Tsots chi abtej li ta s-organisasion Jeovae

TSLOʼILTA VERNON ZUBKO

LI CHʼI ta jun rancho ti nopol yiloj li Stenen, jun lum ti jaʼ yosilal Saskatchewan (Canadá). Li jtot jmeʼ Fred xchiʼuk Adella, laj yakʼik persa la skʼelunkutik tal ta mantal xchiʼuk ta takʼin xchiʼuk li jvixe, li Aurelliae, jaʼ jech kʼuchaʼal la spasbeik li yantik jchiʼiltakutik ta vokʼel ti mas to bikʼitike, Alvin, Allegra xchiʼuk Daryl. Li avie ta jtojbekutik tajek ta vokol ti la xchanubtasunkutik ta sventa li kʼusi melele.

Li jtot ti tʼujbil chbat ta vinajele mu snaʼ xiʼ xcholel mantal. Tsots ch-abtej sventa tsta li kʼusi chtun kuʼunkutike, pe tskʼan xtok ti akʼo xichʼ ojtikinel ta skotol krixchanoetik ti jaʼ yajrextiko Jeovae. Ta xcholilan mantal. Mu xchʼay-o ta jol ti oy tajek ta yoʼonton xchiʼuk ti mu snaʼ xiʼe. Xi chalilanbune: «Tsots me xa abtej li ta s-organisasion Jeova sventa mu xa ta ep avokole».

Ta jcholilankutik mantal ta skayealtak Stenen xchiʼuk li ta lumetik ti te noʼox nopole, pe li voʼone mu toj kʼunuk chkaʼi. Oy j-ilbajinvanejetik ta jujun jteklum ti chtal slabanunkutik ta skoj ti kʼoxunkutik toe. Oy jun velta kʼalal vaxakib toʼox jabil kichʼoj ti te vaʼalun ta jun eskina sventa chkakʼ li revista ¡Despertad! xchiʼuk Li Jkʼel osil ta toyole, te tal jayvoʼ keremetik ti la sjoyibtaikune. La slokʼbikun li kachʼ pixol jlapoje, vaʼun la sjokʼanik ta jun poste ti te nopol oy ta jxokone. Bal to ti oy jun ermano skʼelojun tale, jaʼ yuʼun laj yil li kʼusi la jnuptane, nopaj tal xchiʼuk xi la sjakʼbune: «Vern, ¿mi lek oyot?». Jatavik ta anil li keremetike. Akʼo mi toj chopol laj kaʼi, oy kʼusi la jchan yuʼun: kʼalal ta jcholtik mantal ta kayeetike mu stakʼ te vaʼal xi jkom kʼuchaʼal jun poste. Stekel li kʼusi laj kil ta jkuxlejal ta jbikʼtale jaʼ la stsatsubtas koʼonton sventa xchol kuʼun li mantal ta naetike.

Li ta mayo ta 1951 laj kichʼkutik voʼ xchiʼuk li kitsʼin Alvin kʼalal oxlajuneb toʼox jabil kichʼoje. Xvul to ta jol li Jack Nathan ti la sjelubtas li mantal sventa ichʼ voʼe, ti la stij koʼontonkutik ti akʼo mu xkiktakutik yalbel skʼoplal Jeova junuk ue. * Li ta kutsʼ kalalkutike toj tsots skʼoplal chilik li prekursorale, jaʼ li kʼusi mas lek xuʼ xichʼ pasel ta kuxlejal chilike. Li bat ta Winnipeg (Manitoba) sventa te chi tun ta prekursor kʼalal laj koʼonton ta chanun ta 1958. Akʼo mi xmuyubaj noʼox li jtot ti jmoj chi abtejkutik ta juxteʼe, tskʼan xchiʼuk jmeʼ ti akʼo jpasbe yabtel Dios ta tsʼakal orae, jaʼ yuʼun la skoltaikun kʼalal li bat ta yan lume.

