Kampanya ti stuk noʼox jech echʼ ta Bulgariae

«Toj ep li cʼaoje, pero jaʼ muʼyuc ep li jcʼaojetique. Jaʼ lec cʼanbeic vocol li Yajval cʼaoje, yuʼun acʼo stac batel jcʼaojetic yuʼun.» (MAT. 9:37, 38)

LI KʼUSI laj yal Jesús taje lek chakʼ ta ilel ti kʼuyelan oy li Bulgariae, lum ti te oy ta sureste yuʼun Europae. ¿Kʼu yuʼun? Yuʼun chtun tajek j-abteletik sventa tspukik batel li lekil aʼyej ta stojolal li mas ta vukub miyon jnaklejetik li ta alakʼ sba lum ta Balcanese. Akʼo mi oy 1,700 jcholmantaletik, toj jutukik sventa chcholik mantal ta sjunul li yosilalike. Ta skoj taje, li Jtsop Jbeiltasvaneje laj yakʼ permiso sventa chichʼ takel ta ikʼel jcholmantaletik ti chkʼopojik ta búlgaro ti nakalik ta yan lumetik ta Europa sventa chbatik ta jun kampanya ti stuk noʼox jech chichʼ pasel ta yorail kʼepelaltik ta 2009. Li kampanyae chjalij vukub xemana xchiʼuk tstsuts ta Mukʼta Tsobajel ta oxib kʼakʼal «¡Viqʼuiluc me asatic!», ti ch-echʼ ta jteklum Sofía ta 14 kʼalal 16 yuʼun agosto li ta jabil taje.

Toj lek la xchʼamik

Li ermanoetik ta Betel ta Sofiae tskʼan van tsnaʼik jayvoʼ jcholmantaletik ta Alemania, España, Francia, Grecia, Italia xchiʼuk Polonia chchʼamik li takel ta ikʼel taje. Li buchʼutik chchʼamike, skʼan stoj stukik li kʼuyepal chlaj yuʼunike xchiʼuk tstunes svakasionik sventa chcholik mantal. Toj labal sba ta ilel ti jujun xemana echʼe epaj li buchʼutik la snojesik solisitude, kʼot ta 292. Ti kʼuyepal taje xuʼ xichʼ takel batel ta oxib jteklumetik li jcholmantaletike: ta Kazanlak, Sandanski xchiʼuk ta Silistra. Li jkʼelvanejetik ta sirkuito ta Bulgariae la stakik ta ikʼel jcholmantaletik xchiʼuk prekursoretik li ta tsobobbailetik sventa tskolta sbaik li ta kampanyae. Ta slajebal xae, 382 jcholmantaletik ta sjunul yoʼontonik la xcholik mantal ti bu bakʼintik noʼox chkʼot li lekil aʼyeje.

Laj yichʼ takel batel jlom ermanoetik ti te noʼox nopol stsobobbailik sventa chbat saʼik vayebaletike. La xchʼamunik jayibuk apartamento xchiʼuk la skʼubanik kuartoetik ta otel ti yalelik noʼox stojole. Li ermanoetik taje, tsots abtejik sventa tskoltaik li bu chvayik xchiʼuk li kʼusitik chtun yuʼunik li buchʼutik bat skolta sbaik ta chol mantale. Xchiʼuk xtok, la xchʼamunik yavil bu xuʼ xetʼesik li tsobajeltike, ti jaʼ chetʼes li ermanoetik ti likemik tal ta yantik lume. Toj labal sba laj yichʼ ilel ti la stsob sbaik 50 jcholmantaletik sventa tsmuyubtaik Jeova li ta jteklumetik ti bu mu junuk yajrextiko Jeova te nakale.

Toj labal sba li muyubajel laj yakʼik ta ilel li ermanoetik ti ta yan lum likemik tale. Muʼyuk kʼusi spajesatik, akʼo mi toj kʼixin, yuʼun li ta yorail kʼepelaltike chkʼot ta 40 °C. Kʼalal naka toʼox oxib xemana slikesojik li kampanyae, laj xaʼox xcholik mantal li ta sjunlej Silistrae, ti te nopol oy ta stiʼil ukʼum Danubioe xchiʼuk ti oy mas ta 50,000 jnaklejetike. Vaʼun, li jcholmantaletike la snop chbat xcholik mantal ta bikʼit lumetik ti te noʼox nopajtike xchiʼuk kʼotik to kʼalal ta Tutrakan, ti 55 kilometro snamal ta stukʼil smaleb Kʼakʼale. Jutuk mu skotoluk kʼakʼal chlik xcholik mantal ta baluneb ora xchiʼuk oʼlol ta sob, chpajik jlikeluk sventa chveʼik,  vaʼun chcholik mantal kʼalal to ta vukub ora ta bat kʼakʼal. Jutuk mu jech kʼot ta pasel ek ta Kazanlak xchiʼuk Sandanski: li ermanoetike toj baxbolik ta abtel, ta skoj taje la xcholik mantal ta sjunul li yosilalike, vaʼun batik to ta yan jteklumetik ti te noʼox nopajtike.

