Te xa xchiʼuk li yabtele

THEODORE JARACZ ti jaʼ toʼox jun li ta Jtsop Jbeiltasvanej yuʼun li yajRextikotak Jeovae, tsuts yabtel ta Balumil ta mierkoles ta sob ta 9 yuʼun junio ta 2010 kʼalal yichʼoj xaʼox 84 jabile. Kuxul to kom li yajnil ti Melita sbie, ti 53 xaʼox jabil yikʼoj sbaike, jun xvix xchiʼuk oxvoʼ sjunichʼnab.

Li ermano Jaracz ivokʼ ta 28 yuʼun septiembre ta 1925 ta Pike County (Kentucky, Estados Unidos). Ta 10 yuʼun agosto ta 1941, kʼalal voʼlajuneb xaʼox sjabilale, laj yichʼ voʼ. Kʼalal vuklajuneb xaʼox sjabilale och ta prekursor regular, ti jaʼ jech lik abtejuk ta tsʼakal ora ti jutuk mu 67 jabil jalije.

Ta 1964, kʼalal kʼajomal toʼox jtob sjabilale, bat li ta chanun numero 7 ta Chanob vun sventa Vivlia ta Galaad yuʼun Watchtower. Kʼalal tsuts yuʼune, laj yichʼ takel batel kʼuchaʼal jkʼelvanej ta sirkuito ta yosilal Cleveland (Ohio, Estados Unidos). Ta 1951 laj yichʼ takel batel ta Australia ti bu la sbain skʼelel Betele. Ta Anuario de los testigos de Jehová para 1983 laj yal ti «ep la stijbe yoʼonton li ermanoetik ta sjunul lum, ta skoj ti oy tajek ta yoʼonton spasel li kʼusi xchapanoj Diose xchiʼuk ti lek beiltasvan ta chol mantale».

Kʼalal sut ta Estados Unidose, nupun xchiʼuk Melita Lasko ta 10 yuʼun disiembre ta 1956. Kʼalal nupune lik abtejuk ta jkʼelvanej ta sirkuito xchiʼuk ta distrito, ti baxbol abtej ta skʼelel ti bu takat batel ta Estados Unidose. Ta slajebal 1974 laj yichʼ takel ta ikʼel sventa chtun li ta Jtsop Jbeiltasvaneje.

Li ermano Jaracz jal-o me ta jvules ta joltik ti jaʼ jun tukʼil yajtunel Jeova ti laj yakʼ xkuxlejal ta sventa li abtelal ta mantale. Jaʼ toʼox jun malalil ti tukʼ yoʼonton xchiʼuk ti la skʼan yajnile. Jaʼ jun vinik ti lek ta mantal ti jaʼ baʼyel laj yakʼ ta xkuxlejal li kʼusi tskʼan yantike (1 Cor. 13:4, 5). Vinaj ti oy ta yoʼonton yantike, yuʼun la skʼel ti koʼoluk xichʼik kʼuxubinele. Ti muʼyuk laj yikta skʼanel li yantike jaʼ tijbat-o yoʼonton ta xcholel mantal ta sjunul yoʼonton.

Akʼo mi toj kʼux chkaʼitik ti muʼyuk xa liʼ oy li jun j-abtel ti lek baxbole xchiʼuk ti kʼanbil tajek yuʼun li utsʼ-alalil ta Betel xchiʼuk li ermanoetik ta spʼejel Balumile, xi jmuyubaj tajek kʼalal ta jvules ta joltik ti ta sjaylajunebal jabil abtej ti tukʼ laj yakʼ sba ta stojolal Jeovae. Jchʼunojtik ta melel ti tukʼ-o yoʼonton ichame xchiʼuk ti yichʼoj xa «[skorona] sventa cuxlejal[e]» (Apo. 2:10). Xchiʼuk lek jnaʼojtik ti «te xa xchiʼu[k] li yabtel[e]» (Apo. 14:13).