Yan xa bu chi tun xchiʼuk la jta jun jchiʼil

Li Betele la skʼan j-abteletik ta 1959 sventa chbatik ta Quebec ti bu chtun tajek jcholmantaletike. Bat tunkun ta prekursoral ta Montreal. ¡Toj jelel! Xkoʼolaj kʼuchaʼal lik ta achʼ yaʼel  maʼ jkuxlejale, yuʼun lik jchan francés xchiʼuk la jnopes jba ti kʼuyelan xkuxlejalik tee. Li kʼusi toj ep la skoltaune jaʼ li lekil tojobtasel laj yakʼbun jkʼelvanej ta sirkuitoe: «Mu me xiuk xavale: “Li bu toʼox oyune mu jechuk ta jpaskutik”» (1 Cor. 9:22, 23).

Kalal li kʼot ta Quebec muʼyuk toʼox jchiʼil ta prekursoral. Pe li ta fevrero ta 1961 la jta jun chiʼil sventa sjunul jkuxlejal ti tukʼ yakʼoj sbae, yuʼun li nupun xchiʼuk Shirley Turcotte, jun tseb ti laj kojtikin ta Winnipeg. Li tseb taje skʼanoj tajek Jeova li yutsʼ yalal eke. Mu toʼox bu jnopoj mi ep tskoltaun xchiʼuk tspatbun koʼonton li Shirley ti kʼu sjalil chi tune.

Xcholel mantal ta Gaspé

Kʼalal chib xaʼox jabil nupunemunkutike li ochkutik ta prekursor espesial, vaʼun laj kichʼkutik takel batel ta Rimouski (Quebec). Kʼalal kʼot li primaverae, li Betele laj yalbunkutik ti akʼo jcholkutik mantal ta Gaspee, ti jaʼ te xkom ta slokʼeb Kʼakʼal yuʼun Canadae. Ti kʼusi laj kichʼkutik albele jaʼ ti jtsʼunbekutik sbekʼ li mantal ti bu kʼalal xuʼ kuʼunkutike (Ecl. 11:6). La jnojes li jkarokutike, mas ta jmil revistaetik, jutuk mu chanibuk sien livroetik, laj kichʼ batel jveʼelkutik xchiʼuk jkʼuʼ jpokʼkutik, vaʼun jun u la jcholkutik mantal. Xcholet la jcholkutik batel mantal li ta bikʼtal lumetik tee. Pe la slokʼesik ta radio ti chkʼotik li yajrextikotak Jeovae xchiʼuk laj yalik ti mu la me stsakik li vunetike. Pe jutuk mu skotoluk li krixchanoetike muʼyuk laj yaʼibeik smelolal li kʼusi laj yal li radioe, yalojik mi yakal tspukbeik skʼoplal li jvuntike, jaʼ yuʼun la xchʼamik.

Ti vaʼ kʼakʼale mu toʼox jaluk yichʼoj alel ti xuʼ xichʼ cholel mantal ta jlom lumetik ta Quebec, jaʼ yuʼun mu labaluk chkilkutik ti tspajesvanik li polisiae. Jaʼ jech kʼot ta pasel ta jun lum ti jutuk mu skotolikuk la xchʼamik li vunetike, jaʼ to ti tal jun polisia ti laj yikʼunkutik batel ta kaviltoe, vaʼun li batkutik. Yuʼun li abogado te ta lume laj yal mantal ti mu xa jcholkutik mantale. Ta skoj ti muʼyuk bu te oy li bankilal polisiae, laj kakʼbe yil jlik vun li abogado ti lek meltsanbil yuʼun li Betel ta Canadá te ta Torontoe, ti te chal ti xuʼ jcholkutik mantale. La skʼel, vaʼun xi laj yale: «Kʼelavil, voʼone mu jkʼan kʼop. Jaʼ laj yalbun pale ti akʼo jech jpase». Ta skoj ti ta jkʼankutik ti akʼo xakʼik venta ti ojtikinbil ta stojolal ajvalil li chol mantal ta jpaskutike, li sutkutik batel ti bu la spajesunkutik li polisiae, vaʼun la jcholkutik-o echʼel mantal.

