Koltao avalab anichʼnabik sventa xojtikinik lek li s-organisasion Jeovae

LI OLOLETIKE tskʼan chchanik. Totil-meʼiletik, ¿mi oy anopojik li kʼusitik la sjakʼik li bikʼtal j-israeletik ta Egipto li ta akʼobaltik ta baʼyel kʼin Koltaele? Junantike jaʼ van liʼe: «¿Kʼu yuʼun laj yakʼik ta matanal li uni chʼiom Chije?», «¿Kʼu yuʼun yakal tsbon ta chʼichʼ tiʼna li jtote?», «¿Bu chi jbat?». Kʼalal ta jkʼeltik li mantaletik laj yakʼbe Jeova li totiletik ta Israel sventa li kʼin Koltael tspasik ta jelavele, te chvinaj ti muʼyuk ch-ilin-o ti jech chichʼ jakʼbele: «Cʼalal me oy jech chasjacʼboxuc li anichʼnabique: “¿Cʼusi smelol leʼe ti qʼue sʼelan ta xapasique?” tsots scʼoplal ti xi xatacʼbeique: “Ti chon bolom liʼe, ta xichʼ svocol ta milel yuʼun ti qʼuin Colel ti jaʼ yichʼel ta mucʼ ti Diose. Yuʼun ti cʼalal laj syayijesan ta smilel ti egipcioetique, jelavel jelav ti bu snaic ti israeletic ti cʼalal nacalic to ox ta Egiptoe, xchiʼuc xtoc cʼot ta pasel ti colic ti calab jnichʼnabcutique”» (Éxo. 12:24-27). Ta tsʼakal xtoke la svulesbe ta sjol totiletik ta Israel li Jeova ti tsots skʼoplal ti akʼo stakʼik li kʼusi chjakʼbat yuʼun yalab xnichʼnabik ta sventa li «cʼusi jbel albil ti tsots scʼoplale, ti cʼusitic nopbil ti yaloj ti Ajvalil Dios[e]» (Deu. 6:20-25, Ch).

 Jamal lek xvinaj ti tskʼan Jeova ti jamaluk xichʼ takʼel li kʼusi tsjakʼik ololetik ta sventa li melel yichʼel ta mukʼ Diose, kʼalal jech chichʼik takʼbele jaʼ me chtijbat-o yoʼontonik sventa skʼanik-o li Jeovae, ti jaʼ sDiosike xchiʼuk ti jaʼ Jpojvanej yuʼunike. Li avie jaʼ jech tskʼan ek li Jeova ta sventa li ololetike. Jtos kʼuxi xuʼ xichʼ chanubtasel li ololetik sventa skʼanik Dios ta sjunul yoʼontonik xchiʼuk li Steklumale, jaʼ ti xichʼik koltael ta yojtikinel mas li s-organisasion Jeovae xchiʼuk ti xaʼibeik smelolal kʼuxi tstabeik sbalil li kʼusi tspas ta jtojolaltike. Jkʼeltik junantik kʼuxi xuʼ xichʼ chanubtasel ta yojtikinel mas s-organisasion Dios li ololetike.

Li tsobobbaile

Li ololetike tsots me skʼoplal ti xojtikinik lek li stsobobbail yutsʼ yalalike. Sventa jeche skʼan me xikʼ batel ta skotol tsobajel yalab xnichʼnabik li totil-meʼiletike. Mi jech tspasike ta me xchʼunik li kʼusi albatik yuʼun Jeova li j-israeletike: «Tsobic scotol li jchiʼiltactique cʼalal ta vinic ta ants, ta ololetic [...], yuʼun acʼo tal yaʼyic scotolic li smantal Mucʼul Dios chavaptaique. Yuʼun jech acʼo xchanic yichʼel ta mucʼ li Mucʼul Diose, xchiʼuc jech acʼo spasic batel li cʼusi chaʼyique. Jaʼ noʼox jech ec li avalab anichʼnabic ti mu to snaʼic li mantaletique, xuʼ ta xaʼyic ec, yuʼun jech acʼo xchanic yichʼel ta mucʼ Mucʼul Dios cuʼuntic» (Deu. 31:12, 13).

