Li kʼusitik tsjakʼ jkʼel vunetike

¿Kʼuxi xuʼ xkakʼ ta jkuxlejaltik li jmulavil krixchanoutik li smantal Jesús liʼe: «Skʼan me tukʼoxuk, jech kʼuchaʼal tukʼ li aTotik ta vinajele»? (Mat. 5:48, NM.)

Li kʼusi tskoltautik ta stakʼel taje jaʼ ti xkaʼibetik smelolal kʼuyelan tstunes Vivlia li jpʼel kʼop «tukʼ» xchiʼuk «tukʼilal» xie. Mu skotoluk li kʼusi chal Vivlia ti «tukʼ» xie, jaʼ skʼan xal ti tukʼ xa tajeke. Li buchʼu noʼox tukʼ tajeke jaʼ li Jeovae. Yan li krixchanoetik xchiʼuk li kʼusitike oy noʼox spajeb li stukʼilalike. Ta melel, li kʼopetik ta griego xchiʼuk ta hebreo ti chichʼ jelubtasel kʼuchaʼal «tukʼ» xie, jaʼtik onoʼox chalbe skʼoplal li kʼusi tsʼakale, ti yij xae o ti muʼyuk xchopolale, jech kʼuchaʼal yaloj jun j-abtele. Li krixchanoetik avie oy noʼox spajeb smelolal kʼalal tstunes ta skʼopojelik li jpʼel kʼop taje, jech kʼuchaʼal kʼalal chalik ti tukʼ xkuxlejal jun krixchanoe.

Ta slikebale, li Adán xchiʼuk Evae tukʼik toʼox ta stalelalik, ta mantal xchiʼuk ta sbekʼtal stakopalik, yuʼun spas toʼox yuʼunik skotol li kʼusi albatik yuʼun li Jpasvanej yuʼunike. Pe kʼalal muʼyuk la xchʼunik mantale mu xa spas yuʼunik jech kʼuchaʼal yaloj Diose, jech oxal muʼyuk xa tukʼik xchiʼuk mu xa xuʼ tukʼ x-ayan yalab xnichʼnabik. Jaʼ jech laj yakʼ jkuchintik mulil li Adane, ti muʼyuk xa tukʼutik xchiʼuk ti chi jchamutike (Rom. 5:12).

Pe kʼalal laj yal li Mantaletik ta Vits li Jesuse, jamal laj yakʼ ta ilel ti xuʼ tukʼutik li jmulavil krixchanoutike, jaʼ noʼox ti oy spajebe. Li ta mantal taje, laj yal kʼusi smakoj li tukʼil kʼanele o ti tsʼakale, ti jaʼ jech chakʼbe yil krixchanoetik li Diose. Xi laj yale: «Cʼuxubino avajcontraic; cʼopanbeic Dios ta stojol li bochʼotic chayutsʼintaoxuque. Yuʼun jech ta xvinaj o ti voʼoxuc xnichʼnaboxuc li Jtotic Dios ta vinajele. Yuʼun li Diose coʼol ta xacʼ qʼuepuc ta stojol li bochʼotic chopolique xchiʼuc li bochʼotic lequique. Coʼol chacʼbe voʼ li bochʼotic tucʼ yoʼntonique xchiʼuc li bochʼotic muc tucʼuc yoʼntonique» (Mat. 5:44, 45). Kʼalal chakʼik ta ilel ti jech chkʼanvanik li yajtsʼaklomtak Jesuse, jaʼ jech chchanbeik stukʼil talelal li Diose.

Li avie, li yajrextikoutik Jeova ta spʼejel Balumile chkakʼbetik yipal ti jechuk jkʼanojtik li jchiʼiltaktike. Jech kʼuchaʼal liʼe, chkakʼbetik yipal ta skoltael skotol krixchanoetik sventa chojtikinik lek li kʼusi melele, mu ventauk kʼusi stsʼunbalik, srelijionik o bu likemik. Ta melel, mas ta vukub miyon chanubtaseletik ta Vivlia chkakʼtik ta 236 mukʼta lumetik xchiʼuk bikʼtal lumetik.

Xi laj yal li Jesuse: «Me jaʼ noʼox chacʼuxubinic ec li bochʼo chaxcʼuxubinoxuque, ¿me chata amotonic ti jech chapasique? Yuʼun jaʼ jech tspasic ec li jtsobpatanetique. Me jaʼ noʼox chacʼopanic li bochʼotic xavotquin aba achiʼuquique, ¿cʼusi lec chapasic li voʼoxuque? Yuʼun jaʼ jech tspasic ec li yanlum cristianoetique» (Mat. 5:46, 47). Li melel yajtsʼaklomtak Cristoe maʼuk tstsakik mas ta venta li buchʼutik lek chanemike o ti yan-o stsʼunbalike. Jech xtok maʼuk noʼox tskʼanik li buchʼutik chkʼanatik eke. Moʼoj, jaʼ tskoltaik li buchʼutik abol sbaike, li buchʼutik ipike, li ololetike xchiʼuk li buchʼutik malubemik xae. Jaʼ jech chchanbeik ti kʼuyelan chkʼanvan Jeovae xchiʼuk chakʼik ta ilel ti oy stukʼilik manchuk mi oy noʼox spajebe.

¿Mi ta van jtatik yan velta li tukʼilal ti chʼay yuʼun Adane? Tana. Skotol li jchʼunej mantal krixchanoetik ti chakʼ xchʼunel yoʼontonik ta stojolal li matanal pojelal laj yakʼ Jesuse, ta staik tukʼilal li ta Jmil Jabile, jaʼo kʼalal «ta slilinbe yabtel [Diablo]» li xNichʼon Diose (1 Juan 3:8, Ch).