Ta yokʼomale sut jchiʼinkutik ta loʼil li bankilal polisiae, ilin tajek ta skoj li kʼusi la spas li abogadoe, vaʼun la stak ta ikʼel ta telefono. Li bankilal polisiae laj yalbunkutik mi oy to kʼusi kʼot ta pasele, akʼo la jkʼoponkutik stuk ta anil, jaʼ la chchapan li kʼope. Akʼo mi maʼuk te jlumalkutik xchiʼuk ti mu jnaʼ xi kʼopojkutik ta francese, li krixchanoetik ta lum taje toj lek yoʼontonik xchiʼuk toj lek xchʼamvan ta snaik. Akʼo mi jech, xi la jakʼbe jbakutike: «¿Mi chchʼamik van bakʼin li mantale?». Jayib jabil ta mas tsʼakale laj kilkutik li kʼusi kʼot ta pasele, jaʼo kʼalal li batkutik ta svaʼanel Salonetik sventa Tsobobbail li ta lum taje. Te laj kilkutik ti ep xa pasemik ta yajrextiko Jeova li buchʼutik la jcholbekutik mantale. Ta melel, li Jeovae jaʼ «li bochʼo laj yacʼ chʼiuque» (1 Cor. 3:6, 7).

La jtakutik jun matanal

Li jtsebkutik Lisae vokʼ ta 1970. Batsʼi jaʼ jun matanal ti lik tal ta stojolal Jeovae, yuʼun li muyubajkutik tajek yuʼun. Li Shirley xchiʼuk Lisae jmoj li abtejkutik ta svaʼanel ep Salonetik sventa Tsobobbail. Kʼalal nel yuʼun chanun li Lisae xi laj yalbunkutike: «Ta skoj ti laj aviktabeik spasbel yabtel Dios ta tsʼakal ora ta jkoje, jnopoj chi och ta prekursora». Mas xa ta jtob jabil yakal ch-abtej ta prekursora li Lisae, avie jmoj xa ch-abtej xchiʼuk smalal ti Sylvain sbie. Jmoj staoj smotonik ti chkoltavanik ta svaʼanel salonetik o yan kʼusitik ta yantik lume. Li kʼusi oy ta yoʼonton kutsʼ kalale jaʼ ti lekuk noʼox sba li jkuxlejalkutik yoʼ xi tunkutik mas ta spasel li kʼusi tskʼan ta s-organisasion  Jeovae. Mu xchʼay ta jol li kʼusi laj yal Lisa kʼalal och ta prekursorae. Ta melel, jaʼ la stijbun koʼonton ti akʼo jpasbe yan velta li yabtel Dios ta tsʼakal ora li ta 2001, vaʼun jech chi tun-o li avie. Li abtelal ta prekursore jaʼ skoltaojun sventa jpat-o koʼonton ta stojolal Jeova ta sventa li kʼusitik ta jpase xchiʼuk ti lekuk noʼox sba li jkuxlejale, pe xi muyubaj noʼox ta melel.

Skʼan me oyuk kʼanelal xchiʼuk stukʼil oʼontonal ta svaʼanel li yichʼobil ta mukʼ Diose

Yakʼojbun kil Jeova ti kʼalal chi jtun mas ta spasel li kʼusi tskʼane xchiʼuk ti ta jpastik li kʼusi chi j-albate, ep me ta jtatik bendision. Jun matanal ti toj ep sbalil chkile jaʼ ti chi tun ta Komite sventa Svaʼanel Salonetik ta Jvokʼ Lume, ti parejo chi abtejkutik xchiʼuk ermanoetik xchiʼuk ermanaetik ta svaʼanel salonetik ta sjunul li slumal Quebec xchiʼuk ta yantik lume.