Li ololetike ta sbikʼtal onoʼox xuʼ xchanbeik li sKʼop Jeovae. Xi albat yuʼun jtakbol Pablo li Timoteoe: «Ta abicʼtal onoʼox laj avotquin li scʼop Dios tsʼibabile» (2 Tim. 3:15). Li kʼusi ch-echʼ ta tsobajeletik ta Salon sventa Tsobobbaile xuʼ me xaʼibeik smelolal li kʼoxetik eke xchiʼuk ti xojtikinikuk lek li kʼejojetik sventa Ajvalilal yuʼun Diose. Te chchanik stunesel Vivlia, li vunetik lokʼem ta Vivliae xchiʼuk chchanik xkʼuxubinel. Jech xtok te chilik li  kʼusi ojtikinbil-o li melel yajtsʼaklomtak Cristoe: li kʼanbail ta sjunul oʼontonale. Xi laj yal li Jesuse: «Ta xcalboxuc comel jun achʼ mantal, cʼanano me abaic. Jech chac cʼu chaʼal la jcʼanoxuc li vuʼune, jaʼuc me jech chacʼanan abaic li voʼoxuque. Me jech chapasique, jech ta snaʼic o scotol cristianoetic ti voʼoxuc cajchancʼopoxuque» (Juan 13:34, 35). Li kʼanelal xchiʼuk li lekilal oy ta salone jaʼ me chnopaj-o li ololetike xchiʼuk jaʼ me jech chnop xaʼiik chbatik ta tsobajel.

Totil-meʼiletik, mi cha nopes abaik ti sob cha kʼotik li ta Salon sventa Tsobobbail xchiʼuk ti te to cha komik jlikeluk mi laj li tsobajele, mas me tsta yamigo li avalab anichʼnabike. Sventa mu jaʼuk noʼox xchiʼinik ololetike, ¿kʼu yuʼun mu xavakʼbe yojtikin yan ermanoetik xchiʼuk ermanaetik ti jelajtik sjabilalike? Li buchʼu oy xa sjabilalike ep xa kʼusi xchanoj ta xkuxlejalik xchiʼuk oy spʼijilik, jaʼ yuʼun mi jaʼ chchiʼin li avalab anichʼnabike ta me stabeik sbalil. Jech kʼuchaʼal li Zacarías ta skʼakʼalil Vivlia ti «ichanubtas[van] ta yichʼel ta mucʼ li Diose» ep kʼusi lek la xchan yuʼun li kerem ajvalil Uzías ta Judae. Li avi eke, ti buchʼu xuʼ lek xchanbeik stalelal li ololetike jaʼ li ermanoetik ti oy xa sjabilal tukʼ chtunik ta stojolal Jeovae (2 Cró. 26:1, 4, 5). Jech xtok, kʼalal te oyoxuk li ta Salon sventa Tsobobbaile lek me ti xavalbe avalab anichʼnabik ta sventa li slatsleb o skʼejobil livroetike, li kʼusi chichʼ akʼel ta yavil aʼyejetike xchiʼuk li yan kʼusitik ta salone.

Li organisasion ta spʼejel Balumile

Li ololetike skʼan me snaʼik ti te tsakal skʼoplal ta organisasion ta spʼejel Balumil li tsobobbail bu chkʼotike, ti oy mas ta sien mil tsobobbail ta skotole. Albo yaʼiik kʼuyelan li organisasione, kʼuxi ch-abtej, kʼusi abtelal tspas xchiʼuk kʼuxi xuʼ skolta sba li ololetike. Koltao sventa xaʼibeik smelolal ti kʼu yuʼun amalaojik tajek chkʼot yorail li Mukʼta Tsobajeletik ta chib kʼakʼal, li Mukʼta Tsobajel ta oxib kʼakʼale xchiʼuk ti kʼalal chtal ta vulaʼal li jkʼelvanej ta sirkuitoe (kʼelo li rekuadro «Li kʼusitik xuʼ xichʼ chanel li ta Akʼobal sventa Yichʼel ta Mukʼ Jeova ta Kutsʼ Kalaltike», pajina 28).