¿Kʼusitik kʼot ta pasel?

Li vukub xemana jalij li kampanyae lek laj yichʼ cholel li lekil aʼyeje. Liʼ ta baʼyel sigloe laj yalik ti vinaj «ta sjunul lum li cʼusi [chakʼik] ta [chanel]» li jtakboletike. Xuʼ van jech chalik ek ta stojolal yajrextikotak Jeova li jnaklejetik ta jteklumetik ti laj yichʼik vulaʼanele (Hech. 5:28). Laj yiktaik 50,000 revista xchiʼuk la slikesik 482 chanubtasel ta Vivlia. Jech xtok, li ta 1 yuʼun septiembre ta 2009 lik li baʼyel tsobobbail ta Silistrae, xchiʼuk oy xa grupoetik ta Kazanlak xchiʼuk ta Sandanski. Tspat koʼontontik skʼelel ti oy krixchanoetik ti yakal xchʼiik ta mantal akʼo mi sba to velta laj yaʼiik li mantale.

Ta baʼyel xemanae, jun prekursora espesial ti chkʼopoj ta búlgaro ti likem ta Españae, ta kaye la sta li Karinae, jun ants ti chchon periodiko ta Silistrae. Li Karinae lek la xchikinta li mantale xchiʼuk ay ta jun tsobajel, ta tsʼakale la xchʼam chanubtasel ta Vivlia. Pe ta skoj ti mu xchʼun mi oy Dios li smalale, la skʼan chanubtasel ta jun parke. Koʼol chchanik xchiʼuk li chaʼvoʼ stsebetike, li vixil ti Daniela sbie, yichʼoj tajek ta mukʼ li mantaletik ta Vivliae. Ta jun noʼox xemana la skʼel li livro Chchanubtasvane xchiʼuk ta ora laj yikta stunesel li lokʼoletike, jech kʼuchaʼal chal li Vivliae. Jech xtok, lik yalbe mantal li yamigotake. Kʼalal echʼem xaʼox oxib xemanae ay ta sba velta ta tsobajel, xi laj yalbe li ermana ti ch-akʼbat chanubtasel ta Vivliae: «Jechun xa chkaʼi jba kʼuchaʼal voʼoxuke. ¿Kʼusi skʼan jpas yoʼ xbat jchiʼinoxuk li ta cholmantale?». Li Danielae yakal-o xchʼi ta mantal xchiʼuk smeʼ xchiʼuk li smuke.

Orlin, jun ermano ti Bulgaria slumale, ti nakal xa ta Italiae, laj yichʼ takel batel ta Kazanlak. Jun kʼakʼale, kʼalal tsut xaʼox batel ta skuartoe, laj yil chaʼvoʼ keremetik ti te chotolik ta parkee, vaʼun la xcholbe mantal. Laj yiktabe jlik livro Chchanubtasvan xchiʼuk laj yalanbe ti chbat skʼel ta yokʼomale. Li jun kereme, ti Svetomir sbie, la xchʼam li chanubtasel ta Vivliae. Chanunaj ta yokʼomal xtok, kʼalal lokʼ baluneb kʼakʼale, vaxakib xaʼox velta laj yichʼ chanubtasel. Li kereme xi laj yalbe li Orline: «Kʼalal chib toʼox kʼakʼal skʼan xa cholbun mantal ta parkee, kalojbe xaʼox Dios ti ta jkʼan chkojtikine xchiʼuk ti chkakʼ jkuxlejal ta stojolal mi la skoltaune». Kʼalal sut xaʼox batel ta Italia li Orline, li ermanoetik ti te noʼox nakalike la svulaʼanik-o li Svetomire, ti yakal xchʼi-o ta mantale.

 La staik bendision li buchʼutik laj yakʼ svokolike

¿Kʼusi tsnopik li ermanoetik ti lek yoʼontonik ti la stunes svakasionik xchiʼuk ti la stoj stukik li kʼusitik tun yuʼunik yoʼ xbatik ta chol mantal ta Bulgariae? Xi la stsʼiba jun mol ta Españae: «Li kampanyae la spas ta jun li jcholmantaletik ti chtunik ta España ti ta búlgaro chkʼopojike. Lek kʼusi laj yakʼ kʼotuk ta pasel ta stojolalik». Xi la stsʼiba jun nupultsʼakal ti likemik ta Italiae: «¡Jaʼ li u ti mas kʼupil sba echʼem ta jkuxlejalkutike! [...] Li kampanyae la sjel tajek jkuxlejalkutik. Jelel tajek chkaʼi jbakutik». Li nupultsʼakal taje, yakal tsnop chbatik ta naklej ta Bulgaria sventa chkoltavanik ti bu mas chtun jcholmantaletike. Jun tojol tseb ti prekursora ta España ti Carina sbie, ay xchol mantal ta Silistra. Laj yikta komel yabtel kʼalal laj li kampanyae xchiʼuk bat ta naklej li ta jteklum taje sventa tskolta li achʼ tsobobbaile. Stsoboj stakʼin sventa chnaki jun jabil ta Bulgaria. ¿Kʼu yelan chaʼi sba ti jech la spase? «Xi muyubaj tajek ti laj yakʼ tal tunkun ta Bulgaria li Jeovae —xi chal—; ta jkʼan ti jal to tajek liʼ oyune. Chkakʼ xa voʼob chanubtasel ta Vivlia, xchiʼuk chkʼotik xa oxvoʼ ta tsobajel.»