Yikʼaluk van oy junantik ti mu xtojobik lek ta sjelubtasel mantale, pe li ta svaʼanel salonetike toj lek xtojobik, xojobaj noʼox yutsilik kʼuchaʼal kʼanaletik. Li ermanoetik taje ta sjunul yoʼonton tspas li yabtelike, vaʼun jaʼ te chvinaj li kʼusi snaʼik spasele. Jech ta melel, tstunesatik yuʼun Jeova sventa tsvaʼanik li yichʼobil ta mukʼ Dios ti kʼupilik sbae.

Xi sjakʼojbikun jlome: «¿Kʼu yelan skʼan stalelalik li buchʼutik ch-abtej ta svaʼanel Salonetik sventa Tsobobbaile?». Ta sventa ti kʼusi kiloje xuʼ xkal ti jaʼ li kʼanelal ta stojolal Jeovae, ta stojolal xNichʼon xchiʼuk stekel li ermanoetike (1 Cor. 16:14). Tsots skʼoplal ti oyuk stukʼil koʼontontik xtoke. Kʼalal mu jechuk chichʼ pasel li abtelal kʼuchaʼal ta jkʼantike —ti ta onoʼox xkʼot ta pasele—, li yajtsʼaklom Cristo ti tukʼ yoʼontone ta me x-abtej-o batel li ta s-organisasion Jeovae xchiʼuk li tukʼil oʼontonale jaʼ me chtijbat yoʼonton sventa xtun ta yan abtelal.

Oy ta koʼonton stojel ta vokol

Cham ta 1985 li jtote, akʼo mi jech, te oy-o ta jol ti laj yalbun ti tsotsuk xi abtej li ta s-organisasion Jeovae. Ta melel, li stuke tsots-o ch-abtej ta s-organisasion Jeova ta vinajel kʼuchaʼal yantik yajtuneltak Jeova ti te staoj yabtelike (Apo. 14:13). Li jmeʼe 97 xa jabil yichʼoj, mu xa xkʼopoj lek ta skoj jun chamel ti apoplejía sbie. Pe lek xtojob stunesel li Vivliae. Li ta skartatake te chalbe skʼoplal tekstoetik xchiʼuk skotol ora chalbunkutik ti akʼo tukʼuk xi tunkutik ta stojolal Jeovae. ¡Ta jtojkutik tajek ta vokol xchiʼuk jchiʼiltak ta vokʼel ti kʼanvanem tajek li jtot jmeʼkutike!

Koliyal tajek chkalbe Jeova xtok ti laj yakʼbun li kajnil Shirley, ti tukʼ yakʼoj sbae. Oy-o ta sjol li kʼusi xi albat yuʼun smeʼe: «Li Verne ep me tajek kʼusitik tspas ta sventa mantal, jaʼ yuʼun skʼan me mu avuʼunuk atuk xavaʼi». Kʼalal li nupunkutike —ti oy xa ta 49 jabile—, laj kalkutik ti jmoj chi malubkutik ta spasbel yabtel li Jeovae, xchiʼuk jmoj chi kerem tsebajkutik batel mi kuxul li komkutik kʼalal chichʼ lajesel li kʼusitik liʼ ta balumile, vaʼun jaʼ jech chi tunkutik ta stojolal sbatel osil. Xuʼ xkal ta melel ti kʼotem ta pasel ta jkuxlejalkutik liʼe: «Scotoluc ora abtejanic o yuʼun li Cajvaltique» (1 Cor. 15:58). Li Jeovae skotol ora xchabiojunkutik xchiʼuk yakʼojbunkutik stekel li kʼusi chtun kuʼunkutike.

[Tsʼib ta yok vun]

[Lokʼol ta pajina 31]

«Li kʼusi oy ta yoʼonton kutsʼ kalale jaʼ ti lekuk noʼox sba li jkuxlejalkutik yoʼ xi tunkutik mas ta spasel li kʼusi tskʼan ta s-organisasion Jeovae»