Kʼalal xuʼ avuʼunike ikʼik ta veʼel ta anaik li jkʼelvanejetik ta sirkuitoe, misioneroetik, li buchʼutik ch-abtejik ta Betele xchiʼuk li yan ermanoetik ch-abtejik ta tsʼakal orae. Mu me xa nopik ti mu xokob li ermanoetik sventa chchiʼin ta loʼil li avalab anichʼnabike. Yuʼun li stukike oy ta yoʼonton chchanbeik stalelal Jesús, ti toj lek la xchʼam li ololetike xchiʼuk ti la xchiʼinan ta loʼile (Mar. 10:13-16). Kʼalal chaʼiik li kʼusi kʼotem ta xkuxlejalik li yajtuneltak Jeova taje xchiʼuk ti chilik ti xmuyubaj noʼox tspasik li chʼul abtelale, yikʼaluk van x-ayan ta yoʼonton avalab anichʼnabik ek ti xlik abtejikuk ta tsʼakal orae.

¿Kʼusi mas stakʼ xa pasik sventa xa kolta avalab anichʼnab yoʼ xojtikinik mas li s-organisasion Jeovae? Li kʼusi xuʼ xa pase jaʼ ti xa chaʼkʼelik xchiʼuk avutsʼ avalal li livro Los testigos de Jehová, proclamadores del Reino de Dios, ti chavakʼbeik yil ti yichʼojik ta mukʼ Dios li ermanoetike, ti bikʼit laj yakʼ sbaike xchiʼuk ti tukʼ yoʼontonike, jech xtok chapbo yaʼiik kʼuxi tunesatik yuʼun Jeova yoʼ spukik batel li lekil aʼyej ta spʼejel Balumile. Xuʼ xa tunesik xtok li videoetik slokʼesoj organisasion sventa oy kʼusi te xchanik ta skoj li kʼusi kʼot ta pasel ta voʼne xchiʼuk avie. Mi xuʼ avuʼunik xtoke xuʼ me xa vulaʼanik li Betel ta alumalike o li ta yantik lume. Taje te me chkom ta sjol avalab anichʼnabik, yuʼun jech kʼuchaʼal ta baʼyel sigloe, li jvokʼ s-organisasion Jeova ta Balumile —ti jaʼ sventainoj li j-abtel ti tukʼ yoʼonton, ti lek pʼije— jaʼ yabtel tsbeiltas xchiʼuk chakʼbe sveʼel ta mantal stekel li yermanotak ta Balumile (Mat. 24:45-47; Hech. 15:22-31).

Jaʼ albeik li kʼusi chtun yuʼunik ta jujuntale

Teuk me ta ajol kʼuxi la xchanubtas yajtakboltak Jesús kʼalal cha chanubtas avalab anichʼnabike. Xi laj yal jun velta li Jesuse: «Oy to ep cʼusi ta jcʼan ta xcalboxuc, pero mu xuʼ avuʼunic yaʼyel scotol ta ora»  (Juan 16:12). Li Jesuse muʼyuk ep tajek kʼusi laj yalbe li yajtakboltake, bikʼitik laj yakʼbe xchan li kʼusitik melel yoʼ xaʼibeik lek smelole. Li voʼoxuk eke, mu me epuk tajek kʼusi xavalbe li avalab anichʼnabike. Koltaik sventa xojtikinik lek li s-organisasion Jeovae, jlikeluk noʼox me li kʼusi cha chapbeike xchiʼuk jech me xa pasilanik-o. Jaʼ me jech oy-o ta yoʼontonik xchiʼuk tskʼupinik xchanel li kʼusitik ta steklumal Diose. Kʼalal chjel batel li kʼusi chtun yuʼun avalab anichʼnabike, chaʼkʼelik li kʼusi snaʼojik xae xchiʼuk chapbeik mas smelolal.