Jun ermana ti likem ta Italiae tskʼan chbat li ta kampanyae, pe ta skoj ti mu to jaluk yochel ta abtele, mu toʼox xuʼ skʼan svakasion. Akʼo mi jech, laj yichʼ stsatsal yoʼonton xchiʼuk la skʼan jun u svakasion ti muʼyuk bu chichʼ stojole, ti jpʼel yoʼonton chikta komel yabtel mi mu x-akʼbate. Labal to laj yaʼi ti xi albat yuʼun yajval ta abtele: «Lek oy, pe oy kʼusi ta jkʼanbot: takbun tal junuk slokʼol Bulgaria». Li ermanae jpʼel ta yoʼonton xchʼunoj ti takʼbat s-orasion yuʼun li Jeovae.

Stanislava, jun tseb ti nakal ta jteklum Varna ta Bulgariae, sjunul kʼakʼal ch-abtej xchiʼuk lek tojbil, vaʼun la skʼan permiso sventa chbat koltavanuk li ta kampanya ta Silistrae. Kʼalal kʼote, laj yil ti xmuyubaj li prekursoretik ti likemik tal ta yantik lum sventa chcholik mantal ta slumale, taje tijbat yoʼonton, vaʼun lik okʼuk. Ta skoj taje lik snop kʼuyelan xbat li xkuxlejale, jech oxal kʼalal sut ta sna chib xemana ta tsʼakale, laj yikta li yabtele xchiʼuk och ta prekursora regular. Li avie xmuyubaj tajek li Stanislavae, yuʼun yakal tstunes stsebal sventa chtun ta stojolal li Jpasvanej yuʼune (Ecl. 12:1).

¡Toj ep bendision chichʼik li buchʼutik ta sjunul yoʼonton chtunik ta stojolal Jeovae! Li kʼusi mas lek xuʼ jpas ta jkuxlejaltike jaʼ ti jchʼak jkʼakʼaltik xchiʼuk xkakʼ kipaltik ta spasel li abtelal toj tsots skʼoplale: li xcholel mantal xchiʼuk spasel ta yajtsʼaklom Cristo li krixchanoetike. ¿Mi xuʼ xa abtej mas li ta abtelal ti chpojvane? Xuʼ van oy bu skʼan mas jcholmantaletik li ta alumale. ¿Mi oy anopoj chbat tunan te? O xuʼ van xa chan yan kʼop sventa cha kolta li buchʼutik oy ta yoʼontonik yojtikinel li kʼusitik melel ta Vivliae. Kʼusuk noʼox li kʼusi cha jel ta akuxlejale, xuʼ me xa chʼun ta melel ti chakʼbot ep sbendision li Jeovae (Pro. 10:22).

[Rekuadro ta pajina 32]

Jun kʼakʼal ti mu xchʼay ta jolile

Ep jcholmantaletik ti likemik tal ta yantik lum ti koltavanik ta kampanya ti stuk noʼox jeche ayik li ta Mukʼta Tsobajel ta oxib kʼakʼal «¡Viqʼuiluc me asatic!» li ta Sofiae. Xpatet noʼox yoʼontonik li ermanoetik ta Bulgaria ti laj yojtikinik ep ermanoetik ti likemik ta yantik lum ta Europae. Jech xtok, xmuyubajik tajek ti laj yakʼ ta ilel li ermano Geoffrey Jackson sliklej li Traducción del Nuevo Mundo de las Santas Escrituras ta bulgaroe. Mu xa noʼox albajuk muyubajel laj yaʼiik li 2,039 ti te oyike xchiʼuk la stojik tajek ta vokol kʼalal jal xchiʼuk tsots tajek la xtʼax skʼobike. Jech xtok, oy buchʼutik okʼik ta muyubajel. Ta melel, ti kʼuyelan lek laj yichʼ jelubtasele xchiʼuk ti kʼun ta aʼibel smelolale tskolta li krixchanoetik ta Bulgaria ti oy ta yoʼonton chojtikinik Jeovae.

[Mapa ta pajina 31]

(Sventa xakʼel kʼuyelan pasbil liʼe, saʼo li vune)

BULGARIA

SOFÍA

Sandanski

Silistra

Kazanlak

[Lokʼol ta pajina 31]

Li vukub xemana jalij li kampanyae lek laj yichʼ cholel li lekil aʼyeje