«Jaʼ tskoltaun sventa xkʼot ta yoʼonton mantal kuʼun li krixchanoetike»

LEʼ XA ta sjayibal jabile echʼ jun mukʼta tsobajel sventa jeltos loʼiletik ti chalbe skʼoplal kuxlejaletik ti te echʼ ta Porto Alegre, ta sural Brasile. Ta sjaylajunmilal xa noʼox krixchanoetik ayik ti likemik tal ta 135 lumetike. Jtsop yajrextikotak Jeova ta tsobobbail ta Porto Alegre la xcholik mantal kʼalal la xkuxik jlikeluk li krixchanoetike, la xcholbeik mantal ep krixchanoetik ti ayik li ta tsobajel taje. ¿Kʼuxi laj yutik?

Jun prekursora te ta tsobobbail ti jaʼ sbi Elizabete, xi chale: «La jtuneskutik li foyeto Buenas nuevas para gente de todas las naciones». Xchiʼuk xi to chale: «Ep ti mu junuk velta yaʼiojik li lekil aʼyej sventa Ajvalilal yuʼun Diose, akʼo mi jech, toj lek laj yaʼiik. La jchiʼinkutik ta loʼil krixchanoetik ti likemik ta Bolivia, China, Francia, India, Israel xchiʼuk Nigeria. Laj kichʼkutik batel vunetik ti lokʼem ta Vivlia ta jeltos kʼopetik ta sventa li krixchanoetike, vaʼun ta sjunul yoʼonton la xchʼamik».

Jaʼ jech toj lek tunem yuʼun foyeto ek li Raúl ti jaʼ jun prekursor ta Mexicoe. Jun veltae la xchiʼin ta loʼil jun vinik ti likem ta Arabia ti yichʼoj 80 jabil xchiʼuk ti jaʼtik to xchamel yajnile. Kʼalal la skʼelbe ta skʼop stuk li aʼyej sventa Ajvalilal yuʼun Diose, li vinike lokʼ yaʼlel sat. ¿Kʼu yuʼun? Yuʼun kʼot ta yoʼonton li kʼusi la skʼel ta skʼop stuk ti jaʼ li kʼusi yaloj Dios ta Vivlia ti chlaj skʼoplal li lajel kʼuchaʼal chal Apocalipsis 21:3, 4. Yan kʼakʼal kʼalal jaʼo chchol mantal ta buyuk noʼoxe, laj yojtikin jun vinik ti ta portugués chkʼopoje. Oy buchʼu chamem yuʼun ek: chamem jun xnichʼon. Vaʼun li Raule laj yakʼbe skʼel li aʼyej ta portuguese, kʼalal laj yoʼonton ta skʼelele laj yal ti tskʼan chchan mas ta sventa li Vivliae xchiʼuk la xchʼam jun chanubtasel.

Ta skoltaobba li foyeto Buenas nuevas para gente de todas las naciones, li Raule xcholojbe mantal krixchanoetik ti chkʼopojik ta alemán, armenio, chino, coreano, francés, hindi, inglés, mixe, persa, ruso xchiʼuk zapoteco. Xi chal li Raule: «Kiloj ti toj jtunel ta chol mantal li foyetoe. Jaʼ tskoltaun sventa xkʼot ta yoʼonton mantal kuʼun li krixchanoetike, manchuk mi mu jnabe li skʼopike».

Ta skoj ti yantik x-epaj li krixchanoetik ti chlokʼik ta xanbal o chbatik ta naklej ta yan lume, ta jtatik krixchanoetik ti yan-o slumalike. Mi ta jtunestik li foyeto Buenas nuevas para gente de todas las naciones li ta chol mantale, ta me xaʼi mantal kuʼuntik li krixchanoetike. ¿Mi nopem xavaʼi chavichʼ batel?

[Lokʼol ta pajina 32]

Sventa xkʼot ta yoʼonton mantal yuʼun krixchanoetik li Raule tstunes li foyetoe