Li tsobobbaile jaʼ me jun mukʼta koltael sventa mu xi jlubtsaj ta mantal. Jaʼ yuʼun kʼalal tspasbeik yabtel Dios ta sjunul yoʼontonik li kerem-tsebetike jaʼ me jech lek chapalik sventa stsalik li kʼusi chakʼ slumal Satanase (Rom. 12:2). Jnaʼojtik ta melel ti ta me xa muyubajik kʼalal cha kolta avalab anichʼnabik sventa xojtikinik lek li s-organisasion Jeovae. Jaʼ jech oy ta koʼontonkutik, mi jech tskʼan Jeovae, ti tukʼuk-o ta stojolal Jeova li avalab anichʼnabike xchiʼuk ti teikuk-o li ta s-organisasione.

[Rekuadro ta pajina 28]

Li kʼusitik xuʼ xichʼ chanel li ta Akʼobal sventa Yichʼel ta Mukʼ Jeova ta Kutsʼ Kalaltike

Liʼ ta rekuadroe cha ta jayibuk loʼil sventa li s-organisasion Jeova ti toj jtunelike.

▪ Albo skʼoplal bakʼin xchiʼuk kʼuxi lik tal li tsobobbail bu oyoxuke xchiʼuk albo skʼoplal butik Salonetik sventa Tsobobbail laj yichʼ tunesel tal. Li kʼusi yan xuʼ xa pase, jaʼ ti xuʼ xavikʼ tal junuk ermano ti oy xa sjabilal yochel ta mantal sventa stakʼbe li kʼusi tsjakʼ avalab anichʼnabike.

▪ Albo skʼoplal kʼusi sventa li tsobajeletik ta jpastike, li mukʼta tsobajeletike xchiʼuk albo li sbalil ti xuʼ staik li ololetike.

▪ Alo kʼusi sventa li jeltos chanun chakʼ li s-organisasion Jeovae. Albo skʼoplal kʼusitik lek kʼotem ta pasel yuʼun li buchʼutik nelem yuʼunik li chanunetik taje.

▪ Koltaik li uni kʼoxetik sventa xaʼibeik smelolal ti toj tsots skʼoplal ti baxbolikuk ta chol mantale. Chanubtaso kʼuxi xuʼ x-abtejik sventa skolta sbaik li ta yaʼyejal kabteltik ta spʼejel Balumil ti te chichʼ alel ta Anuario de los testigos de Jehová.

▪ Chapbo skʼoplal ti oy jaytos li abtel ta tsʼakal ora ti bu xuʼ skolta sbaik li kerem-tsebetik ta s-organisasion Jeovae. Xuʼ te xa taik epal mantal li ta stsʼakleb Kabteltik sventa Dios yuʼun marso ta 2007, pajina 3 kʼalal ta 6.

▪ Koltaik ta yaʼibel smelolal li uni kʼoxetik ti kʼu yuʼun skʼan xichʼ chʼunel li mantaletik ta tsobobbaile. Albeik smelolal ti kʼu yuʼun skʼan jchʼunbetik smantal li s-organisasion Jeovae, akʼo mi mu toj tsotsuk skʼoplal yilel. Albeik skʼoplal ti kʼalal chchʼunbeik smantal li moletike jaʼ jech tskolta sbaik sventa lekuk noʼox oy li tsobobbaile.

Lek me ti xamigoin avalab anichʼnabik li buchʼutik voʼne xa chtunik ta stojolal Diose

[Lokʼol ta pajina 26]

Jech kʼuchaʼal kʼot ta pasel ta voʼneal Israele, kʼalal oy kʼusi tsjakʼik ta sventa s-organisasion Jeova li ololetike jamal me chtakʼbat yuʼun stot smeʼik