svulaʼanel li Betel ti yichʼoj ta venta slumalike. Jech kʼuchaʼal li Paulo xchiʼuk Eugeniae chanib to jabil la stsʼin stakʼinik sventa xbatik li ta Betel ta Brasile, chib kʼakʼal xanavik ta karo ti oxmil kilometro snamale. ¿Kʼu yelan laj yilik? Xi chalike: «Xtoj-o jvokoltik. Mas xa xkaʼibekutik smelolal kʼuxi ch-abtej s-organisasion li Jeovae. Kʼalal chkalbekutik li buchʼutik ta jchanubtaskutik ta Vivlia ti kʼuyelan ch-abtejik li ta Betele, xi tsjakʼik bakʼintike: “¿Mi oy ayemoxuk te?”. Li avi une xuʼ xa xkalbekutik ti ayemunkutike».

¿Mi oy junuk Betel ti bu nakalote o ta junuk lum ti nopol xavile? Mi jeche, ta jtijkutik avoʼonton sventa xa vulaʼan. Te chavil ti lek chʼambil cha kʼote xchiʼuk cha ta ep bendisionetik ta mantal.

[Lokʼol ta pajina 18]

Mario

[Lokʼol ta pajina 18]

Abel

[Lokʼol ta pajina 18]

Alemania

[Lokʼol ta pajina 18]

Japón

[Lokʼol ta pajina 18]

Brasil